|
ຕາມຂ່າວ CRI: "ບົດລາຍງານກຳລັງແກ່ງແຍ່ງຂອງເອີລົບ" ປີ 2004ທີ່ຄະນະກຳມາທິການສະຫະພາບເອີລົບປະກາດໃນວັນທີ 25 ພະຈິກເຫັນວ່າ, ການພັດທະນາຂອງຈີນໄດ້ເປັນການທ້າທາຍຕໍ່ກຳລັງແກ່ງແຍ່ງຂອງສະຫະພາບເອີລົບ ທັງໄດ້ນຳເອົາໂອກາດມາໃຫ້ສະຫະພາບເອີລົບ. ບົດລາຍງານຂຽນວ່າ, ໃນເວລາຈີນດຳເນີນການປະຕິຮູບເສດຖະກິດນັ້ນ ໄດ້ຊຳລະກຳແພງຕະຫຼາດຢ່າງຫຼວງຫຼາຍ. ພາຍຫຼັງຈີນເຂົ້າຮ່ວມອົງການການຄ້າໂລກແລ້ວ, ຍັງຈະໃຊ້ມາດຕະການໃໝ່ຫຼາຍຢ່າງຕໍ່ເນື່ອງກັນເພື່ອເປີດຕະຫຼາດ.ຈີນທີ່ໄຂປະຕູໄດ້ນຳເອົາໂອກາດການຄ້າແລະການລົງທຶນອັນມະຫາສານມາໃຫ້ວິສາຫະກິດສະຫະພາບເອີລົບ.
ແຕ່ປີ 1994 ເປັນຕົ້ນມາ, ຄະນະກຳມາທິການສະຫະພາບເອີລົບໄດ້ປະກາດ "ບົດລາຍງານກຳລັງແກ່ງແຍ່ງຂອງເອີລົບ" ປີລະເທື່ອ, ວິເຄາະແລະສະຫຼຸບຢ່າງລະອຽດຕໍ່ກຳລັງແກ່ງແຍ່ງຂອງປະເທດສະມາຊິກສະຫະພາບເອີລົບ. ບົດລາຍງານຂອງປີນີ້ແບ່ງອອກເປັນ 5 ພາກສ່ວນ, ພາກສ່ວນທີ 5 ໄດ້ວິເຄາະໂດຍຈຳເພາະຕໍ່ການພັດທະນາເສດຖະກິດຂອງຈີນເປັນສິ່ງທ້າທາຍຕໍ່ກຳລັງແກ່ງແຍ່ງຂອງສະຫະພາບເອີລົບ, ໄດ້ບັນບາຍເປັນຈຸດໜັກກ່ຽວກັບການປ່ຽນແປງໃນການຄ້າລະຫວ່າງຈີນເອີລົບທີ່ເກີດຂຶ້ນໃນຫວ່າງມໍ່ໆນີ້ ນະໂຍບາຍອຸດສາຫະກຳຂອງຈີນແລະສະພາບທຶນພາຍນອກໄຫຼເຂົ້າຈີນ.
ບົດລາຍງານຂຽນວ່າ, ໃນ 25 ປີຜ່ານມາ, ເສດຖະກິດຈີນໄດ້ພັດທະນາຢ່າງວ່ອງໄວ. ແຕ່ປີ 1979 ຫາປີ 2002, ຈັງຫວະເຕີບໂຕຂອງ GNP ສະເລ່ຍແລ້ວໄດ້ບັນລຸ 9%. ໃນຜະລິດຕະພັນທີ່ຈີນສົ່ງອອກໃຫ້ສະຫະພາບເອີລົບ, ຜະລິດຕະພັນວິທະຍາສາດເຕັກນິກສຸມ ປັນຍາສຸມແລະທຶນສຸມໄດ້ກວມອັດຕານັບມື້ນັບສູງ.
ແຕ່ກ່ອນ, ໃນດ້ານນຳເຂົ້າສິນຄ້າ ສະຫະພາບເອີລົບຕົ້ນຕໍໄດ້ປະເຊີນກັບການແກ່ງແຍ່ງຂອງຜະລິດຕະພັນແຮງງານສຸມຂອງຈີນ. ແຕ່ປະຈຸບັນ, ນະໂຍບາຍອຸສາຫະກຳອັນຕັ້ງໜ້າຂອງຈີນໄດ້ເຮັດໃຫ້ຈີນກາຍເປັນຜູ່ມີກຳລັງແກ່ງແຍ່ງຍ້ອນອຸດສາຫະກຳໄຮເທັກຕົ້ນທຶນຕ່ຳ. ໃນດ້ານຜະລິດຕະພັນເຕັກນິກຂໍ້ມູນຂ່າວສານ, ຈີນແມ່ນປະເທດສຳຄັນທີ່ສະຫະພາບເອີລົບສົ່ງຂາຍອຸບປະກອນໂທລະຄົມແລະຄອມພິວເຕີ, ຈຳນວນຈີນນຳເຂົ້າຜະລິດຕະພັນເຫຼົ່ານີ້ເພີ່ມຂຶ້ນ 20% ຮອດ 30% ຕໍ່ປີ. ໃນຜະລິດຕະພັນທີ່ຈີນສົ່ງຂາຍໃຫ້ 15 ປະເທດສະຫະພາບເອີລົບນັ້ນ, ຜະລິດຕະພັນໄຮເທັກໄດ້ລື່ນກາຍ 20% ແລ້ວ, ແມ່ນສອງເທົ່າຂອງຈຳນວນທີ່ 10 ປະເທດສະມາຊິກໃໝ່ຂອງສະຫະພາບເອີລົບທີ່ສົ່ງຂາຍໃຫ້ 15 ປະເທດສະຫະພາບເອີລົບ.
ບົດລາຍງານເຫັນວ່າ, ຈີນໃນຖານເປັນຜູ່ຜະລິດຜະລິດຕະພັນໄຮເທັກມີຖານະນັບມື້ນັບສຳຄັນ ເປັນການສ່ອງແສງຢ່າງໜຶ່ງໃຫ້ເຫັນນະໂຍບາຍອຸດສາຫະກຳອັນແຈ່ມແຈ້ງຂອງລັດຖະບານຈີນ. ນະໂຍບາຍອຸດສາຫະກຳຂອງຈີນໄດ້ຮັບເອົາທຶນພາຍນອກໂດຍກົງ ໃຫ້ເຂົ້າສູ່ອຸດສາຫະກຳເຕັກນິກສຸມຢ່າງມີການຄັດເລືອກ. ພ້ອມກັນນັ້ນ ລັດຖະບານຈີນຍັງຕັ້ງໜ້າອຸບປະຖຳວິສາຫະກິດພາຍໃນປະເທດທີ່ຖືກຖືວ່າມີກຳລັງແກ່ງແຍ່ງໃນໂລກ. ນີ້ໄດ້ເສີມຂະຫຍາຍບົດບາດຢ່າງໃຫຍ່ຫຼວງທີ່ເຮັດໃຫ້ອົງປະກອບອຸດສາຫະກຳຂອງຈີນສູງຂຶ້ນຫຼາຍ.
ບົດລາຍງານຂຽນວ່າ, ປີ 2002, ຈີນໄດ້ຮັບເອົາທຶນພາຍນອກໂດຍກົງບັນລຸ 52 ຕື້ 700 ລ້ານໂດລາສະຫະລັດ. ໃນທຶນພາຍນອກທີ່ມາໂດຍກົງນັ້ນ, 25 ປະເທດສະມາຊິກສະຫະພາບເອີລົບກວມປະມານ 10%. ໃນໄລຍະຕົ້ນ, ທຶນພາຍນອກຖືກດູດດຶງຍ້ອນຕົ້ນທຶນຕ່ຳ, ທິດການລົງທຶນຂອງສະຫະພາບເອີລົບຕົ້ນຕໍແມ່ນອຸດສາຫະກຳຂາອອກ. ສ່ວນໃນປະຈຸບັນ, ການລົງທຶນນັບມື້ນັບຫຼາຍຂອງສະຫະພາບເອີລົບແມ່ນເພື່ອໃຫ້ຜະລິດຕະພັນຂອງເຂົາເຂົ້າສູ່ຕະຫຼາດຂອງຈີນທີ່ມີກຳລັງບົ່ມຊ້ອນອັນມະຫາສານ.
ບົດລາຍງານເຫັນວ່າ, ເມື່ອທຽບກັບ 15 ປະເທດສະມາຊິກເດີມຂອງສະຫະພາບເອີລົບທີ່ລະດັບຫັນເປັນອຸດສາຫະກຳຍິ່ງສູງນັ້ນແລ້ວ, ປະເທດສະມາຊິກໃໝ່ທີ່ເຂົ້າຮ່ວມສະຫະພາບເອີລົບໃນວັນທີ 1 ພຶດສະພາປີນີ້ແລະປະເທດສຳຮອງຈຳນວນໜຶ່ງທີ່ຖ້າເຂົ້າຮ່ວມສະຫະພາບເອີລົບພວມປະເຊີນກຳລັງໜີບຍິ່ງແຮງຈາກກຳລັງແກ່ງແຍ່ງຂອງຈີນ. ແຕ່ຈີນກໍໄດ້ອຳນວຍໂອກາດທີ່ທັງຊ່ອຍປະເທດພວມພັດທະນາພັດທະນາເສດຖະກິດ ທັງມີຜົນດີຕໍ່ຜູ່ບໍລິໂພກແລະຜູ່ຜະລິດຂອງປະເທດອຸດສາຫະກຳ. ສະນັ້ນ ບົດລາຍງານກ່າວເນັ້ນວ່າ, ເອີລົບຄວນອອກແບບຍຸດທະສາດຢ່າງໜຶ່ງ ບົນພື້ນຖານຍົກກຳລັງຜະລິດ ກຳລັງແກ່ງແຍ່ງແລະຄວາມສາມາດປະດິດສ້າງໃຫ້ສູງຂຶ້ນ, ເພື່ອຕ້ອນຮັບການທ້າທາຍຂອງຈີນ, ແລະກຳກາລະໂອກາດພັດທະນາໃຫ້ດີ.
|
