|
|
 |
| (GMT+08:00)
2004-11-29 14:32:32
|
 |
|
"10+3","10+1"ແມ່ນຫຍັງ?
cri
Author: q
ຕາມຂ່າວCRI,ປີ1997,ໃນໂອກາດສ້າງຕັ້ງອາຊຽນຄົບຮອບ30ປີ,ອາຊຽນໄດ້ຕົກລົງສ້າງກົນໄກປຶກສາຫາລືເປັນປະຈຳລະຫວ່າງຜູ້ນຳອາຊຽນກັບຈີນ,ຍີ່ປຸ່ນແລະສ.ເກົາຫຼີ,ຄື"10+3".ກອງປະຊຸມຜູ້ນຳອາຊຽນກັບຈີນ,ຍີ່ປຸນ,ສ.ເກົາຫຼີປີນີ້ຕົກລົງຈັດຂຶ້ນຢູ່ວຽງຈັນໃນວັນທີ29ພະຈິກ.ທ່ານເວິ່ນເຈ່ຍປາວ ນາຍົກລັດຖະມົນຕີຈີນຈະເຂົ້າຮ່ວມກອງປະຊຸມ.
ກົນໄກ"10+3"ໃນເບື້ອງຕົ້ນແມ່ນກຳເນີດຂຶ້ນຍ້ອນສະຕິວິກິດການ.ວິກິດການການເງິນອາຊີເມື່ອປີ1997ໄດ້ສ້າງຄວາມເສຍຫາຍລັກສະນະໄພພິບັດໃຫ້ແກ່ບັນດາປະເທດອາຊີຕາເວັນອອກ,ແລະກໍໄດ້ກະຕຸບັນດາປະເທດໃນພາກພື້ນອາຊີຕາເວັນອອກມີຄວາມປາຖະໜາອັນແຮງກ້າຊຸກຍູ້ການຮ່ວມມືຂອງພາກພື້ນແລະຕ່າງຊ່ອຍເຫຼືອກັນຜ່ານຜ່າຄວາມຫຍຸ້ງຍາກ.ໃນທ້າຍປີດຽວກັນ,ຜູ້ນຳອາຊຽນແລະຈີນ,ຍີ່ປຸ່ນ,ສ.ເກົາຫຼີໄດ້ເຕົ້າໂຮມກັນຢູ່ກົວລາລຳເປີນະຄອນຫຼວງມາເລເຊຍ.ການຮ່ວມມື"10+3"ໄດ້ເລີ່ມຕົ້ນຢ່າງເປັນທາງການ.ກົນໄກນີ້ຕົ້ນຕໍແມ່ນດຳເນີນການປຶກສາຫາລືກັນກ່ຽວກັບອະນາຄົດ,ການພັດທະນາແລະທິດຮ່ວມມືຂອງພາກພື້ນອາຊີຕາເວັນອອກໃນສະຕະວັດທີ21,ແລະເຮັດແນວໃດຊຸກຍູ້ຂົງເຂດແລະຂອບເຂດຂອງການຮ່ວມມືຕື່ມອີກເປັນຕົ້ນ,ອັນໄດ້ປະກອບສ່ວນຢ່າງໃຫຍ່ຫຼວງໃຫ້ແກ່ສັນຕິພາບ,ສະຖຽງລະພາບແລະການພັດທະນາຂອງພາກພື້ນອາຊີຕາເວັນອອກ.ປະຈຸບັນ,ກົນໄກ"10+3"ໄດ້ຂະຫຍາຍມາເປັນຊ່ອງທາງຕົ້ນຕໍແຫ່ງການຮ່ວມມືຂອງພາກພື້ນອາຊີຕາເວັນອອກ,ໄດ້ເສີມຂະຫຍາຍບົດບາດສຳຄັນໃນການຊຸກຍູ້ເສດຖະກິດພາກພື້ນເຊື່ອມໂຍງເຂົ້າກັນ,ແລະຄ່ອຍໆຊອກໄດ້ເສັ້ນທາງຮ່ວມມືທີ່ສອດຄ່ອງກັບຈຸດພິເສດຫຼາຍຢ່າງຫຼາຍແນວຂອງພາກພື້ນອາຊີຕາເວັນອອກ.
ກົນໄກທີ່ສ້າງຕັ້ງຂຶ້ນພ້ອມກັນກັບກົນໄກ"10+3"ນັ້ນແມ່ນກອງປະຊຸມຜູ້ນຳອາຊຽນກັບຈີນ,ກອງປະຊຸມຜູ້ນຳອາຊຽນກັບຍີ່ປຸ່ນແລະກອງປະຊຸມຜູ້ນຳອາຊຽນກັບສ.ເກົາຫຼີ,ຄືກົນໄກ"10+1".ກົນໄກນີ້ມີວັດຖຸປະສົງເພີ່ມທະວີການພົວພັນແລະການຮ່ວມມືກັນລະຫວ່າງອາຊຽນກັບຈີນ,ຍີ່ປຸ່ນ,ສ.ເກົາຫຼີພາຍໃນຂອບເຂດສອງຝ່າຍ.
ປີນີ້,ກອງປະຊຸມຜູ້ນຳອາຊຽນ-ຈີນຄັ້ງທີ8ຈະຈັດຂຶ້ນຢູ່ວຽງຈັນ,ທ່ານເວິ່ນເຈ່ຍປາວ ນາຍົກລັດຖະມົນຕີຈີນຈະເຂົ້າຮ່ວມກອງປະຊຸມເທື່ອນີ້.ປະຈຸບັນ,ກອງປະຊຸມຜູ້ນຳອາຊຽນ-ຈີນ(10+1)ໄດ້ຂະຫຍາຍກາຍເປັນກົນໄກຮ່ວມມືທີ່ແນໃສ່ຊຸກຍູ້ການພົວພັນລະຫວ່າງອາຊຽນກັບຈີນໃຫ້ຂະຫຍາຍຕົວຢ່າງຮອບດ້ານ.
ຜ່ານຈາກກົນໄກ"10+1",ການພົວພັນລະຫວ່າງອາຊຽນກັບຈີນໄດ້ມີການພັດທະນາຢ່າງໝັ້ນທ່ຽງ.ໃນກອງປະຊຸມຜູ້ນຳອາຊຽນ-ຈີນຄັ້ງທີ5ໃນປີ2001,ສອງຝ່າຍໄດ້ເປັນເອກະສັນກັນເຫັນດີສ້າງຕັ້ງເຂດການຄ້າເສລີຈີນ-ອາຊຽນພາຍໃນ10ປີ.ໃນປີ2002,ສອງຝ່າຍໄດ້ເຊັນສັນຍາໂຄງຮ່າງການຮ່ວມມືເສດຖະກິດຮອບດ້ານແລະຄຳຖະແຫຼງການດຳເນີນງານຂອງບັນດາຝ່າຍທີ່ທະເລຈີນໃຕ້,ໄດ້ກຳນົດເປົ້າໝາຍສ້າງເຂດການຄ້າເສລີຈີນ-ອາຊຽນໃນປີ2010.ໃນກອງປະຊຸມຜູ້ນຳອາຊຽນ-ຈີນຄັ້ງທີ7ປີກາຍ.ຈີນແລະອາຊຽນໄດ້ປະກາດສ້າງການພົວພັນໝູ່ຄູ່ຍຸດທະສາດທີ່ຫັນໜ້າສູ່ສັນຕິພາບແລະຄວາມຈະເລີນຮຸ່ງເຮືອງ,ຈີນເຂົ້າຮ່ວມສົນທິສັນຍາການຮ່ວມມືດ້ວຍໄມຕີຈິດອາຊີອາຄະເນຢ່າງເປັນທາງການ,ໄດ້ກາຍເປັນປະເທດທີ່ຢູ່ນອກພາກພື້ນອາຊີອາຄະເນປະເທດທຳອິດທີ່ເຂົ້າຮ່ວມສົນທິສັນຍາດັ່ງກ່າວ.
|
|
|
