|
ແຕ່ວັນທີ31ຕຸລາຮອດວັນທີ3ພະຈິກ,ກອງປະຊຸມສະຫຼຸບງານກິລາໂອລິມປິກອາແຕນປີ2004ເຊິ່ງແມ່ນຄະນະກຳມະການໂອລິມປິກສາກົນເປັນຜູ້ຈັດນັ້ນໄດ້ຈັດຂຶ້ນຢູ່ປັກກິ່ງ.ໃນກອງປະຊຸມ,ຄະນະກຳມະການຈັດງານກິລາໂອລິມປິກປັກກິ່ງໄດ້ຮັບຟັງບົດຮຽນສຳເລັດຜົນຂອງງານກິລິໂອລິມປິກອາແຕນຢ່າງເອົາຈິງເອົາຈັງ,ແລະຕັ້ງໜ້າແລກປ່ຽນກັບຜູ້ຊ່ຽວຊານຂອງຄະນະກຳມະການໂອລິມປິກສາກົນ,ຜູ້ປະຕິບັດງານຂອງຄະນະກຳມະການຈັດງານກິລາໂອລິມປິກອາແຕນແລະຄະນະກຳມະການຈັດງານກິລາໂອລິມປິກດູລິນປີ2006,ສະສົມບົດຮຽນເພື່ອຈັດງານກິລາໂອລິມປິກປັກກິ່ງໃຫ້ດີ.
ທ່ານລີວສີ ປະທານຄະນະກຳມະການຈັດງານກິລາໂອລິມປິກປັກກິ່ງເຫັນວ່າ,ຕາມວຽກງານຄືບໜ້າໃນປະຈຸບັນ,ປັກກິ່ງສາມາດສຳເລັດວຽກງານກະກຽມທັງໝົດເຊິ່ງລວມທັງການກໍ່ສ້າງຫໍກິລາແລະສະໜາມກິລາ,ການກໍ່ສ້າງພື້ນຖານໂຄງລ່າງໃນຕົວເມືອງເປັນຕົ້ນຕາມເວລາກຳນົດ.ສ່ວນບົດຮຽນອັນປະເສີດຂອງງານກິລາໂອລິມປິກທຸກຄັ້ງທີ່ຜ່ານມາສອນໃຫ້ເມືອງເຈົ້າພາບຈັດງານກິລາໂອລິມປິກຕໍ່ພາຍໜ້ານັ້ນຈະເຮັດໃຫ້ປັກກິ່ງແລະເມືອງຈັດງານກິລາໂອລິມປິກອື່ນໆສາມາດຫຼົບຫຼີກຄວາມພາດພັງອັນບໍ່ຈຳເປັນ.ທ່ານລີວສີກ່າວວ່າ:
"ປັກກິ່ງຈະຮຳ່ຮຽນແລະຖອດຖອນເອົາບົດຮຽນອັນປະເສີດທີ່ເມືອງເຈົ້າພາບຈັດງານກິລາໂອລິມປິກທຸກຄັ້ງທີ່ຜ່ານມາສະສົມໄວ້ນັ້ນດ້ວຍທ່າທີຍິ່ງເປີດກວ້າງກວ່າເກົ່າ,ແລະຈະໝູນໃຊ້ບົດຮຽນເຫຼົ່ານີ້ຢ່າງມີລັກສະນະປະດິດສ້າງໂດຍປະສານສົມທົບກັບສະພາບແຫ່ງຊາດຈີນ,ປະກອບສ່ວນໃໝ່ຍິ່ງຫຼາຍກວ່າເກົ່າເຂົ້າໃນກິລາໂອລິມປິກ."
ເພື່ອກະກຽມງານກິລາໂອລິມປິກປີ2008ໃຫ້ດີ,ເລີ່ມແຕ່ປີ2003ເປັນຕົ້ນມາ,ຄະນະກຳມະການຈັດງານກິລາໂອລິມປິກປັກກິ່ງໄດ້ແຕ່ງຜູ້ປະຕິບັດງານ400ກວ່າຄົນໄປເຂົ້າຮ່ວມວຽກງານຈັດຕັ້ງງານກິລາໂອລິມປິກອາແຕນຕາມໆກັນ.ໃນກອງປະຊຸມສະຫຼຸບງານກິລາໂອລິມປິກອາແຕນຄັ້ງນີ້,ຜູ້ປະຕິບັດງານຂອງຄະນະກຳມະການຈັດງານກິລາໂອລິມປິກປັກກິ່ງ,ໄດ້ປະສານກັນກັບຄວາມຮູ້ສຶກຂອງໃຜລາວ,ແລະພ້ອມກັນກັບຜູ້ປະຕິບັດງານຂອງຄະນະກຳມະການຈັດງານກິລາໂອລິມປິກອາແຕນແລະດູລິນ ດຳເນີນການປຶກສາຫາລືຢ່າງເລິກເຊິ່ງແລະຮອບດ້ານໂດຍໝູນອ້ອມຫົວຂໍ້ຕ່າງໆເຊັ່ນກາໝາຍແລະອະນາຄົດຂອງງານກິລາໂອລິມປິກ,ການນຳໃຊ້ຊັບພະຍາກອນແກນກາງຂອງງານກິລາໂອລິມປິກ,ແຜນການແລະຄວາມຄືບໜ້າຂອງການກໍ່ສ້າງຫໍກິລາແລະສະໜາມກິລາ,ການແຂ່ງຂັນກິລາ,ການໝູນເດີນໃນໄລຍະການແຂ່ງຂັນຂອງງານກິລາໂອລິມປິກ,ງານກິລາໂອລິມປິກຄົນພິການເປັນຕົ້ນ.
ກ່ຽວກັບທ່າທີອັນຕັ້ງໜ້າຂອງຝ່າຍປັກກິ່ງທີ່ຕັ້ງໃຈຮຳ່ຮຽນແລະຖອດຖອນບົດຮຽນຂອງທຸກຝ່າຍ,ທ່ານໂລເກີປະທານຄະນະກຳມະການໂອລິມປິກສາກົນທີ່ຮ່ວມປະຊຸມໄດ້ຕີລາຄາສູງ.ທ່ານກ່າວວ່າ:"ຝ່າຍປັກກິ່ງໄດ້ຕັ້ງໃຈຄົ້ນຄວ້າບົດຮຽນຂອງງານກິລາໂອລິມປິກທີ່ຜ່ານມາແລະໄດ້ນຳໃຊ້ເຂົ້າໃນວຽກງານຈັດຕັ້ງໃນອະນາຄົດ,ເຮັດແນວນີ້ສາມາດປະຢັດເວລາແລະກຳລັງວັງຊາຢ່າງຫຼວງຫຼາຍ,ພາຍໃຕ້ການຊີ້ນຳຂອງບົດຮຽນອັນສຳເລັດຜົນຂອງງານກິລາໂອລິມປິກທຸກຄັ້ງທີ່ຜ່ານມາ,ໄດ້ຍົກສະມັດຖະພາບຂອງງານໃຫ້ສູງຂຶ້ນແລະຫຼີກທາງຄົດລ້ຽວ."
ທ່ານເວນບູຼແກນ ປະທານຄະນະກຳມະການປະສານງານກິລາໂອລິມ ປິກປັກກິ່ງຂອງຄະນະກຳມະການໂອລິມປິກສາກົນ ທີ່ເຄີຍມາສຳຫຼວດວຽກງານກະກຽມຢູ່ປັກກິ່ງຕັ້ງຫຼາຍເທື່ອເຫັນວ່າ,ປະຈຸບັນ,ຝ່າຍປັກກິ່ງໄດ້ສ້າງຈິດໃຈໝູ່ຄະນະຮ່ວມມືອັນແຂງແຮງ,ໄດ້ທຳຄວາມເຂົ້າໃຈແລະປະສານງານເປັນຢ່າງດີກັບທາງລັດຖະບານແລະຄະນະກຳມະການໂອລິມປິກສາກົນ.ພ້ອມກັນນັ້ນ,ປັກກິ່ງໄດ້ປະສານສົບທົບກັບສະພາບຕົວຈິງຂອງຕົນແລະຖອດຖອນບົດຮຽນຂອງງານກິລາໂອລິມປິກທຸກຄັ້ງທີ່ຜ່ານມາ,ວາງທັດສະນະຄະຕິທີ່"ຈັດງານກິລາໂອລິມປິກຢ່າງປະຢັດ",ຜ່ານຈາກແຜນການຕ່າງໆເຊັ່ນຫຼຸດຄ່າໃຊ້ຈ່າຍໃນການກໍ່ສ້າງຫໍກິລາແລະສະໜາມກິລາແລະປ່ຽນທີ່ຕັ້ງຫໍກິລາແລະສະໜາມກິລາເປັນຕົ້ນ,ເຮັດໃຫ້ຫໍກິລາແລະສະໜາມກິລາໄດ້ຮັບການນຳໃຊ້ເປັນຢ່າງດີກວ່າເກົ່າພາຍຫຼັງງານກິລາໂອລິມປິກ.ນີ້ໄດ້ສອດຄ່ອງກັບຄວາມຄິດຂອງຄະນະກຳມະການໂອລິມປິກສາກົນທີ່ໃຫ້ຄວບຄຸມຂະໜາດຂອງງານກິລາໂອລິມປິກເປັນຕ້ົນ.ນີ້ສະແດງໃຫ້ເຫັນວ່າ,ເພື່ອຈັດງານກິລາໂອລິມປິກໃຫ້ດີ,ຄະນະກຳມະການຈັດງານກິລາໂອລິມປິກປັກກິ່ງໄດ້ຮຳ່ຮຽນແລະກຶກກອງຄວາມສຳເລັດແລະຄວາມເສຍໄຊແລະຜົນໄດ້ຜົນເສຍຂອງງານກິລາໂອລິມປິກປັກກິ່ງໃນທຸກຄັ້ງທີ່ຜ່ານມາໂດຍຕະຫຼອດ.
ພາຍຫຼັງງານກິລາໂອລິມປິກອາແຕນສິ້ນສຸດລົງແລ້ວ,ປະຈຸບັນ,ການກະກຽມງານກິລາໂອລິມປິກໄດ້ເຂົ້າສູ່ໄລຍະ"ປັກກິ່ງ"ແລ້ວ,ທ່ານເວນບູຼແກນຊີ້ອອກວ່າ:
" ວຽກງານກະກຽມງານກິລາໂອລິມປິກຂອງປັກກິ່ງໄດ້ຈາກໄລຍະວາງແຜນອັນຍອດຢ້ຽມຫັນໄປສູ່ໄລຍະປະຕິບັດ,ພວກຂ້າພະເຈົ້າໄດ້ເຫັນວ່າຜູ້ຈັດຕັ້ງຂອງງານກິລາໂອລິມປິກປັກກິ່ງພວມດຳເນີນວຽກງານຢ່າງບັງເກີດຜົນແລະໄດ້ມີການຄືບໜ້າຢ່າງສະດວກທີ່ສຸດໂດຍຢູ່ໃຕ້ການສະໜັບສະໜູນຢ່າງແຂງແຮງຂອງລັດຖະບານຈີນແລະອົງການປົກຄອງນະຄອນປັກກິ່ງ.ປະຈຸບັນ,ໝົດທຸກຄົນລ້ວນແຕ່ໄດ້ເລັງສາຍຕາໄປສູ່ປັກກິ່ງ,ໄປສູ່ປັກກິ່ງປີ2008."
|
