|
ຕາມຂ່າວCRI: ວັນທີ 11 ພະຈິກນີ້ ທ່ານຫູຈິນທາວ ປະທານປະເທດຈີນໄດ້ຝາກໂທລະເລກໄປຍັງທ່ານໂລຮີ ຟັດຕູ ປະທານຄະນະກຳມະການນິຕິບັນຍັດປະເທດປາເລັສຕິນ, ສະແດງຄວາມໄວ້ອາໄລດ້ວຍຄວາມເສົ້າສະຫຼົດໃຈຕໍ່ການເຖິງແກ່ກຳຢ່າງບໍ່ເປັນຈັ່ງບຸນຂອງທ່ານຢັດເຊີ ອາລາຟັດ ປະທານາທິບໍດີປະເທດປາເລັສຕິນ ປະທານອົງການອຳນາດແຫ່ງຊາດປາເລັສຕິນ ປະທານຄະນະບໍລິຫານງານອົງການປົດປ່ອຍປະເລັສຕິນ.
ໃນໂທລະເລກໄວ້ອາໄລ ທ່ານຫູຈິນທາວກ່າວວ່າ: ທ່ານປະທານອາລາຟັດແມ່ນຜູ່ນຳທີ່ດີເລີດຂອງພາລະກິດປາເລັສຕິນ, ແມ່ນນັກການເມືອງຜູ່ດີເດັ່ນ, ທ່ານໄດ້ສຸມກຳລັງວັງຊາຕະຫຼອດຊີວິດເພື່ອພາລະກິດອັນເປັນທຳທີ່ຍາດແຍ່ງຟື້ນຟູສິດອຳນາດແຫ່ງຊາດອັນຊອບກົດໝາຍຂອງປະຊາຊົນປາເລັສຕິນ, ໄດ້ຮັບຄວາມໂຄລົບນັບຖືແລະຄວາມສະໜັບສະໜູນອຸ້ມຊູຈາກປະຊາຊົນປາເລັສຕິນ, ແລະມີອິດທິພົນຊື່ສຽງອັນສູງສົ່ງໃນປະຊາຄົມໂລກ.
ໃນໂທລະເລກໄວ້ອາໄລ, ທ່ານຫູຈິນທາວກ່າວວ່າ, ທ່ານປະທານອາລາຟັດແມ່ນຜູ່ສ້າງພື້ນຖານແລະຜູ່ຕັ້ງໜ້າຊຸກຍູ້ການພົວພັນຈີນປາເລັສຕິນ, ໄດ້ປະກອບສ່ວນອັນພົ້ນເດັ່ນເຂົ້າໃນການປັບປຸງແລະຂະຫຍາຍມິດຕະພາບລະຫວ່າງສອງປະເທດແລະປະຊາຊົນ ສອງຊາດ. ທ່ານເຖິງແກ່ມໍລະນະກຳ, ບໍ່ພຽງແຕ່ເປັນການສູນເສຍອັນມະຫາສານຂອງປະຊາຊົນປາເລັສຕິນທໍ່ນັ້ນ, ແລະກໍເຮັດໃຫ້ປະຊາຊົນຈີນເສຍເພື່ອນຜູ່ຍິ່ງໃຫຍ່ຜູ່ໜຶ່ງ.
ທ່ານຫູຈິນທາວເຊື່ອວ່າ, ລັດຖະບານແລະປະຊາຊົນປາເລັສຕິນຄົງຈະສືບທອດພາລະກິດທີ່ທ່ານປະທານອາລາຟັດຍັງເຮັດບໍ່ສຳເລັດ, ສືບຕໍ່ທຳຄວາມພະຍາຍາມຢ່າງບໍ່ລົດລະ ເພື່ອຊຸກຍູ້ຂະບວນວິວັດສັນຕິພາບຕາເວັນອອກກາງ ແກ້ໄຂບັນຫາຕາເວັນອອກກາງທາງການເມືອງ. ຝ່າຍຈີນຍິນດີພ້ອມກັນກັບຝ່າຍປາເລັສຕິນ, ຊຸກຍູ້ການພົວພັນໄມຕີຈິດແລະຮ່ວມມືກັນລະຫວ່າງສອງປະເທດໃຫ້ຂະຫຍາຍໄປໜ້າຢ່າງບໍ່ຢຸດຢັ້ງ.
|
