|
ວັນທີ 10 ຕຸລາ ງານດົນຕີຢັງມີແຊນຢາຣ໌ໄດ້ຈັດຂຶ້ນຢູ່ສະໜາມຫຼວງປະຕູອູເມີນຂອງພະລາຊະວັງຕ້ອງຫ້າມປັກກິ່ງ,ຈາກນີ້,ປີວັດທະນະທຳຝຣັ່ງທີ່ຈັດຂຶ້ນຢູ່ຈີນນັ້ນໄດ້ເປີດສາກຢ່າງເປັນທາງການແລ້ວ.
ທີ່ທ່ານພວມຟັງຢູ່ນີ້ແມ່ນສຽງກັບບ່ອນຂອງງານດົນຕີຢັ່ງມີແຊນຢາຣ໌. ໃນງານດັ່ງກ່າວ,ທ່ານຢັງມີແຊນຢາຣ໌ ນັກດົນຕີເອເລັກໂຕຼນິກໄດ້ອາໃສພາຫະນະໄຮເຕັກດ້ວຍຄວາມໂລມັງຕິກແລະຄວາມຈູບຈ້າວຫ້າວຫັນທີ່ມີເອກະລັກພິເສດຂອງຝຣັ່ງ,ເສບມະໂຫລີຫຼາຍຊະນິດ,ເຮັດໃຫ້ແບບແຜນດົນຕີຫຼາຍຢ່າງປະສານ ສົມທົບກັນຢ່າງກົມກຽວ,ເຮັດໃຫ້ຜູ່ຊົມຈີນໄດ້ສຳຜັດສະເໜຂອງດົນຕີເອເລັກໂຕຼນິກທັນສະໄໝ.
ເວທີຂອງງານດົນຕີໄດ້ປະດັບແບບງ່າຍໆ,ຖົງອາຍສີຂາວຮູບເສົາກົມ,ຮູບບານແລະຮູບສາມຫຼ່ຽມເປັນຕົ້ນທີ່ໃຫຍ່ພິລຶກໄດ້ຕັ້ງຢູ່ເວທີ,ພາຍໃຕ້ແສງເລເຊີ,ໄດ້ປ່ຽນເປັນຮູບພາບອັນສວຍງາມຢ່າງຕໍ່ເນ່ືອງຕາມຫົວຂໍ້ຂອງດົນຕີ,ທັງນີ້ໄດ້ມີລັກສະນະຜິດໂຕນກັນອັນມະຫາສານກັບປະຕູອູເມີນຂອງວັງບູຮານທີ່ເກົ່າແກ່,ເຄັ່ງຂຶມແລະມີກຳລັງກະໜ່ຳຈຢ່າງຮຸນແຮງຕໍ່ຈັກຂຸວິນຍານແລະໂສຕະວິນຍານ ຂອງຜູ່ຊົມ.
ທ່ານຢາຣ໌ແມ່ນຜູ່ນຳໜ້າຂອງດົນຕີເອເລັກໂຕຼນິກຂອງໂລກ,ມີຊື່ລືນາມຍ້ອນຊ່າງນຳໃຊ້ເຕັກນິກກ້າວໜ້າແລະສ້າງບັນຍາກາດ. ປີ 1981 ທ່ານໄດ້ຈັດງານດົນຕີຢູ່ປັກກິ່ງແລະຊຽງໄຮ້,ກາຍເປັນນັກດົນຕີຜູ່ທຳອິດທີ່ນຳເອົາງານດົນຕີເອເລັກໂຕຼນິກ ຮູບການດົນຕີໃໝ່ອ່ຽມດັ່ງກ່າວມາສູ່ຈີນ. 20 ກວ່າປີຜ່ານໄປແລ້ວ,ຊາວຝຣັ່ງທີ່ເຄີຍມີຜົນສະທ້ອນຕໍ່ການກຳເນີດຂອງດົນຕີເອເລັກໂຕຼນິກຂອງຈີນໄດ້ມາສູ່ຈີນອີກໃນນາມເປັນທູດວັດທະນະທຳຝຣັ່ງຈີນ.ຕໍ່ເລື່ອງນີ້ ທ່ານຢາຣ໌ຮູ້ສຶກດີໃຈທີ່ສຸດ,ທ່ານເວົ້າວ່າ:ຄວາມປາຖະໜາຂອງໝົດທຸກຄົນພວກເຮົາກໍແມ່ນຜ່ານຈາກງານດົນຕີນີ້ ສະແດງມິດຕະພາບອັນເປັນມູນເຊື້ອລະຫວ່າງຈີນກັບຝຣັ່ງຕໍ່ທົ່ວປະເທດຈີນແລະທົ່ວໂລກ.ອີກດ້ານໜຶ່ງ,ແມ່ນເພ່ືອສະແດງຄວາມຈູບຈ້າວຫ້າວຫັນແລະຈິດໃຈປະດິດສ້າງຂອງຝຣັ່ງພ້ອມດ້ວຍຄວາມຮັກແພງທີ່ຝຣັ່ງມີພິເສດຕໍ່ທົ່ວໂລກແລະຈີນ.
ຍ້ອນວ່າສາມາດຈັດງານດົນຕີຢູ່ວັງຕ້ອງຫ້າມຂອງປັກກິ່ງ,ທ່ານຢາຣ໌ຮູ້ສຶກກະຕຸ້ນໃຈຫຼາຍ,ທ່ານເຫັນວ່າ,ນີ້ແມ່ນການເຊື່ອມຕໍ່ເຂົ້າກັນລະຫວ່າງປະຫວັດສາດກັບປັດຈຸບັນແລະລະຫວ່າງຝ່າຍຕາເວັນອອກກັບຝ່າຍຕາເວັນຕົກ. ຕາມທ່ານຢາຣ໌ແນະນຳວ່າ,ໃນງານດົນຕີເທ່ືອນີ້ເພ່ືອເຮັດໃຫ້ວັດທະນະທຳຂອງຝ່າຍຕາເວັນອອກແລະຝ່າຍຕາເວັນຕົກ,ຂອງຈີນແລະຂອງຝຣັ່ງເຊ່ືອມໂຍງເຂົ້າກັນເປັນຢ່າງດີ,ການສະແດງເທື່ອນີ້,ທ່ານບໍ່ພຽງແຕ່ໄດ້ນຳພານັກສິລະປິນຝຣັ່ງ 100 ກວ່າທ່ານທໍ່ນັ້ນ ຍັງໄດ້ເຊື້ອເຊີນນັກສິລະປິນຈີນ 200 ກວ່າທ່ານມາສະແດງນຳກັນ.
ປີວັດທະນະທຳຈີນຝຣັ່ງແມ່ນການເຄື່ອນໄຫວທີ່ຜູ່ນຳສອງປະເທດຈີນຝຣັ່ງພ້ອມກັນຫາລືຕົກລົງກັນໃນປີ 1999 ແລະປີ 2000. ແມ່ນເລ່ືອງໃຫຍ່ໂຕມະໂຫລານດ້ານວັດທະນະທຳທີ່ບໍ່ເຄີຍມີມາກ່ອນໃນປະຫວັດການພົວພັນຈີນຝຣັ່ງ. ແຕ່ເດືອນຕຸລາປີກາຍນີ້ຮອດເດືອນກໍລະກົດປີນີ້,ຈີນໄດ້ຈັດປີວັດທະນະທຳຢູ່ຝຣັ່ງແລ້ວ,ຜ່ານຈາກ 400 ກວ່າໂຄງການ,ໄດ້ສະແດງໃຫ້ສາທາລະນຊົນຝຣັ່ງເຫັນວັດທະນະທຳຈີນທີ່ມີເນື້ອໃນເລິກເຊິ່ງ,ມີຫຼາຍສີຫຼາຍສັນແລະເຕັມໄປດ້ວຍພະລັງຊີວິດ.
ທ່ານນາງເມີ້ງສຽວຊື ຮອງລັດຖະມົນຕີກະຊວງວັດທະນະທຳຈີນ ຮອງປະ ທານບໍລິຫານງານຂອງຄະນະກຳມະການຈັດຕັ້ງຝ່າຍຈີນຂອງປີວັດທະນະທຳຈີນຝຣັ່ງໄດ້ຕີລາຄາສູງຕໍ່ປີວັດທະນະທຳຈີນຝຣັ່ງ.ທ່ານນາງເວົ້າວ່າ:ການແລກປ່ຽນວັດທະນະທຳແມ່ນການແລກປ່ຽນດ້ານຈິດໃຈ,ແມ່ນການຕິດຕໍ່ພົວພັນດ້ານຈິດອາລົມ,ມັນສາມາດໃຫ້ຄົນທັງຫຼາຍທີ່ຢູ່ປະເທດຕ່າງກັນ,ມີຜິວພັນຕ່າງກັນແລະມີເບື້ອງຫຼັງວັດທະນະທຳຕ່າງກັນນັ້ນເຂົ້າໃຈເຊິ່ງກັນແລະກັນ,ນິຍົມຊົມຊອບເຊິ່ງກັນແລະກັນ,ປີວັດທະນະທຳຈີນຝຣັ່ງໄດ້ເປັນສັກຂີພິຍານໃຫ້ແກ່ຄວາມປາຖະຫນາອັນແຮງກ້າແລະດີງາມຂອງປະຊາຊົນສອງຊາດຈີນຝຣັ່ງໃນການເພີ່ມທະວີການແລກປ່ຽນແລະການຮ່ວມມືກັນດ້ານວັດທະນະທຳແລະຊຸກຍູ້ວັດທະນະທຳໂລກພັດທະນາຢ່າງປອງດອງກັນ.
ໃນນາມເປັນພາກສ່ວນທີສອງຂອງປີວັດທະນະທຳຈີນຝຣັ່ງ,ການເຄື່ອນໄຫວປີວັດທະນະທຳຝຣັ່ງຈະຈັດຂຶ້ນຢູ່ຈີນແຕ່ເດືອນຕຸລາຮອດເດືອນກໍລະກົດປີໜ້າ. ໃນການເຄື່ອນໄຫວເປັນເວລາໜຶ່ງປີ,ປີວັດທະນະທຳຝຣັ່ງຈະສະແດງໃຫ້ສາທາລະນະຊົນຈີນເຫັນໂສມໜ້າໃໝ່ຂອງຝຣັ່ງທີ່ສົດໆແລະສາມມິຕິຈາກດ້ານຕ່າງໆເຊັ່ນວັນນະຄະດີ,ດົນຕີ,ການຟ້ອນ,ລະຄອນ,ຮູບເງົາໂທລະພາບ,ການສຶກສາ,ສະຖາປັດຕະຍະກຳແລະສິລະປະດ້ານຊີວິດປັນຕົ້ນ,ແລະຈະຈັດຂຶ້ນຢູ່ 7 ຕົວເມືອງແລະເຂດພິເສດຮົງກົງຂອງຈີນຕາມໆກັນ.
ທ່ານລົມບາຣ໌ ຜູ່ປະສານງານໃຫຍ່ຂອງປີວັດທະນະຈີນຝຣັ່ງແນະນຳວ່າ,ສອງຫົວຂໍ້ໃຫຍ່ຂອງປີວັດທະນະທຳຝຣັ່ງແມ່ນ:ຝຣັ່ງທີ່ຖືຄົນເປັນຫຼັກແລະປ່ຽນແປງໃໝ່ແລະຝຣັ່ງທີ່ໂລມັງຕິກແລະປະດິດສ້າງ,ພວກເຂົາເຈົ້າຫວັງໃຫ້ຖຶການເຄື່ອນໄຫວເທື່ອນີ້ໄປພົບພໍ້ສາທາລະນະຊົນອັນໄພສານຂອງຈີນ,ສະເຫນີຝຣັ່ງທີ່ໃໝ່ໝົດແລະເຕັມໄປດ້ວຍຫົວຄິດປະດິດສ້າງນັ້ນໃຫ້ປະຊາຊົນຈີນໄດ້ເຫັນກັບທ່ີ.
|
