|
ຕາມຂ່າວCRI: ວັນທີ 21 ທັນວາ ກອງປະຊຸມຄັ້ງທຳອິດຂອງໜ່ວຍພິເສດປ້ອງກັນແລະປິ່ນປົວພະຍາດໄຂ້ຫວັດສັດປີກອາຊຽນທີ່ຈັດຂຶ້ນຢູ່ສິງກະໂປເປັນເວລາ 2 ມື້ໄດ້ສິ້ນສຸດລົງ, ກອງປະຊຸມໄດ້ວາງມາດຕະການ 8 ຂໍ້ສຳລັບ 10 ປະເທດອາຊຽນພ້ອມກັນປ້ອງກັນແລະປິ່ນປົວພະຍາດໄຂ້ຫວັດສັດປີກ.
ມາດຕະການ 8 ຂໍ້ມີດັ່ງນີ້ ສ້າງກົນໄກຕິດຕາມແລະສັນຍານໄພພະຍາດ, ພົບເຫັນແລະລາຍງານສະພາບລະບາດຢ່າງທັນການ; ໃຊ້ຮູບການອັນບັງເກີດຜົນຄື ກັກກັນແລະຄວບຄຸມຕາມເສັ້ນແບ່ງເຂດເກີດພະຍາດເປັນຕົ້ນ, ຄວບຄຸມບໍ່ໃຫ້ພະຍາດແຜ່ລາມອອກ; ນຳໃຊ້ຂໍ້ມູນຂ່າວສານນຳກັນໃນດ້ານພະຍາດລະບາດວິທະຍາ; ສ້າງກົນໄກສຸກເສີນ, ເພື່ອແກ້ພະຍາດໄຂ້ຫວັດສັດປີກທີ່ເກີດຂຶ້ນຢ່າງກະທັນຫັນ; ໃຊ້ວິທີຂ້າຕາຍແລະສັກຢາວັກແຊງຢ່າງທັນການເປັນຕົ້ນ, ຫຼຸດຜົນສະທ້ອນແລະຄວາມເສຍຫາຍໃຫ້ໜ້ອຍລົງເທົ່າທີ່ຄວນ; ຍົກສູງຄວາມສາມາດໃນການບົ່ງມະຕິພະຍາດຢ່າງວ່ອງໄວແລະແມ່ນຢຳ; ສ້າງເຂດປາສະຈາກພະຍາດເພື່ອຟື້ນຟູການສົ່ງອອກຜະລິດຕະພັນທີ່ກ່ຽວຂ້ອງ; ຍົກສູງຄວາມຮູ້ຂອງມວນຊົນໃນການປ້ອງກັນແລະປິ່ນປົວພະຍາດໄຂ້ຫວັດສັດປີກ.
ຕາມໄດ້ຊາບ, ມາດຕະການ 8 ຂໍ້ດັ່ງກ່າວລ້ວນແຕ່ຈະໃຫ້ປະເທດທີ່ກ່ຽວຂ້ອງເປັນຜູ່ປະສານງານ, ແລະຈະວາງແຜນປະຕິບັດງານທີ່ລະອຽດແລະຫາລືກັນໃນກອງປະຊຸມໜ່ວຍພິເສດຄັ້ງໜ້າ. ໜ່ວຍພິເສດປ້ອງກັນແລະປິ່ນປົວພະຍາດໄຂ້ຫວັດສັດປີກຈະຈັດກອງປະຊຸມຄັ້ງໜ້າຢູ່ໄທໃນເດືອນພຶດສະພາປີໜ້າ.
|
