|
ຄະນະ"ຕຸ້ງລີ້ໂຫເຊີ່"ແມ່ນຄະນະດົນຕີທີ່ມີເອກະລັກພິເສດບົນເວທີເພງໄຕ້ຫວັນ, ພວກເຂົາເຈົ້າໄດ້ໃຊ້ສຽງສູງ ດັງຫອງ, ຟົດຝື້ນ ສ້າງກະແສນິຍົມຢູ່ເວທີເພງໄຕ້ຫວັນໃນທ້າຍສະຕະວັດກ່ອນ. ເມື່ອມິດງຽບໄປໄລຍະໜຶ່ງແລ້ວ, ປີນີ້, ພວກເຂົາເຈົ້າກໍໄດ້ອັດຈຳໜ່າຍແຜ່ນCDໃໝ່ທີ່ໃຫ້ຊື່ວ່າ: ບັນທຶກຄວາມສະຫງ່າລາສີ". ໃນລາຍການຢ່ອນອາລົມໃນວັນເສົາມື້ນີ້, ແສງແກ້ວຂໍແນະນຳຄະນະຕຸ້ງລີ້ໂຫເຊີ່ກັບແຜ່ນCDໃໝ່ຂອງພວກເຂົາເຈົ້າສູ່ທ່ານຟັງ.
ຄະນະຕຸ້ງລີ້ໂຫເຊີ່ປະກອບດ້ວຍທ່ານຢິວຊິວຊິງແລະທ່ານອຽນຈື້ລີນ, ນັກຮ້ອງທັງສອງນີ້ກໍບໍ່ໜຸ່ມນ້ອຍປານໃດແລ້ວ, ເຄີຍຮ້ອງເພງຢູ່ໃນບາເຫຼົ້າມາຫລາຍປີ, ປີ1996 ຈຶ່ງເຊັນສັນຍາເຂົ້າສູ່ເວທີເພງຢ່າງເປັນທາງການ. ປີ 1997, ເຂົາເຈົ້າໄດ້ອັດCDແຜ່ນທຳອິດທີ່ໃຫ້ຊື່ວ່າ: Wuqingdeqingshu ຈົດໝາຍຮັກທີ່ບໍ່ປານີ, ເພງທີ່ທ່ານພວມຟັງຢູ່ນີ້ກໍແມ່ນເພງຊື່ດຽວກັນກັບCDແຜ່ນນີ້, ຄະນະຕຸ້ງລີ້ໂຫເຊີ່ໄດ້ສະແດງຄວາມທໍລະມານໃຈຍ້ອນອົກຮັກດ້ວຍສຽງເພງຈາກສ່ວນເລິກຂອງຫົວໃຈ. ເນື້ອເພງມີຢູ່ວ່າ: ໃນເມື່ອບໍ່ຮັກແລ້ວ, ຈຳເປັນຫຍັງຍັງໃສ່ໃຈ? ຂ້ອຍຢືນຢູ່ເທິງຫລັງຄາເຮືອນ, ນ້ຳຕາແລະແສງໄຟນີອອນເຮັດໃຫ້ຕາຂ້ອຍມົວໝອງ, ຄວາມຂົມຂື່ນໃນໃຈ ຈະເວົ້າສູ່ໃຜຟັງ?
ກໍແມ່ນຍ້ອນແຜ່ນCD Wuqingdeqingshu ຈົດໝາຍຮັກທີ່ບໍ່ປານີນີ້ເອງ, ຄົນທັງຫລາຍເລີ່ມເອົາໃຈໃສ່ນຳຄະນະຕຸ້ງລີ້ໂຫເຊີ່, ຈາກສຽງທີ່ດັງຫອງ ມ່ວນ ຢ່າງບໍ່ມີບ່ອນຕິ, ແລະເຕັມໄປດ້ວຍລັກສະນະຂອງລູກຜູ້ຊາຍ, ຜູ້ຟັງໄດ້ສຳນຶກເຖິງຄວາມສຸດວິໄສຍ້ອນອົກຮັກ, ຄວາມອົດທຳນຍ້ອນສະຫຼະຮັກ, ແລະການທົບທວນຄວາມຮັກຂອງຜູ້ຮ້ອງ.
ຫລັງຈາກນັ້ນມາ, ຄະນະຕຸ້ງລີ້ໂຫເຊີ່ຄືຈັ່ງວ່າໄດ້ບິດລານຈົນເຕັມ, ແລ້ວເດີນໄປຕາມເສັ້ນທາງດົນຕີຢ່າງໄວວາ ດ້ວຍບຸກຄະລິກທີ່ເອກອ້າງແລະອາລົມຈິດອັນເລິກເຊິ່ງທີ່ແຝງຊ້ອນຢູ່ໃນທຳນອງດົນຕີລອກແອນໂລນຂອງພວກເຂົາເຈົ້າ, ແຕ່ປີ 1997 ຮອດປີ 2002, ປີໃດເຂົາເຈົ້າກໍມີCDແຜ່ນໃໝ່ນຳອອກຈຳໜ່າຍ. ຫລັງຈາກນັ້ນ, ຄະນະດົນຕີຕຸ້ງລີ້ໂຫເຊີ່ໄດ້ມິດງຽບໄປ. ຈົນຮອດປີນີ້, ຄະນະຕຸ້ງລີ້ໂຫເຊີ່ຈຶ່ງໄດ້ມີແຜ່ນCDໃໝ່ທີ່ໃຫ້ຊື່ວ່າ: Jiushihonghuihuangquanjilu "ບັນທຶກຄວາມສະຫງ່າລາສີ", ໃນນັ້ນທີ່ເພງມ່ວນໆ 15 ເພງ ຊຶ່ງເປັນເພງເກົ່າທີ່ຜູ້ຟັງຍັງຕິດອົກຕິດໃຈ, ເຮັດໃຫ້ຜູ້ຟັງຫູແຈ້ງຕາໃສຂຶ້ນ.
ທີ່ທ່ານພວມຟັງຢູ່ນີ້ແມ່ນເພງMingtiandemingtiandemingtian ມື້ອື່ນຂອງມື້ອື່ນຂອງມື້ອື່ນ, ເພງນີ້ໄດ້ສືບຕໍ່ເອກະລັກຂອງເພງຈົດໝາຍຮັກທີ່ບໍ່ປານີ ເຊິ່ງທ່ານໄດ້ຟັງເມື່ອກີ້ນີ້, ໃນເພງນີ້ໄດ້ສະແດງໃຫ້ເຫັນຄວາມຈົນປັນຍາແລະຄວາມອົດກັ້ນຂອງອາລົມຈິດ. ເນື້ອເພງຮ້ອງວ່າ: ຖ້ານ້ອງບໍ່ກ້າຢູ່ຄຽງຂ້າງອ້າຍຈົນຮອດມື້ອື່ນຂອງມື້ອື່ນຂອງມື້ອື່ນ, ກໍໃຫ້ນ້ອງລືມອ້າຍດີກວ່າ.
CDແຜ່ນໃໝ່ທີ່ຄະນະຕຸ້ງລີ້ໂຫເຊີ່ນຳອອກໃນປີນີ້ບໍ່ມີເພງໃໝ່, ອາດບໍ່ໄດ້ຄຶດມາກ່ອນ. ຄະນະຕຸ້ງລີ້ໂຫເຊີ່ເວົ້າວ່າ, ເພງເຫຼົ່ານີ້ຮ້ອງໄດ້ດີແລ້ວ, ຖ້າຢາກຮ້ອງໃຫ້ດີກວ່ານີ້ແມ່ນຍາກຫລາຍ. ສະນັ້ນ, ເຂົາເຈົ້າທັງສອງໄດ້ດັດແປງໜ້ອຍໜຶ່ງ, ເພີ່ມດົນຕີເອເລັກໂຕຼນິກແລະທຳນອງRAPໃສ່, ເພື່ອໃຫ້ສອດຄ່ອງກັບລົດນິຍົມຂອງຜູ້ຟັງທີ່ໜຸ່ມນ້ອຍລຸ້ນໃໝ່. ຕໍ່ໄປເຊີນຟັງເພງLvguang ແສງສີຂຽວ ຂັບຮ້ອງໂດຍຄະນະຕຸ້ງລີ້ໂຫເຊີ່.
ໃນຖານເປັນຄະນະດົນຕີທີ່ມີຊື່ສຽງ, ຜົນສຳເລັດຂອງຄະນະຕຸ້ງລີ້ໂຫເຊີ່ສຳຄັນແມ່ນຍ້ອນສອງຄົນເຂົາເຈົ້າຮ່ວມມືກັນດີ, ແລະສະແດງເອກະລັກດົນຕີຂອງຕົນຢ່າງເຕັມສ່ວນ. ທ່ານຢິວຊິວຊິງມີພອນສະຫວັນດົນຕີຫລາຍ, ທ່ານເວົ້າວ່າ, ໃນຫົວສະໝອງຂອງທ່ານມີດົນຕີປະກົດຂຶ້ນຢູ່ທຸກເວລາ, ເວລາແຕ່ງເພງກໍແຕ່ງໄປຕາມຈິນຕະນາການຂອງຕົນ. ສ່ວນທ່ານອຽນຈື້ລີນພັດມີສຽງມ່ວນແລະຄວາມຈົດຈໍ່ຕໍ່ດົນຕີ. ຕັ້ງແຕ່ເຂົາເຈົ້າຮ້ອງເພງຢູ່ບາເຫຼົ້າຢ່າງສຸດອົກສຸດໃຈ, ມາຮອດສູ່ມື້ນີ້, ກໍຍັງຮັກສາຄວາມຮັກແພງກັນຂອງຜູ້ຊາຍ, ແລະບໍ່ມີການປ່ຽນແປງ. ນີ້ກໍອາດຈະແມ່ນມູນເຫດໜຶ່ງທີ່ແຟນເພງທັງຫລາຍນິຍົມເຂົາເຈົ້າ.
ເຈົ້າຖາມຂ້ອຍວ່າ, ໃນໂລກນີ້, ບ່ອນໄກສຸດຢູ່ໃສ? ຂ້ອຍໂຍນຄຳຕອບນີ້ໄປໃສ່ທ້ອງຟ້າສີຄາມແລ້ວມັນຈະຕົກໃສ່ສ່ວນເລິກໃນໃຈຂອງເຈົ້າ. ເຈົ້າຖາມຂ້ອຍວ່າ, ໃນໂລກນີ້, ຄວາມຮັກແທ້ຢູ່ໃສ? ຂ້ອຍຈະຊີ້ບອກວ່າຢູ່ນອກມະຫາສະໝຸດ ຢູ່ໃນຊວງເອິກຂອງຂ້ອຍ. ຄຳໝັ້ນສັນຍາຫັກຫລັງຄຳໝັ້ນສັນຍາ, ມິດຫັກຫລັງຄວາມລະມ່ອມລະໄມ, ແທງເຂົ້າຫົວໃຈ, ແຕ່ຂ້ອຍພັດບໍ່ເຫັນ. ເພງທີ່ທ່ານພວມຟັງຢູ່ນີ້ແມ່ນເພງBeipanqingge ເພງຮັກຫັກຫລັງ. ຂັບຮ້ອງໂດຍຄະນະຕຸ້ງລີ້ໂຫເຊີ່.
ໃນຫລາຍປີມານີ້, ມີນັກຮ້ອງໃໝ່ປະກົດຕົວເລື້ອຍໆ, ໄດ້ນຳເອົາການປ່ຽນແປງຫລາກຫລາຍມາໃຫ້ເວທີດົນຕີ, ແຕ່ຄວາມຈິງໃຈຕໍ່ດົນຕີຢ່າງສະເໝີຕົ້ນສະເໝີປາຍຂອງຄະນະຕຸ້ງລີ້ໂຫເຊີ່ແລະເອກະລັກຂອງພວກເຂົາເຈົ້າທີ່ຝາກຝັງໃນດົນຕີພັດບໍ່ໄດ້ປ່ຽນແປງ. ມ້ວນທ້າຍລາຍການມື້ນີ້, ພວກເຮົາມາຟັງເພງCaihong ສາຍຮຸງ, ເຊິ່ງແມ່ນເພງທີ່ຄະນະຕຸ້ງລີ້ໂຫເຊີ່ມັກທີ່ສຸດ. ເນື້ອເພງຮ້ອງວ່າ: ສາຍຮຸງ, ເມື່ອຝົນເອື້ອນແລ້ວຄວນປະກາຍແສງທົ່ວທ້ອງຟ້າ, ເປັນສີແກ່ນ້ອງທີ່ແສນຮັກຂອງອ້າຍ.
|
