|
ໃນຊີວິດສັງຄົມທ່ີນັບມື້ນັບເຄັ່ງຕຶງນັ້ນ,ຄົນສ່ວນຫລາຍເຄີຍມີປະກົດການທີ່ນອນບໍ່ຫລັບໃນລະດັບຕ່າງກັນ.ການນອນບໍ່ຫລັບມີສາມກໍລະນີຄື:1/ແມ່ນນອນຫລັບຍາກ;ສອງ/ຫຼັບໆຕື່ນໆ,ເມື່ອຕື່ນນອນຍາມເຊົ້າຍັງຮູ້ສຶກວ່າບໍ່ຫາຍເມື່ອຍ;3/ນອນຫລັບຍາກ,ມັກສະດຸ້ງຕື່ນ,ເມື່ອຕື່ນແລ້ວກໍ່ນອນຫລັບອີກຍາກ.ຄັນຊັ້ນ,ເຮັດແນວໃດຈິ່ງແກ້ໄຂການນອນບໍ່ຫລັບໄດ້?ພວກເຮົາມີຂໍ້ສະເໜີຫລາຍຂໍ້ດັ່ງລຸ່ມນີ້:
1/ເວລານອນຈະສັ້ນຫຼືຍາວບໍ່ໄດ້ຫມາຍເຖິງນອນອື່ມນອນພໍຫຼືບໍ່..ເວລານອນນັ້ນແຕ່ລະຄົນກໍ່ຜິດແຜກແຕກຕ່າງກັນຫລາຍ.ມີຄົນ 5%ແຕ່ລະມື້ຕ້ອງການນອນແຕ່ 6 ຊົ່ວໂມງລົງລຸ່ມກໍພໍ,ຍັງມີຄົນ 5%ຕ້ອງນອນ 10 ຊົ່ວໂມງຂຶ້ນໄປໃນແຕ່ລະມື້.ທຳມະດາແລ້ວ,ຜູ້ໃຫຍ່ຕ້ອງນອນປະມານ 5 ຮອດ 9 ຊົ່ວໂມງ.ຄຽງຄູ່ກັບອາຍຸແກ່ຂຶ້ນ,ເວລານອນກໍ່ຄ່ອຍໆຫນ້ອຍລົງ,ພາຍຫລັງເຂົ້າໄວກາງຄົນແລ້ວກໍ່ບໍ່ຕ້ອງນອນຫລາຍຄືໄວຫນຸ່ມອີກ.ມີຄົນຈຳນວນຫນຶ່ງຄິດຫລາຍຕໍ່ເວລານອນຂອງຕົນຈະຈົນກາຍເປັນສິ່ງລົບກວນທີ່ບໍ່ຈຳເປັນແລ້ວພາໃຫ້ຮູ້ສຶກວ່ານອນບໍ່ຫລັບ.ທະແນມແຕ່ຕື່ນນອນແລ້ວຮູ້ສຶກສົດຊື່ນ,ເຕັມໄປດ້ວຍກຳລັງວັງຊາ,ກໍຫມາຍຄວາມວ່າເວລານອນພໍແລ້ວ.
2/ ບໍ່ຕ້ອງເປັນຫ່ວງຫລາຍນຳການນອນບໍ່ຫລັບບາງຄັ້ງຄາວໃນຊີວິດ,ການນອນບໍ່ຫລັບໃນຄືນຫນຶ່ງສອງຄືນບໍ່ຫ່ອນຈະມີຜົນກະທົບຫຍັງຫລາຍຕໍ່ຮ່າງກາຍແລະຈິດໃຈຂອງຄົນເຮົາ.ສາຍເຫດທີ່ພາໃຫ້ນອນບໍ່ຫລັບບາງຄັ້ງຄາວນັ້ນມີຫລາຍຢ່າງ,ຕົວ ຢ່າງຄືປະສົບຄວາມຫຍຸ້ງຍາກດ້ານຊີວິດເຊັ່ນຍາດພີ່ນ້ອງເສຍຊີວິດ ຫວ່າງງານ ຫນີ້ສິນ ອົກຫັກ ຢ່າຮ້າງກັນເປັນຕົ້ນຫລືບໍ່ລື້ງປ່ອນນອນເຊັ່ນນອນຄ້າງຄືນຢູ່ເຮືອນຫມູ່ເປັນຕົ້ນ.ທຳມະດາແລ້ວ,ເມື່ອຄວາມຫຍຸ້ງຍາກຜ່ານພົ້ນໄປແລ້ວຫລືຄ່ອຍໆສອດຄ່ອງກັບສິ່ງແວດລ້ອມ,ກໍ່ຈະນອນຫລັບເປັນປົກກະຕິເອງ.ແຮງເປັນຫ່ວງຈະນອນບໍ່ຫລັບ,ກໍ່ແຮ່ງນອນບໍ່ຫລັບ.ບໍ່ຄຶດຫຍັງ,ເມື່ອເຫົງານອນແລ້ວກໍ່ຈະນອນຫລັບເອງ.
3/ຈັດວາງຊີວິດການເປັນຢູ່ໃຫ້ມີກົດເກນແມ່ນວິທີໄດ້ຜົນກວ່າຫມູ່ໃນການຫລີກເວັ້ນການນອນບໍ່ຫລັບ.ໃຫ້ກາຍເປັນຄວາມຊິນເຄີຍທ່ີນອນຕາມໂມງແລະຕ່ືນຕາມໂມງ,ສ້າງໂມງສະລີລະສາດອັນດີງາມ.ໃນວັນສຸດສັບປະດາແລະວັນພັກຢ່າຕື່ນສວຍ,ເພາະນອນຫລາຍກໍບໍ່ມີຜົນດີຫຍັງຕໍ່ຄົນເຮົາ.ບາງທີນອນເດິກຍ້ອນຄາວຽກ,ຕອນເຊົ້າກໍ່ຕ້ອງຕື່ນນອນຕາມໂມງ.ມີບາງຄົນຍ້ອນຄວາມຕ້ອງການຂອງວຽກງານ,ລາງເທື່ອເຮັດວຽກໃນຍາມກາງເວັນ,ລາງເທ່ືອເຮັດວຽກກາງຄືນ,ແນ່ນອນແລ້ວຈະກະທົບກະເທືອນເຖິງການນອນເຊິ່ງອາດຈະພາໃຫ້ນອນບໍ່ຫລັບຊົ່ວຄາວ.
4/ກ່ອນນອນບໍ່ຄວນກິນອິ່ມໂພດ,ບໍ່ຄວນດື່ມເຫົ້ຼາ,ກາເຟ ນ້ຳຊາ ນ້ຳອັດລົມ ໂກກາໂກລາເປັນຕົ້ນເຊ່ິງເປັນເຄ່ືອງດື່ມແບບກະຕຸກປະສາດ.ມີຄົນບໍ່ຫນ້ອຍຄຶດວ່າ,ການດື່ມເຫົ້ຼາຊ່ອຍໃຫ້ຫລັບງ່າຍ,ເຖິງວ່າດື່ມເຫົ້ຼາຊ່ອຍໃຫ້ນອນຫລັບງ່າຍກໍ່ຕາມ,ແຕ່ຫຼັບນອນບໍ່ດົນ,ຖ້າຕື່ນແລ້ວກໍນອນຫລັບອີກຍາກ.ກ່ອນນອນຈະກິນນົມງົວຈອກຫນຶ່ງຈະຊ່ອຍໃຫ້ນອນຫລັບ.
5/ເຄິ່ງຊົ່ງໂມງກ່ອນນອນບໍ່ຄວນເຮັດວຽກເມ່ືອຍໂພດ,ມີຄົນຄຶດວ່າອອກກຳລັງກາຍຢ່າງຮຸນແຮງໃຫ້ເມື່ອຍໆ ຄົງຈະນອນຫລັບດີ,ແຕ່ຜົນພັດກົງກັນຂ້າມ.ກ່ອນນອນຄວນຜ່ອນຄາຍຈິດໃຈ,ຟັງດົນຕີເບົາໆຈະຊ່ອຍໃຫ້ນອນຫລັບ.
6/ຖ້າຂໍ້ສະເໜີທີ່ກວ່າມານັ້ນບໍ່ໄດ້ຜົນ,ກໍຢ່າກິນຢານອນຫລັບເອງອັນຂາດ,ເພາະວ່າຢານອນຫລັບມີແຕ່ລະງັບເສັ້ນປະສາດສູນກາງຫລືເຮັດໃຫ້ມືນເມົາເທົ່ານັ້ນ,ບໍ່ສາມາດຊ່ອຍໃຫ້ນອນຫລັບສະຫນິດແທ້ຈິງ.ບໍ່ສາມາດຄວບຄຸມໄດ້ແທ້,ຄວນໄປຫາຫມໍປົວໃຫ້,ກິນຢານອນຫລັບຕ້ອງກິນຕາມຄຳສັ່ງຂອງຫມໍ.
|
