|
ກອງທະຫານອາເມລິກາແລະອີຣັກປະສົບການຕ້ານຢັນຢ່າງໝັ້ນໜຽວທົນທານ
ປະຊາຄົມໂລກເອົາໃຈໃສ່ນຳວິກິດການມະນຸດສະທຳຢູ່ຟາລູຈາ
cri
Author: q
ຕາມຂ່າວCRI,ວັນທີ9ພະຈິກ,ໃນເວລາບຸກເຂົ້າເມືອງຟາລູຈາ,ກອງທະຫານອາເມລິກາປະຈຳອີຣັກແລະກອງທະຫານລັດຖະບານອີຣັກໄດ້ປະສົບການຕ້ານຢັນຢ່າງໝັ້ນໜຽວທົນທານຂອງກອງປະກອບອາວຸດຕ້ານອາເມລິກາ.ພ້ອມດຽວກັນນັ້ນ,ປະຊາຄົມໂລກໄດ້ເອົາໃຈໃສ່ນຳວິກິດການມະນຸດສະທຳຢູ່ຟາລູຈາ.
ຕອນຮຸ່ງເຊົ້າວັນທີ9ພະຈິກ,ກອງທະຫານອາເມລິກາແລະອີຣັກເຄີຍໄດ້ບຸກເຂົ້າຮອດບ່ອນຫ່າງຈາກກາງເມືອງຟາລູຈາບໍ່ຮອດ1ກິໂລແມັດ.ແຕ່ເມື່ອກອງທະຫານອາເມລິກາເຂົ້າສູ່ເທດສະບານເມືອງແລ້ວໄດ້ຖືກກອງປະກອບອາວຸດຕ້ານອາເມລິກາຕ້ານຢັນຢ່າງໝັ້ນໜຽວທົນທານ.ຕາມຜູ້ເຫັນກັບຕາກ່າວວ່າ,ກອງທະຫານອາເມລິກາໄດ້ຄ່ອຍໆຖອນຕົວອອກຈາກໃຈກາງເມືອງແລ້ວ.ມື້ດຽວກັນ,ໂຄສົກກອງທະຫານອາເມລິກາປະຈຳອີຣັກກ່າວວ່າ,ແຕ່ເປີດການບຸກໂຈມຕີເມືອງຟາລູຈາໃນວັນທີ8ພະຈິກມານີ້,ໄດ້ມີທະຫານອາເມລິກາແລະທະຫານອີຣັກ10ກວ່າຄົນເສຍຊີວິດແລ້ວ.
ວັນທີ9ພະຈິກ,ທ່ານອາລາວີ ນາຍົກລັດຖະມົນຕີລັດຖະບານຊົ່ວຄາວຂອງອີຣັກໄດ້ຮຽກຮ້ອງໃຫ້ພວກປະກອບອາວຸດຕ້ານອາເມລິກາຢູ່ເມືອງຟາລູຈາວາງອາວຸດ.ພ້ອມດຽວກັນນັ້ນ,ກອງປະກອບອາວຸດຈຳນວນໜຶ່ງພາຍໃນແດນອີຣັກພັດປະກາດຢ່າງເປີດເຜີຍວ່າ,ຈະໃຊ້ພາຫະນະທຸກຢ່າງເປີດການໂຈມຕີແບບແກ້ແຄ້ນຍິ່ງຮ້າຍແຮງກວ່າເກ່ົາຕໍ່ເປົ້າໝາຍຂອງກອງທະຫານອາເມລິກາແລະລັດຖະບານອີຣັກ.
ນອກນີ້,ຕາມຂ່າວແຈ້ງວ່າ,ວັນທີ9ພະຈິກ,ຢູ່ທີ່ເຊີແນວ,ທ່ານເຈນນີເຟີຄຼາກໂຄສົກສຳນັກງານຊາວອົບພະຍົບຂອງສະຫະປະຊາຊາດກ່າວວ່າ,ອົງການດ່ັງກ່າວຮູ້ສຶກເປັນຫ່ວງທີ່ສຸດຕໍ່ສາມັນຊົນອີຣັກຫຼາຍໝື່ນຄົນທີ່ໜີຈາກເມືອງຟາລູຈາເພື່ອຫຼີກໄພສົງຄາມ.ມື້ດຽວກັນ,ສະພາຕຳ່ລາຊະອານາຈັກບາເລນກໍໄດ້ອອກຖະແຫຼງການ,ກ່າວປະນາມການກະທຳທີ່ສັງຫານໂຫດຢ່າງປ່າເຖື່ອນທີ່ເກີດຂຶ້ນຢູ່ເມືອງຟາລູຈາແລະຕົວເມືອງອື່ນໆຢູ່ອີຣັກ.
|
|
