|
ທ່ານໂຈວຈື້ພິງແມ່ນນັກຮ້ອງຜູ້ມີຊື່ສຽງຜູ້ໜຶ່ງບົນເວທີເພງສະໄໝນິຍົມໄຕ້ຫວັນຂອງຈີນ, ແລະກໍແມ່ນຜູ້ຜະລິດແລະຜູ້ແຕ່ງເພງທີ່ດີເດັ່ນ. ໃນລາຍການມື້ນີ້, ພວກເຮົາມາຟັງເພງທີ່ແຕ່ງແລະຂັບຮ້ອງໂດຍທ່ານໂຈວຈື້ພີງ.
ທ່ານໂຈວຈື້ພີງເລີ່ມມີການພົວພັນກັບດົນຕີມາແຕ່ຍາມຍັງນ້ອຍ, ຍ້ອນອ້າຍເອື້ອຍຂອງທ່ານກໍມັກດົນຕີທີ່ສຸດ. ເອື້ອຍກົກມັກດົນຕີລອກແອນໂລນ, ເອື້ອຍຜູ້ທີສອງມັກດົນຕີດັ້ງເດີມ, ອ້າຍມັກດົນຕີພື້ນເມືອງ, ເອື້ອຍຜູ້ທີສາມມັກງິ້ວຮວງເມີຍ, ດົນຕີຕ່າງກັນທີ່ພວກອ້າຍເອື້ອຍທັງຫລາຍມັກນັ້ນໄດ້ສ້າງພື້ນຖານດົນຕີໃຫ້ແກ່ທ່ານໂຈວຈື້ພິງ, ແລະເຮັດໃຫ້ທ່ານມີໂອກາດເຂົ້າໃກ້ຊິດກັບຮູບການດົນຕີທີ່ມີລັກສະນະຕ່າງກັນ. ໃນເວລາຮຽນຈົບຊັ້ນມັດຕະຍົມປາຍ, ພໍດີແມ່ນສະໄໝນິຍົມເພງເດີ່ນໂຮງຮຽນຂອງໄຕ້ຫວັນ, ການດີດກິດຕາກາຍເປັນຄວາມນິຍົມຂອງນັກຮຽນທັງຫລາຍ. ທ່ານໂຈວຈື້ພິງໄດ້ຮຽນດີດກິດຕານຳອ້າຍແຕ່ອາຍຸ 18 ປີ, ແລະເລີ່ມແຕ່ງເພງແລະຂັບຮ້ອງເອງ. ຫລັງຈາກນັ້ນບໍ່ດົນ, ທ່ານໄດ້ປະກາດເພງທຳອິດທີ່ທ່ານແຕ່ງເພງຄືເພງ: Midusha. ຕໍ່ມາບໍລິສັດແຜ່ນສຽງໄດ້ຄັດເລືອກເອົາທ່ານ, ເຂົ້າຮ່ວມການອັດແຜ່ນCDເພງເດີ່ນໂຮງຮຽນສອງແຜ່ນ, ຊຶ່ງເປັນບາດກ້າວທຳອິດໃນຊີວິດຮ້ອງເພງຂອງທ່ານ.
ທີ່ຟັງມານັ້ນແມ່ນເພງWangshiyouyou ຫວນຄືນເລື່ອງອະດີດຕະການ ແຕ່ງແລະຂັບຮ້ອງໂດຍທ່ານໂຈວຈື້ພິງ.
ປີ 1985, ທ່ານໂຈວຈື້ພິງໄດ້ເສັງເຂົ້າເປັນຜູ້ຊ່ອຍຜະລິດຂອງບໍລິສັດແຜ່ນສຽງ, ແລ້ວໄດ້ເລີ່ມຕົ້ນຊີວິດດົນຕີທີ່ເປັນວິຊາສະເພາະຂອງທ່ານ. ບັງເອີນທີ່ສຸດແມ່ນໃນໂອກາດທີ່ທ່ານເຂົ້າເຮັດວຽກຢູ່ບໍລິສັດແຜ່ນສຽງນີ້ບໍ່ດົນ, ຜູ້ຜະລິດດົນຕີເກົ່າກໍລາອອກບໍລິສັດດັ່ງກ່າວ, ອັນເປັນໂອກາດທີ່ຫາຍາກໃຫ້ແກ່ທ່ານກັບຜູ້ຊ່ອຍຜະລິດດົນຕີອີກຜູ້ໜຶ່ງ. ພວກເຂົາເຈົ້າໄດ້ຜະລິດແຜ່ນCDສ່ວນຕົວທີ່ໃຫ້ຊື່ວ່າ: Chumo ໃຫ້ທ່ານQiqin ນັກຮ້ອງໄຕ້ຫວັນຢ່າງສຳເລັດຜົນ, ແຕ່ນັ້ນມາ, ທ່ານໂຈວຈື້ພິງກໍໄດ້ກາຍຈາກຜູ້ຊ່ອຍເປັນຜູ້ຜະລິດ. ໜຶ່ງປີຫລັງຈາກນັ້ນ, ທ່ານໄດ້ເຂົ້າເຮັດວຽກຢູ່ບໍລິສັດແຜ່ນສຽງປາວລີ້ຈິ່ນທີ່ມີຊື່ສຽງ, ພາຍໃຕ້ການບຳລຸງສ້າງຂອງບໍລິສັດ, ທ່ານໄດ້ກາຍເປັນນັກແຕ່ງເນື້ອຮ້ອງທຳນອງເພງແລະຜູ້ຜະລິດດົນຕີທີ່ດີເລີດກວ່າໝູ່ບົນເວທີເພງໄຕ້ຫວັນ.
ທ່ານໂຈວເຢພິງແມ່ນຜູ້ຜະລິດທີ່ມີບົດຮຽນຫລາຍ, ທ່ານເຫັນວ່າ, ໃນໄລຍະຜະລິດແຜ່ນສຽງນັ້ນ, ຜູ້ຜະລິດຄວນແລກປ່ຽນຄວາມຄິດຄວາມເຫັນນຳນັກຮ້ອງເລື້ອຍໆ, ເຂົ້າໃຈວ່ານັກຮ້ອງຕ້ອງການເພງແນວໃດ? ແລ້ວອິງຕາມສຽງແລະວາດຊົງຂອງນັກຮ້ອງ, ແລ້ວຕົກລົງແຜ່ນສຽງແຜ່ນນີ້, ຈະຄັດເລືອກເອົາເພງປະເພດໃດຈຶ່ງເໝາະສົມ, ໃຫ້ນັກຮ້ອງສາມາດສະແດງຈິດໃຈອາລົມຂອງຕົນຢ່າງເຕັມທີ່, ແຜ່ນສຽງແຜ່ນນີ້ຈຶ່ງເປັນແຜ່ນສຽງຂອງນັກຮ້ອງຜູ້ນນີ້ແທ້ໆ. ທ່ານໂຈວເຢພິງເຄີຍອັດແຜ່ນສຽງໃຫ້ດາລາເພງທີ່ມີຊື່ສຽງດົ່ງດັງຄືທ່ານຈ່າງໂກວຢົງ ທ່ານຈ່າງເສຢິວ ທ່ານລິວເຕີຮວາ ແລະທ່ານລຽງສາວເວີຍເປັນຕົ້ນ, ໄດ້ຮັບຜົນງານຈຳໜ່າຍທີ່ດີຫລາຍ. ເພງທີ່ທ່ານພວມຟັງຢູ່ນີ້ແມ່ນເພງWohewozhuizhudemeng ຂ້ອຍກັບຄວາມຝັນທີ່ຂ້ອຍສະແຫວງຫາ. ຍ້ອນການຂັບຮ້ອງດ້ວຍອາລົມອັນສຸດຊຊຶ້ງຂອງທ່ານ, ແລະສະແດງເນື້ອໃນໃຈຄວາມຂອງເພງຢ່າງຖືກຕ້ອງທີ່ສຸດແລະໜ້າຟັງທີ່ສຸດ, ອັນໄດ້ຮັບຄວາມນິຍົມຈາກແຟນເພງທັງຫລາຍແລະນຳໄປຮ້ອງກັນຢ່າງກວ້າງຂວາງ.
ປີ 1990, ບໍລິສັດແຜ່ນສຽງປາວລີ້ຈີ່ນຕົກລົງໃຫ້ທ່ານໂຈວເຢພິງອັດCDເພງແຜ່ນໜຶ່ງຂອງທ່ານເອງທີ່ໃຫ້ຊື່ວ່າ: Qingmeizhuma ຊຶ່ງມີຄວາມໝາຍວ່າ ໝູ່ຫຼິ້ນນຳກັນຢ່າງໄຮ້ດຽງສາມາແຕ່ນ້ອຍ. ພາຍຫລັງCDແຜ່ນນີ້ນຳອອກຈຳໜ່າຍແລ້ວ, ກໍຂາຍດິບຂາຍດີທີ່ສຸດ, ບໍ່ພຽງແຕ່ຖືກເລືອກເຂົ້າໃນCD 10 ແຜ່ນທີ່ດີເລີດໃນປີນັ້ນຂອງໄຕ້ຫວັນ, ເພງເຄິ່ງໜຶ່ງຂຶ້ນໄປໃນCDແຜ່ນນີ້ຍັງຖືກເລືອກເຂົ້າການລຽນລຳດັບເພງສະໄໝນິຍົມຕ່າງໆຂອງໄຕ້ຫວັນ, ແລະນັກຮ້ອງຫລາຍຄົນຍັງເອົາໄປຮ້ອງເປັນພາສາກວາງຕຸ້ງອີກ, ໄດ້ຮັບຄວາມນິຍົມຊົມເຊີຍທີ່ສຸດ. ຕໍ່ໄປເຊີນຟັງເພງ Qingmeizhuma ຄວາມຮັກໄຮ້ດຽງສາ.
ເນື້ອເພງມີຢູ່ວ່າ: ແມ່ນໃຈຂອງໃຜກັບໃຜ, ຖືກຄວັດໄວ້ເທິງຕົ້ນໄມ້, ແມ່ນຊື່ໃຜກັບໃຜ, ຂຽນໃສ່ຝາເຮືອນແລ້ວບໍ່ລືບຖິ້ມຈັກເທື່ອ. ເຖິງວ່າລະດູການແຍກຈາກກັນພວມປ່ຽນແປງ, ເຖິງວ່າເຫດຜົນຈາກກັນໄປພວມປ່ຽນແປງ, ແຕ່ຄວາມຮັກທີ່ໄຮ້ດຽງສາໃນຍາມຍັງນ້ອຍ, ອ້າຍບໍ່ເຄີຍລືມຈັກເທື່ອ.
ພາຍຫລັງແຜ່ນCD Qingmeizhuma ຄວາມຮັກໄຮ້ດຽງສາໄດ້ນຳອອກຈຳໜ່າຍຢ່າງສຳເລັດຜົນແລ້ວ, ທ່ານໂຈວຈື້ພິງກໍໄດ້ອັດແຜ່ນCDປະມວນເພງສ່ວນຕົວຢ່າງຕໍ່ເນື່ອງກັນຄືແຜ່ນCD Suiyueruge ອະດີດຕະການເໝືອນບົດເພງ ແລະHuakaihuaxie ດອກໄມ້ບານດອກໄມ້ຮ່ວງ ເປັນຕົ້ນ. ແຕ່ທ່ານໂຈວຈື້ພິງບໍ່ຢາກເປັນນັກຮ້ອງລ້ວນໆ, ທ່ານຮູ້ວ່າ, ຕາມນິດໄສໃຈຄໍຂອງຕົນແລ້ວ, ດີທີ່ສຸດແມ່ນເປັນນັກແຕ່ງນົດແຕ່ງເນື້ອຮ້ອງແລະຜູ້ຜະລິດຢູ່ເບື້ອງຫລັງ. ສະນັ້ນ, ປີ 1994, ທ່ານໂຈວເຢພິງໄດ້ລາອອກບໍລິສັດແຜ່ນສຽງປາວລີ້ຈິ່ນ, ແລ້ວຕັ້ງຫ້ອງການຜະລິດແຜ່ນສຽງຂອງຕົນເອງ. ກາຍເປັນຜູ້ຜະລິດດົນຕີທີ່ເປັນອິດສະຫຼະ.
ທີ່ທ່ານພວມຟັງຢູ່ນີ້ແມ່ນເພງNayichangfenghuaxueyuedeshi ເລື່ອງຄວາມຮັກເທື່ອນັ້ນ. ເຊິ່ງແມ່ນເພງທີ່ທ່ານໂຈວຈື້ພິງເອງມັກທີ່ສຸດ. ທຳນອງທີ່ອອນຊອນອ້ອຍອິ່ນ, ພາບດັ່ງຄວາມຝັນ, ໄດ້ສະແດງໃຫ້ເຫັນການສະແຫວງຫາແລະຄວາມງົງຕໍ່ໄວຄະນອງແລະຄວາມຮັກຂອງທ່ານ. ເນື້ອເພງຂຽນວ່າ: ແສງຈັນແລະດວງດາວ ກີບດອກກຸຫລາບກັບສາຍຝົນ, ຄຳໝັ້ນສັນຍາທີ່ອອນຫວານ, ຄວາມຝັນອັນດີງາມ ຄຳກອນແຫ່ງຄວາມຮັກ, ຊື່ທີ່ຮ້ອງຫາໃນສາຍລົມ ທຳນອງເພງທີ່ເສົ້າໝອງ ລ້ວນແລ້ວແຕ່ແມ່ນເລື່ອງໃນອະດີດຕະການ.
ເນື້ອເພງທີ່ທ່ານໂຈວເຢພິງແຕ່ງນັ້ນມ່ວນ, ມີອາລົມສີເສົ້າໆແຕ່ຈົບງາມ, ໃຫ້ຄົນຟັງແລ້ວຮູ້ສຶກສະອອນໃຈ. ມ້ວນທ້າຍລາຍການມື້ນີ້, ເຊີນຟັງເພງ Meiguihuabandexinjian ເຈ້ຍຂຽນຈົດໝາຍທີ່ມີລາຍດອກກຸຫລາບ. ຂັບຮ້ອງໂດຍໂຈວຈື້ຢພິງ. ເພງນີ້ໄດ້ເລົ່າເລື່ອງຄວາມຮັກອັນຈັບອົກຈັບໃຈຄົນ. ທຳນອງອອນຊອນ, ເນື້ອເພງໜ້າຟັງ, ໄດ້ສະແດງໃຫ້ເຫັນຄວາມສຸດວິໃສໃນເລື່ອງຄວາມຮັກ. ເຊີນຟັງໄດ້ເລີຍ.
|
