ຕາມຂ່າວCRI: ວັນທີ 20 ທັນວາ ທ່ານຊາລົງ ນາຍົກລັດຖະມົນຕີອິສລາແອນກ່າວວ່າ, ອິສລາແອນຈະບໍ່ເຂົ້າຮ່ວມກອງປະຊຸມສາກົນກ່ຽວກັບບັນຫາປາເລັສຕິນອິສລາແອນທີ່ຈະໄຂຂຶ້ນຢູ່ລອນດອນໃນເດືອນກຸມພາປີໜ້າ.
ທ່ານຊາລົງກ່າວວ່າ, ອິສລາແອນເຂົ້າໃຈຄວາມສຳຄັນຂອງກອງປະຊຸມເທື່ອນີ້, ແຕ່ຈະບໍ່ສົ່ງຜູ່ແທນໄປເຂົ້າຮ່ວມ. ໃນມື້ດຽວກັນ ທ່ານເອຮຸດ ໂອນເມິດ ຮອງນາຍົກລັດຖະມົນຕີອິສລາແອນກໍກ່າວວ່າ, ໃນສະເພາະໜ້ານີ້ ໜ້າທີ່ອັນດັບໜຶ່ງຂອງອິສລາແອນແມ່ນປະຕິບັດແຜນການເຄື່ອນໄຫວແຕ່ຝ່າຍດຽວ, ກອງປະຊຸມລອນດອນອາດຈະລົບກວນການປະຕິບັດແຜນການດັ່ງກ່າວ.
ໃນມື້ດຽວກັນ ທ່ານລີຊາດ ໂບເຊີ ໂຄສົກກະຊວງການຕ່າງປະເທດອາເມລິກາກ່າວວ່າ, ອາເມລິກາສະໜັບສະໜູນຄວາມພະຍາຍາມຂອງອັງກິດເພື່ອຊຸກຍູ້ຂະບວນວິວັດສັນຕິພາບຕາເວັນອອກກາງ. ຕາມເຜີຍໃຫ້ຮູ້ວ່າ, ທ່ານບຸສຍັງຈະສົ່ງຜູ່ແທນຊັ້ນສູງໄປເຂົ້າຮ່ວມກອງປະຊຸມເທື່ອນີ້.
ເມື່ອເດືອນແລ້ວນີ້ ທ່ານແບຼ ນາຍົກລັດຖະມົນຕີອັງກິດສະເໜີໃຫ້ຈັດກອງປະຊຸມສາກົນກ່ຽວກັບບັນຫາປາເລັສຕິນອິສລາແອນຢູ່ລອນດອນໃນເດືອນກຸມພາປີໜ້າ, ເພື່ອຊຸກຍູ້ຂະບວນວິວັດສັນຕິພາບ. ແຕ່ປາເລັສຕິນອິສລາແອນມີຄວາມເຫັນຂັດກັນກ່ຽວກັບຫົວຂໍ້ຂອງກອງປະຊຸມເທື່ອນີ້.
|