|
ສະບາຍດີທ່ານຜູ່ຟັງທີ່ໂຄລົບ, ຊົມເຊີຍທ່ານຮັບຟັງລາຍການຢ່ອນອາລົມໃນວັນເສົາຂອງວິທະຍຸCRI, ຂ້າພະເຈົ້າແມ່ນແສງແກ້ວ. ເພງທີ່ທ່ານພວມຟັງຢູ່ນີ້ແມ່ນເພງNishichunfengwoshiyv ນ້ອງແມ່ນລົມລະດູບານໃໝ່ອ້າຍແມ່ນຝົນ, ຂັບຮ້ອງໂດຍທ່ານມານຈຽງ, ນີ້ແມ່ນເພງໃນCDແຜ່ນທຳອິດຂອງທ່ານທີ່ໃຫ້ ຊື່ວ່າ: Duobiandehai ທະເລທີ່ປ່ຽນແປງເລື້ອຍ. ເພງນີ້ໄດ້ສະແດງໃຫ້ເຫັນອາລົມຈິດລະຫວ່າງບ່າວສາວ, ແຕ່ພັດປ່ຽມລົ້ນໄປດ້ວຍອາລົມອັນອ່ອນໂຍນ, ເໝືອນດັ່ງລົມລະດູບານໃໝ່. ທ່ານມານຈຽງເວົ້າວ່າ, ໃນເວລາທ່ານຮ້ອງເພງນີ້, ທ່ານຮູ້ສຶກວ່າຕົນເອງຄືຢືນຢູ່ເທິງຈອມພູສີຂຽວ, ຝົນຝອຍຮຳລົງ, ມີກິ່ນຫອມສົດຊື່ນອົບອຸ່ນຂອງຂີ້ດິນສົ່ງມາ.
ທີ່ຟັງມານັ້ນແມ່ນເພງ Nishichunfengwoshiyv ນ້ອງແມ່ນລົມລະດູບານໃໝ່ອ້າຍແມ່ນຝົນ, ຂັບຮ້ອງໂດຍທ່ານມານຈຽງ.
ນາງຊຸນພີງແຂວງຫູນານແມ່ນຜູ້ສາວທີ່ມີນິດໃສເບີກບານ, ເບິ່ງໄປກໍ່ເປັນຄົນຊື່. ແຕ່ພໍເມື່ອສຽງດົນຕີດັງຂຶ້ນ, ນາງກໍປ່ຽນເປັນຄົນໃໝ່, ສີໜ້າສວຍງາມ, ເຕັມໄປດ້ວຍຄວາມໝັ້ນໃຈຕໍ່ຕົນເອງ. ສຽງຂອງນາງສູງດັງກ້ອງ, ປານສຽງໂລຫະເນ່ັງຊອດສິ່ງຕ່າງໆຈົນຮອດດວງໃຈຂອງຜູ້ຟັງ. ແຕ່ບ່ອນສຽງຕ່ຳພັດເຮັດໃຫ້ຄົນຮູ້ສຶກອຸ່ນ ໜາ. ຕໍ່ໄປເຊີນຟັງເພງJuejiang ໃຈເດັດ ເພງໃໝ່ຂອງນາງ ທີ່ນຳອອກ ສະ ເໜີຕໍ່ ຜູ້ຟັງຫວ່າງບໍ່ດົນນີ້, ເພງນີ້ເປັນເພງລະດົມໃຈ, ສະແດງໃຫ້ເຫັນນິດໃສຂອງນາງຊຸນພີງທີ່ບໍ່ຍອມອ່ອນຄືທໍ້ຖອຍໃຈ. ເຊີນຟັງໄດ້ເລີຍ.
ເນື້ອເພງມີຢູ່ວ່າ: ໃນເວລາແຫງນເບິ່ງທ້ອງຟ້າ, ບໍ່ເຫັນມີນົກບິນເວີ່ນ, ໃນໂລກນີ້ຫລາຍສິ່ງຫລາຍ ຢ່າງບໍ່ເປັນປົກກະຕິ. ຄວາມທະນົງຂອງຂ້ອຍຍິ່ງຍຶດໝັ້ນຍາວນານ, ຈົນຄວາມເຈັບປວດໃນຊວງເອິກກາຍເປັນກຳລັງ. ແຕ່ລະຄ່ຳຄືນ, ໃນຄວາມຝັນທີ່ມິດງຽບ, ມີແຕ່ເງົາຂອງຕົນເອງສ່ົງສຽງຮ້ອງເພງ, ທ່າທາງກ້າຫານ, ຢູ່ເທິງເວທີທ່ີອຶກກະທຶກ, ຂ້ອຍສູ້ກັບຄວາມເປົ່າຫວ່າງ, ເມື່ອມືນຕາ, ຂ້ອຍໄດ້ເຫັນແສງດາວລະຍິບລະຍັບ.
ທີ່ຟັງມານັ້ນແມ່ນເພງ Juejiang ໃຈເດັດ ເພງໃໝ່ຂອງນາງຊຸນພິງ.ທ່ານລີປິງສັນຮຽນຈົບວິຊາຟ້ອນພື້ນເມືອງຢູ່ສະຖາບັນຟ້ອນປັກກິ່ງ, ທ່ານມີພື້ນຖານວິຊາຟ້ອນສິບກວ່າປີ, ມີວາດຊົງເຈົ້າຊູ້, ຫ້າງໂຄສະນາສິນຄ້າທັງຫລາຍມັກເຊີນໄປຖ່າຍໂຄສະນາສິນຄ້າເລື້ອຍໆ. ໃນຫລາຍປີມານີ້, ນອກຈາກຖ່າຍໂຄສະນາສິນຄ້າຫລາຍສິບເລື່ອງຢ່າງສຳເລັດຜົນແລ້ວ, ທ່ານຍັງໄດ້ເຂົ້າຮ່ວມການສະແດງເລື່ອງໂທລະພາບຫລາຍເລື່ອງ, ໄດ້ຮັບຄວາມຊົມເຊີຍຈາກຊາວໜຸ່ມເຍົາວະຊົນທັງຫລາຍ. ດຽວນີ້, ທ່ານລີປິງສັນທີ່ເກ່ັງຫລາຍດ້ານກໍໄດ້ຮ້ອງເພງZhiyaoxihuan ທະແນມແຕ່ມັກ, ພວກແຟນເພງດີໃຈຫລາຍ. ເພງນີ້ໄດ້ສະແດງໃຫ້ເຫັນສະພາບຊີວິດລຸ້ນໄວໜຸ່ມທີ່ມີນິດໄສເອ້ອ້າງແລະແຂງແຮງ. ເນື້ອເພງມີຢູ່ວ່າ, "ທະແນມແຕ່ມັກ, ກໍອາດຈະໃສ່ຕຸ້ມຫູເປັນແຖວເຕັມໃບຫູ. ທະແນມແຕ່ມັກ, ກໍອາດຊື້ເສື້ອຜ້າຫ້ອຍໄວ້ເຕັມຕູ້ແຕ່ບໍ່ໃສ່ຈັກເທື່ອ…"
ຕໍ່ໄປເຊີນໄປຕາມສຽງເພງຂອງຄະນະດົນຕີສູນໂມງ, ໄປທ່ຽວແດນຄວາມຝັນທີ່ເປັນໜ້າຝັກໃຝ່. ຄຽງຄູ່ກັບສຽງດົນຕີທີ່ອອນຊອນ, ສຽງຍິງທີ່ມີອາລົມເລິກເຊິ່ງພາທ່ານເຂົ້າສູ່ສະພາບອັນດີງາມຄືດັ່ງຄວາມຝັນຢ່າງບໍ່ຮູ້ສຶກຕົວ.
ທີ່ຟັງມານັ້ນແມ່ນເພງMeng ຄວາມຝັນ ຂອງຄະນະດົນຕີສູນໂມງ. ເພງນີ້ໄດ້ສ່ອງແສງອາລົມຈິດອັນບໍລິສຸດຜຸດຜ່ອງຂອງຄົນທັງຫລາຍທີ່ຫວນຄຶດອະດີດ ຕະການທີ່ດີງາມ, ປາຖະໜາບ່ອນເພິ່ງພິງຂອງຈິດໃຈ.
ທ່ານຜູ້ຟັງ, ມ້ວນທ້າຍລາຍການມື້ນີ້, ເຊີນຟັງເພງທີ່ໃຫ້ຊື່ວ່າ"Huangheyuantou ແຫຼ່ງກຳເນີດຂອງແມ່ນ້ຳເຫຼືອງ", ເພງນີ້ແມ່ນເພງທີ່ນາງຈາງມາຍຮ້ອງໃນການປະກວດເພງMTVລູມານີໃນປີ 1996 , ນາງໄດ້ລາງວັນທີໜຶ່ງໃນການປະກວດ. ໃນເພງນີ້, ນາງຈາງມາຍໄດ້ເລ່ົາປະສົບການພັນປີຂອງແມ່ນ້ຳເຫຼືອງ ແມ່ນ້ຳມານດາຂອງຈີນດ້ວຍການຂັບຮ້ອງອັນຝົດຟື້ນສະຫງ່າແລະດັງກ້ອງດັງໄກ.
ເນື້ອເພງມີຢູ່ວ່າ: ແຫຼ່ງແມ່ນ້ຳເຫຼືອງຢູ່ໃສ? ຢູ່ໃນໜັງສືປະຫວັດສາດທີ່ສີເຫຼືອງຫຼ່າແລ້ວໃນເມື່ອກ່ອນ, ຢູ່ໃນກອງຫິມະທີ່ຫາກໍ່ລະລາຍໃນມື້ນີ້. ແມ່ນ້ຳໄຫຼມາພັນປີີ. ຟອງນ້ຳຟອງໜຶ່ງກໍມີເລື່ອງເລື່ອງໜຶ່ງ, ໄຫຼໄປສູ່ດິນແດນເກົ່າແກ່ບູຮານຂອງຈີນແຜ່ນນີ້. ຟອງນ້ຳຟອງໜຶ່ງກໍມີຮອຍຕີນຮອຍໜຶ່ງ, ຢ່າງໄປຫາບ່ອນທີ່ດວງຕາເວັນໂພ່ຂຶ້ນ.
ທ່ານຜູ້ຟັງທີ່ເຄົາລົບ, ໃນທ່າມກາງສຽງເພງຂອງນາງຈາງມາຍ, ລາຍການຢ່ອນອາລົມຂອງພວກເຮົາພາກນີ້ກໍຂໍລາຈາກທ່ານທໍ່ນີ້, ຂອບໃຈທ່ານທີ່ຮັບຟັງ, ສະບາຍດີ.
|
