|
ຢູ່ຈີນໃນຊູ່ມື້ນີ້,ໂທລະສັບມືຖືເກືອບກາຍເປັນສ່ິງຈຳເປັນໃນຊີວິດປະຈຳວັນຂອງຄົນທັງຫລາຍ.ປະຈຸບັນ,ຈີນມີແຜ່ນຊິບໂທລະສັບມືຖືທ່ີມີສິດຊັບສິນທາງປັນຍາເປັນເຈົ້າຕົນເອງແລ້ວ.ຕັ້ງແຕ່ໂທລະສັບມືຖືເຂົ້າສູ່ຕະຫລາດຈີນຮອດຄົນຈີນຄົ້ນຄ້ວາຜະລິດແຜ່ນຊິບເຊ່ິງເປັນຊີກສ່ວນແກນກາງຂອງໂທລະສັບມືຖືຂອງຕົນໄດ້ໃຊ້ເວລາພຽງ 10 ປີເທ່ົານັ້ນ.ຜູ້ນຳທາງການຄົ້ນຄ້ວາຜະລິດແຜ່ນຊິບຂອງໂທລະສັບມືຖືແມ່ນທ່ານດຣ.ວາງຈື້ກົ່ງຜູ້ຊ່ຽວຊານມິໂກຼເອເລັກໂຕຼນິກແລະເອເລັກໂຕຼນິກແສງຂອງຈີນ.ໃນລາຍການວິທະຍາສາດມື້ນີ້,ພວກເຮົາຈະລົມເລ່ືອງຜູ່ທ່ີຄົ້ນຄ້ວາແຜ່ນຊິບຂອງຈີນຜູ້ນີ້ສູ່ທ່ານຟັງ.
ທ່ານດຣ.ວາງຈື້ກ່ົງປີນີ້ອາຍຸ 50 ປີ,ມີຮ່າງຄີງປານກາງ,ໂສມໜ້າທຳມະດາ,ມີແຕ່ໜ້າຜາກທ່ີອ່າວໃຫຍແລະກວ້າງແດ່ເຮັດໃຫ້ຄົນມີພາບພົດອັນເລິກເຊິ່ງ.ຜູ້ທ່ີຄຸ້ນເຄີຍກັບທ່ານລ້ວນແຕ່ເວົ້າວ່າຢູ່ໃນໜ້າຜາກນີ້ໄດ້ສະສົມສະຕິປັນຍາຈຳນວນຫລວງຫລາຍ.
ທ່ານວາງຈື້ກ່ົງໄດ້ຮຽນຢູ່ມະຫາວິທະຍາໄລຕົງນານນະຄອນນານກ່ິງແຂວງຈ່ຽງຊູຂອງຈີນ.ປີ 1984,ທ່ານຖືກເລືອກສ່ົງໄປຮຽນຕໍ່ຢູ່ມະຫາວິທະຍາໄລລູແຮໂບຈຸມຂອງເຢຍລະມັນ,ເປັນລູກສິດຂອງທ່ານສາສະດາຈານໂລເບີດໂບສ ຜູ້ຊ່ຽວຊານດ້ານມິໂກຼເອເລັກໂຕຼນິກທ່ີມີຊື່ສຽງໃນໂລກ ບິດາມິໂກຼເອເລັກໂຕຼນິກຂອງເຢຍລະມັນ.
ເມ່ືອທ້າຍຊຸມປີ 90 ສະຕະວັດແລ້ວນີ້,ທ່ານວາງຈື້ກົ່ງທ່ີ່ໄດ້ຮັບບັດຂຽວຂອງເຢຍລະມັນໄດ້ປະລະໂອກາດເຮັດວຽກແລະດຳລົງຊີວິດຢູ່ເຢຍລະມັນ,ພ້ອມທັງໄດ້ປະຕິເສດການເຊື້ອເຊີນດ້ວຍເງິນເດືອນສູງຂອງຫລາຍບໍລິສັດໃຫຍ່ຂອງອາເມລິກາ,ກັບຄືນມາເຮັດວຽກຢູ່ຈີນ.ທ່ານເວົ້າວ່າ,ການກັບຄືນມາສອນໜັງສື ບຳລຸງສ້າງຜູ້ມີຄວາມຮູ້ຄວາມສາມາດຢູ່ປະເທດຊາດຂອງຕົນນັ້ນແມ່ນເລ່ືອງທ່ີທ່ານຢາກເຮັດທ່ີສຸດ:
"ຖ້າວ່າຂ້າພະເຈົ້າກັບຄືນເມືອປະເທດຊາດ,ສາມາດບຳລຸງສ້າງນັກສຶກສາບົນດິນແດນປະເທດຕົນ,ຜົນສຳເລັດຂອງພວກເຂົາເຈົ້າກໍ່ສາມາດບັນລຸລະດັບສູງຄືແນວນີ້,ແລະບໍ່ແມ່ນຜູ້ດຽວ,ຫາກແມ່ນຫລາຍສິບ ຫລາຍຮ້ອຍຄົນ,ຈົນກະທັ້ງສາມາດຊັກນຳຄົນຍ່ິງຫລາຍກວ່າເກົ່າ,ຄຸນຄ່າທ່ີສ້າງຂຶ້ນແນວນີ້ຈະໃຫຍ່ກວ່າຄຸນຄ່າທ່ີຂ້າພະເຈົ້າສ້າງຢູ່ຕ່າງປະເທດ,ແລະຍ່ິງເປັນໜ້າທະນົງອົງອາດ,ຍ່ິງເປັນໜ້າພາກພູມໃຈ."ກໍ່ແມ່ນດ້ວຍຄວາມຄິດແນວນີ້,ເມ່ືອທ່ານວາງຈື້ກ່ົງກັບຄືນເມືອຮອດມະຫາວິທະຍາໄລຕົງນານເຊ່ິງເປັນໂຮງຮຽນເກົ່າຂອງຕົນກໍ່ເລ່ີມສ້າງພາລະກິດຢ່າງລຳບາກກາກກຳ.ໃນຄາວນັ້ນ,"ທາງດ່ວນຂ້ໍມູນຂ່າວສານຂອງຈີນພວມຢູ່ໃນໄລຍະເລ່ີມຕົ້ນ,ວົງຈອນໄຟຟ້າໄອຊີທ່ີເປັນຈຸດຄ້ຳຂອງອຸດສາຫະກຳຂ້ໍມູນຂ່າວສານຈີນກໍ່ຄືກັນກັບແຜ່ນຊິບແກນກາງແລະບັດອິນເຕີເນັດເປັນຕົ້ນຂອງຄອມພີວເຕີ,ແມ່ນຊື້ເຂົ້າມາຈາກຕ່າງປະເທດເກືອບຫມົດ.ທ່ານວາງຈື້ກ່ົງສຳນຶກຮູ້ວ່າ,ການສຶກສາຄົ້ນຄ້ວາແລະພັດທະນາອຸດສາຫະກຳມິໂກຼເອເລັກໂຕຼນິກ ເອເລັກໂຕຼນິກແສງຕ້ອງການ ບຳລຸງສ້າງຖັນແຖວເຕັກນິກ,ພັດທະນາອຸດສາຫະກຳວົງຈອນໄຟຟ້າໄອຊີທ່ີມີສິດຊັບສິນທາງປັນຍາເປັນເຈົ້າຕົນເອງນັ້ນແມ່ນເລ່ືອງທ່ີລໍຖ້າບໍ່ໄດ້ອີກແລ້ວ.ທ່ານທັງສອນເຕັກນິກຂ້ໍມູນຂ່າວສານຫລ້າສຸດໃນໂລກໃຫ້ນັກສຶກສາ,ທັງເລ່ີມສ້າງສະຖາບັນຄົ້ນຄ້ວາວັດແທກວົງຈອນໄຟຟ້າໄອຊີ.
ສະຖາບັນຄົ້ນຄວ້າຂອງທ່ານວາງຈື້ກົ່ງສ້າງຂ້ຶນບໍ່ດົນກໍຄົ້ນຄ້ວາຜະລິດວົງຈອນໄຟຟ້າໄອຊີຄວາມໄວສູງເຊ່ິງເປັນພາກສ່ວນຕົ້ນຕໍຂອງແຜ່ນຊິບຄອມພີວເຕີ.ໜ່ວຍຜູ້ຊ່ຽວຊານເອເລັກໂຕຼນິກແສງຂອງແຜນການພັດທະນາເຕັກນິກສູງແຫ່ງລັດຈີນເຫັນວ່າ,ໝາກຜົນຄົ້ນຄ້ວາຂອງທ່ານວາງຈື້ກ່ົງໄດ້ບັນລຸລະດັບກ້າວໜ້າຂອງໂລກ.ທ່ານສາສະດາຈານຮວງຈ້ຽນຂອງຂະແຫນງວິຊາວິສະວະກຳວິທະຍຸມະຫາວິທະຍາໄລຕົງນານເວົ້າວ່າ,ພາກສ່ວນຕົ້ນຕໍຂອງແຜ່ນຊິບທ່ີທ່ານວາງຈື້ກ່ົງປະດິດສ້າງນັ້ນ,ບ່ອນຍອດຢ້ຽມທ່ີສຸດແມ່ນສາມາດສ່ົງຂ້ໍມູນຕົວເລກໄວກວ່າເກົ່າທົບເທ່ົາ. "ການຄົ້ນຄ້ວາກ່ຽວກັບວົງຈອນໄຟຟ້າໄອຊີຄວາມໄວສູງຂອງແຜ່ນຊິບ,ປະຈຸບັນ,ໃນໂລກພຽງແຕ່ຈຳກັດຢູ່ໃນຂົງເຂດອັນຈຳກັດເທ່ົານັ້ນ.ການຄົ້ນຄວ້າຂອງທ່ານວາງຈື້ກ່ົງມີ 5 ປະເພດຢູ່ໃນລະດັບນຳໜ້າສາກົນ,ໃນນັ້ນຜູ້ປະດິດສ້າງຂອງໝາກຜົນຄົ້ນຄ້ວາສາມປະເພດກໍ່ແມ່ນທ່ານວາງຈື້ກ່ົງເອງ."
ທ່ານວາງຈື້ກ່ົງເຫັນວ່າ,ຜົນງານທ່ີໃຫຍ່ກວ່າໝູ່ທ່ີທ່ານໄດ້ຮັບໃນການກັບຄືນມາສິດສອນຫຼັງກກັບຄືນຢູ່ປະເທດຊາດແມ່ນໄດ້ສ້າງຖັນແຖວຄົ້ນຄ້ວາທ່ີປະກອບດ້ວຍພະນັກງານທ່ີມີອາຍຸຕ່າງກັນໃນຂົງເຂດມິໂກຼເອເລັກໂຕຼນິກແລະເອເລັກໂຕຼນິກແສງ.ພາຍໃນເວລາ 5 ປີຫລັງກັບຄືນປະເທດ,ທ່ານໄດ້ຊີ້ນຳນັກຄົ້ນຄ້ວາປະລິນຍາໂທ 28 ຄົນ,ນັກຄົ້ນຄ້ວາປະລິນຍາເອກ 16 ຄົນ,ຢູ່ອ້ອມຂ້າງຂອງທ່ານໄດ້ປະກອບເປັນຖັນແຖວຄົ້ນຄ້ວາທ່ີອົງປະກອບຄວາມຮູ້ສົມເຫດສົມຜົນແລະສາມາດປະຕິບັດງານໄດ້ດີ.
ນາງຊູລີຊາວກໍ່ແມ່ນຫລັກແຫລ່ງຜູ້ໜ່ຶງຂອງຖັນແຖວດັ່ງກ່າວ.ນາງເວົ້າວ່າ,"ໃຕ້ການນຳພາຂອງອາຈານວາງ,ສະຖາບັນຄົ້ນຄວ້າຂອງພວກເຮົາໄດ້ມີນັກຄົ້ນຄ້ວາ 80 ກວ່າຄົນ,ພວກເຮົາບໍ່ພຽງແຕ່ໄດ້ເປີດຊ່ອງທາງສ້າງສາຍຜະລິດວົງຈອນໄຟຟ້າໄອຊີຂອງແຜ່ນຊິບ 10 ກວ່າສາຍຢູ່ພາຍໃນແລະນອກປະເທດເທ່ົານັ້ນ,ຍັງມີເງ່ືອນໄຂພື້ນຖານແຫ່ງການອອກແບບວົງຈອນໄຟຟ້າໄອຊີຄວາມໄວສູງ ຄວາມຖ່ີສູງແລະເອເລັກໂຕຼນິກແສງ.ອາດເວົ້າໄດ້ວ່າ,ໝາກຜົນຄົ້ນຄ້ວາວິທະຍາສາດເຫ່ົຼານີ້ທ່ີພວກເຮົາໄດ້ຮັບນັ້ນໄດ້ສ້າງພື້ນຖານເປັນຢ່າງດີໃຫ້ແກ່ປະເທດຊາດພວກເຮົາເຂົ້າ ຮ່ວມການແກ່ງແຍ່ງໃນອຸດສາຫະກຳຂ້ໍມູນຂ່າວສານສາກົນ."
ທ່ານວາງຈືກ່ົງເຊ່ືອໝັ້ນວ່າ,ຜູ້ໃດມີແຜ່ນຊິບທ່ີດີກວ່າໝູ່,ຜູ້ນັ້ນກໍຈະມີຊັບສົມບັດຫລາຍກວ່າໝູ່ໃນໂລກ,ຜູ້ນັ້ນກໍຈະສາມາດກາຍເປັນປັດໄຈຊີ້ນຳແລະປັດໄຈຕັດສິນຂອງສັງຄົມຂ້ໍມູນຂ່າວສານ.ທ່ານຫວັງຜ່ານຄວາມພະຍາຍາມຂອງຕົນ,ໃຊ້ເວລາ 5 ຮອດ 10 ປີ,ສາມາດບຳລຸງສ້າງຖັນແຖວຄົ້ນຄ້ວາວິທະຍາສາດທ່ີມີຫລາຍຮ້ອຍຄົນ, ຍາດແຍ່ງເຮັດໃຫ້ພາລະກິດມິໂກຼເອເລັກໂຕຼນິກແລະເອເລັກໂຕຼນິກແສງຂອງຈີນລ່ືນກາຍລະດັບກ້າວໜ້າຂອງໂລກ,ທ່ານເວົ້າວ່າ,ນີ້ຈ່ິງແມ່ນເປົ້າຫມາຍທ່ີທ່ານບາກບັ່ນສູ້ຊົນຕະຫລອດຊີວິດ.
|
