|
|
 |
| (GMT+08:00)
2004-12-17 16:07:17
|
 |
|
ນ້ຳຕາແມ່ນເຄື່ອງພະຍາກອນສຸຂະພາບ
cri
ເວົ້າໃນດ້ານແພດສາດແລ້ວ,ນ້ຳຕາແມ່ນທາດແຫຼວທີ່ລະບາຍອອກຈາກຕ່ອມນ້ຳຕາ,ຕ່ອມນ້ຳຕາຢູ່ບ່ອນເທິງຂອງໜ່ວຍຕາ.ຄົນທຳມະດາສະເລ່ຍແລ້ວ ນາທີໜຶ່ງພັບຕາປະມານ 13 ເທື່ອ,ພັບຕາເທື່ອໃດ,ໜັງຕາກໍນຳເອົານ້ຳຕາໜ້ອຍໜຶ່ງອອກຈາກຕ່ອມນ້ຳຕາ.ໃນເວລາຄົນເຮົາພັບຕາ,ນ້ຳຕາທຳຄວາມສະອາດຂອງຕາ,ເຊັ່ນສາມາດລ້າງເຊາະສິ່ງບໍ່ດີ ສິ່ງກະຕຸ້ນເປັນຕົ້ນ.
ດຽວນີ້,ນັກວິທະຍາສາດບາງຄົນກຳລັງຄົ້ນຄວ້າບົດບາດອື່ນໆຂອງນ້ຳຕາ,ເຊັ່ນ,ສາຍພົວພັນລະຫວ່າງນ້ຳຕາກັບອາລົມ.ໃຜໆກໍຮູ້ດີແລ້ວວ່າ,ເມື່ອຜູ້ໃດຜູ້ໜຶ່ງຮູ້ສຶກໂສກເສົ້າສະຫຼົດໃຈ,ນ້ຳຕາກໍໄຫຼອອກອາບແກ້ມອາບໜ້າ,ບາງທີທັງມີນ້ຳຂີ້ມູກໄຫຼອອກມາພ້ອມ.ນີ້ແມ່ນຍ້ອນວ່າ,ນ້ຳຕາຫຼວງຫຼາຍໄຫຼຜ່ານທໍ່ນ້ຳຕາ,ຖົງນ້ຳຕາແລະທໍ່ນ້ຳດັງ,ຜ່ານໂຜ້ງຮູດັງໄຫຼອອກຈາກຮ່າງກາຍ.
ນັກວິທະຍາສາດໄດ້ຄົ້ນຄວ້າເຫັນພົບວ່າ,ນ້ຳຕາສາມາດຜ່ອນຄາຍຄວາມກົດດັນຂອງຄົນເຮົາ.ພວກເຂົາເຈົ້າວິເຄາະທາງເຄມີຕໍ່ນ້ຳຕາແລ້ວປະກົດເຫັນວ່າ,ໃນນ້ຳຕາມີທາດເຄມີທີ່ສຳຄັນສອງຢ່າງ.ສິ່ງທີ່ເປັນຕາສົນໃຈນັ້ນແມ່ນ,ທາດເຄມີສອງຢ່າງດັ່ງກ່າວພຽງແຕ່ຢູ່ໃນນ້ຳຕາທີ່ໄຫຼອອກຍ້ອນອາລົມຖືກຜົນສະທ້ອນ,ໃນເວລາຖືກບົວກະຕຸ້ນເສັ້ນປະສາດແລ້ວນ້ຳຕາໄຫຼອອກນັ້ນພັດວິເຄາະທາດເຄມີດັ່ງກ່າວບໍ່ອອກ.ສະນັ້ນ,ພວກເຂົາເຈົ້າເຫັນວ່າ,ການລະບາຍນ້ຳຕາ,ສາມາດລົບລ້າງທາດເຄມີໃນຮ່າງກາຍຍ້ອນຄວາມໂສກເສົ້າສະຫຼົດໃຈ,ແລ້ວຜ່ອນຄາຍຄວາມກົດດັນທາງຈິດໃຈ,ໃຫ້ອາລົມເບີກບານມ່ວນຊື່ນຂຶ້ນ.
ຜູ້ຊ່ຽວຊານເຫຼົ່ານີ້ເຄີຍຈັດຕັ້ງຍິງຊາຍ 200 ກວ່າຄົນທົດລອງໄດ້ 1 ເດືອນ,ສຸດທ້າຍມີຜູ້ຍິງ 85%ແລະຜູ້ຊາຍ 73% ເວົ້າວ່າ,ພາຍຫັຼງໄຫ້ແລ້ວ ພວກເຂົາເຈົ້າຮູ້ສຶກສະບາຍໃຈຫຼາຍກວ່າເກົ່າ,ສະເລ່ຍແລ້ວ ຄວາມຮູ້ສຶກກົດດັນກໍຫຼຸດລົງປະມານ 40%.ຜົນການທົດລອງຍັງສະແດງໃຫ້ເຫັນວ່າ,ຄວາມສາມາດການໄຫ້ຂອງຜູ້ຊາຍບໍ່ທໍ່ຜູ້ຍິງ,ຈຳນວນເທື່ອຂອງການໄຫ້ຂອງຜູ້ຊາຍມີແຕ່ 1 ສ່ວນ 5 ຂອງຜູ້ຍິງ,ພ້ອມກັນນັ້ນຍັງມີຜູ້ຊາຍ 45% ເຖິງວ່າໄຫ້ແລ້ວ,ແຕ່ນ້ຳຕາບໍ່ໄດ້ໄຫຼອອກ,ແຕ່ນ້ຳຕາຂອງຜູ້ຍິງສ່ວນຫຼາຍໄດ້ໄຫຼອອກມາເລີຍ,ມີພຽງແຕ່ 6% ນ້ຳຕາບໍ່ໄດ້ໄຫຼອອກ.
ນັກວິທະຍາສາດເຫັນວ່າ,ການອົດກັ້ນບໍ່ໃຫ້ນ້ຳຕາໄຫຼອອກນັ້ນແມ່ນບໍ່ຄວນສົ່ງເສີມ.ຜູ້ຊາຍມັກຄວບຄຸມອາລົມແລະນ້ຳຕາຂອງພວກເຂົາເຈົ້າ,ສະນັ້ນ,ພວກເຂົາເຈົ້າມັກເປັນພະຍາດທີ່ກ່ຽວຂ້ອງກັບຄວາມກົດດັນທາງຈິດໃຈງ່າຍກວ່າຜູ້ຍິງ,ເຊັ່ນພະຍາດແຜເປື່ອຍເປັນຕົ້ນ.ສະນັ້ນເວົ້າໄດ້ວ່າ,ຄົນເຮົາຄວນປ່ຽນແປງທ່າທີຕໍ່ການໄຫ້,ຍ້ອນວ່າການໄຫ້ແມ່ນປະກົດການສະລິລະທຳມະຊາດຊະນິດໜຶ່ງ,ຖ້າວ່າອົດທົນບໍ່ໄຫ້ ຈະມີຜົນຮ້າຍຕໍ່ສຸຂະພາບ.ດັ່ງນັ້ນ,ການໄຫ້ແລະການຫົວລ້ວນແຕ່ແມ່ນຊ່ອງທາງທີ່ລະບາຍອາລົມ.
ນັກວິທະຍາສາດຍັງພົບເຫັນວ່າ,ໃນນ້ຳຕາມີທາດເຄມີທີ່ສັບສົນທີ່ສຸດ,ພາກສ່ວນປະກອບຂອງມັນຈະປ່ຽນແປງນຳພະຍາດແລະສະພາບການກິນຢາຂອງຄົນ.ສະນັ້ນ,ນ້ຳຕາສາມາດສ່ອງແສງສະພາບສຸຂະພາບຢ່າງຄັກແນ່,ທັງສາມາດເປັນເຄື່ອງກວດນັກກິລາໄດ້ກິນຢາຫ້າມຫຼືບໍ່.
ພວກເຂົາເຈົ້າກ່າວວ່າ,ຈະວິເຄາະນ້ຳຕາຢ່າງລະອຽດລະອໍ,ເພື່ອປະກົດເຫັນພະຍາດ,ຊອກຫາສາຍເຫດຂອງພະຍາດ.ວຽກງານຄົ້ນຄວ້າເຫຼົ່ານີ້,ຈະແກ້ຄວາມລັບຂອງນ້ຳຕາຕື່ມອີກ,ແລ້ວໃຊ້ເຂົ້າໃນການປີ່ນປົວ,ສ້າງຄວາມສຸກໃຫ້ມວນມະນຸດ.
|
|
|
