|
ເອົາໃຈໃສ່ນຳການຕ່າງປະເທດອ້ອມຂ້າງ,ຍາດແຍ່ງໃຫ້ໄດ້ຮັບຜົນປະໂຫຍດຫລາຍຝ່າຍ,ຈີນໄດ້ຮັບຄວາມໄວ້ວາງໃຈແລະຄວາມເຄົາລົບນັບຖື
cri
Author: huang
ໃນບັນດາກອງປະຊຸມສຸດຍອດອາຊຽນທີ່ຈັດຂຶ້ນຢູ່ນະຄອນຫລວງວຽງຈັນໃນປີນີ້,ຈີນໄດ້ກາຍເປັນຈຸດສຸມທີ່ໄດ້ຮັບຄວາມເອົາໃຈໃສ່ອີກເທື່ອຫນຶ່ງ,ຈີນກັບອາຊຽນໄດ້ເຊັ່ນສັນຍາຄັ້ງປະຫວັດການ,ເລີ່ມຢ່ວງບາດກ້າວໃຫຍ່ໄປສູ່ການສ້າງເຂດການຄ້າເສລີທີ່ມີປະຊາກອນ 1 ຕື້ 800 ລ້ານຄົນ;ຈີນກັບອາຊຽນໄດ້ວາງແຜນປະຕິບັດງານຜັນຂະຫຍາຍຄຳຖະແຫລງການຮ່ວມແຫ່ງການພົວພັນຄູ່ຍຸດທະສາດຈີນອາຊຽນເພື່ອສັນຕິພາບແລະຄວາມຈະເລີນຮຸ່ງເຮືອງ,ວາງແຜນ 5 ປີເພື່ອຮັດແໜັນການພົວພັນຄູ່ຍຸດທະສາດຂອງສອງຝ່າຍ.ການຢ້ຽມຢາມເທື່ອນີ້ຂອງທ່ານນາຍົກເວີ່ນເຈຍປາວທີ່ເອົາໃຈໃສ່ນຳຜົນຕົວຈິງໄດ້ຮັບຜົນຢ່າງເດັ່ນຊັດ.
ທ່ານສາຍຢູ້ ຜູ້ຊ່ຽວຊານສະພາບັນດິດວິທະຍາສາດສັງຄົມຈີນເວົ້າວ່າ,ຈີນເອົາໃຈໃສ່ນຳການທູດອ້ອມຂ້າງແນວນີ້ແມ່ນເພື່ອ"ຜູກມິດໃຫ້ຫລາຍ,ແຕ່ສັດຕູໃຫ້ມີຫນ້ອຍ",ສ້າງສະພາບແວດລ້ອມອ້ອມຂ້າງທີ່ມີຜົນດີທີ່ສຸດຕໍ່ການພັດທະນາຂອງຈີນ,ໃຫ້ການຊ່ອຍເຫືຼອແກ່ການຮ່ວມມືຂອງພາກພື້ນ,ສະແຫວງຫາໃຫ້ອາຊຽນ ອາຊີຕະຫລອດຮອດໂລກໄດ້ຮັບຜົນປະໂຫຍດ ຫລາຍຝ່າຍ.
ວັນທີ 29 ພະຈິກ,ຈີນແລະອາຊຽນໄດ້ເຊັນສັນຍາການຄ້າເຄື່ອງຂອງຂອງສັນຍາຂອບການຮ່ວມມືເສດຖະກິດຮອບດ້ານ,ອາຊຽນຮັບຮອງຖານະເສດຖະກິດຕະຫລາດສົມບູນຂອງຈີນ, ແຕ່ນີ້ໄປ,ການສ້າງເຂດການຄ້າເສລີຈີນອາຊຽນໄດ້ກ້າວເຂົ້າສູ່ວິຖີໂຄຈອນ.ສັນຍາການຄ້າເຄື່ອງຂອງໄດ້ຂຽນວ່າ,ການເຊັນສັນຍາການຄ້າເຄື່ອງຂອງຂອງເຂດການຄ້າເສລີຈີນອາຊຽນໄດ້ແຜ້ວທາງໃຫ້ແກ່ການເລີ່ມສ້າງເຂດການຄ້າເສລີຈີນອາຊຽນຕາມເວລາກຳນົດ,ແລະຈະສ້າງສະພາບການທີ່ໄດ້ຮັບຜົນປະໂຫຍດທັງສອງຝ່າຍໃນການພົວພັນເສດຖະກິດການຄ້າຈີນອາຊຽນ.
ການໄດ້ຮັບຜົນປະໂຫຍດທັງສອງຝ່າຍແນວນີ້ໄດ້ສ່ອງແສງຫລາຍຂຶ້ນໃນດ້ານມູນຄ່າການຄ້າສອງຕໍ່ສອງທີ່ເພີ່ມຂຶ້ນສູ່ປີ.ປີ 2003,ມູນຄ່າການຄ້າສອງຕໍ່ສອງຂອງຈີນແລະອາຊຽນໄດ້ບັນລຸ 78 ຕື້ໂດລາສະຫະລັດ,ມູນຄ່າການຄ້າໃນ 10 ເດືອນຕົ້ນປີນີ້ໄດ້ລື່ນກາຍ 70 ຕື້ໂດລາສະຫະລັດ,ຜູ້ຊ່ຽວຊານດ້ານເສດຖະກິດການຄ້າເຫັນໂດຍທົ່ວໄປວ່າ,ການບັນລຸເປົ້າຫມາຍ 100 ຕື້ໂດລາສະຫະລັດຂອງປີ 2005 ກ່ອນເວລາກຳນົດໃນປີນີ້ແມ່ນເບິ່ງໄປໃນແງ່ດີສົມຄວນ. ທ່ານອົງເຄັງຢົງ ເລຂາທິການໃຫຍ່ອາຊຽນກ່າວວ່າ,ເມື່ອສັງເກດເບິ່ງທ່ວງທ່າຂະຫຍາຍຕົວໃນຫລາຍປີມານີ້ແລ້ວເຫັນວ່າ,ໃນອະນາຄົດອີກບໍ່ດົນ,ມູນຄ່າການຄ້າຈີນແລະອາຊຽນກໍ່ຈະລື່ນກາຍ 130 ຕື້ໂດລາສະຫະລັດ.
ໃນກອງປະຊຸມຄັ້ງນີ້,ຈີນແລະອາຊຽນຍັງໄດ້ປະກາດແຜນປະຕິບັດງານຜັນຂະຫຍາຍຄຳຖະແຫລງການຮ່ວມແຫ່ງການພົວພັນຄູ່ຍຸດທະສາດຈີນອາຊຽນເພື່ອຕິພາບແລະຄວາມຈະເລີນຮຸ່ງເຮືອງ,ວາງແຜນໃຫ້ແກ່ການຮ່ວມມືໃນທຸກຂົງເຂດລະຫວ່າງສອງຝ່າຍໃນ 5 ປີຂ້າງຫນ້າຢ່າງຮອບດ້ານ,ໃນຂະນະເພີ່ມທະວີການເມືອງນັ້ນ,ກໍ່ເຮັດໃຫ້ການຮ່ວມມືໃນຫລາຍຂົງເຂດຂອງສອງຝ່າຍເຊັ່ນພະລັງງານ ຄົມມະນາຄົມ ຄວາມປອດໄພ ວັດທະນະທຳແລະວິທະຍາສາດເຕັກນິກເປັນຕົ້ນໄດ້ດຳເນີນຢ່າງເປັນລະບຽບກວ່າເກົ່າ.
ໃນໄລຍະຢ້ຽມຢາມລາວແລະເຂົ້າຮ່ວມກອງປະຊຸມອາຊຽນ,ທ່ານເວີ່ນເຈຍປາວຍັງໄດ້ຈັດການພົບປະສອງຕໍ່ສອງກັບຜູ້ນຳຂອງ 10 ກວ່າປະເທດ,ແລກປ່ຽນຄວາມເຫັນກ່ຽວກັບການພົວພັນສອງຕໍ່ສອງແລະການຮ່ວມມືໃນຂົງເຂດຈຸດຫນັກພ້ອມທັງໄດ້ມີຄວາມຮັບຮູ້ຄືກັນຢ່າງກວ້າງຂວາງ.
ທ່ານລີຈ້າວຊິງຊີ້ອອກວ່າ,ທ່ານເວີ່ນເຈຍປາວໄດ້ສະແດງໃຫ້ເຫັນທິດທາງການທູດກັບອ້ອມຂ້າງຂອງຈີນທີ່ປອງດອງກັນກັບປະເທດໃກ້ຄຽງ ຢູ່ຮ່ວມກັນດ້ວຍຄວາມສະຫງົບ ສ້າງຄວາມຮັ່ງມີນຳກັນກັບປະເທດໃກ້ຄຽງດ້ວຍການກະທຳຕົວຈິງ,ເຮັດໃຫ້ບັນດາປະເທດໃກ້ຄຽງຮູ້ສຶກເຖິງຄວາມຈິງໃຈຂອງຈີນອີກເທື່ອຫນຶ່ງ,ແລະຮູ້ສຶກເຖິງກາລະໂອກາດທີ່ການພັດທະນາຂອງຈີນນຳມາໃຫ້.
ໃນເວລາທົ່ວໂລກສຸມສາຍຕາມາໃສ່ອາຊີຕາເວັນອອກ,ແລະໃນເວລາປະເທດອາຊີຕາເວັນອອກພວມກ້າວໄປສູ່ທິດຮ່ວມມືພາກພື້ນເທື່ອລະກ້າວນັ້ນ,ຈີນກໍ່ພວມໄດ້ຮັບຄວາມເຄົາລົບນັບຖືແລະຄວາໄວ້ວາງໃຈນັບມື້ນັບຫລາຍດ້ວຍທ່ວງທຳນອງຕິດແທດຕົວຈິງແລະທ່າທີອັນຈິງໃຈ.
|
|
