|
|
 |
| (GMT+08:00)
2004-11-16 16:06:16
|
 |
|
ສະພາບັນດິດວິທະຍາສາດຈີນມີກຳລັງແກ່ງແຍ່ງເພີ່ມຂຶ້ນຢ່າງແຂງແຮງ
cri
ຕາມຂ່າວCRI:ໃນຫຼາຍປີມານີ້,ສະພາບັນດິດວິທະຍາສາດຈີນ ເຊິ່ງເປັນອົງການຄົ້ນຄວ້າວິທະຍາສາດທີ່ໃຫຍ່ກວ່າໝູ່ຂອງຈີນ ໄດ້ດຳເນີນການປະຕິຮູບຢ່າງຂະໜາດໃຫຍ່ທີ່ເອີ້ນກັນວ່າ,ເປັນກິດຈະການປະດິດສ້າງຄວາມຮູ້ໃໝ່,ມີການປ່ຽນແປງຢ່າງຫຼວງຫຼາຍໃນດ້ານລະບອບໃຊ້ພະນັກງານ,ລະບອບແບ່ງປັນ,ແລະການຈັດສັນຊັບພະຍາກອນເປັນຕົ້ນ.ຜ່ານການປະຕິຮູບ,ກຳລັງແກ່ງແຍ່ງຂອງສະພາບັນດິດວິທະຍາສາດຈີນໄດ້ສູງຂຶ້ນຫຼາຍ,ປະກົດມີໝາກຜົນການຄົ້ນຄວ້າວິທະຍາສາດທີ່ສຳຄັນບໍ່ໜ້ອຍ.
ວັນທີ 1 ພະຈິກປີນີ້,ສະພາບັນດິດວິທະຍາສາດຈີນໄດ້ຕ້ອນຮັບວັນເກີດຄົບຮອບ 55 ປີຂອງຕົນ.ແຕ່ສ້າງຕັ້ງຂຶ້ນເປັນຕົ້ນມາ,ສະພາບັນດິດວິທະຍາສາດຈີນກໍແມ່ນອົງການຄົ້ນຄວ້າວິທະຍາສາດທຳມະຊາດທີ່ໃຫຍ່ກວ່າໝູ່ຂອງຈີນໂດຍຕະຫຼອດ.ຜົນສຳເລັດທາງດ້ານການຄົ້ນຄວ້າວິທະຍາສາດພື້ນຖານແລະຄົ້ນຄວ້າເຕັກນິກສູງແລະໃໝ່ຂອງຈີນຈຳນວນຫຼວງຫຼາຍລ້ວນແຕ່ກຳເນີດເກີດຂຶ້ນຢູ່ແຫ່ງນີ້.
ແຕ່ວ່າ,ເມື່ອຮອດຊຸມປີ 90 ສະຕະວັດທີແລ້ວ,ຍ້ອນຄ່າໃຊ້ຈ່າຍການຄົ້ນຄວ້າວິທະຍາສາດບໍ່ພຽງພໍ,ວັດຖຸອຸປະກອນເກົ່າແກ່,ວິທີການຄຸ້ມຄອງຫຼ້າຫັຼງແລະປັດໄຈອື່ນໆ,ພະນັກງານຄົ້ນຄວ້າວິທະຍາສາດຂອງສະພາບັນດິດວິທະຍາສາດຈີນຍ້າຍໜີຢ່າງຫຼວງຫຼາຍ,ລະດັບຜົນການຄົ້ນຄວ້າວິທະຍາສາດກໍອ່າວໄກກັບລະດັບກ້າວໜ້າຂອງໂລກ.
ເພື່ອປ່ຽນແປງສະພາບດັ່ງກ່າວນີ້,ເລີ່ມແຕ່ປີ 1998 ເປັນຕົ້ນມາ,ພາຍໃຕ້ການສະໜັບສະໜູນຂອງລັດຖະບານ,ສະພາບັນດິດວິທະຍາສາດຈີນເລີ່ມດຳເນີນການປະຕິຮູບຂະໜາດໃຫຍ່ທີ່ຖືເປັນກິດຈະການປະດິດສ້າງຄວາມຮູ້ໃໝ່.ທ່ານລີຈື້ກັ່ງ ເລຂາທິການໃຫຍ່ຂອງສະພາບັນດິດວິທະຍາສາດຈີນແນະນຳໃຫ້ຮູ້ວ່າ:
"ປະຕິບັດກິດຈະການປະດິດສ້າງຄວາມຮູ້ໃໝ່,ກໍຕ້ອງກັ່ນຕອງເປົ້າໝາຍວິທະຍາສາດເຕັກນິກຂອງພວກເຮົາຢ່າງບໍ່ຢຸດຢັ້ງ,ຕ້ອງເຮັດໃຫ້ເປົ້າໝາຍວິທະຍາສາດເຕັກນິກສອດຄ່ອງກັບຄວາມຮຽກຮ້ອງຕ້ອງການທາງດ້ານວິທະຍາສາດເຕັກນິກທີ່ສຳຄັນຂອງລັດແລະໃຫ້ຢູ່ແຖວໜ້າແຫ່ງການພັດທະນາຂອງວິທະຍາສາດເຕັກນິກຂອງໂລກ,ພ້ອມກັນນັ້ນ ກໍຕ້ອງສັບຊ້ອນອົງປະກອບການຈັດຕັ້ງ,ປະຕິຮູບໂຄງປະກອບການຄຸ້ມຄອງ."
ພາຍຫັຼງປະຕິບັດກິດຈະການປະດິດສ້າງຄວາມຮູ້ໃໝ່ແລ້ວ,ສະພາບັນດິດວິທະຍາສາດຈີນເລີ່ມຈາກຄວາມຮຽກຮ້ອງຕ້ອງການທາງຍຸດທະສາດຂອງລັດແລະທ່ວງທ່າພັດທະນາວິທະຍາສາດເຕັກນິກຂອງໂລກ,ກຳນົດເປົ້າໝາຍພັດທະນາຈຸດໜັກ,ຊຶ່ງກໍຄືວິທະຍາສາດແລະເຕັກນິກໃນຂົງເຂດຂໍ້ມູນຂ່າວສານ ຊີວິດ ສິ່ງແວດລ້ອມຊັບພະຍາກອນ ພະລັງງານແລະມະຫາສະໝຸດເປັນຕົ້ນ.
ພ້ອມກັນນັ້ນ,ສະພາບັນດິດວິທະຍາສາດຈີນຍັງໄດ້ສັບຊ້ອນການຈັດວາງວິທະຍາສາດເຕັກນິກແລະອົງປະກອບການຈັດຕັ້ງຢ່າງຂະໜາດໃຫຍ່ທີ່ສຸດໃນປະຫວັດສາດ,ຜ່ານຈາກການສັບຊ້ອນສະຖາບັນແລະຫ້ອງຄົ້ນຄວ້າ,ໄດ້ສ້າງຕັ້ງແຫຼ່ງປະດິດສ້າງວິທະຍາສາດເຕັກນິກສັງລວມຂະໜາດໃຫຍ່ງວດໜຶ່ງ,ໃນນັ້ນລວມທັງສະຖາບັນຄົ້ນຄວ້າວິທະຍາສາດຊີວິດຊຽງໄຮ້,ສະຖາບັນຄົ້ນຄວ້າຄະນິດສາດແລະລະບົບວິທະຍາສາດ,ຫໍດາລາສາດແຫ່ງຊາດເປັນຕົ້ນ.ໃນຂະນະດຽວກັນນີ້,ສະພາບັນດິດວິທະຍາສາດຈີນຍັງໄດ້ສ້າງຕັ້ງອົງການຄົ້ນຄວ້າໃໝ່ງວດໜຶ່ງ,ເຈາະຈົງຄົ້ນຄວ້າວິຊາການທີ່ຈະເລີນໃໝ່ຄືສີ່ງແວດລ້ອມໜ່ວຍໂລກແລະແຊນເປັນຕົ້ນ.ເມື່ອໄດ້ສັບຊ້ອນແລ້ວ,ສະຖາບັນຄົ້ນຄວ້າຂອງສະພາບັນດິດວິທະຍາສາດຈີນໄດ້ຫຼຸດລົງຈາກ 120 ກວ່າແຫ່ງ,ເຫຼືອພຽງ 80 ກວ່າແຫ່ງ.
ນອກຈາກອົງການກະທັດຮັດແລະພະນັກງານຫຼຸດໜ້ອຍລົງແລ້ວ,ການປະຕິຮູບການຄຸ້ມຄອງກໍແມ່ນຈຸດຮຸ່ງທີ່ສຳຄັນຈຸດໜຶ່ງໃນກິດຈະການປະດິດສ້າງຄວາມຮູ້ໃໝ່ຂອງສະພາບັນດິດວິທະຍາສາດຈີນ.ຕໍ່ເລື່ອງນີ້,ທ່ານຊຸນມູ້ ຮອງຫົວໜ້າສະຖາບັນຄົ້ນຄວ້າວັດຖຸວິທະຍາຂອງສະພາບັນດິດວິທະຍາສາດຈີນບອກນັກຂ່າວວ່າ:
"ຈາກການປະຕິບັດກິດຈະການປະດິດສ້າງ,ສະພາບັນດິດວິທະຍາສາດຈີນໄດ້ນຳເອົາທັດສະນະຄະຕິ ໂຄງປະກອບແລະກົນໄກການຄຸ້ມຄອງອັນໃໝ່ອ່ຽມເຂົ້າມາ.ເຊັ່ນ:ການນຳເອົາຜູ້ມີຄວາມຮູ້ຄວາມສາມາດເຂົ້າມາ,ດູດດຶງເອົານັກວິທະຍາສາດໜຸ່ມຜູ້ດີເລີດທີ່ຮຽນຢູ່ນອກໃຫ້ກັບຄືນປະເທດ;ປະຕິບັດລະບອບເຊັນຂໍ້ຜູກພັນເຮັດວຽກກັບພະນັກງານທັງໝົດ,ລະບອບແບ່ງປັນພົວພັນກັບຜົນງານຂອງພະນັກງານຢ່າງແໜ້ນແຟ້ນ,ອັນໄດ້ປຸກລະດົມຄວາມຂະຫຍັນຫ້າວຫັນຂອງແຕ່ລະຄົນຢ່າງເຕັມສ່ວນ;ໃນດ້ານຕີລາຄາວິທະຍາສາດເຕັກນິກກໍໄດ້ດຳເນີນການກວດສອບປະຈຳປີແລະຕີລາຄາໃນສາກົນ."
ອາໄສການແກ່ງແຍ່ງກັນຊັກຈຸງການພັດທະນາ ເວົ້າໄດ້ວ່າແມ່ນວິທີອັນຍອດຢ້ຽມວິທີໜຶ່ງໃນການປະຕິຮູບຂອງສະພາບັນດິດວິທະຍາສາດຈີນ.ເລືອກຜູ້ມີຄວາມຮູ້ຄວາມສາມາດດີເລີດເຂົ້າຮັບໜ້າທີ່ວຽກງານ,ແກ່ງແຍ່ງກັນຍາດເອົາໂຄງການຄົ້ນຄວ້າວິທະຍາສາດ,ໃຫ້ລາງວັນຫຼວງຫຼາຍແກ່ສະຖາບັນແລະບຸກຄົນທີ່ໄດ້ຮັບຜົນງານດີເດັ່ນ.ໃນເວລາສຳພາດ ນັກຂ່າວໄດ້ຊາບວ່າ,ການແກ່ງແຍ່ງກັນເຮັດໃຫ້ພະນັກງານຄົ້ນຄວ້າວິທະຍາສາດຜູ້ມີຄວາມສາມາດສູງແລະໂຄງການຄົ້ນຄວ້າທີ່ມີອະນາຄົດພັດທະນາເຫົ່ຼານັ້ນໄດ້ຮັບຊັບພະຍາກອນຕ່າງໆຢ່າງເຕັມສ່ວນຄື:ຄ່າໃຊ້ຈ່າຍຄົ້ນຄວ້າວິທະຍາສາດແລະອຸປະກອນກ້າວໜ້າເປັນຕົ້ນ,ແລ້ວໄດ້ຊຸກຍູ້ການພັດທະນາການຄົ້ນຄວ້າວິທະຍາສາດເຕັກນິກ.
ການປະຕິບັດກິດຈະການປະດິດສ້າງຄວາມຮູ້ໃໝ່ໄດ້ເຮັດໃຫ້ໝາກຜົນການປະດິດສ້າງທາງດ້ານວິທະຍາສາດເຕັກນິກຂອງສະພາບັນດິດວິທະຍາສາດຈີນເພີ່ມຂຶ້ນຢ່າງຫຼວງຫຼາຍ.ປີ 2003,ຈຳນວນບົດວິທະຍານິພົນຂອງສະພາບັນດິດດັ່ງກ່າວທີ່ພິມລົງວາລະສານວິຊາການສາກົນໄດ້ເພີ່ມຂຶ້ນຫຼາຍກວ່າ 6 ປີກ່ອນໜຶ່ງເທົ່າປາຍ,ໄດ້ຮັບສິດທີບັດປະດິດສ້າງແລະລິກຂະສິດຊອຟແວເພີ່ມຂຶ້ນຢ່າງຫຼວງຫຼາຍ.
ໃນສະຖາບັນຄົ້ນຄວ້າຕ່າງໆຂອງສະພາບັນດິດວິທະຍາສາດຈີນ,ສະຖາບັນຄົ້ນຄວ້າຄອມພິວເຕີແມ່ນສະຖາບັນແຫ່ງໜຶ່ງທີ່ໄດ້ຮັບໝາກຜົນວິຊາການວິທະຍາສາດເຕັກນິກພົ້ນເດັ່ນທີ່ສຸດໃນຫຼາຍປີມານີ້.ຄອບພິວເຕີຊູກວງ 4000 A ສັບພະຄຸນສູງທີ່ສະຖາບັນຄົ້ນຄວ້າດັ່ງກ່າວຄົ້ນຄວ້າຜະລິດນັ້ນ,ມີຄວາມໄວໃນການຄິດໄລ່ບັນລຸ 11000 ຕື້ເທື່ອຕໍ່ວິນາທີ,ຄອງອັນດັບທີ 10 ໃນການລຽງລຳດັບ 500 ຄອມພິວເຕີທີ່ມີສັບພະຄຸນສູງຂອງໂລກໃນປີນີ້.
ເພື່ອສະໜັບສະໜູນການປະຕິຮູບຂອງສະພາບັນດິດວິທະຍາສາດຈີນ,ລັດຖະບານຈີນກໍໄດ້ເພີ່ມຄ່າໃຊ້ຈ່າຍໃຫ້ແກ່ການຄົ້ນຄວ້າຂອງສະພາ.ອັນໄດ້ປົວແປງເງື່ອນໄຂຄົ້ນຄວ້າວິທະຍາສາດຂອງສະພາບັນດິດວິທະຍາສາດຈີນໃຫ້ດີຂຶ້ນຢ່າງຫຼວງຫຼາຍ,ລາຍໄດ້ຂອງພະນັກງານຄົ້ນຄວ້າວິທະຍາສາດກໍໄດ້ເພີ່ມຂຶ້ນໃນໜ້າພຽງກວ້າງ.ພະນັກງານຄົ້ນຄວ້າວິທະຍາສາດບໍ່ຕ້ອງເປັນຫ່ວງນຳຊີວິດການເປັນຢູ່ອີກ,ສາມາດສຸມຈິດສຸມໃຈເຮັດວຽກຄົ້ນຄວ້າວິທະຍາສາດ.ທ່ານວັງຈ້ຽນທ່າວແຫ່ງສະຖາບັນຄົ້ນຄວ້າວັດຖຸວິທະຍາຂອງສະພາບັນດິດວິທະຍາສາດຈີນບອກນັກຂ່າວດ້ວຍຄວາມຮູ້ສຶກອັນເລິກເຊິ່ງວ່າ:
"ພາຍຫັຼງສະພາບັນດິດວິທະຍາສາດຈີນເລີ່ມປະຕິບັດແຜນການປະດິດສ້າງນີ້ແລ້ວ,ສະພາບແວດລ້ອມການຄົ້ນຄວ້າວິທະຍາສາດຂອງພວກເຮົາໄດ້ມີການປ່ຽນແປງຫຼາຍ.ເມື່ອປີ 1998,ຄ່າໃຊ້ຈ່າຍການຄົ້ນຄວ້າວິທະຍາສາດຂອງພວກເຮົາບໍ່ຫຼາຍ,ແຕ່ວ່າເມື່ອໄດ້ປະຕິບັດກິດຈະການປະດິດສ້າງແລ້ວ,ອຸປະກອນແລະຄ່າໃຊ້ຈ່າຍລ້ວນແຕ່ຮັບປະກັນ.ໃນ 3 ປີຜ່ານມາ,ອຸປະກອນທີ່ທາງສະຖາບັນຊື້ເຂົ້າມານັ້ນມີມູນຄ່າ 150 ລ້ານຢວນ,ອັນນີ້ມີຄວາມໝາຍສຳຄັນທີ່ສຸດຕໍ່ການທົດລອງພື້ນຖານຂອງພວກເຮົາ."
ຄຽງຄູ່ກັບກຳລັງແຮງເພີ່ມທະວີຂຶ້ນ,ສະພາບັນດິດວິທະຍາສາດຈີນກໍຍິ່ງມີກຳລັງດູດດຶງແລະແຮງໜ່ຽງປັ້ນເຂົ້າກັນຢ່າງພົ້ນເດັ່ນ.ແຕ່ກ່ອນ,ນັກສຶກສາປະລິນຍາເອກແລະປະລິນຍາໂທທີ່ຮຽນຈົບຈາກສະພາບັນດິດວິທະຍາສາດຈີນສ່ວນໜຶ່ງເຫັນວ່າ,ເງື່ອນໄຂຄົ້ນຄວ້າວິທະຍາສາດເຕັກນິກຂອງຕ່າງປະເທດດີກວ່າ,ຢາກໄປຫາທາງພັດທະນາຢູ່ຕ່າງປະເທດ.ແຕ່ດຽວນີ້,ເງື່ອນໄຂຄົ້ນຄວ້າວິທະຍາສາດຂອງສະພາບັນດິດພວກເຮົານັບມຶ້ນັບດີຂຶ້ນ,ລາຍໄດ້ຂອງພະນັກງານຄົ້ນຄວ້າວິທະຍາສາດກໍນັບມື້ນັບສູງ,ຫຼາຍຄົນຈຶ່ງບໍ່ຢາກໄປຕ່າງປະເທດອີກແລ້ວ,ສ່ວນຜູ້ໄປເຮັດວຽກຢູ່ຕ່າງປະເທດ,ທັງມີຖານະສູງແລະເງິນເດືອນກໍຫຼາຍແລ້ວນັ້ນກໍພາກັນກັບຄືນມາປະເທດ,ແລະໄປເຮັດວຽກຢູ່ສະພາບັນດິດວິທະຍາສາດຈີນ.
|
|
|
