|
ໃນລາຍການມື້ນີ້, ຂ້າພະເຈົ້າຈະສະເໜີເພງຕ່າງປະເທດທີ່ຂັບຮ້ອງໂດຍນາງຈູ່ມິງອິງ ນັກຮ້ອງທີ່ມີຊື່ສຽງຂອງຈີນສູ່ທ່ານຟັງ.
ກ່ອນອື່ນ, ເຊີນຟັງເພງອີຢາຢາໂອເລໂອ ນີ້ແມ່ນເພງທີ່ມີທຳນອງມ່ວນແລະໄວ, ໄດ້ສະແດງຄວາມສັນລະເສີນແລະຮັກຫອມປະເທດຊາດຂອງປະຊາຊົນຊາເອຍ.
ທີ່ຟັງມານັ້ນແມ່ນເພງອີຢາຢາໂອເລໂອ ຂັບຮ້ອງໂດຍນາງຈູ່ມິງອິງ.
ນາງຈູ່ມິງອິງແມ່ນນັກຮ້ອງທີ່ມີຊື່ສຽງຂອງຈີນ, ນາງຮ້ອງເພງເກັ່ງທັງຟ້ອນກໍງາມ, ສາມາດ ຮ້ອງເພງຂອງຫຼາຍປະເທດທີ່ມີເອກະລັກຕ່າງກັນເປັນຫລາຍພາສາ. ໃນເວລາຂັບຮ້ອງ, ນາງຍັງເອົາການຂັບຮ້ອງກັບການຟ້ອນເຊື່ອມໂຍງເຂົ້າກັນ, ສຽງເພງຂອງນາງກໍເຕັມໄປດ້ວຍຈິດອາລົມ, ປະກອບເປັນວາດຮ້ອງແລະລີລາອັນແຈ່ມໃສ່ໃໝ່ອ່ຽມ.
ທີ່ທ່ານພວມຟັງຢູ່ນີ້ແມ່ນເພງກ່ອມນອນ ຂັບຮ້ອງໂດຍນາງຈູ່ມິງອິງ. ເຊິ່ງແມ່ນເພງເສບໃນຮູບເງົາເລື່ອງນາສອງໄຮ່ຂອງອິນເດຍ. ເພງນີ້ແມ່ນຂັບຮ້ອງເປັນພາສາອິນເດຍ, ມີເນື້ອໃນວ່າ: ຄວາມຝັນເອີຍ, ເຈົ້າມາແລ້ວ, ເຈົ້າມາຈາກໝູ່ດາວທີ່ເຫຼື້ອມຍິບຍັບ, ເຂົ້າມາໃນຕາຂອງລູກຂ້ອຍ. ຄວາມຝັນເອີຍ, ເຈົ້າມາແລ້ວ, ດອກໄມ້ແລະສາຍລົມພາກັນນອນຫຼັບຢູ່ກ້ອງຮົ່ມໄມ້.
ທີ່ຟັງມານັ້ນແມ່ນເພງກ່ອມນອນ.
ນາງຈູ່ມິງອິງຈົນຮອດອາຍຸ 30 ປີຈຶ່ງເລີ່ມຮຽນຮ້ອງເພງ, ຖ້າທຽບກັບນັກຮ້ອງຈີນຜູ່ອື່ນໆແລ້ວ, ນາງແມ່ນຕັ້ງຕົວໃນວຽກງານຮ້ອງເພງຫຼ້າໝູ່ຫຼາຍ, ແຕ່ວ່ານາງໄດ້ອີງໃສ່ຈິດໃຈຍຶດໝັ້ນສິລະປະຮ້ອງເພງແລະຄວາມດຸໝັ່ນຂະຫຍັນພຽນ, ເດີນໄປຕາມທາງສິປະລະທີ່ສະແດງຄວາມສາມາດຂອງຕົນ ເອງຢ່າງຮອບດ້ານ. ນາງນຳໃຊ້ເງື່ອນໄຂທີ່ຕົນເອງເຄີຍເປັນນັກຟ້ອນ, ໄດ້ຮຽນເອົາຮູບການສິລະປະທີ່ທັງຮ້ອງເພງແລະທັງຟ້ອນໄປນຳຂອງອາຊີ ອາຟິຼກາ ແລະອາເມລິກາລາຕີນ, ອັນໄດ້ເຮັດໃຫ້ລີລາການຂັບຮ້ອງຂອງນາງມີຫລາຍຮູບຫລາຍແບບ, ທັງມີທຳນອງຕ່າງປະເທດອັນເຂັ້ມຂຸ້ນ, ຈົນເຮັດໃຫ້ນາງບໍ່ພຽງແຕ່ໄດ້ຮັບຄວາມນິຍົມຊົມຊອບຈາກຜູ່ຊົນຈີນທໍ່ນັ້ນ, ຫາກຍັງໄດ້ຮັບຄວາມຊົມເຊີຍຈາກຜູ່ຊົມຕ່າງປະເທດອີກດ້ວຍ.
ໃນເພງຕ່າງປະເທດຫລາຍນັ້ນ, ເພງທີ່ນາງຈູ່ມິງອິງມັກຮ້ອງຫລາຍກວ່າໝູ່ແມ່ນເພງອິນເດຍ. ນາງຮ້ອງເພງອິນເດຍຄືຫລາຍ, ປ່ຽມລົ້ນໄປດ້ວຍຈິດອາລົມ, ທັງມີສະເໜສິລະປະອັນໂດດເດັ່ນ. ທີ່ທ່ານພວມຟັງຢູ່ນີ້ແມ່ນເພງຄຳທວາຍ ເພງອິນເດຍທີ່ຂັບຮ້ອງໂດຍນາງຈູ່ມິງອິງ. ເພງນີ້ກໍແມ່ນເພງສະຫລັບໃນຮູບເງົາອິນເດຍ, ທຳນອງມ່ວນ ໄວ , ມີເອກະລັກຊົນເຜົ່າຢ່າງເຂັ້ມຂຸ້ນ.
1 2
|
