|
ຊື່ເຕັມຂອງກຳປູເຈຍແມ່ນພະລາດຊະອານາຈັກກຳປູເຈຍ, ທົ່ວປະເທດກຳປູເຈຍກວ້າງ 1 ແສນ 8 ໝື່ນ 1 ພັນ 35 ກິໂລແມັດມົນທົນ, ນະຄອນຫຼວງຢູ່ພະນົມເປັນ. ກຳປູເຈຍຕັ້ງຢູ່ພາກໃຕ້ແຫຼມອິນດູຈີນ, ພາກເໜືອແດນຕໍ່ແດນກັບລາວ, ພາກຕາເວັນຕົກສຽງເໜືອຕິດກັບໄທ, ພາກຕາເວັນອອກແລະພາກຕາເວັນອອກສຽງໃຕ້ຕິດກັບຫວຽດນາມ, ພາກຕາເວັນຕົກສຽງໃຕ້ແມ່ນອ່າວໄທ. ແມ່ນ້ຳຂອງ ໄຫຼຜ່ານພາກຕາເວັນອອກແຫ່ງກຳປູເຈຍ, ຍາວ 500 ກິໂລແມັດ. ອາກາດຂອງກຳປູເຈຍແມ່ນອາກາດລົມມໍສະສຸມແຖບຮ້ອນ, ສະເລ່ຍໃນຕະຫຼອດປີອຸນຫະພູມຢູ່ລະຫວ່າງ 29 ຫາ 30 ອົງສາ.
ນັບມາຮອດປີ 1998, ກຳປູເຈຍມີປະຊາກອນ 11 ລ້ານ 4 ແສນ 3 ໝ່ືນຄົນ. ໃນນັ້ນ, ມີ 84.3% ຊົນນະບົດ. ຢູ່ກຳປູເຈຍມີ 20 ກວ່າຊົນເຜົ່າ, ເຜົ່າຂະແມກວມປະຊາກອນທົ່ວປະເທດ 80%. ພາສາຂະແມແມ່ນພາສາທີ່ໃຊ້ທົ່ວໄປ, ກໍແມ່ນພາສາທາງການພ້ອມກັບພາສາອັງກິດແລະພາສາຝະລັ່ງ. ສາສະໜາພຸດແມ່ນສາສະໜາແຫ່ງຊາດກຳປະປູເຈຍ, ມີປະຊາກອນ 80% ຂຶ້ນໄປເຊເຊື່ອຖືສາສະໜາພຸດ. ປະຊາຊົນກຳປູເຈຍທີ່ດຸໝັ່ນແລະໃຈບຸນໄດ້ປະດິດສ້າງວັດທະນະທຳຊາດທ່ີສະຫງ່າລາສີ, ອາລິຍະທຳອັງກໍວັດມີຊື່ສຽງດົງດັງໃນທົ່ວໂລກ.
ທຸງຊາດແຫ່ງກຳປູເຈຍແມ່ນຮູບສ່ີຫຼ່ຽມຍາວ, ແມ່ນປະກອບໂດຍສາມຮູບສີ່ ຫຼ່ຽມທາງຂວາງທ່ຮຽງກັນ, ຢູ່ພາກກາງແມ່ນສີແດງ, ພາກເທິງແລະພາກລຸ່ມລ້ວນແຕ່ແມ່ນສີຟ້າ. ສີແດງເປັນສັນຍາເລັກສິລິມຸງຄຸນ, ສີຟ້າເປັນສັນຍາເລັກແຫ່ງຄວາມສະຫວ່າງສະໄຫວແລະເສລີພາບ. ໃນພາກກາງທ່ີເປັນສີແດງມີຮູບອັງກໍວັດສີຂາວແລະມີຂອບສີຄຳທີ່ເປັນສ່ິງກໍ່ສ້າງທີ່ຊື່ດັງຂອງສາສະໜາພຸດ ເຊິ່ງໝາຍເຖິງປະຫວັດສາດອັນຍາວນານແລະວັດທະນະທຳອັນເກົ່າແກ່ຂອງກຳປູເຈຍ.
ກາໝາຍປະຈຳຊາດກຳປູເຈຍແມ່ນຮູບດາບເຈົ້າຊີວິດເປັນເສັ້ນຜ່ານກາງ. ດາບເຈົ້າຊີວິດໃນຮູບສ່ີແຈແຫຼມຮອງໂດຍຖາດ, ໝາຍເຖິງພະບໍລົມເດຊານຸພາບຢູ່ເໜືອທຸກສິ່ງທຸກຢ່າງ; ຢູ່ສອງຂ້າງແມ່ນສິງໂຕເຝົ້າຄັນຮົ່ມ 5 ຊັ້ນ, ໂຕໜັງສື 5 ໃນຮີດຄອງປະເພນີຂອງກຳປູເຈຍໝາຍເຖິງຄວາມສິລິມຸງຄຸນ, ໃບຕົ້ນໄມ້ປາມຢູ່ສອງຂ້າງໝາຍເຖິງໄຊຊະນະ. ຢູ່ເທິງໂປທີ່ພາກລຸ່ມໄດ້ໜັງສືຂຽນຂະແມໃສ່ວ່າເຈົ້າຊີວິດຂອງພະລາດຊະອານາຈັກກຳປູເຈຍ. ໝົດທັງຮູບໝາຍເຖິງພະລາດຊະອານາຈັກກຳປູເຈຍແມ່ນປະເທດອັນເອກກະພາບ ຄົບຖ້ວນ ສາມາຄີແລະສຸກສຳລານໃຕ້ການນຳພາຂອງເຈົ້າຊີວິດ.
ລັດຖະທຳມະນູນແຫ່ງກຳປູເຈຍລະບູໄວ້ວ່າ, ກຳປູເຈຍເປັນປະເທດພະລາດຊະອານາຈັກໃຕ້ລະບອບລາຊາທິປະໄຕລັດຖະທຳມະນູນ, ສາມອຳນາດ ຄື, ນິຕິບັນຍັດ ບໍລິຫານ ຍຸຕິທຳແຍກກັນເປັນເອກ. ເຈົ້າຊີວິດແມ່ນປະມຸກລັດຕະຫຼອດຊີວິດ ຜູ່ບັນຊາການສູງສຸດຂອງກອງທັບແຫ່ງຊາດແລະເປັນສັນຍະເລັກແຫ່ງຄວາມເປັນເອກກະພາບແຫ່ງຊາດແລະການຊົງຕົວຢູ່ຊົ່ວກາວະນານ, ມີສິດປະກາດນີລະໂທດ ຍຸບສະພາໂດຍອີງຕາມຂໍ້ສະເໜີຂອງນາຍົກລັດຖະມົນຕີແລະໄດ້ຮັບຄວາມເຫັນດີຈາກປະທານສະພາແຫ່ງຊາດ. ໃນຊົ່ວໄລຍະທ່ີເຈົ້າຊີວິດບໍ່ສາມາດປົກຄອງລັດຫຼືວ່າບໍ່ຢູ່ພາຍໃນປະເທດ, ຈະໃຫ້ປະທານສະພາສູງເປັນຕົວແທນດຳລົງຕຳແໜ່ງປະມຸກລັດ. ພະລາຊະບັນລັງຈະສືບທອດບໍ່ໄດ້, ຫຼັງຈາກເຈົ້າຊີວິດສະຫວັນລະຄົດແລ້ວ, ໃຫ້ຄະນະກຳມະການພະລາຊະບັນລັງ 9 ຄົນທ່ີປະກອບດ້ວຍນາຍົກລັດຖະມົນຕິ ສົມເດັດພະສັງຄະລາດທັງສອງນິກາຍ ປະທານແລະຮອງປະທານສະພາສູງສະພາແຫ່ງຊາດສະເໜີເຊື້ອສາຍຮຸ້ນຫຼັງໃນພະບໍລົມວົງສານຸວົງເປັນເຈົ້າຊີວິດອົງໃໝ່. ສະພາແຫ່ງຊາດແມ່ນອົງການອຳນາດສູງສຸດແລະນິຕິບັນຍັດແຫ່ງຊາດກຳປູເຈຍ, ແຕ່ລະຊຸດມີອາຍຸ 5 ປີ. ສະພາສູງມີສິດພິຈາລະນາມາດຕາທ່ີຮັບຜ່ານໃນສະພາແຫ່ງຊາດແລະປະກອບຄວາມຄິດຄວາມເຫັນ.
ວັນທີ 24 ມີຖຸນາແມ່ນວັນຊາດຂອງກຳປູເຈຍ. ກຳປູເຈຍປະຕິບັດນະໂຍບາຍການຕ່າງປະເທດເປັນເອກກະລາດ ສັນຕິພາບ ເປັນກາງຖາວອນແລະບໍ່ຮ່ວມກຸ່ມ, ຍຶດຖືໂຄລົບແລະປະຕິບັດຫຼັກ 5 ປະການຢູ່ຮ່ວມກັນໂດຍສັນຕິ, ສ້າງການພົວພັນໄມຕິຈິດກັບທຸກປະເທດໃກ້ຄຽງ. ກຳປູເຈຍເຂົ້າເປັນສະມາຊິກຂອງອາຊຽນຢ່າງເປັນທາງການເມ່ືອເດືອນເມສາ ປີ 1999.
|
