|
ທ່ີນີ້ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ່ຟັງທ່ີໂຄລົບ, ຍິນດີຕ້ອນຮັບທ່ານເຂົ້າສູ່ລາຍການນັດພົບໃນວັນອາທິດ, ໃນລາຍການພາກນີ້, ທ່ານຈະໄດ້ຟັງດົນຕີເສບດ້ວຍຂຸ່ຍທ່ີແຕ່ງແລະບັນເລງໂດຍທ່ານຈ້າວຊົງຖິງ ນັກເປ່ົາຂຸ່ຍທ່ີມີຊ່ືສຽງຂອງຈີນທ່ີເຖິງແກ່ກຳແລ້ວ.
ທ່ີທ່ານພວມຟັງຢູ່ນີ້ແມ່ນດົນຕີທ່ີເປົ່າດ້ວຍຂຸ່ຍທ່ີໃຫ້ຊ່ືວ່າ "ອູ້ຈຽງເຟິງກວງ" ແປວ່າ "ພາບວິວທຳມະຊາດແມ່ນ້ຳອູ້ຈຽງ", ດົນຕີນີ້ແມ່ນທ່ານຈ້າວຊົງຖິງແຕ່ງຕາມເພງພື້ນເມືອງແຂວງເຈີ້ຈຽງຈີນ, ມີທຳນອງໄພເລາະເພາະຫູ, ວາດພາບທິວທັດທຳມະຊາດອັນສວຍງາມຕາມສອງຝ່ັງແມ່ນ້ຳອູ້ຈຽງ, ໄດ້ສະແດງເຖິງຈິດອາລົມຂອງນັກແຕ່ງທ່ີຮັກຫອມແລະຍ້ອງຍໍພູຜາແມ່ນ້ຳຂອງບ້ານເກີດຂອງຕົນ.
ທ່ານຈ້າວຊົງຖິງເກີດຢູ່ໃນຄອບຄົວປັນຍາຊົນຢູ່ແຂວງເຈີ້ຈຽງຂອງຈີນ, ທ່ານຮຽນເປ່ົາຂຸ່ຍມາແຕ່ອາຍຸ 9 ຂວບ, 14 ປີກໍໄດ້ຂຶ້ນສະແດງບົນເວທີ. ໃນຍາມຍັງນ້ອຍ, ທ່ານຈ້າວຊົງຖິງມັກໄປຮຽນເປ່ົາຂຸ່ຍນຳສິລະປິນພື້ນເມືອງຢູ່ບ້ານເກີດເລື້ອຍໆ, ຮຽນເອົາຄວາມຮູ້ຈາກດົນຕີພື້ນເມືອງທ່ີອຸດົມສົມບູນ, ອັນໄດ້ສ້າງພື້ນຖານອັນແໜ້ນໜາໃຫ້ແກ່ເອກະລັກສິລະປະຂອງທ່ານເອງແລະເຮັດໃຫ້ທ່ານໄດ້ຮັບຜົນສຳເລັດອັນດີເດ່ັນ.
ທ່ານຈ້າວຊົງຖິງເຄີຍເປັນຄູສອນດົນຕີໃນໂຮງຮຽນປະຖົມ ມັດທະຍົມແລະໂຮງຮຽນສ້າງຄູ, ທ່ານຕັ້ງໃຈອຸທິດກຳລັງວັງຊາແລະສະຕິປັນຍາໃຫ້ແກ່ພາລະກິດດົນຕີ. ເມ່ືອປີ1949, ທ່ານເສັງເຂົ້າຄະນະສິລະປາກອນ, ຈ່ຶງເຮັດໃຫ້ທ່ານມີໂອກາດສະແດງພອນສະຫວັນສິລະປະຂອງທ່ານຢ່າງເຕັມສ່ວນ. ໃນໄລຍະທ່ານຈ້າວຊົງຖິງເຮັດວຽກຢູ່ພາກຕາເວັນອອກສຽງເໜືອຂອງຈີນເມ່ືອປີ 1954, ທ່ານໄດ້ແຕ່ງດົນຕີເປ່ົາດ້ວຍຂຸ່ຍ ທ່ີໃຫ້ຊ່ືວ່າ "ຍາມເຊົ້າ". ຫຼັງຈາກນຳອອກສະແດງແລ້ວກໍດັງກ້ອງທ່ົວວົງການດົນຕີຈີນ, ກາຍເປັນດົນຕີທ່ີເຮັດໃຫ້ທ່ານມີຊ່ືສຽງດ່ົງດັງຂຶ້ນ. ດົນຕີນີ້ມີທຳນອງໄພເລາະເພາະຫູ, ວາດພາບອັນສວຍງາມໃນຍາມເຊົ້າລະດູບານໃໝ່ເວລາຕາເວັນໂພ່ຂຶ້ນຈາກຂອບຟ້າ ສຽງນົກຮ້ອງແຊວໆ ສັບພະສ່ິງຟື້ນຊີບຄືນມາ.
ດົນຕີຂຸ່ຍຂອງຈີນໄດ້ແບ່ງອອກເປັນສອງຝ່າຍ ຝ່າຍເໜືອແລະຝ່າຍໃຕ້, ສອງຝ່າຍມີເອກະລັກຕ່າງກັນ. ທ່ານຈ້າວຊົງຖິງໄດ້ມ້າງຂອບວົງເໜືອໃຕ້, ຮັບເອົາຈຸດເດ່ັນຂອງທັງສອງຝ່າຍ, ແລະຍັງຖອດຖອນເອົາວິທີເສບບາງຢ່າງຂອງຂຸ່ຍປະເທດຕາເວັນຕົກ, ແລ້ວຈໍ່ຕົວເປັນເອກະລັກຝ່າຍເຈີ້ຈຽງທ່ີເຕັມໄປດ້ວຍກ່ິນອາຍຊົນນະບົດອັນເຂັ້ມຂຸ້ນ.
ຍ້ອນທ່ານຈ້າວຊົງຖິງໄດ້ຮຽນເອົາດົນຕີພື້ນເມືອງຂອງຈີນເປັນຈຳນວນຫຼວງຫຼາຍໃນຍາມຍັງນ້ອຍ, ສະນັ້ນ, ໃນເວລາແຕ່ງນົດ, ບົດດົນຕີສ່ວນຫຼາຍຂອງທ່ານໄດ້ຖືງິ້ວທ້ອງຖ່ິນແລະເພງພື້ນເມືອງແຂວງເຈີ້ຈຽງເປັນເຄົ້າ. ສະນັ້ນ ລົດຊາດດົນຕີພື້ນເມືອງແຂວງເຈີ້ຈຽງອັນເຂັ້ມຂຸ້ນຈ່ຶງໄດ້ກາຍເປັນຈຸດພິເສດຂອງເພງເສບຂອງທ່ານ. ດົນຕເສບດ້ວຍຂຸ່ຍ "ຊານອູຊີ່" ກໍ່ເປັນຕົວແທນໃນດົນຕີປະເພດນີ້.
ທ່ານຜູ່ຟັງທ່ີໂຄລົບ, ມ້ວນທ້າຍລາຍການພາກນີ້, ເຊີນທ່ານຟັງດົນຕີເສບດ້ວຍຂຸ່ຍທ່ີຊ່ືວ່າ "ຂຸ້ນເດັດຊາ" ເຊ່ິງແຕ່ງແລະເສບໂດຍທ່ານຈ້າວຊົງຖິງ. ດົນຕີນີ້ໂຮມເອົາສີມືເປ່ົາຂຸ່ຍຂອງພາກເໜືອແລະພາກໃຕ້ຂອງຈີນເຂົ້າໃສ່ກັນ, ມີທຳນອງສົດຊ່ືນ ເບົາໄວ, ໄດ້ວາດພາບສວນຊາທ່ີສວຍງາມແລະພາບຜູ່ສາວເດັດຊາອອກແຮງງານຢ່າງມ່ວນຊ່ືນ.
ທ່ານຜູ່ຟັງທ່ີໂຄລົບ ທ່ີຟັງມານັ້ນແມ່ນບົດສະເໜີທ່ານຈ້າວຊົງຖິງ ນັກເປ່ົາຂຸ່ຍທ່ີມີຊ່ືສຽງຂອງຈີນແລະດົນຕີຂຸ່ຍທ່ີແຕ່ງແລະເສບໂດຍທ່ານເອງ. ລາຍການນັດພົບໃນວັນອາທິດພາກນີ້ຂໍສ້ຽງສຸດລົງພຽງທໍ່ນີ້, ຂອບໃຈທ່ີທ່ານຮັບຟັງ, ພົບກັນໃໝ່ໃນລາຍການໜ້າ, ສະບາຍດີ.
|
