|
|
 |
| (GMT+08:00)
2004-09-28 11:41:31
|
 |
|
ໃຫ້ທຸງຊາດເດີນເຮືອທາງໄກພ້ອມກັນກັບກຳ່ປັ່ນ
cri
Author: cbf
ວັນທີ 1 ຕຸລາປີນີ້,ແມ່ນວັນສະຖາປະນາສາທາລະນະລັດປະຊາຊົນຈີນຄົບຮອບ 55 ປີ.ໃນການເຕີບໃຫຍ່ຂອງປະເທດຈີນໃໝ່ເປັນເວລາເຄິ່ງສະຕະວັດກວ່າ,ມີເລື່ອງທີ່ນັບບໍ່ຖ້ວນກ່ຽວກັບການບາກບັ່ນສູ້ຊົນ.ທ່ານເວີ້ຍເຈ່ຍຟູ ປະທານກຸ່ມບໍລິສັດໃຫຍ່ຂົນສ່ົງມະຫາສະໝຸດທາງໄກຂອງຈີນ(ຄືບໍລິສັດຈົ່ງຢວນ)ມີອາຍຸສຳ່ກັນກັບສາທາລະນະລັດປະຊາຊົນຈີນ,ອາດເວົ້າໄດ້ວ່າ,ປະສົບການໃນການເຕີບໃຫຍ່ຂອງທ່ານເປັນຮູບຫຍໍ້ຂອງການພັດທະນາພາລະກິດຂົນສົ່ງທາງທະເລຂອງຈີນ,ທ່ານກໍໄດ້ເຫັນກັບຕາຕໍ່ຂະບວນວິວັດທີ່ຈີນພັດທະນາຈາກການປິດປະຕູແລະຫຼ້າຫຼັງໄປສູ່ຄວາມຈະເລີນຮຸ່ງເຮືອງ.
ໃນລະດູໜາວປີ 1949,ທ່ານເວີ້ຍເຈ່ຍຟູເກີດຢູ່ໃນຄອບຄົວຊາວກະສິກອນສາມັນໃນແຂວງຈ່ຽງຊູ່ ພາກຕາເວັນອອກຂອງຈີນ.ພາຍຫຼັງຮຽນຈົບມັດທະຍົມຕົ້ນແລ້ວ,ຍ້ອນໃນຄາວນັ້ນ,ຄອບຄົວຂອງທ່ານອ່າວທຸກຍາກ,ທ່ານຈຶ່ງໄດ້ເຂົ້າໂຮງຮຽນວິຊາເຕັກນິກຊັ້ນກາງຫຼັງໜຶ່ງຮຽນເຕັກນິກໂທລະຄົມວິທະຍຸ.
ໃນຄາວນັ້ນ,ເຖິງວ່າປະເທດຈີນໃໝ່ສະຖາປະນາຂຶ້ນພຽງແຕ່ 10 ກວ່າປີເທົ່ານັ້ນ,ການສ້າງສາເສດຖະກິດຍັງຢູ່ໃນໄລຍະຕົ້ນ,ແຕ່ລັດຖະບານຕົກລົງຢ່າງເດັດຂາດຈະພັດທະນາພາລະກິດເດີນເຮືອທາງໄກຊຶ່ງເປັນຕົວແທນໃຫ້ແກ່ກຳລັງຕົວຈິງເຕັກນິກເສດຖະກິດແຫ່ງຊາດ.ປີ 1961,ບໍລິສັດໃຫຍ່ຂົນສົ່ງມະຫາສະໝຸດທາງໄກຂອງຈີນຊຶ່ງເປັນວິສາຫະກິດຂົນສ່ົງທາງທະເລສາກົນຫຼັງທຳອິດຂອງປະເທດຈີນໃໝ່ໄດ້ປະກາດສ້າງຕັ້ງຂຶ້ນ.ຫຼັງຈາກນັ້ນ 3 ປີ,ທ່ານເວີ້ຍເຈ່ຍຟູໄດ້ຮຽນຈົບຈາກໂຮງຮຽນ,ແລ້ວໄປເຮັດວຽກຢູ່ບໍລິສັດນີ້,ແຕ່ນັ້ນມາ,ທ່ານບໍ່ໄດ້ອອກຈາກບໍລິສັດດັ່ງກ່າວຈັກເທື່ອ.
ໃນຊຸມປີ 80 ສະຕະວັດແລ້ວນີ້,ທ່ານເວີ້ຍເຈ່ຍຟູເລີ່ມເຂົ້າສູ່ຂັ້ນນຳຂອງບໍລິສັດ.ປີ 1998,ຜູ້ຊາຍຜູ້ນີ້ທີ່ໄດ້ບາກບັ່ນສູ້ຊົນຢູ່ເທິງທະເລເປັນເວລາຫຼາຍປີ,ໄດ້ຮັບຕຳແໜ່ງເປັນປະທານກຸ່ມບໍລິສັດຈົ່ງຢວນ.ເມື່ອກ່າວເຖິງປະສົບການແລະຄວາມສຳນຶກຮູ້ໃນການເຕີບໃຫຍ່ຂອງຕົນ,ທ່ານເວີ້ຍເຈ່ຍຟູເວົ້າວ່າ,ທ່ານໄດ້ເຫັນກັບຕາກ່ຽວກັບການພັດທະນາຂອງກຸ່ມບໍລິສັດນີ້,ຍັງໄດ້ເຫັນກັບຕາກ່ຽວກັບການພັດທະນາຢ່າງບໍ່ຢຸດຢັ້ງຂອງປະເທດຈີນໃໝ່ໃນ 55 ປີທີ່ຜ່ານມາ:
"ຂ້າພະເຈົ້າມາຢູ່ບໍລິສັດຈົ່ງຢວນໄດ້ 37 ປີແລ້ວ.ຈາກກະລາສີສາມັນກາຍເປັນຜູ້ນຳຊັ້ນສູງສຸດ,ຂ້າພະເຈົ້າໄດ້ເຫັນກັບຕາວ່າ,ປະຫວັດການພັດທະນາຂອງບໍລິສັດມີການພົວພັນຢ່າງແໜ້ນແຟ້ນກັບປະຫວັດພັດທະນາທີ່ຄຽງຄູ່ກັບການປະຕິຮູບແລະໄຂປະຕູສູ່ພາຍນອກຂອງຈີນ.ທັງນີ້ເຮັດໃຫ້ຂ້າພະເຈົ້າໄດ້ເຫັນຄວາມສາມາດດ້ານການປົກຄອງຂອງພັກກອມມູນິດຈີນ,ແລະໄດ້ເຫັນຄວາມຫວັງຂອງຈີນ."
ບໍລິສັດຈົ່ງຢວນແມ່ນວິສາຫະກິດຂົນສົ່ງທາງທະເລສາກົນຫຼັງທຳອິດຂອງປະເທດຈີນໃໝ່,ໃນເວລາຫາກໍ່ສ້າງຕັ້ງຂຶ້ນ,ບໍລິສັດຈົ່ງຢວນມີກຳ່ປັ່ນພຽງ 4 ລຳເທົ່ານັ້ນ.ແຕ່ດຽວນີ້,ບໍລິສັດຈົ່ງຢວນມີກຳ່ປັ່ນທັນສະໄໝ 600 ກວ່າລຳແລ້ວ,ຍອດຈຳນວນຊັບສິນບັນລຸ 18 ຕື້ກວ່າໂດລາສະຫະລັດ.ກຳ່ປັ່ນແລະຕູ້ບັນທຸກສິນຄ້າຂອງບໍລິສັດຈົ່ງຢວນໄປມາລະຫວ່າງທ່າກຳ່ປັ່ນ 1300 ກວ່າແຫ່ງຂອງ 160 ກວ່າປະເທດແລະເຂດແຄວ້ນໃນໂລກ.
ປະຈຸບັນ,ວຽກງານຂອງບໍລິສັດຈົ່ງຢວນບໍ່ສະເພາະແຕ່ຂົນສ່ົງເດີນທະເລທາງໄກ,ຍັງໄດ້ຂະຫຍາຍໄປຮອດຂົງເຂດທີ່ກ່ຽວຂ້ອງຄືການຄ້າ ອຸດສາຫະກຳແລະການເງິນເປັນຕົ້ນ,ບຸກຄົນໃນວົງການນີ້ເອີ້ນບໍລິສັດຈົ່ງຢວນເປັນກຳ່ປັ່ນບັນທຸກເຮືອບິນຂອງວົງການຂົນສ່ົງທາງທະເລຂອງຈີນ,ການເຄື່ອນໄຫວທຸກຢ່າງຂອງບໍລິສັດນີ້ຖືກວົງການຂົນສ່ົງທາງທະເລສາກົນຖືເປັນທິດໄຫວຕົວຂອງວົງການນີ້.
ໃນຂະນະທີ່ທ່ານເວີ້ຍເຈ່ຍຟູຮູ້ສຶກພາກພູມໃຈຕໍ່ຜົນສຳເລັດທີ່ບໍລິສັດຈົ່ງຢວນໄດ້ຮັບ,ທ່ານກໍມີຄວາມຮູ້ສຶກຢ່າງເລິກຊຶ່ງຕໍ່ເສັ້ນທາງຄົດລ້ຽວທີ່ບໍລິສັດຈົ່ງຢວນໄດ້ປະສົບ.ປີ 1978,ຈີນເລີ່ມປະຕິບັດນະໂຍບາຍປະຕິຮູບແລະໄຂປະຕູສູ່ພາຍນອກ,ແລະໄດ້ສ້າງອົງປະກອບເສດຖະກິດຕະຫຼາດສັງຄົມນິຍົມໃນເບື້ອງຕົ້ນ.ຄຽງຄູ່ກັບການປະຕິຮູບລົງສູ່ລວງເລິກຢ່າງບໍ່ຢຸດຢັ້ງ,ບໍລິສັດຈົ່ງຢວນໄດ້ເຂົ້າຮ່ວມການແກ່ງແຍ່ງລະຫວ່າງຊາດຢ່າງຕັ້ງໜ້າ,ແລະໄດ້ສ້າງລະບອບວິສາຫະກິດທັນສະໄໝຂຶ້ນເປັນເທື່ອລະກ້າວ.
"ພວກເຮົາໝູນເດີນເປັນແບບສະບັບຕາມຮູບການໝູນເດີນຂອງວິສາຫະກິດສາກົນ,ໄດ້ຮັບຄວາມໄວ້ເນື້ອເຊື່ອໃຈຈາກລູກຄ້າ,ທັງໄດ້ຮັບເອົານັກລົງທຶນ.ນັກຂ່າວຂອງສື່ມວນຊົນອາເມລິກາຖາມຂ້າພະເຈົ້າວ່າ,ທ່ານຖືກແຕ່ງຕັ້ງຈາກໃຜ?ຂ້າພະເຈົ້າຕອບວ່າ,ຄືກັນກັບອາເມລິກາຫັ້ນແລ້ວ,ຜູ້ຖືຫຸ້ນເປັນຜູ້ເລືອກເອົານັກທຸລະກິດ."
ໃນຫຼາຍປີມານີ້,ປະເທດຝ່າຍຕາເວັນຕົກບໍ່ເຂົ້າໃຈແລະມີຄວາມເຫັນລຳອຽງຕໍ່ຈີນ,ເຮັດໃຫ້ບໍລິສັດຈົ່ງຢວນປະສົບຄວາມຫຍຸ້ງຍາກນານາປະການໃນການຫັນເປັນສາກົນ.ທະແນມແຕ່ມີຄວາມອາດເປັນໄປໄດ້,ທ່ານເວີ້ຍເຈ່ຍຟູກໍຈະກຳໂອກາດ,ແນະນຳບໍລິສັດຂອງຕົນ,ຫວັງໃຫ້ມີຊາວຕ່າງປະເທດຫຼາຍກວ່າເກົ່າຜ່ານຈາກບໍລິສັດຈົ່ງຢວນເຂົ້າໃຈຈີນຢ່າງຮອບດ້ານແລະພາວະວິໄສກວ່າເກົ່າ.ປີ 2001,ທ່ານເວີ້ຍເຈ່ຍຟູໄດ້ກ່າວປາຖະກະຖາຢູ່ມະຫາວິທະຍາໄລຮາເວິດຕາມຄຳເຊີນ.ທ່ານໄດ້ແນະນຳຜົນສຳເລັດໃນການປະຕິຮູບຂອງລັດວິສາຫະກິດຈີນເຊິ່ງເອົາບໍລິສັດຈົ່ງຢວນເປັນຕົວແທນນັ້ນດ້ວຍພາສາອັງກິດທີ່ຫຼ່ຽນໄຫຼດີ,ທ່ານບອກໃຫ້ຄົນທັງຫຼາຍຊາບວ່າ,ເລື່ອງທີ່ວິສາຫະກິດຕ່າງປະເທດເຮັດໄດ້ນັ້ນ,ລັດວິສາຫະກິດຂອງຈີນກໍເຮັດໄດ້ຄືກັນ.
ບໍລິສັດຈົ່ງຢວນທີ່ໄດ້ກ້າວເຂົ້າສູ່ຕະຫຼາດສາກົນນັ້ນ,ໄດ້ໝູນເດີນຕາມສະພາບທ້ອງຖິ່ນດ້ວຍຈີນຕະນາການໂລກາວິວັດ.ທ່ານເວີ້ຍເຈ່ຍຟູເວົ້າວ່າ,ກໍແມ່ນວິທີທີ່ເຮັດໃຫ້ການທຸລະກິດຂອງຕົນເຊື່ອມຍົງເຂົ້າກັບວັດທະນະທຳທ້ອງຖິ່ນ,ເຮັດໃຫ້ບໍລິສັດຈົ່ງຢວນໄດ້ຮັບຄວາມເຂົ້າໃຈແລະຄວາມຮັບຮູ້ຈາກບຸກຄົນຝ່າຍທາງການແລະການຄ້າຂອງໂລກ.
"ເຖິງວ່າບໍລິສັດພວກເຮົາແມ່ນລັດວິສາຫະກິດກໍຕາມ,ແຕ່ພັດແມ່ນໝູນເດີນຕາມການຫັນເປັນຕະຫຼາດແລະກະຕິກາສາກົນ.ບໍລິສັດພວກເຮົາຍິນດີໄປລົງທຶນຢູ່ຕ່າງປະເທດ,ຍິນດີຮ່ວມມືກັບໝູ່ຄູ່ຮ່ວມມືຂອງທ້ອງຖິ່ນໂດຍຕ່າງຝ່າຍຕ່າງມີຜົນປະໂຫຍດ.ພວກຂ້າພະເຈົ້າເປັນເຈົ້າການໄປຢ້ຽມຢາມວົງການຝ່າຍທາງການແລະວົງການການຄ້າຂອງອາເມລິກາ,ຈັດງານຊຸມນຸມນັກຂ່າວ,ບັນລະຍາຍບໍລິສັດຈົ່ງຢວນພວກເຮົາ,ແລະການປະຕິຮູບໄຂປະຕູສູ່ພາຍນອກຂອງຈີນ."
ປະຈຸບັນ,ຊາວໂລກນັບມື້ນັບຫຼາຍໄດ້ຮັບຮູ້ບໍລິສັດດັ່ງກ່າວ,ໄດ້ເຂົ້າໃຈປະເທດຈີນຢ່າງແທ້ຈິງ.ປີ 2003,ທ່ານເວີ່ນເຈ່ຍປາວ ນາຍົກລັດຖະມົນຕີຈີນໄດ້ໄປຢ້ຽມຢາມອາເມລິກາ,ແລະເຊັນ《ອະນຸສັນຍາການຂົນສ່ົງທາງທະເລລະຫວ່າງຈີນອາເມລິກາ》ກັບຝ່າຍອາເມລິກາ,ອັນໄດ້ເຮັດໃຫ້ບໍລິສັດຈົ່ງຢວນໄດ້ຮັບຄຸນວຸດທິເປັນຜູ້ຮັບເໝົາການຂົນສ່ົງທົ່ວໂລກທີ່ໝູນເດີນຕາມກະຕິກາຕະຫຼາດ.
ປະຈຸບັນ,ເມື່ອມອງເບິ່ງທະເລບ່ອນໃດໃນໂລກ,ຄົນທັງຫຼາຍກໍຈະໄດ້ເຫັນກຳ່ປ່ັນຂອງບໍລິສັດຈົ່ງຢວນທີ່ມີທຸງແດງຫ້າດາວປິວສະບັດ.ຊາວຈີນແລະຊາວຕ່າງປະເທດນັບມື້ນັບຫຼາຍໄດ້ຮູ້ຈັກທ່ານເວີ້ຍເຈ່ຍຟູ ນັກທຸລະກິດຈີນ.
ທ່ານເວີ້ຍເຈ່ຍຟູຮັບຮູ້ຕະຫຼອດມາວ່າ,ສະເພາະແຕ່ກຳລັງຂອງທ່ານຜູ້ດຽວແມ່ນບໍ່ພຽງພໍ,ຢູ່ເບື້ອງຫຼັງຂອງຜົນສຳເລັດຂອງບໍລິສັດຈົ່ງຢວນຍັງມີປະເທດຈີນທີ່ນັບມື້ນັບເຂັ້ມແຂງເປັນຜູ້ໜູນຫຼັງ.
|
|
|
