|
|
 |
| (GMT+08:00)
2004-11-19 11:01:04
|
 |
|
ນ້ຳຕານຖ້າກິນຫຼາຍຜົນຮ້າຍຂອງມັນຍັງແຮງກວ່າການສູບຢາ
cri
Author: li
 (CRI) ຂອງຫວານແມ່ນອາຫານທີ່ພວກເຮົາມັກກິນ. ແຕ່ອົງການອະນາໄມໂລກເມື່ອໄດ້ສຳຫຼວດມູນເຫດທີ່ພາໃຫ້ຄົນຕາຍຂອງປະຊາກອນຂອງ 23 ປະເທດແລ້ວ ໄດ້ຂໍ້ສະຫຼຸບວ່າ: ນ້ຳຕານຖ້າກິນຫຼາຍຜົນຮ້າຍຂອງມັນຍັງແຮງກວ່າການສູບຢາ,ກິນອາຫານທີ່ຫວານຫຼາຍເປັນເວລາຍາວນານຈະເຮັດໃຫ້ອາຍຸຂອງຄົນສັ້ນເຂົ້າຢ່າງເດັ່ນຊັດ,ແລະໄດ້ສະເໜີຄຳຂວັນທີ່ໃຫ້"ເຊົາກິນນ້ຳຕານ". ແຕ່ວ່າ,ຄົນສ່ວນຫຼາຍຍັງບໍ່ຮູ້ຜົນຮ້າຍຂອງການກິນນ້ຳຕານເທື່ອ.
ຢາກໃຫ້ຄົນເຊົາກິນນ້ຳຕານແມ່ນເລື່ອງຍາກຫຼາຍ,ຄັນຊັ້ນ,ໃນຊີວິດປະຈຳວັນ,ພວກເຮົາຄວນກິນນ້ຳຕານຫຼືກິນຂອງຫວານຫຼາຍປານໃດ? ນ້ຳຕານແນວໃດຈະດີກວ່າ?
ສັບວ່າ"ນ້ຳຕານ"ມີຄວາມໝາຍທົ່ວໄປແລະຄວາມໝາຍສະເພາະ. ຄວາມໝາຍທົ່ວໄປແມ່ນໝາຍເຖິງທາດຫວານປະເພດຕ່າງໆທີ່ຍ່ອຍໄດ້,ລວມທັງນ້ຳຕານທີ່ມີລົດຫວານແລະທາດແປ້ງທີ່ບໍ່ມີລົດຫວານ; ນ້ຳຕານໃນຄວາມໝາຍສະເພາະໝາຍເຖິງນ້ຳຕານຂາວຫຼືນ້ຳຕານຊາຍທີ່ປຸງແຕ່ງແລ້ວແລະນ້ຳເຊື່ອມທີ່ມັກໃຊ້ປຸງແຕ່ງອາຫານແລະເຄື່ອງດື່ມ. ທີ່ມີຜົນຮ້າຍຕໍ່ຄົນເຮົານັ້ນສຳຄັນແມ່ນນ້ຳເຊື່ອມ.
ໃນອາຫານຫວານເກືອບທັງໝົດລ້ວນແຕ່ມີທາດຫວານທີ່ເຮັດດ້ວຍນ້ຳຕານຂາວຫຼືນ້ຳເຊື່ອມຢ່າງຫຼວງຫຼາຍ. ສະນັ້ນ ເວົ້າສຳລັບເດັກນ້ອຍແລະຍິງໜຸ່ມທີ່ມັກກິນຂອງຫວານ,ເຂົ້າໜົມປັງ,ຂອງກິນຫຼິ້ນແລະເຄື່ອງດື່ມແລ້ວ,ການກິນນ້ຳຕານຂາວມື້ລະ 100 ກຼາມຂຶ້ນໄປແມ່ນເລື່ອງທຳມະດາ. ແຕ່ນັກໂພຊະນາການສະເໜີວ່າຂອງຫວານມື້ໜຶ່ງຢ່າງຫຼາຍໃຫ້ກິນແຕ່ 30 ຮອດ 40 ກຼາມທໍ່ນັ້ນ.
ນ້ຳຕານ 30 ຮອດ 40 ກຼາມແມ່ນຫຼາຍປານໃດ? ໃນຂອງຫວານທີ່ຄົນເຮົາກິນເລື້ອຍໆນັ້ນ,ໝາກໄມ້ກວນໜຶ່ງບວງໃຫຍ່ມີນ້ຳຕານປະມານ 15 ກຼາມ,ນ້ຳອັດລົມໂຄກໜຶ່ງກະປ໋ອງມີນ້ຳຕານປະມານ 37 ກຼາມ,ໂຊໂກລາ 3 ກ້ອນນ້ອຍມີນ້ຳຕານ 9 ກຼາມ,ໄອສ໌ຄີຼມກ້ອນໜຶ່ງມີນ້ຳຕານປະມານ 10 ກຼາມ…ຖ້າບໍ່ລະວັງ,ນ້ຳຕານໃນອາຫານທີ່ກິນກໍຈະເກີນ 30 ຮອດ 40 ກຼາມຢ່າງງ່າຍທີ່ສຸດ.
ນ້ຳຕານຂາວທີ່ປຸງແຕ່ງຢ່າງດີນັນມີທາດຫວານຫຼາຍທີ່ສຸດ,ຈົນເຖິງ 99%,ໝາຍຄວາມວ່າເກືອບບໍ່ມີທາດບຳລຸງແນວອື່ນຫຍັງເລີຍ,ມີແຕ່ກາໂລຣີແນວດຽວຢ່າງຫຼວງຫຼາຍ. ຖ້າກິນຂອງຫວານຫຼາຍ,ກໍຈະຮູ້ສຶກອີ່ມຍ້ອນກິນກາໂລຣີຫຼາຍໂພດ,ແລ້ວພາໃຫ້ເຊົາຢາກອາຫານອື່ນໆທີ່ມີໂປຼຕິນ,ວີຕາມິນ,ທາດແຮ່ແລະອາຫານເຍື້ອໄຍຕ່າງໆ. ດົນຕາມດົນ,ຈະພາໃຫ້ຂາດທາດບຳລຸງ,ເຕີບໂຕຊ້າ,ອ້ວນພີແລະເປັນພະຍາດອື່ນໆ.
ອີກດ້ານໜຶ່ງ,ການຂັບຖ່າຍທາດຫວານໃນຮ່າງກາຍຕ້ອງສິ້ນເປືອງວິຕາມິນແລະວັດຖຸທາດແຮ່ຫຼາຍຊະນິດ,ດັ່ງນັ້ນ,ການກິນນ້ຳຕານຫຼາຍໆຈະພາໃຫ້ຂາດທາດບຳລຸງຫຼາຍຢ່າງເຊັ່ນວິຕາມິນ,ການຊີອົມແລະຂາດທາດກາລີ. ນັກໂພຊະນາການຍີ່ປຸ່ນເຫັນວ່າ,ເດັກນ້ອຍກິນຂອງຫວານຫຼາຍເກີນໄປແມ່ນມູນເຫດສຳຄັນທີ່ພາໃຫ້ກະດູກຫັກ; ນັກໂພຊະນາການອາເມລິກາກໍຊີ້ອອກວ່າ,ເດັກນ້ອຍທີ່ມັກກິນຂອງຫວານກະດູກຈະຫັກງ່າຍ.
ການສຳຫຼວດດ້ານທາດບຳລຸງຍັງປະກົດເຫັນວ່າ,ເຖິງວ່າກິນນ້ຳຕານອາດຈະບໍ່ແມ່ນມູນເຫດໂດຍກົງທີ່ພາໃຫ້ເປັນໂຣກເບົາຫວານກໍຕາມ,ແຕ່ກິນຂອງຫວານຫຼາຍເລື້ອຍໆເປັນເວລາຍາວນານຈະພາໃຫ້ແອງສຸລີນຊຶມອອກຫຼາຍເກີນຄວາມຕ້ອງການ,ແລ້ວພາໃຫ້ການຂັບຖ່າຍທາດຫວານແລະໄຂມັນຜິດປົກກະຕິ,ພາໃຫ້ພາຍໃນຮ່າງກາຍເສຍຄວາມດຸນດ່ຽງກັນ,ແລ້ວພາໃຫ້ເປັນພະຍາດຊຳເຮື້ອຫຼາຍຊະນິດ,ຕົວຢ່າງຄືພະຍາດສາຍເລືອດສະໝອງແລະຫົວໃຈ,ໂຣກເບົາຫວານ,ໂຣກອ້ວນພີ,ຕາເຂົ້າເຝື້ອຜູ້ເຖົ້າ,ແຂ້ວແມງ,ສາຍຕາສັ້ນແລະພະຍາດດູກອ່ອນ. ກິນຂອງຫວານຫຼາຍຍັງຈະພາໃຫ້ເລືອດຫັນເປັນລັກສະນະອາສິດ,ບໍ່ມີຜົນດີຕໍ່ການໝູນວຽນຂອງເລືອດ,ແລະເສື່ອມສັບພະຄຸນລະບົບພູມຕ້ານທານ.
ຄວາມມັກກິນຂອງຫວານຍັງອາດຈະກາຍເປັນຄວາມແງ້ນໃນດ້ານສະລີລະສາດແລະຈິດໃຈ. ການຄົ້ນຄວ້າສະແດງໃຫ້ເຫັນວ່າ,ລົດຫວານແມ່ນລົດຊາດທີ່ມະນຸດຮັບເອົາແລະຊອກຫາກ່ອນໝູ່ຫຼັງຈາກເກີດອອກມາຈາກທ້ອງແມ່,ການມັກກິນຂອງຫວານແມ່ນສັນຊາດຍານຂອງມະນຸດ. ການທົດລອງທາງແພດສາດຢັ້ງຢືນວ່າ,ເວົ້າໃນດ້ານຄວາມໝາຍໃດໜຶ່ງແລ້ວ,ຂອງຫວານທີ່ໃສ່ນ້ຳຕານຫຼາຍ ບົດບາດຂອງມັນແມ່ນຄ້າຍຄືກັນກັບຢາເສບຕິດ. ຖ້າໃຫ້ສັດກິນຂອງຫວານເປັນປະຈຳຈົນມັນລື້ງ,ກໍຈະກະຕຸກສະໝອງຂອງມັນ,ເຮັດໃຫ້ມັນຮູ້ສຶກມ່ວນດີໃຈ. ເມື່ອໃດເຊົາໃຫ້ມັນກິນຂອງຫວານ,ມັນກໍຈະຮູ້ສຶກທໍລະມານ,ຫງຸດຫງິດ,ວັດຖຸເຄມີໃນສະໝອງຂອງມັນຈະເສຍຄວາມດຸນດ່ຽງ. ປະກົດການດັ່ງກ່າວແມ່ນຄ້າຍຄືກັນທີ່ສຸດກັບປະຕິກິລິຍາຕິດແງ້ນຢາເສບຕິດ.
ເຖິງວ່າກິນຂອງຫວານຫຼາຍຈະເປັນໂທດຕໍ່ຮ່າງກາຍກໍຕາມ,ແຕ່ຖ້າກິນໜ້ອຍໜຶ່ງໃນເວລາອັນເໝາະສົມ,ມັນກໍມີຜົນດີອັນແນ່ນອນຕໍ່ສຸຂະພາບ. ຕົວຢ່າງຄືໃນເວລາທາດຫວານໃນເລືອດຕ່ຳລົງ,ກິນນ້ຳຕານບາງເລັກໜ້ອຍສາມາດຕາບຈູນໂດຍດ່ວນ. ໃນເວລາທາດຫວານເລືອດຕ່ຳ,ຫິວເຂົ້າ,ຈະຮູ້ສຶກໜ້າມືດ,ແຂນຂາຫຼ່ອຍ,ວິທີແກ້ດີທີ່ສຸດກໍແມ່ນຊງນ້ຳຕານກິນຈອກໜຶ່ງໃນທັນທີ. ຜູ້ທີ່ບໍ່ມັກກິນອາຫານເຊົ້າ ເມື່ອຮອດໃກ້ທ່ຽງມັກຮູ້ສຶກວິນ,ໃຈບໍ່ຕ້ອມ,ຄວາມສາມາດຄິດຫງຳກໍຕ່ຳລົງ,ເວລານີ້ ຖ້າກິນຂອງຫວານໜ້ອຍໜຶ່ງກໍຈະພາໃຫ້ມີແຮງຂຶ້ນໂລດ.
ນອກນີ້ ການຄົ້ນຄວ້າແພດສາດກິລາຢັ້ງຢືນວ່າ,ກ່ອນຫຼິ້ນກິລາທີ່ດຸເດືອດ ນັກກິລາຖ້າກິນເຄື່ອງດື່ມຫວານຈັກໜ້ອຍ,ຈະຊ່ອຍໃຫ້ພວກເຂົາເຈົ້າໄດ້ຮັບຜົນງານດີຂຶ້ນ; ຫຼັງຈາກຫຼິ້ນກິລາແລ້ວກິນເຄື່ອງດື່ມຫວານຫຼືນ້ຳຕານ,ສາມາດແກ້ອິດເໝື່ອຍ. ຄົນທຳມະດາຖ້າກິນຂອງຫວານຫຼືນ້ຳຕານໜ້ອຍໜຶ່ງກ່ອນອາບນ້ຳຫຼືໃນເວລາຫິວເຂົ້າກໍມີຜົນດີເຊັ່ນດຽວກັນ.
ໃນເມື່ອກິນນ້ຳຕານກໍມີຜົນດີຕໍ່ຮ່າງກາຍແລ້ວ,ຄັນຊັ້ນ ຕ້ອງເລືອກກິນນ້ຳຕານແນວໃດ? ຖ້າຢາກໃຫ້ມີຜົນດີຕໍ່ສຸຂະພາບແລ້ວ,ດີທີ່ສຸດໃຫ້ກິນນ້ຳຕານຫຼາຍຊະນິດດັ່ງລຸ່ມນີ້:
ໜຶ່ງແມ່ນນ້ຳອ້ອຍ. ຄົນຈີນເອີ້ນນ້ຳຕານແດງຫຼືນ້ຳຕານດຳ,ນ້ຳອ້ອຍມີວັດຖຸທາດແຮ່ຫຼາຍຢ່າງເຊັ່ນເຫຼັກ,ການຊີອົມ,ກາລີແລະມາເຍຊີອົມ,ມີຄຸນຄ່າບຳລຸງຫຼາຍສົມຄວນ.ແຕ່ວ່າຖ້າກິນນ້ຳອ້ອຍຫຼາຍ,ຈະພາໃຫ້ຮ້ອນໃນ,ມັກຄໍແຫ້ງ,ສະນັ້ນກໍບໍ່ຄວນກິນຫຼາຍ.
ສອງແມ່ນນ້ຳຕານໝາກໄມ້,ນ້ຳຕານເຂົ້າໝັກ. ນ້ຳຕານສອງປະເພດນີ້ມີກາໂລຣີຕ່ຳ,ຊ່ອຍຈຸລິນຊີທີ່ມີປະໂຫຍດໃນຮ່າງກາຍເຕີບໃຫຍ່,ລະງັບການແຜ່ເຊື້ອຂອງແມ່ພະຍາດໃນລຳໄສ້ແລະແມ່ພະຍາດເປື່ອຍເນົ່າ.
ສາມແມ່ນນ້ຳຕານໄມ້,ນ້ຳຕານໂຊບິນເປັນຕົ້ນ,ນ້ຳຕານປະເພດນີ້ບໍ່ຫວານທໍ່ນ້ຳຕານຊາຍ. ກາໂລຣີກໍຕ່ຳ,ບໍ່ພາໃຫ້ເປັນແຂ້ວແມງ,ບໍ່ພາໃຫ້ທາດຫວານໃນເລືອດສູງຂຶ້ນ,ແມ່ນທາດຫວານທີ່ບຳລຸງສຸຂະພາບ. ແຕ່ດີທີ່ສຸດ,ມື້ໜຶ່ງບໍ່ໃຫ້ກິນກາຍ 20 ກຼາມ,ເພາະວ່າກິນຫຼາຍຈະພາໃຫ້ລົງທ້ອງ.
|
|
|
