|
ບຸກຄົນວົງການການບິນເຫັນວ່າ,ການຮ່ວມມືດ້ານເຕັກນິກອະວະກາດລະຫວ່າງຈີນກັບເອີລົບແມ່ນຂວາງກັ້ນໄວ້ບໍ່ໄດ້
cri
Author: li
ແຜນການກາລີເລຈະແມ່ນຈີນກັບເອີລົບຮ່ວມມືກັນສ້າງໃຫ້ສຳເລັດກ່ອນແລະຫຼັງປີ 2008,ການຮ່ວມມືດ້ານເຕັກນິກອະວະກາດລະຫວ່າງຈີນກັບເອີລົບທີ່ຈະສ້າງຄວາມສຸກໃຫ້ແກ່ມວນມະນຸດນັ້ນຈະຂວາງກັ້ນໄວ້ບໍ່ໄດ້. ລະບົບກາລີເລແມ່ນລະບົບພາທາງດາວທຽມທົ່ວໂລກຮຸ້ນໃໝ່,ສາມາດສະໜອງສັນຍານບໍລິການພາທາງດາວທຽມທີ່ໄວ້ໃຈໄດ້ກວ່າເກົ່າ,ປອດໄພກວ່າເກົ່າແລະແມ່ນຢຳກວ່າເກົ່າໃຫ້ແກ່ຜູ້ໃຊ້,ມີອະນາຄົດກວ້າງຂວາງໃນການນຳໃຊ້ໃນດ້ານການບິນພົນລະເຮືອນ,ທາງລົດໄຟ,ການຂົນສົ່ງທາງນ້ຳທາງຫຼວງແລະໃນດ້ານໂທລະຄົມເຄື່ອນທີ່ເປັນຕົ້ນຂອງຈີນ.
ໃນງານວາງສະແດງການບິນຈູຫາຍທີ່ອັດລົງໃນວັນທີ 7 ພະຈິກ,ການຮ່ວມມືໃນດ້ານການບິນອະວະກາດລະຫວ່າງຈີນກັບເອີລົບໄດ້ປະຈັກຕາຄົນໃນທົ່ວໂລກ. ໃນໄລຍະຈັດງານວາງສະແດງເທື່ອນີ້ ທ່ານຟ່າງຊຽງມິງ ຮອງຜູ້ອຳນວຍການໃຫຍ່ກຸ່ມບໍລິສັດອຸດສາຫະກຳວິທະຍາສາດການບິນຈີນໄດ້ກ່າວຢ່າງຄັກແນ່ເປັນຄັ້ງທຳອິດວ່າ,ລະບົບພາທາງດາວທຽມກາລີເລມີອະນາຄົດກວ້າງຂວາງໃນການນຳໃຊ້ໃນດ້ານຄົມມະນາຄົມຂົນສົ່ງແລະໂທລະຄົມເຄື່ອນທີ່ເປັນຕົ້ນຂອງຈີນ. ຈີນເຂົ້າຮ່ວມລະບົບດັ່ງກ່າວແມ່ນໃຊ້ເຂົ້າທາງພົນລະເຮືອນທັງໝົດ.
ໃນໄລຍະຈັດງານວາງສະແດງການບິນຈູຫາຍ,ຜູ້ຊົງຄຸນວຸດທິວົງການການບິນອະວະກາດຂອງຈີນແລະເອີລົບໄດ້ກ່າວລື້ມຫຼັກໝັ້ນທີ່ຮ່ວມມືພັດທະນາເຕັກນິກອະວະກາດຢ່າງເປັນເອກະລາດເປັນເຈົ້າຕົນເອງແລະສະໜອງການສະໜັບສະໜູນເຕັກນິກຍິ່ງດີກວ່າເກົ່າໃຫ້ແກ່ຄວາມກ້າວໜ້າຂອງສັງຄົມມະນຸດ.
ບຸກຄົນວົງການການບິນອະວະກາດເຫັນວ່າ,ການທັບມ້າງການຜູກຂາດເຕັກນິກໃນຂົງເຂດອະວະກາດ,ແມ່ນຫຼັກການພື້ນຖານແຫ່ງຍຸດທະສາດການບິນອະວະກາດຂອງຈີນແລະເອີລົບ. ບຸກຄົນວິຊາການເຫັນວ່າ,ລະບົບກາລີເລສາມາດເຊື່ອມໂຍງເຂົ້າກັບລະບົບ GPS ຂອງອາເມລິກາ,ຂອບເຂດຜິດໂຕນກັນທີ່ຕັ້ງສິ່ງຂອງທີ່ມັນກຳນົດນັ້ນບໍ່ຮອດ 1 ແມັດ,ລະບົບດັ່ງກ່າວສາມາດນຳພາຍົນບິນຂຶ້ນ,ລົງຈອດຢ່າງປອດໄພຫຼືເຮັດໃຫ້ລົດໄຟແລ່ນຢ່າງປອດໄພເປັນຕົ້ນ.
ທ່ານຄາມົສປະທານສະມາຄົມອຸດສາຫະກຳການບິນອະວະກາດຝຣັ່ງເວົ້າວ່າ,ແຜນການກາລີເລແມ່ນການຕົກລົງຮວມໝູ່ຂອງສະຫະພາບເອີລົບ,25 ປະເທດສະມາຊິກທີ່ມີຢູ່ໃນປັດຈຸບັນລ້ວນແຕ່ຈະເຂົ້າຮ່ວມ. ບໍ່ວ່າແນວໃດກໍຈະເຮັດສຸດກົກສຸດປາຍ,ສ່ວນວິສາຫະກິດຈີນແນ່ນອນແມ່ນຄູ່ຮ່ວມມືໃນແຜນການດັ່ງກ່າວ.
ໂຄສົກກະຊວງການຕ່າງປະເທດຈີນເຄີຍກ່າວວ່າ,ໂຄງການຮ່ວມມືກາລີເລແມ່ນການຮ່ວມມືກ່ຽວກັບເຕັກນິກພາທາງການບິນພົນລະເຮືອນແລະອຸດສາຫະກຳພາທາງການບິນພົນລະເຮືອນທັງນັ້ນ. ການຮ່ວມມືລະຫວ່າງຈີນກັບເອີລົບບໍ່ມີຄວາມໝາຍໃດໆທີ່ແນໃສ່ຝ່າຍທີສາມ.
ໃນເວລາເລີ່ມປະຕິບັດແຜນການກາລີເລ,ທ່ານໂພຼດີ ປະທານຄະນະກຳມາທິການສະຫະພາບເອີລົບເຄີຍກ່າວວ່າ,ນີ້ແມ່ນເລື່ອງໃຫຍ່ທີ່ກ່ຽວພັນເຖິງອະນາຄົດຂອງເອີລົບ,ແມ່ນການຕໍ່ສູ້ລະຫວ່າງການຜູກຂາດກັບການຕ້ານການຜູກຂາດ,ແມ່ນການຕໍ່ສູ້ທາງການທູດທີ່ພົວພັນເຖິງການເມືອງ,ເສດຖະກິດ,ການທະຫານແລະຜົນປະໂຫຍດແຫ່ງຊາດ.
ບຸກຄົນວິຊາການເຫັນວ່າ,ແຜນການກາລີເລແມ່ນຂີດໝາຍສະແດງໃຫ້ເຫັນວ່າຈີນຊຸກຍູ້ການຮ່ວມມືບຸກເບີກອະວະກາດໃນທົ່ວໂລກ. ປະເທດທີ່ຮ່ວມມືກັບຈີນໃນດ້ານເຕັກນິກອະວະກາດຂອງຈີນເຊິ່ງເອົາສັນຕິພາບແລະໃຊ້ທາງພົນລະເຮືອນເປັນຈຸດພິເສດນັ້ນຍັງລວມມີເບຼຊິນແລະຣັດເຊຍເປັນຕົ້ນ. ເດືອນສິງຫາປີນີ້ ຢູ່ມົສກູ ຄະນະກຳມະການພົບປະກັນຕາມເວລາກຳນົດລະຫວ່າງນາຍົກລັດຖະມົນຕີຈີນຣັດເຊຍໄດ້ໄຂກອງປະຊຸມຄັ້ງທີ 5 ຂອງສາຂາຄະນະກຳມະການຮ່ວມມືການບິນອະວະກາດ,ເພື່ອຄົ້ນຄວ້າທິດທາງຮ່ວມມືໃນຂົງເຂດການບິນອະວະກາດລະຫວ່າງສອງຝ່າຍ,ສະພາບການປະຕິບັດແຜນການຮ່ວມມືລະຫວ່າງຈີນກັບຣັດເຊຍໃນສອງປີຂ້າງໜ້າ,ກົມການບິນອະວະກາດສອງຝ່າຍຕ່າງແຕ່ງຜູ້ແທນປະຈຳຝ່າຍກົງກັນຂ້າມແລະບັນຫາອື່ນໆ,ແລະກຳນົດວ່າສືບຕໍ່ເຮັດໃຫ້ການຮ່ວມມືລະຫວ່າງຈີນກັບຣັດເຊຍໃນຂົງເຂດການບິນອະວະກາດລົງສູ່ລວງເລິກເພື່ອສອດຄ່ອງກັບການພົວພັນຄູ່ຮ່ວມມືຍຸດທະສາດລະຫວ່າງສອງປະເທດ.
ຄຽງຄູ່ກັບພາລະກິດການບິນອະວະກາດຂອງຈີນພັດທະນາຢ່າງວ່ອງໄວ,ການຮ່ວມມືທາງເຕັກນິກໃນທົ່ວໂລກຈະນັບມື້ນັບກວ້າງຂວາງ. ໂລກປັດຈຸບັນແມ່ນຍຸກສະໄໝທີ່ເຕັມໄປດ້ວຍຄວາມແກ່ງແຍ່ງ,ທັງແມ່ນຍຸກສະໄໝທີ່ຕ້ອງຕິດຕໍ່ພົວພັນຮ່ວມມືກັນແລະສະແຫວງໃຫ້ສອງຝ່າຍໄດ້ຮັບຜົນປະໂຫຍດນຳກັນ. ຈີນຈະປະຕິບັດນະໂຍບາຍແຫ່ງຊາດພື້ນຖານທີ່ປະຕິຮູບໄຂປະຕູສູ່ພາຍນອກຢ່າງສະເໝີຕົ້ນສະເໝີປາຍ,ສົ່ງເສີມແລະສະໜັບສະໜູນຫົວໜ່ວຍວິສາຫະກິດແລະຫົວໜ່ວຍວຽກງານຕັ້ງໜ້າດຳເນີນການຮ່ວມມືແລະການແລກປ່ຽນລະຫວ່າງຊາດໃນຂົງເຂດການບິນແລະການບິນອະວະກາດໃຕ້ປະຖົມປັດໃຈທີ່ໂຄລົບນະໂຍບາຍການຕ່າງປະເທດຂອງຊາດແລະສົນທິສັນຍາສາກົນທີ່ໄດ້ເຊັນກັນ.
|
|
