|
ທີ່ນີ້ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການນັດພົບໃນວັນອາທິດ. ໃນລາຍການພາກນີ້, ທ່ານຈະໄດ້ຟັງເພງພື້ນເມືອງພາກຕາເວັນອອກສຽງເໜືອຂອງຈີນ, ແລະຈະແນະນຳຮີດຄອງປະເພນີທ້ອງຖິ່ນນັ້ນ.
ທີ່ທ່ານພວມຟັງຢູ່ນີ້ແມ່ນເພງພື້ນເມືອງພາກຕາເວັນອອກສຽງເໜືອຂອງຈີນທີ່ຊື່ວ່າ "ຕິວເຈ້ຍຈື" ແປວ່າ "ແຫວນເສຍ". ວາດພາບນາງສາວຜູ່ໜຶ່ງເຮັດແຫວນທີ່ຄູ່ຮັກເອົາໃຫ້ເສຍ, ນາງໃຈຮ້ອນຈົນບໍ່ຄຶດເລື່ອງລະອາຍເວົ້າກັບຜູ່ອື່ນ ຈົນສັນຍາວ່າ ຖ້າໃຜເກັບໄດ້ຈະໃຫ້ຄ່າຕອບແທນເປັນຈຳນວນເງິນຫຼວງຫຼາຍ.
ພາກຕາເວັນອອກສຽງເໜືອຂອງຈີນໝາຍເຖິງສາມແຂວງ ຄື ແຂວງເຮີຍຫຼົງຈຽງ ແຂວງຈີລິນແລະແຂວງລຽວນິງ. ຢູ່ແຫ່ງນັ້ນດິນດຳນ້ຳຊຸມ, ມີແມ່ນ້ຳໄຫຼສົນສວານ, ມີປ່າໄມ້ຕຶບໜາ, ແມ່ນທົ່ງພຽງໃຫຍ່ກວ່າໝູ່ຂອງຈີນ. ເນື່ອງຈາກຄົມມະນາຄົມສະດວກຫຼາຍ, ສາມແຂວງດັ່ງກ່າວຈຶ່ງໄດ້ມີການແລກປ່ຽນກັນທາງດ້ານເສດຖະກິດແລະວັດທະນະທຳເລື້ອຍໆ, ສະນັ້ນ ເພງພື້ນເມືອງສາມແຂວງນີ້ຈຶ່ງມີລັກສະນະຄ້າຍຄືກັນ, ຈຸດພິເສດກໍແມ່ນຟົດຟື້ນເປີດອົກເປີດໃຈ ຊື່ສັດມ່ວນຊື່ນ, ທຳນອງເພງກໍເປັນແບບພື້ນເມືອງທີ່ສຸດ. ຕໍ່ໄປເຊີນຟັງເພງ "ຊິນຮົວລາງ" ແປວ່າ "ອ້າຍຂາຍຂອງຜູ່ໃໝ່" ເພງນີ້ມີທຳນອງມ່ວນຊື່ນເບົາອາລົມ, ວາດພາບອ້າຍບ່າວຂາຍຂອງຜູ່ໜຸ່ມນ້ອຍຜູ່ໜຶ່ງສົ່ງເຄື່ອງໄປຂາຍຢູ່ຊົນນະບົດ.
ເພງພື້ນເມືອງພາກຕາເວັນອອກສຽງເໜືອມີເນື້ອໃນອຸດົມສົມບູນທີ່ສຸດ, ສ່ວນຫຼາຍສ່ອງແສງຊີວິດບັນເທີງຂອງປະຊາຊົນ, ທັງນີ້ກ່ຽວພັນເຖິງຮີດຄອງຊີວິດການເປັນຢູ່ຂອງປະຊາຊົນພາກຕາເວັນອອກສຽງເໜືອຂອງຈີນ. ຢູ່ພາກຕາເວັນອອກສຽງເໜືອ ໃນລະດູໜາວອາກາດໜາວຈັດ, ເວລາຫວາງວຽກໄຮ່ການນາຈຶ່ງຍາວນານກວ່າແຫ່ງອື່ນ, ໃນໄລຍະນີ້, ຊາວນາບໍ່ຕ້ອງໄປໄຮ່ໄປນາ, ມີແຕ່ເຮັດວຽກຢ້າວການເຮືອນເລັກໜ້ອຍ, ຫຼືນັ່ງຕີເປັນວົງໂອ້ລົມກັນ ສູບຢາກອກ ຫຼິ້ນເກມຫຼືພາກັນໄປທ່ຽວທາງນອກ. ຕໍ່ໄປເຊີນຟັງເພງ "ຟ້າງເຟິງເຈິງ" ແປວ່າ "ປ່ອຍວ່າວ" , ເພງນີ້ໄດ້ວາດພາບພວກຜູ່ສາວເປັນໝູ່ກັນໄປປ່ອຍວ່າວຢ່າງມ່ວນຊື່ນ.
ໃນເພງພື້ນເມືອງພາກຕາເວັນອອກສຽງເໜືອຂອງຈີນກໍມີເນື້ອເປັນນິທານປະຫວັດສາດບໍ່ໜ້ອຍ, ເພງປະເພດນີ້ມັກມີທຳນອງລະບາຍອາລົມ, ບັນລະຍາຍເລື່ອງລາວຫຼາຍຕອນດ້ວຍທຳນອງດຽວກັນ. ໃນນັ້ນເພງ "ແຢ້ຢາອູຈິງ" "ຊີກເດືອນຍາມເດິກ" ກໍແມ່ນຕົວຢ່າງ, ເພງນີ້ບັນລະຍາຍຊາຕາກຳຂອງຍິງສາວສີ່ຄົນໃນສະໄໝບູຮານຂອງຈີນຄື ນາງເມິງຈຽງນີ ນາງລິນໄຕ້ອີ້ ນາງຊີຊືແລະນາງວາງຈາວຈິນ.
ທ່ານຜູ່ຟັງທີ່ໂຄລົບ, ມ້ວນທ້າຍລາຍການພາກນີ້, ເຊີນຟັງເພງ "ສຽວສິງລາງ" ແປວ່າ "ພົບຄູ່ຮັກ" ເພງພື້ນເມືອງພາກຕາເວັນອອກສຽງເໜືອຂອງຈີນ. ເພງນີ້ເລົ່າເລື່ອງນາງສາວຜູ່ໜຶ່ງຊື້ຂອງຂວັນຫຼາຍຢ່າງຫຼາຍແນວຈະໄປພົບກັບຄູ່ຮັກຕາມນັດດ້ວຍຄວາມດີອົກດີໃຈ, ແຕ່ຍ້ອນມື້ນັ້ນຝົນຕົກ ທາງມື່ນ, ນາງໃຈຮ້ອນຫຼາຍບໍ່ລະວັງຈົນພະລາດລົ້ມ, ຂອງທີ່ຖືໄປກໍຕົກເຮ່ຍໄປໝົດທາງ. ເພງນີ້ມີເອກະລັກທ້ອງຖິ່ນຢ່າງເຂັ້ມຂຸ້ນ, ຕະຫຼົກຊວນຫົວ.
ທ່ານຜູ່ຟັງທີ່ໂຄລົບ, ລາຍການນັດພົບໃນວັນອາທິດພາກນີ້ຂໍສ້ຽງສຸດລົງພຽງທໍ່ນີ້, ຂອບໃຈທີ່ທ່ານຮັບຟັງ, ພົບກັນໃໝ່ໃນອາທິດໜ້າ, ສະບາຍດີ.
|
