|
|
 |
| (GMT+08:00)
2004-11-26 20:20:13
|
 |
|
ວຽງຈັນທີ່ປະດັບປະດາສວຍງາມຕ້ອນຮັບແຂກຜູ້ມີກຽດ
cri
ກອງປະຊຸມສຸດຍອດອາຊຽນຄັ້ງທີ10ຈະຈັດຂຶ້ນຢູ່ວຽງຈັນນະຄອນຫຼວງຂອງລາວໃນໄວໆນີ້, ກອງປະຊຸມເຈົ້າໜ້າທີ່ຊັ້ນສູງອາຊຽນເຊິ່ງເປັນພິທີເລີ່ມຕົ້ນໄດ້ຈັດຂຶ້ນໃນວັນທີ25ພະຈິກ. ເມື່ອໄດ້ທຳການກະກຽມຢ່າງພຽນໃຈເປັນເວລາໜຶ່ງປີ, ວຽງຈັນພວມສະແດງໂສມໜ້າໃໝ່ອ່ຽມໃຫ້ຊາວໂລກ.
ສະໜາມບິນສາກົນໄດ້ຮັບການປະດັບປະດາໃໝ່ອ່ຽມ
ເມື່ອເຂົ້າສູ່ສະໜາມບິນສາກົນວຽງຈັນ, ສິ່ງທີ່ປະຈັກຕາກ່ອນໝູ່ແມ່ນຮູບພາບສີໝາກກ້ຽງທີ່ໄດ້ແຕ້ມບຸກຄົນກາຕູນ3ຄົນ. ເຖິງວ່າໃນຮູບບໍ່ມີຄຳຂວຳໃດໆ, ແຕ່ຄືກັນກັບໃບໜ້າຂອງພະນັກງານດ່ານພາສີ, ແຂກທີ່ເຂົ້າມາຮູ້ສຶກອົບອຸ່ນທີ່ສຸດ.
ຢູ່ຕໍ່ໜ້າຫໍສະສະໜາມບິນ, ທຸງຊາດຂອງ17ປະເທດທີ່ເຂົ້າຮ່ວມກອງປະຊຸມສຸດຍອດອາຊຽນແລະກອງປະຊຸມອື່ນໆທີ່ກ່ຽວຂ້ອງໄດ້ປິວສະບັດຕາມສາຍລົມ. ຢູ່ຕໍ່ໜ້ານັ້ນແມ່ນປ້າຍໂຄສະນາສິນຄ້າແຜ່ນໃຫຍ່10ກວ່າແຜ່ນທີ່ຕັ້ງລຽນຊ້າຍລ້າຍຢູ່ສອງຟາກທາງຫຼວງທີ່ເນັ່ງໄປຫາເທດສະບານເມືອງ. ຢູ່ສະໜາມບິນຍັງໄດ້ຈັດບ່ອນຈອດລົດແບບແຜນທີ່ສາມາດຈອດລົດໄດ້ຫຼາຍສິນຄັນເປັນຄັ້ງທຳອິດ. ນັກຂ່າວຈີນທີ່ໄດ້ມາເອົາຂ່າວຢູ່ທີ່ນີ້ໃນຫຼາຍເດືອນກ່ອນອຸທານວ່າ, ໄດ້ມີການປ່ຽນແປງຢ່າງໃຫຍ່ຫຼວງແທ້.
ກອງປະຊຸມໄດ້ສ້າງຄວາມສວຍງາມໃນຕອນຄ່ຳ
ເພື່ອຕ້ອນຮັບແຂກເມືອງຂອງບັນດາປະເທດແລະນັກຂ່າວສື່ມວນຊົນ800 ກວ່າຄົນທີ່ມາຈາກແຫ່ງຕ່າງໆໃນໂລກ, ຢູ່ເທິງສິ່ງກໍ່ສ້າງຕົ້ນຕໍຕາມຖະໜົນສຳຄັນຂອງວຽງຈັນ, ລ້ວນແຕ່ໄດ້ຫ້ອຍດອກໄຟຟ້າສີແດງ, ສີເຫຼືອງແລະສີຂຽວເປັນຕົ້ນ. ຮູບດອກໄມ້5ກີບແລະຮູບເລຂາຄະນິດງ່າຍໆເປັນຮູບຕົ້ນຕໍຂອງດອກໄຟຟ້າປະເພດຕ່າງໆ.
ພາຍໃຕ້ແສງໄຟນີອອນຫຼາຍສີຫຼາຍສັນສາມາດຫຼຽວເຫັນເຮືອນຕຶກສີຂາວເປັນຫຼັງໆຢູ່ສັບຫວ່າງຕົ້ນປາມທີ່ສູງໃຫຍ່, ເຮັດໃຫ້ເມືອງນີ້ມີສະເໜີຍິ່ງຂຶ້ນ.
ສິ່ງທີ່ຜະລິດຢູ່ຈີນເຫັນຢູ່ເລື້ອຍໆ
ຢູ່ເທິງປ້າຍຂອງຮ້ານຄ້າຫຼາຍຫຼັງ, ໄດ້ຂຽນໂຕພາສາຈີນ, ພາສາລາວແລະພາສາອັງກິດພ້ອມກັນ. ໃນຮ້ານອາຫານໄດ້ພົບລູກຫຼານຂອງຊາວຈີນຕ່າງດ້າວທີ່ປາກພາສາຈີນເປັນນັ້ນເລື້ອຍໆ. ບໍລິສັດຈີນຈຳນວນໜຶ່ງກໍ່ໄດ້ເຂົ້າຮ່ວມການສ້າງສາໂຄງການພຶ້ນຖານໂຄງລ່າງຂະໜາດໃຫຍ່ທີ່ກ່ຽວຂ້ອງກັບກອງປະຊຸມຄັ້ງນີ້.
ໂຮງແຮມດອນຈັນພາເລດທີ່ເປັນໂຮງແຮມ5ດາວພຽງແຫ່ງດຽວຂອງວຽງຈັນທີ່ສ້າງຂຶ້ນໃໝ່ນັ້ນແມ່ນກຸ່ມບໍລິສັດຈ້ຽນກຸ່ງແຂວງຢຸນນານຈີນສ້າງຂຶ້ນມາພາຍໃນເວລາ10ເດືອນ. ສິ່ງກໍ່ສ້າງ14ຊັ້ນຫຼັງນີ້ໄດ້ກາຍເປັນສັນຍະລັກໃໝ່ຂອງນະຄອນຫຼວງວຽງຈັນ, ຈະຕ້ອນຮັບຄະນະຜູ້ແທນທີ່ມາຈາກອົສຕຼາລີ, ນິວຊີແລນແລະສ.ເກົາຫຼີ.
ຖະໜົນກວ້າງຫຼາຍສາຍທີ່ໄດ້ແປງໃໝ່ຢູ່ໃຈກາງເມືອງວຽງຈັນແມ່ນບໍລິສັດຈີນຮັບເໝົາສ້າງ, ກິດຈະການດັດແປງສວນສາທາລະນະປະຕູໄຊເຊິ່ງເປັນໂຄງການຊ່ອຍເຫຼືອລາວທີ່ກົມໄຟຟ້ານ້ຳຕົກກວາງຕົງທີ3ຂອງຈີນຮັບເໝົາສ້າງນັ້ນໄດ້ສ້າງສຳເລັດໃນຫວ່າງກ່ອນນີ້ບໍ່ດົນ. ໃນຫຼາຍມື້ມານີ້, ຢູ່ສູນກອງປະຊຸມແລະວາງສະແດງສາກົນແລະໃນເດີ່ນຂອງພະແນກການຂ່າວຂອງກະຊວງການຕ່າງປະເທດ, ນັກຂ່າວຍັງໄດ້ເຫັນລົດແພດແລະລົດຕຳຫຼວດທີ່ໄດ້ຂຽນຕົວໜັງສືທີ່ວ່າ: ສປຈີນບໍລິຈາກ. ຈາກນີ້ສາມາດເຫັນໄດ້ການພົວພັນມິດຕະພາບລະຫວ່າງຈີນລາວ.
ມາດຕະການປ້ອງກັນຄວາມປອດໄພເຄັ່ງຄັດທີ່ສຸດ
ຄືກັນກັບກອງປະຊຸມສາກົນອື່ນໆທີ່ມີຂະໜາດອ່າວໃຫຍ່, ມາດຕະການປ້ອງກັນຄວາມປອດໄພແມ່ນບັນຫາສຳຄັນທີ່ຄົນທັງຫຼາຍສົນໃຈນຳກັນ. ມາດຕະການປ້ອງກັນຄວາມປອດໄພຂອງກອງປະຊຸມຄັ້ງນີ້ຈັດວາງຢ່າງເຄັ່ງຄັດຫຼາຍ. ບໍ່ວ່າຢູ່ກາງເວັນຫຼືກາງຄືນ, ຢູ່ຕາມຖະໜົນຕົ້ນຕໍຂອງວຽງຈັນ, ໂຮງແຮມທີ່ຄະນະຜູ້ແທນພັກເຊົ່າແລະອ້ອມຂ້າງຫໍປະຊຸມສາມບ່ອນ, ລ້ວນແຕ່ມີຕຳຫຼວດຢູ່ຍາມ. ຫຼາຍສິບແມັດກໍມີຄົນໜຶ່ງ, ແຕ່ລະບ່ອນຢູ່ຍາມມີຕຳຫຼວດທະຫານ4,5ຄົນທີ່ມືຈັບປືນຍາວແລະປືນນ້ອຍ.
ເມື່ອຢ່າງເຂົ້າປະຕູເດີ່ນຫໍປະຕູຂອງກອງປະຊຸມລັດຖະມົນຕີອາຊຽນແລະຫໍປະຊຸມ2ແຫ່ງຂອງກອງປະຊຸມສຸດຍອດ, ຕຳຫຼວດຈະໃຊ້ເຄື່ອງຢັ່ງແທກກວດວ່າຢູ່ພື້ນລົດມີສິ່ງລະເບີດຫຼືບໍ່. ເມື່ອເຂົ້າສູ່ຫໍປະຊຸມແລະໂຮງແຮມທີ່ຄະນະຜູ້ແທນພັກເຊົານັ້ນ, ທຸກຄົນແລະສິ່ງຂອງຕ່າງໆລ້ວນແຕ່ຕ້ອງຜ່ານການກວດກາຄວາມປອດໄພ. ຫວ່າງມໍ່ໆນີ້, ນັກຂ່າວຍັງໄດ້ເຫັນທະຫານຫຼາຍຄົນໄດ້ຖືເຄື່ອງຢັ່ງແທກສິ່ງລະເບີດດຳເນີນການກວດກາບ່ອນມໍ່ສູນກອງປະຊຸມແລະວາງສະແດງສາກົນລາວທີ່ຈະຈັດກອງປະຊຸມສຸດຍອດ.
|
|
|
