|
ໃນສະເພາະຫນ້ານີ້,ເມືອງປັກກິ່ງພວມຄັດເລືອກເຈົ້າຫນ້າທີ່ລັດຖະບານ 15 ຄົນໃນທົ່ວປະເທດ,ການຄັດເລືອກພະນັກງານຄືແນວນີ້ໄດ້ດຳເນີນໂດຍທົ່ວໄປຢູ່ແຫ່ງຕ່າງໆຂອງຈີນ.ໃນເວລາຜູ່ຊ່ຽວຊານຂອງສະຖາບັນບໍລິຫານແຫ່ງຊາດຈີນວິເຄາະປະກົດການດັ່ງກ່າວ,ທ່ານຊີ້ອອກວ່າ,ການຄັດເລືອກເຈົ້າຫນ້າທີ່ຢ່າງເປີດເຜີຍແມ່ນມາດຕະການສຳຄັນລາຍຫນຶ່ງທີ່ຈີນໃຊ້ເພື່ອຍົກສູງຄຸນທາດຂອງເຈົ້າຫນ້າທີ່ແລະເພີ່ມຄວາມສາມາດຄຸ້ມຄອງຂອງລັດຖະບານ.ປະຈຸບັນ,ວຽກງານດັ່ງກ່າວພວມໄດ້ຮັບການປະຕິບັດຢ່າງຫນັກແຫນ້ນຢູ່ຈີນ.
ການຄັດເລືອກເຈົ້າຫນ້າທີ່ແບບດັ້ງເດີມຂອງຈີນແມ່ນອົບຮົມຜູ່ມີຄວາມຮູ້ຄວາມສາມາດໄວ້ກ່ອນ,ໃນເວລາຫນ້າທີ່ຕຳແຫນ່ງເປົ່າຫວ່າງ,ພາກສ່ວນການຈັດຕັ້ງຂັ້ນເທິງຈຶ່ງອີງຕາມຄວາມຕ້ອງການຂອງຕຳແຫນ່ງສຳຫຼວດຜູ່ມີຄວາມຮູ້ຄວາມສາມາດທີ່ສຳຮອງໄວ້,ແລ້ວຄັດເລືອກແລະແຕ່ງຕັ້ງ.ເຖິງວ່າເຮັດແບບນີ້ມີລະບຽບການສຳຫຼວດຢ່າງເຄັ່ງຄັດ,ແລະໄດ້ຜ່ານການພິຈາລະນາຕົກລົງແບບປະຊາທິປະໄຕໃນຫມູ່ມວນຊົນກໍຕາມ,ແຕ່ກໍຍັງມີຂໍ້ບົກພ່ອງ ຕ່າງໆເຊັ່ນ:ຂອບເຂດຄັດເລືອກນ້ອຍແລະຂາດຄວາມໂປ່ງໃສອັນຈຳເປັນເປັນຕົ້ນ.ສະນັ້ນ,ແຕ່ຊຸມປີ 90 ສະຕະວັດແລ້ວນີ້ເປັນຕົ້ນມາ,ບາງແຫ່ງໃນປະເທດຈີນໄດ້ທົດລອງຄັດເລືອກເຈົ້າຫນ້າທີ່ຢ່າງເປີດເຜີຍໃຫ້ຜູ່ທີ່ມີເງື່ອນໄຂສອດຄ່ອງກັບຄວາມຕ້ອງການນັ້ນມີໂອກາດຖືກຄັດເລືອກເອົາ,ໃນໄລຍະຄັດເລືອກນັ້ນ,ໃຊ້ວິທີເປີດເຜີຍຕຳແຫນ່ງ ມາດຖານ ລະບຽບການແລະຜົນການຄັດເລືອກ.ເຈົ້າຫນ້າທີ່ທີ່ຄັດເລືອກເອົາຢ່າງເປີດເຜີຍຕົ້ນຕໍແມ່ນເຈົ້າຫນ້າທີ່ຂັ້ນຮອງຫົວຫນ້າກົມແລະຕ່ຳກວ່າຂັ້ນຮອງຫົວຫນ້າກົມ.
ເພື່ອເຮັດໃຫ້ວຽກງານດັ່ງກ່າວຍິ່ງເປັນແບບສະບັບກວ່າເກົ່າ,ໃນຕົ້ນປີນີ້ຈີນຍັງໄດ້ປະກາດຂໍ້ກຳນົດຊົ່ວຄາວກ່ຽວກັບວຽກຄັດເລືອກເຈົ້າຫນ້າທີ່ພັກລັດຢ່າງເປີດເຜີຍ.
ທ່ານຈູລີ້ເຈ່ຍ ສາດສະດາຈານສະຖາບັນບໍລິຫານແຫ່ງຊາດຈີນເວົ້າວ່າ,ໃນ 10 ກວ່າປິມານີ້, ຄຸນທາດຄຸນສົມບັດ ວິຊາສະເພາະແລະຜົນງານເຈົ້າຫນ້າທີ່ຂອງລັດພວກເຮົາລ້ວນແຕ່ໄດ້ຍົກສູງຂຶ້ນຢ່າງຫຼວງຫຼາຍ,ທັງນີ້ແມ່ນມີການພົວພັນກັບການເຜີຍແຜ່ການຄັດເລືອກຜູ່ມີຄວາມຮູ້ຄວາມສາມາດຢ່າງເປີດເຜີຍແລະລະບອບໃຊ້ພະນັກງານ.
ທ່ານກ່າວວ່າ,ການຄັດເລືອກຢ່າງເປີດເຜີຍລວມມີສອງຮູບການຄື ຄັດເລືອກຢ່າງເປີດເຜີຍໃນທົ່ວສັງຄົມແລະພາຍໃນພະແນກຂອງຕົນເອງ.ຕາມສະຖິຕິ,ນັບມາຮອດດຽວນີ້,ໃນເຈົ້າຫນ້າທີ່ຂັ້ນຮອງຫົວຫນ້າກົມແລະຕ່ຳກວ່າຂັ້ນຮອງຫົວຫນ້າກົມທີ່ຈີນແຕ່ງຕັ້ງໃຫມ່ທຸກປີ,ມີ 30%ແມ່ນຄັດເລືອກເອົາຢ່າງເປີດເຜີຍ.
ປະຈຸບັນ,ຈີນໄດ້ມີລະບຽບການຄັດເລືອກເຈົ້າຫນ້າທີ່ຢ່າງເປີດເຜີຍເຄັ່ງຄັດທັງຊຸດແລ້ວ,ຈາກການປະກາດຄັດເລືອກ ສະຫມັກເຂົ້າຮ່ວມແລະສຳຫຼວດຄຸນວຸດທິຮອດການສອບເສັງເປັນເອກະພາບກັນ ຕົກລົງຜູ່ເລືອກເອົາ ພ້ອມດ້ວຍການເຮັດທຳນຽມດຳລົງຕຳແຫນ່ງເປັນຕົ້ນລ້ວນແຕ່ມີຂໍ້ກຳນົດອັນລະອຽດ.ໃນເວລາຄັດເລືອກເຈົ້າຫນ້າທີ່ຢ່າງເປີດເຜີຍນັ້ນ,ຕົ້ນຕໍເອົາໃຈໃສ່ສຳຫຼວດຄຸນທາດໃນສອງດ້ານຄື:ຄຸນສົມບັດແລະຄວາມສາມາດຂອງຜູ່ເຂົ້າຮ່ວມການຄັດເລືອກ.
ຄຸນສົມບັດຫມາຍເຖິງຄວາມຈົງຮັກພັກດີຕໍ່ປະເທດຊາດແລະຄຸນທາດຂອງສ່ວນບຸກຄົນ,ຕົ້ນຕໍແມ່ນຕ້ອງສຳຫຼວດໃນວຽກງານທີ່ຜ່ານມາຂອງຜູ່ກ່ຽວ,ແຕ່ຄວາມສາມາດແມ່ນສຳຫຼວດໂດຍຜ່ານການສອບເສັງແລະການສຳຫຼວດຕໍ່ຫນ້າ.ທັງໃຊ້ວິທີກວດສອບທາງດ້ານຄຸນທາດຈິດຕະສາດແລະທົດສອບແບບລອກແບບສະພາບຕົວເປັນຕົ້ນ,ເພື່ອສຳຫຼວດຄວາມສາມາດວິເຄາະ ສັງລວມ ຄວາມສາມາດຮັບມືໃນເວລາສະພາບປ່ຽນແປງ ຄວາມສາມາດປະຊາສຳພັນແລະຄວາມສາມາດຈັດຕັ້ງແລະປະສານງານເປັນຕົ້ນຂອງຜູ່ສະຫມັກເຂົ້າຮ່ວມການຄັດເລືອກ
ທ່ານຈູລີ້ເຈ່ຍ ສາດສະດາຈານສະຖາບັນການບໍລິຫານແຫ່ງຊາດຈີນຊີ້ອອກວ່າ,ປະຈຸບັນ,ການຄັດເລືອກພະນັກງານຢ່າງເປີດເຜີຍຂອງຈີນຕົ້ນຕໍແມ່ນຄັດເລືອກເຈົ້າຫນ້າທີ່ຜູ່ຮອງແລະເຈົ້າຫນ້າທີ່ທີ່ມີວິຊາສະເພາະແລະເຮັດ ວຽກຕົວຈິງ,ເພື່ອຊຸກຍູ້ໃຫ້ການເມືອງແບບປະຊາທິປະໄຕຂອງຈີນຂະຫຍາຍຕົວຕື່ມອີກ,ທ່ານສະເຫນີໃຫ້ລັດຖະບານຄວນເພີ່ມຄວາມແຮງໃນການຄັດເລືອກເຈົ້າຫນ້າທີ່ຕຳແຫນ່ງຫຼັກໃນດ້ານນະໂຍບາຍແລະການຕົກລົງວຽກງານຢ່າງເປີດເຜີຍ
ໃນການຄັດເລືອກເຈົ້າຫນ້າທີ່ຂັ້ນຕຳແຫນ່ງຫຼັກ,ກໍ່ຕ້ອງນຳໃຊ້ກົນໄກເປັນແບບສະບັບແລະກົນໄກຫັນເປັນແບບລະບຽບການເທື່ອລະກ້າວ,ຄັດເລືອກພະນັກງານຂັ້ນຕຳແຫນ່ງຫຼັກຢ່າງເປີດເຜີຍແບບປະຊາທິປະໄຕ,ນີ້ແມ່ນບັນຫາແກນກາງແຫ່ງການປະຕິຮູບລະບອບບຸກຄະລາກອນພະນັກງານຂອງຈີນ
|
