|
ຕາມຂ່າວCRI: ວັນທີ 22 ພະຈິກ ຢູ່ທີ່ຊາມ ແອນ-ເຊັກ, ທ່ານອາເມັດ ອາບູນ ເກອິດ ລັດຖະມົນຕີການຕ່າງປະເທດເອຢິບກ່າວວ່າ, ກອງປະຊຸມລັດຖະມົນຕີການຕ່າງປະເທດຂອງປະເທດອ້ອມຂ້າງອີຣັກຄັ້ງທີ 7 ໄດ້ຮັບໝາກຜົນອັນຕັ້ງໜ້າ.
ທ່ານເກອິດກ່າວວ່າ, ບັນດາຝ່າຍທີ່ຮ່ວມປະຊຸມໄດ້ຫາລືສະຖານະການອີຣັກໃນສະເພາະໜ້າແລະບັນຫາການເລືອກຕັ້ງທົ່ວໄປຂອງອີຣັກທີ່ຈະຈັດຂຶ້ນໃນຕົ້ນປີໜ້າ, ໄດ້ຮັບຟັງບົດລາຍງານການປະເມີນຫຼ້າສຸດກ່ຽວກັບສະຖານະການອີຣັກຂອງຜູ່ແທນສະຫະປະຊາຊາດ. ລັດຖະມົນຕີການຕ່າງປະເທດທີ່ຮ່ວມປະຊຸມຍັງໄດ້ຫາລືຄຳຖະແຫຼງການຊາມ ແອນ-ເຊັກທີ່ກຽມຈະມອບໃຫ້ກອງປະຊຸມສາກົນກ່ຽວກັບບັນຫາອີຣັກທີ່ຈັດຂຶ້ນໃນວັນທີ 23 ພະຈິກນີ້, ແລະໄດ້ກ້າວເຖິງຂັ້ນຕົກລົງກັນກ່ຽວກັບເນື້ອໃນຄຳຖະແຫຼງການ.
ທ່ານເຈບາລີ ລັດຖະມົນຕີການຕ່າງປະເທດລັດຖະບານຊົ່ວຄາວອີຣັກທີ່ຮ່ວມປະຊຸມກ່າວວ່າ, ເນື່ອງຈາກສະຖານະການພາຍໃນປະເທດອີຣັກຍັງປັ່ນປ່ວນຢູ່, ການວາງຕາລາງເວລາຖອນກອງທະຫານປະສົມໃນດຽວນີ້ໂລດຍັງບໍ່ເໝາະສົມເທື່ອ.
ໃນມື້ດຽວກັນ ທ່ານວາງກວາງຢາ ທູດພິເສດຂອງລັດຖະບານຈີນ ຜູ່ແທນຈີນປະຈຳສະຫະປະຊາຊາດທີ່ເຂົ້າຮ່ວມກອງປະຊຸມສາກົນກ່ຽວກັບບັນຫາອີຣັກໄດ້ແຍກອອກພົບປະທ່ານເກອິດ ທ່ານລາວຼົຟ ລັດຖະມົນຕີການຕ່າງປະເທດຣັດເຊຍແລະສະເດັດຊຸດ ອານ-ແຟຊານ ລັດຖະມົນຕີການຕ່າງປະເທດອາລາບີຊາອູດິດ, ໄດ້ແລກປ່ຽນຄວາມເຫັນກ່ຽວກັບບັນຫາອີຣັກ. ທ່ານວາງກວາງຢາກ່າວວ່າ, ແກ້ໄຂບັນຫາອີຣັກຕ້ອງການການສະໜັບສະໜູນທົ່ວໄປຈາກປະຊາຄົມໂລກ, ສະຫະປະຊາຊາດຄວນເສີມຂະຫຍາຍບົດບາດໃຫຍ່ຫຼວງກວ່າເກົ່າ.
|
