ຕາມຂ່າວCRI,ວັນທີ1ຕຸລາແມ່ນວັນສ້າງຕັ້ງສາທາລະນະລັດປະຊາຊົນຈີນຄົບຮອບ55ປີ,ວັນທີ30ກັນຍາ,ລັດຖະບານຈີນໄດ້ຈັດງານລ້ຽງຮັບຮອງຢ່າງໃຫຍ່ໂຕມະໂຫລານຢູ່ປັກກິ່ງ,ສະຫຼອງວັນສ້າງຕ້ັງປະເທດຄົບຮອບ55ປີ.ໃນງານລ້ຽງຮັບຮອງ,ທ່ານເວິ່ນເຈ່ຍປາວ ນາຍົກລັດຖະມົນຕີຈີນກ່າວວ່າ,ຈີນຈະຍຶດໝັ້ນເດີນຕາມເສັ້ນທາງພັດທະນາໂດຍສັນຕິ.
ຜູ່ນຳຈີນເຊັ່ນທ່ານຫູຈິນທ່າວ,ທ່ານອູປ່າງໂກວ,ທ່ານເຈຍຊິງລິນເປັນຕົ້ນແລະຜູ່ແທນບຸກຄົນວົງການຕ່າງໆພາຍໃນປະເທດແລະຕ່າງປະເທດ4ພັນກວ່າຄົນໄດ້ເຂົ້າຮ່ວມງານລ້ຽງຮັບຮອງ.
ໃນເວລາກ່າວຄຳປາໄສ,ທ່ານເວິ່ນເຈ່ຍປາວກ່າວວ່າ,ຈີນຈະຍຶດໝັ້ນການປະຕິຮູບແລະໄຂປະຕູສູ່ພາຍນອກ,ເພີ່ມທະວີການສ້າງສາລະບອບກົດໝາຍປະຊາທິປະໄຕແລະການກໍ່ສ້າງວັດທະນະທຳ,ລົງເລິກດຳເນີນການຕໍ່ສູ້ຕ້ານການເສຍທາດຂາດຄຸນຢ່າງຍາວນານ,ປັບປຸງແລະພັດທະນາມະຫາສາມັກຄີລະຫວ່າງບັນດາຊົນເຜົ່າ.ທ່ານກ່າວເນັ້ນວ່າ,ຈີນຈະຊູທຸງສັນຕິພາບ,ການພັດທະນາ,ແລະການຮ່ວມມືໃຫ້ສູງຄືແຕ່ເກົ່າເມືອຫຼັງ,ປະຕິບັດນະໂຍບາຍການຕ່າງປະເທດສັນຕິພາບທີ່ຕັ້ງຕົວເປັນເອກະລາດເປັນເຈົ້າຕົນເອງ,ຕັ້ງໜ້າຂະຫຍາຍມິດຕະພາບແລະການຮ່ວມມືກັບບັນດາປະເທດໃນໂລກ.
ທ່ານຍັງກ່າວວ່າ,ລັດຖະບານຈີນຈະສືບຕໍ່ປະຕິບັດທິດທາງປະເທດດຽວສອງລະບອບ,ຊາວຮົງກົງປົກຄອງຮົງກົງ,ຊາວມາກາວປົກຄອງມາກາວ,ແລະປົກຄອງຕົນເອງໃນລະດັບສູງ,ຮັກສາສະຖຽນລະພາບແລະຄວາມຈະເລີນຮຸ່ງເຮືອງຍາວນານຂອງຮົງກົງແລະມາກາວ.ເດັດດ່ຽວຄັດຄ້ານແລະສະກັດກັ້ນອິດທິກຳລັງແບ່ງແຍກທີ່ໃຫ້ໄຕ້ຫວັນເປັນເອກະລາດ,ເດັດດ່ຽວປົກປັກຮັກສາອະທິປະໄຕແລະຜືນແຜ່ນດິນອັນຄົບຖ້ວນຂອງຊາດຢ່າງໝັ້ນໜຽວບໍ່ປ່ຽນແປງ.
|