|
|
 |
| (GMT+08:00)
2004-12-10 15:56:06
|
 |
|
ຈີນໄດ້ປະຕິບັດຄຳໝັ້ນສັນຍາທຸກລາຍຢ່າງດີເດັ່ນຫັຼງຈາກເຂົ້າຮ່ວມອົງການການຄ້າໂລກໃນສາມປີມານີ້
cri
ວັນທີ 11 ທັນວາ,ຈີນເຂົ້າຮ່ວມອົງການການຄ້າໂລກສາມປີແລ້ວ.ໃນສາມປີມານີ້, ຈີນໄດ້ປະຕິບັດຄຳໝັ້ນສັນຍາທຸກລາຍຢ່າງດີເດັ່ນທີ່ທຳອອກໃນເວລາເຂົ້າຮ່ວມອົງການການຄ້າໂລກ,ການໄຂປະຕູສູ່ພາຍນອກກວ້າງອອກຕື່ມອີກ,ຍອດມູນຄ່າການຄ້າກັບຕ່າງປະເທດກໍເຕີບໂຕໄວຂຶ້ນ.ໃນສາມປີຂ້າງໜ້າ, ຈີນຈະປະຕິບັດທຸກທຸກຄຳໝັ້ນສັນຍາທີ່ທຳອອກໃນເວລາເຂົ້າຮ່ວມອົງການການຄ້າໂລກສຳເລັດຜົນ,ການພັດທະນາຂອງບາງຂະແໜງການຂອງຈີນຈະປະເຊີນກັບສິ່ງທ້າທາຍ.
ໃນເວລາຕ້ອນຮັບການເຂົ້າສຳພາດຂອງນັກຂ່າວCRI,ທ່ານຊຸນເຈີນອີ ເອກອັກຄະລັດຖະທູດຈີນປະຈຳອົງການການຄ້າໂລກເວົ້າວ່າ,ເລື່ອງຈິງໃນສາມປີໄດ້ພິສູດໃຫ້ເຫັນວ່າ,ຈີນໄດ້ປະຕິບັດຄຳໝັ້ນສັນຍາທຸກລາຍກ່ຽວກັບການເຂົ້າຮ່ວມອົງການການຄ້າໂລກຢ່າງຕັ້ງໜ້າ.ທ່ານເວົ້າວ່າ:
"ກ່ອນອື່ນ,ໃນດ້ານປັບປຸງກົດໝາຍກົດບັນຍັດ,ຂະແໜງການຕ່າງໆຂອງຈີນໄດ້ຊຳລະກົດໝາຍກົດບັນຍັດ 2300 ກວ່າສະບັບ,ປະກາດກົດໝາຍສະບັບໃໝ່ເຊິ່ງລວມທັງກົດໝາຍວ່າດ້ວຍການຄ້າກັບຕ່າງປະເທດ 40 ກວ່າສະບັບ;ສອງ,ຈີນໄດ້ຫຼຸດພາສີໃຫ້ໜ້ອຍລົງໃນໜ້າພຽງກວ້າງ,ໄຂຕະຫຼາດໃຫ້ກວ້າງອອກຕື່ມອີກ;ສາມ,ຈີນປະຕິບັດຄຳໝັ້ນສັນຍາໃນດ້ານໄຂປະຕູການຄ້າບໍລິການ,ເຊິ່ງລວມທັງການທະນາຄານ ການປະກັນໄພ ໂທລະຄົມແລະການບໍລິການທາງດ້ານກົດໝາຍເປັນຕົ້ນ;ສີ່,ໃນດ້ານປົກປັກຮັກສາສິດຊັບສິນທາງປັນຍາ,ຈີນກໍໄດ້ເຮັດວຽກຫຼວງຫຼາຍ."
ທ່ານສຸພະໄຊ ຜູ້ອຳນວຍການໃຫຍ່ຂອງອົງການການຄ້າໂລກໄດ້ຕີລາຄາສູງຕໍ່ຄວາມພະຍາຍາມອັນໃຫຍ່ຫຼວງຂອງຈີນ.ທ່ານຍ້ອງຍໍວ່າ,ການກະທຳຂອງຈີນພາຍຫັຼງເຂົ້າຮ່ວມອົງການການຄ້າໂລກແລ້ວແມ່ນດີເລີດທີ່ສຸດ,ໄດ້ຊັກນຳເສດຖະກິດຂອງປະເທດແລະເຂດແຄວ້ນອື່ນໆໃນໂລກຈະເລີນຂຶ້ນ.
ທ່ານຈັງຊຽງເສີນ ຮອງຫົວໜ້າກົມການຄ້າໂລກກະຊວງການຄ້າຈີນເວົ້າວ່າ:"ການເຂົ້າຮ່ວມອົງການການຄ້າໂລກມີບົດບາດອັນຕັ້ງໜ້າຕໍ່ການເປີດກວ້າງຕະຫຼາດແລະປົວແປງສະພາບແວດລ້ອມການລົງທຶນຂອງພວກຂ້າພະເຈົ້າ.ພວກຂ້າພະເຈົ້າໄດ້ຊົມໃຊ້ສິດຂອງປະເທດສະມາຊິກອົງການການຄ້າໂລກ,ຂະນະດຽວກັນຍັງໄດ້ຊົມໃຊ້ນະໂຍບາຍພິເສດທີ່ປະເທດສະມາຊິກອື່ນໆອຳນວຍໃຫ້,ທັງນີ້ໄດ້ສ້າງສະພາບແວດລ້ອມຍິ່ງດີແກ່ການສົ່ງອອກຜະລິດຕະພັນຂອງປະເທດຂ້າພະເຈົ້າ.ໃນຂະນະດຽວກັນ,ຈີນເຂົ້າຮ່ວມອົງການການຄ້າໂລກ,ປະຕິບັດກະຕິກາອົງການການຄ້າໂລກ,ເວົ້າສຳລັບຜູ້ລົງທຶນຕ່າງປະເທດແລ້ວ,ກໍຈະມີຄວາມໝັ້ນໃຈຫຼາຍຂຶ້ນຕໍ່ການລົງທຶນຢູ່ຈີນ.
ຕາມແນະນຳວ່າ,ເມື່ອເຂົ້າຮ່ວມອົງການການຄ້າໂລກແລ້ວ,ໄດ້ຊຸກຍູ້ການພັດທະນາການຄ້າກັບຕ່າງປະເທດຂອງຈີນຢ່າງວ່ອງໄວ,ຍອດມູນຄ່າການຄ້າກັບຕ່າງປະເທດໃນສາມປີໄດ້ເພີ່ມຂຶ້ນຄົບເທົ່າ,ຄາດຄະນາວ່າ,ປີນີ້ຈະບັນລຸ 1100 ຕື້ໂດລາສະຫະລັດ.ພ້ອມກັນນັ້ນ,ຕ່າງປະເທດລົງທຶນຢູ່ຈີນກໍເພີ່ມຂຶ້ນຢ່າງບໍ່ຢຸດຢັ້ງ,ຍອດມູນຄ່າການລົງທຶນໂດຍກົງໃນປີນີ້ມີຫວັງລື່ນກາຍ 60 ຕື້ໂດລາສະຫະລັດເປັນຄັ້ງທຳອິດ.
ເລີ່ມແຕ່ປີ 2005,ຈີນຈະເຂົ້າສູ່ໄລຍະຂ້າມຜ່ານຕອນຫັຼງຂອງການເຂົ້າຮ່ວມອົງການການຄ້າໂລກ.ໃນໄລຍະ 3 ປີຂ້າງໜ້າ,ໄລຍະປົກປັກຮັກສາອຸດສາຫະກຳສຳຄັນຂອງຈີນຈະສິ້ນສຸດລົງ,ຈີນຈະປະຕິບັດຄຳໝັ້ນສັນຍາໃຫ້ໝົດໃນເວລາເຂົ້າຮ່ວມອົງການການຄ້າໂລກ.ເຊັ່ນ,ເລີ່ມແຕ່ປີໜ້າ,ການຄຸ້ມຄອງໃບໂຄຕານຳເຂົ້າລົດຍົນຈະຖືກຍົກເລີກໝົດ;ໄລຍະຂ້າມຜ່ານຂອງຂະແໜງການບໍລິການສຳຄັນຕ່າງໆຄືທະນາຄານ ການປະກັນໄພ ແລະຫຼັກສັບເປັນຕົ້ນກໍຈະສິ້ນສຸດລົງເປັນກ້າວໆ.ສະນັ້ນ,ເມື່ອປະເຊີນກັບການແກ່ງແຍ່ງກັນໃນການໄຂຕະຫຼາດສູ່ພາຍນອກແລະຜະລິດຕະພັນຊັ້ນສູງຂອງຕ່າງປະເທດເຂົ້າສູ່ຕະຫຼາດຈີນ,ຂະແໜງການເຫຼົ່ານີ້ຈະຖືກກະໜ່ຳໃນລະດັບໃດໜຶ່ງ.ນອກນີ້,ຄຽງຄູ່ກັບໂຄຕາສິ່ງປັ່ນທໍທົ່ວໂລກຈະຖືກຍົກເລີກໃນປີໜ້າ,ການຂັດສີກັນດ້ານການລະຫວ່າງຈີນກັບປະເທດສ່ວນໜຶ່ງກໍຈະຮ້າຍແຮງຂຶ້ນຕື່ມອີກ,ການສຳຫຼວດກວດກາການຂາຍເລທີ່ແນໃສ່ຈີນກໍຈະນັບມື້ນັບຫຼາຍຂຶ້ນ.
ກ່ຽວກັບເລື່ອງນີ້,ຜູ້ຊ່ຽວຊານທີ່ກ່ຽວຂ້ອງຂອງຈີນເວົ້າວ່າ,ວິສາຫະກິດຈີນຕ້ອງການຍົກລະດັບຄຸນນະພາບແລະເຕັກນິກຂອງສິນຄ້າ,ສ້າງຍີ່ຫໍ້ຊື່ດັງຂອງຕົນ,ເພື່ອເພີ່ມທະວີຄວາມສາມາດແກ່ງແຍ່ງ;ວິສາຫະກິດຈີນຍັງຕ້ອງໄປລົງທຶນຕັ້ງໂຮງງານຢູ່ຕ່າງປະເທດ,ຫີຼກເວັ້ນການເກີດການຕ້ານຂາຍເລເລື້ອຍໆ.ພ້ອມກັນນັ້ນ,ລັດຖະບານຈີນຄວນຜ່ານການເຄື່ອນໄຫວທາງການຄ້າແລະການເຈລະຈາ ຍາດແຍ່ງໃຫ້ປະເທດຍິ່ງຫຼາຍຮັບຮອງຖານະເສດຖະກິດຕະຫຼາດສົມບູນຂອງຈີນ,ເຮັດໃຫ້ວິສາຫະກິດຈີນຮັບການປະຕິບັດຕໍ່ຢ່າງສະເໝີພາບໃນຕະຫຼາດສາກົນ.
|
|
|
