|
ຄົນໄວກາງຄວນຮູ້ຈັກສະພາບຮ່າງກາຍຂອງຕົນເອງຢ່າງຈະແຈ້ງ, ຍາມປົກກະຕິ ຕ້ອງກວດສຸຂະພາບເປັນປະຈຳ, ຕໍ່ພະຍາດທີ່ມັກເປັນແລະພະຍາດຊຳເຮື້ອ, ຕ້ອງຮູ້ໄວ, ປິ່ນປົວຢ່າງທັນການ, ພ້ອມທັງຕ້ອງຮູ້ຈັກຮັກສາຕົນເອງ, ຢ່າຂີ້ຄ້ານ, ເຮັດຫຍັງຢ່າເມື່ອຍຫລາຍ, ກິນຂອງຢ່າກິນຫລາຍເກີນຄວນ, ຢ່າໃຈຮ້ອນ ເພື່ອຮັບປະກັນສຸຂະພາບຂອງຕົນ. ຄົນໄວກາງເປັນພະຍາດມີຈຸດພິເສດສາມຢ່າງຄື: ເປັນກະທັນຫັນ, ພະຍາດບາງຢ່າງບ່ົມຊ້ອນຢູ່, ແລະພະຍາດບາງຢ່າງເປັນຂຶ້ນຍ້ອນສາເຫດໃດໜຶ່ງ.
ພະຍາດທີ່ເປັນຂຶ້ນກະທັນຫັນ: ແມ່ນຍ້ອນວ່າຄົນໄວກາງຂຸ້ນນຳແຕ່ວຽກ, ບາງທີອາດຈະບໍ່ເອົາຫົວຊານຳສຸຂະພາບຂອງຕົນ, ຈົນກະທັ້ງບໍ່ມີເວລາໄປຊານຳ, ແລ້ວເຮັດໃຫ້ພະຍາດທີ່ມັກເປັນບາງຢ່າງບ່ໍໄດ້ຖືກກວດເຫັນຢ່າງທັນການແລະບ່ົງມະຕິໃນໄລຍະຕົ້ນ, ຈຶ່ງເຮັດໃຫ້ພະຍາດຄືໂຣກຫົວໃຈ, ໂຣກເບົາຫວານ, ເລືອດດັນສູງ, ພະຍາດກະເພາະລຳໄສ, ແລະຊີ້ນປ່ົງເປັນຕົ້ນນັບມື້ນັບຮ້າຍແຮງຂຶ້ນຫລືປ່ຽນແປງຢ່າງກະທັນຫັນ.
ສະນັ້ນ, ການກວດສຸຂະພາບເປັນປະຈຳແມ່ນສຳຄັນທີ່ສຸດ. ຄົນໄວກາງຄວນອິງຕາມສະພາບຮ່າງກາຍຕົວຈິງຂອງຕົນ, ກວດຮ່າງກາຍປີລະເທື່ອຫລືເຄິ່ງປີກວດເທື່ອໜຶ່ງ. ຖ້າມີປະຫວັດພະຍາດຊຳເຮື້ອຍ້ອນກຳມະພັນຈາກຄອບຄົວຄືເສັ້ນເລືອດຫົວໃຈແລະສະໝອງ, ແລະຊີ້ນປົ່ງເປັນຕົ້ນ, ນອກຈາກກວດສຸຂະພາບຕາມປົກກະຕິແລ້ວ, ຍັງຕ້ອງກວດສະເພາະພະຍາດທີ່ກ່ຽວຂ້ອງ. ນອກນີ້, ຄົນໄວກາງທີ່ເປັນພະຍາດຊຳເຮື້ອແລ້ວນັ້ນ, ຄວນຈັດວາງຕາລາງເວລາເຮັດວຽກແລະການກິນການຢູ່ທີ່ເໝາະສົມ, ບໍ່ຄວນເຮັດວຽກຈົນເຫຼືອບ່າກວ່າແຮງເປັນເວລາຍາວນານ.
ພະຍາດບາງຢ່າງອາດຈະບ່ົມຊ້ອນຢູ່ໃນຮ່າງກາຍຍາວນານ ທັງນີ້ແມ່ນຍ້ອນວ່າ: ຄົນໄວກາງສ່ວນຫລາຍຕ້ອງຫາບແບກໜ້າທີ່ໜັກໜາທາງດ້ານວຽກງານແລະຄອບຄົວ, ຈຶ່ງບໍ່ສູ້ເອົາໃຈໃສ່ນຳຄວາມເຈັບປວດຫລືຄວາມບໍ່ສະບາຍເລັກໆນ້ອຍໆຂອງຕົນ. ທີ່ຈິງແລ້ວ, ສັບພະຄຸນສະລີລະຂອງຄົນໄວກາງພວມຢູ່ໄລຍະຈາກແຂງແຮງຫັນເປັນອ່ອນແອ, ຄວາມສາມາດເກີດໃໝ່ແລະພູມຕ້ານທານຂອງຈຸລັງຊີວິດແລະສັບພະຄຸນນຳຊຶມອອກພາຍໃນຮ່າງກາຍເປັນຕົ້ນພວມເສື່ອມລົງ, ສັບພະຄຸນຂອງໝາກຫົວໃຈ, ປອດ, ສະໝອງ, ແລະໝາກໄຂ່ຫຼັງກໍພວມເສື່ອມລົງເທື່ອລະກ້າວຢ່າງບໍ່ຮູ້ສຶກຕົວ. ຄົນໄວກາງພວມຢູ່ໃນໄລຍະທີ່ມັກເປັນພະຍາດຊະນິດຕ່າງໆ, ແຕ່ຜູ້ກ່ຽວພັດມັກປະໝາດຫລືເຜີຕົວຍ້ອນວຽກຫລາຍ, ສະນັ້ນຈຶ່ງບໍ່ໄດ້ສັງເກດເຫັນແລະປິ່ນປົວໃນໄລຍະທີ່ຫາກໍ່ເປັນ.
ດ້ວຍເຫດນີ້, ຜູ້ຢູ່ໃນໄວກາງຄົນຄວນຮັບປະກັນໃຫ້ຕົນເອງມີເວລານອນ 6 ຊ່ົວໂມງຂຶ້ນໄປໃນແຕ່ລະມື້. ຕອນເຊົ້າ, ພາຍຫລັງຕື່ນນອນແລ້ວ, ຕ້ອງຫາເວລາໄປຫັດກາຍ, ເຮັດແນວນີ້, ຈຶ່ງສາມາດຮັກສາໃຫ້ຕົນເອງມີກຳລັງວັງຊາເຕັມປ່ຽມ, ເພື່ອເຮັດວຽກຢ່າງເຄ່ັງຕຶງໃນມື້ໜຶ່ງ. ຕໍ່ຄວາມເຈັບປວດຕາມຮ່າງກາຍທີ່ບໍ່ຮູ້ມູນເຫດ, ຢ່າຖືເບົາເດັດຂາດ, ຄວນໄປກວດຢູ່ໂຮງໝໍຢ່າງທັນການ, ຖ້າເທື່ອດຽວກວດບໍ່ຮູ້ວ່າເປັນພະຍາດຫຍັງ, ກໍຄວນລະວັງທີ່ສຸດ, ຖ້າບໍ່ສະບາຍກໍໄປກວດຢູ່ທຸກເວລາ.
ມີພະຍາດບາງຢ່າງອາດຈະເກີດຂຶ້ນຍ້ອນມູນເຫດໃດໜຶ່ງ: ຄົນໄວກາງຍ້ອນມີຖານະພິເສດໃນສັງຄົມແລະຄອບຄົວ, ຈຶ່ງຈຳເປັນຕ້ອງຫາບແບບໜ້າທີ່ອັນໜັກໜາ. ຄວາມເຄ່ັງຕຶງແລະອິດເມື່ອຍທີ່ທ້ອນໂຮມກັນເຂົ້າຍ້ອນຂຸ້ນວຽກ, ຮ້ອນຮົນ, ອຸກອ່ັງ, ຫ່ວງໃຍ, ມັກກາຍເປັນປັດໄຈທີ່ພາໃຫ້ເກີດພະຍາດ. ຄົນໄວກາງມັກຖືວ່າ, ຕົນເອງມີກຳລັງວັງຊາແລະຄວາມແຂງແຮງພຽງພໍ ທີ່ຈະທົນຕໍ່ຄວາມເຄ່ັງຕຶງແລະອິດເມື່ອຍໄດ້. ແຕ່ນີ້ແມ່ນບໍ່ອາດລົບລ້າງພະຍາດໄດ້, ກົງກັນຂ້າມ, ຫາກຍັງຈະພາໃຫ້ເກີດພະຍາດນາໆຊະນິດຍ້ອນອິດເມື່ອຍເກີນໄປ.
ເພື່ອບໍ່ໃຫ້ພະຍາດບາງຢ່າງເກີດຂຶ້ນໄດ້, ຄົນໄວກາງຍັງຄວນປັບຈິດໃຈຂອງຕົນໃຫ້ເໝາະສົມ. ພາຍຫລັງຂຸ້ນເຮັດວຽກມາໄລຍະໜຶ່ງແລ້ວ, ດີທີ່ສຸດໃຫ້ພັກຜ່ອນຢ່ອນອາລົມດ້ວຍຮູບການຕ່າງໆຄືໄປທ່ອງທ່ຽວ, ຄຸຍກັນແລະຫຼີ້ນລື້ນເລີງນຳໝູ່, ວິທີເຫຼ່ົານີ້ລ້ວນແຕ່ສາມາດຜ່ອນຄາຍສະພາວະຈິດໃຈອັນເຄ່ັງຕຶງໄດ້, ພ້ອມທັງໃຫ້ມີຄວາມຊີນເຄີຍດ້ານການກິນດື່ມຢ່າງວິທະຍາສາດ, ອາຫານທີ່ໄວກາງຄົນກິນນັ້ນຄວນຈືດຈາງ, ບໍ່ຄວນກິນຫລາຍເກີນໄປ.
|
