|
|
 |
| (GMT+08:00)
2004-11-22 20:47:41
|
 |
|
ສັງເກດການໄປຢ້ຽມຢາມປາເລັສຕິນແລະອິດສະລາແອນຂອງທ່ານພໍແວວ ລັດຖະມົນຕີການຕ່າງປະເທດອາເມລິກາ
cri
Author: MO
ຕາມຂ່າວCRI：ວັນທີ 21 ພະຈິກ, ທ່ານພໍແວວ ລັດຖະມົນຕີການຕ່າງປະເທດອາເມລິກາໄດ້ເດີນທາງໄປຮອດອິດສະລາແອນເພື່ອຢ້ຽມຢາມເຂດປາເລັສຕີນແລະອິດສະລາແອນເປັນເວລາມື້ໜຶ່ງ. ນີ້ແມ່ນທ່ານພໍແວວໄປຢ້ຽມຢາມເຂດປາເລັສຕີນແລະອິດສະລາແອນເປັນຄັ້ງທຳອິດພາຍໃນປີເຄິ່ງທີ່ຜ່ານມາ. ຫາງສຽງເຫັນວ່າ, ນີ້ມີຄວາມໝາຍວ່າ, ອາເມລິກາເລີ່ມປັບປຸງນະໂຍບາຍຕໍ່ປາເລັສຕີນແລະອິດສະລາແອນຂອງຕົນເປັນເທື່ອລະກ້າວພາຍຫລັງທ່ານອາລາຟັດ ຜູ້ນຳປາເລັສຕີນເຖິງແກ່ກຳ, ແລະເພີ່ມຄວາມແຮງໃນການໄກ່ເກ່ຍຕໍ່ການປະທະກັນລະຫວ່າງປາເລັສຕີນກັບອິດສະລາແອນ.
ໃນໄລຍະຢ້ຽມຢາມ, ທ່ານພໍແວວຈະພົບປະເຈລະຈາກັບທ່ານຊາລົງ ນາຍົກລັດຖະມົນຕີແລະທ່ານຊາໂລມ ລັດຖະມົນຕີການຕ່າງປະເທດຂອງອິດສະລາແອນ, ຕໍ່ຈາກນັ້ນ, ທ່ານຈະໄປເມືອງເຈລີໂຄ ຕົວເມືອງຝັ່ງຕາເວັນຕົກແມ່ນ້ຳຈໍແດນເພື່ອພົບປະຜູ້ນຳປາເລັສຕິນ. ຕາມສື່ມວນຊົນອິດສະລາແອນລາຍງານວ່າ, ທ່ານພໍແວວຈະຮຽກຮ້ອງໃຫ້ກອງທະຫານອິດສະລາແອນຜ່ອນຍານການຈຳກັດຕໍ່ການເຄື່ອນໄຫວຂອງຊາວປາເລັສຕິນ, ຖອນອອກຈາກຕົວເມືອງປາເລັສຕີນ, ຫລຸດຜ່ອນການເຄື່ອນໄຫວທາງການທະຫານທີ່ແນໃສ່ປາເລັສຕີນ, ເພື່ອສ້າງເງື່ອນໄຂໃຫ້ການເລືອກຕັ້ງທົ່ວໄປຂອງປາເລັສຕີນທີ່ຈະຈັດຂຶ້ນໃນເດືອນມັງກອນປີໜ້າ.
ຝ່າຍປາເລັສຕີນເອົາໃຈໃສ່ທີ່ສຸດນຳການຢ້ຽມຢາມປາເລັສຕີນແລະອິດສະລາແອນຂອງທ່ານພໍແວວເທື່ອນີ້, ຫວັງຖືໂອກາດນີ້ສະແດງຄວາມຈິງໃຈຕໍ່ຝ່າຍອາເມລິກາກ່ຽວກັບການຈັດການເຈລະຈາສັນຕິພາບລະຫວ່າງປາເລັສຕີນກັບອິດສະລາແອນຄືນໃໝ່, ແລະຮຽກຮ້ອງໃຫ້ອາເມລິກາໃຊ້ກຳລັງໜີບຕໍ່ອິດສະລາແອນ, ຢ່າລົບກວນການເລືອກຕັ້ງທົ່ວໄປຂອງປາເລັສຕິນ, ສ້າງສະພາບແວດລ້ອມພາຍນອກທີ່ດີງາມໃຫ້ແກ່ການມອບຮັບອຳນາດປາເລັສຕີນຢ່າງໝັ້ນທ່ຽງແລະໃຫ້ບັນດາຝ່າຍພາຍໃນປາເລັສຕີນຜ່ອນສັ້ນຜ່ອນຍາວແກ່ກັນ.
ກ່ອນທ່ານພໍແວວໄປຢ້ຽມຢາມ, ຫລັກໝັ້ນຂອງອິດສະລາແອນໃນບັນຫາປາເລັສຕິນອິດສະລາແອນໄດ້ມີຮ່ອງຮອຍໂຍະຍານຈຳນວນໜຶ່ງ. ຕາມຊາບວ່າ, ອິດສະລາແອນອາດຈະຕອບສະໜອງຄວາມຮຽກຮ້ອງຂອງທ່ານພໍແວວ, ພະຍາຍາມບໍ່ສ້າງອຸປະສັກໃຫ້ແກ່ການເລືອກຕັ້ງທົ່ວໄປຂອງປາເລັສຕີນ. ວັນທີ 18 ພະຈິກ, ທ່ານຊາລົງ ນາຍົກລັດຖະມົນຕີອິດສະລາແອນຍັງກ່າວວ່າ, ທ່ານເຂົ້າໃຈວ່າ, ຝ່າຍປາເລັສຕີນທັບມ້າງອົງການກໍ່ການຮ້າຍຍັງຕ້ອງການເວລາຢູ່, ສະນັ້ນ, ເພື່ອກວດສອບຄວາມຈິງໃຈແຫ່ງສັນຕິພາບຂອງຂັ້ນນຳປາເລັສຕີນ, ທ່ານສະເໜີວ່າ, ກ່ອນຝ່າຍປາເລັສຕີນເລີ່ມຕົ້ນແຜນການເສັ້ນທາງສັນຕິພາບຢູ່ຕາເວັນອອກກາງ, ຕ້ອງຢຸດຕິການໂຄສະນາແລະການສຶກສາຕ້ານອິດສະລາແອນ. ພາຍຫລັງທ່ານອາລາຟັດເຖິງແກ່ກຳແລ້ວ, ທ່ານຊາລົງໄດ້ກ່າວໂດຍຕະຫລອດວ່າ, ຝ່າຍປາເລັສຕີນລົບລ້າງລັດທິກໍ່ການຮ້າຍຢ່າງເຖິງຖອງແມ່ນເງື່ອນໄຂເບື້ອງຕົ້ນເລີ່ມຕົ້ນການເຈລະຈາສັນຕິພາບປາເລັສຕີນອິດສະລາແອນຄືນໃໝ່, ມີການວິເຄາະເຫັນວ່າ, ຄຳປາໄສຂອງທ່ານຊາລົງໃນວັນທີ 18 ພະຈິກໄດ້ສະແດງໃຫ້ເຫັນວ່າ, ທ່ານໄດ້ຜ່ອນຍານລົງແດ່ໃນບັນຫາດັ່ງກ່າວນີ້.
ແຕ່ວ່າ, ມີຜູ້ວິເຄາະຊີ້ອອກວ່າ, ເຖິງວ່າຮ່ອງຮອຍຕ່າງໆສະແດງໃຫ້ເຫັນວ່າ, ອາເມລິກາຈະເພີ່ມຄວາມແຮງໃນການໄກ່ເກ່ຍການປະທະກັນລະຫວ່າງປາເລັສຕີນກັບອິດສະລາແອນ, ແຕ່ກ່ອນສະເຫລີຍຜົນການເລືອກຕັ້ງທົ່ວໄປຂອງປາເລັສຕີນ, ລະຫວ່າງປາເລັສຕີນອິດສະລະແອນບໍ່ອາດຈະດຳເນີນການເຈລະຈາສັນຕິພາບທີ່ມີຄວາມໝາຍແທ້ຈິງ. ກ່ອນອື່ນ, ສະຖານະການການເມືອງປາເລັສຕີນໃນສະເພາະໜ້ານນີ້ຍັງຄົງມີຄວາມບໍ່ຄັກແນ່ຫລາຍ, ລະຫວ່າງຝ່າຍຕ່າງໆຂອງປາເລັສຕີນຍັງມີຄວາມເຫັນຂັດກັນຫລາຍໃນການຢຸດຍິງຕໍ່ອິດສະລາແອນ ການຈັດການເລືອກຕັ້ງທົ່ວໄປແນວໃດເປັນຕົ້ນ, ການເລືອກຕັ້ງທົ່ວໄປຂອງປາເລັສຕີນຈະດຳເນີນໄປຢ່າງສະດວກຫລືບໍ່ແລະໃຜຈະຮັບໄຊຊະນະໃນການເລືອກຕັ້ງນັ້ນ, ອາເມລິກາແລະອິດສະລາແອນກໍບໍ່ຮູ້ເທື່ອ.
ຖັດມາ, ພາຍຫລັງທ່ານອາລາຟັດເຖິງແກ່ກຳຍ້ອນເປັນພະຍາດແລ້ວ, ລັດຖະບານບຸສຂອງອາເມລິກາເຖິງຈະມີຄວາມຕິດໃຈບັນຫາປາເລັສຕີນອິດສະລາແອນຄືນໃໝ່ກໍ່ຕາມ, ແຕ່ຄຳໝັ້ນສັນຍາທີ່ອາເມລິກາທຳອອກໃນປະຈຸບັນຍັງໄກຫລາຍກັບຄວາມປາຖະໜາຂອງຂັ້ນນຳປາເລັສຕີນ. ບຸກຄົນວິເຄາະເຫັນວ່າ, ການຢ້ຽມຢາມປາເລັສຕີນແລະອິດສະລາແອນຂອງທ່ານພໍແວວເທື່ອນີ້ພຽງແຕ່ເປັນການເລີ່ມຕົ້ນທໍ່ນັ້ນ, ລັດຖະບານບຸສອາເມລິກາຈະເຮັດແນວໃດປະຕິບັດຕາມຄຳໝັ້ນສັນຍາຂອງຕົນໃນການຊຸກຍູ້ການສ້າງຕັ້ງປະເທດປາເລັສຕີນນັ້ນ, ຍັງຕ້ອງຄອຍຖ້າສັງເກດເບິ່ງຕໍ່ໄປ.
|
|
|
