|
|
 |
| (GMT+08:00)
2004-12-24 09:02:34
|
 |
|
ຈີນເພີ່ມທະວີການກໍ່ສ້າງຫ້ອງທົດລອງແຫ່ງຊາດ ພະຍາຍາມຍົກລະດັບການຄົ້ນຄວ້າພື້ນຖານໃຫ້ສູງຂຶ້ນ
cri
ຕາມຂ່າວCRI: ວັນທີ 23 ທັນວານີ້, ກອງປະຊຸມລະລຶກວັນປະຕິບັດແຜນການກໍ່ສ້າງຫ້ອງທົດລອງຈຸດໜັກແຫ່ງຊາດຈີນຄົບຮອບ 20 ປີໄດ້ຈັດຂຶ້ນຢູ່ປັກກິ່ງ. ໃນກອງປະຊຸມ ທ່ານເສິງຈິນເຜີຍ ຮອງລັດຖະມົນຕີກະຊວງວິທະຍາສາດເຕັກໂນໂລຊີຈີນກ່າວວ່າ, ເມື່ອໄດ້ກໍ່ສ້າງມາເປັນເວລາ 20 ປີ, ຫ້ອງທົດລອງຈຸດໜັກແຫ່ງຊາດຈີນໄດ້ພັດທະນາເປັນແຫຼ່ງການຄົ້ນຄວ້າພື້ນຖານແລະປະດິດສ້າງວິທະຍາສາດຂອງຈີນ. ຕາມໄດ້ຊາບ, ຕໍ່ໄປພາຍໜ້າ, ຈີນຈະໃຊ້ມາດຕະການຕ່າງໆ ເຊັ່ນ ເພີ່ມການລົງທຶນເປັນຕົ້ນ, ສືບຕໍ່ເພີ່ມທະວີການກໍ່ສ້າງຫ້ອງທົດລອງແຫ່ງຊາດ, ຍົກລະດັບການຄົ້ນຄວ້າພື້ນຖານໃຫ້ສູງຂຶ້ນຕື່ມອີກ.
ເພື່ອຍົກລະດັບການຄົ້ນຄວ້າພື້ນຖານໃຫ້ສູງຂຶ້ນ, ເມື່ອປີ 1984 ລັດຖະບານຈີນໄດ້ເລີ່ມປະຕິບັດແຜນການກໍ່ສ້າງຫ້ອງທົດລອງຈຸດໜັກແຫ່ງຊາດຈີນ, ແລະໄດ້ລົງທຶນຫຼາຍຕື້ຢວນຕາມໆກັນໃຊ້ເຂົ້າໃນການສະໜັບສະໜູນການກໍ່ສ້າງຫ້ອງທົດລອງ. ເມື່ອໄດ້ກໍ່ສ້າງແລະພັດທະນາມາເປັນເວລາ 20 ປີ, ຫ້ອງທົດລອງຈຸດໜັກແຫ່ງຊາດທີ່ພວມໝູນເດີນໃນປະຈຸບັນມີ160 ກວ່າແຫ່ງ, ຍອດມູນຄ່າຂອງເຄື່ອງວັດແທກແລະອຸປະກອນມີເກືອບ 3 ຕື້ຢວນ. ທຶນໃຊ້ໃນການຄົ້ນຄວ້າວິທະຍາສາດໃນທຸກປີທີ່ຫ້ອງທົດລອງເຫຼົ່ານີ້ຫ້າງຫາໄດ້ນັ້ນລື່ນກາຍ 2 ຕື້ຢວນ. ຫ້ອງທົດລອງຈຸດໜັກແຫ່ງຊາດໄດ້ກວມຂົງເຂດການຄົ້ນຄວ້າວິທະຍາສາດຈຸດໜັກຄື ການຄົ້ນຄວ້າພື້ນຖານ ການຄົ້ນຄວ້າໄຮເທັກແລະການຄົ້ນຄວ້າລັກສະນະສາທາລະນູປະໂພກທີ່ກ່ຽວຂ້ອງເປັນຕົ້ນ.
ໃນກອງປະຊຸມລະລຶກທີ່ຈັດຂຶ້ນໃນວັນທີ 23 ທັນວານີ້, ທ່ານເສິງຈິນເຜີຍ ຮອງລັດຖະມົນຕີກະຊວງວິທະຍາສາດເຕັກໂນໂລຊີຈີນຊີ້ອອກວ່າ, ຫ້ອງທົດລອງຈຸດໜັກແຫ່ງຊາດໄດ້ຮັບໝາກຜົນຄົ້ນຄວ້າວິທະຍາສາດທີ່ມີລະດັບກ້າວໜ້າໃນສາກົນງວດໜຶ່ງໃນຂົງເຂດຄົ້ນຄວ້າວິທະຍາສາດລະດັບນຳໜ້າແລະດ້ານຮັບໃຊ້ເປົ້າໝາຍຍຸດທະສາດພັດທະນາເສດຖະກິດແລະສັງຄົມທີ່ສຳຄັນຂອງລັດ, ໄດ້ກາຍເປັນອູ່ທີ່ບົ່ມເພາະການປະດິດສ້າງດັ້ງເດີມອັນສຳຄັນຂອງຈີນ.
ທ່ານເສິງຈິນເຜີຍຍັງສະເໜີວ່າ, ພຽງແຕ່ໃນປີກາຍນີ້ປີດຽວ, ວິທະຍານິພົນວິຊາການທີ່ຫ້ອງທົດລອງຈຸດໜັກແຫ່ງຊາດປະກາດນັ້ນໄດ້ບັນລຸ 2 ໝື່ນ 8000 ກວ່າບົດ, ໃນນັ້ນມີ 30% ຂຶ້ນໄປຖືກບັນທຶກເຂົ້າໃນວາລະສານວິຊາການທີ່ມີຊື່ສຽງໃນໂລກ, ໄດ້ເປີດກວ້າງອິດທິພົນຂອງຈີນໃນວົງການວິຊາການສາກົນ. ນອກນີ້ ຫ້ອງທົດລອງຈຸດໜັກແຫ່ງຊາດຈີນຍັງໄດ້ຫາບແບກໜ້າທີ່ແກ້ຂອດວິທະຍາສາດເຕັກນິກໃນການກໍ່ສ້າງໂຄງການສຳຄັນຂອງຈີນ ຄືທາງລົດໄຟຊຽງໄຫຕິເບດແລະໂຮງໄຟຟ້ານິວເຄຼຍສິນຊານເປັນຕົ້ນ, ໄດ້ໃຫ້ການຄ້ຳຊູດ້ານວິທະຍາສາດເຕັກນິກແກ່ການກໍ່ສ້າງໂຄງການເຫຼົ່ານີ້ຢ່າງສະດວກ.
ຕາມສະເໜີໃຫ້ຮູ້ວ່າ,ໃນຫຼາຍປີມໍ່ໆມານີ້,ລັດຖະບານຈີນໄດ້ເພີ່ມເງິນທຶນຫຼາຍກວ່າເກົ່າເຂົ້າໃນການປົວແປງເງື່ອນໄຂຄົ້ນຄວ້າວິທະຍາສາດ,ການບຳລຸງສ້າງຜູ້ມີຄວາມຮູ້ຄວາມສາມາດເປັນຕົ້ນຂອງຫ້ອງທົດລອງຈຸດໜັກແຫ່ງຊາດໃຫ້ດີຂຶ້ນ,ແລະໄດ້ມີການຄືບໜ້າຢ່າງຕັ້ງໜ້າ.ທ່ານລູເຄີແມ່ນຫົວໜ້າຫ້ອງທົດລອງແຫ່ງຊາດວິທະຍາສາດວັດສະດຸຂອງນະຄອນເສີນຢາງ ເຂດພາກຕາເວັນອອກສຽງເໜືອຂອງຈີນ,ທ່ານໄດ້ເຮັດວຽກຢູ່ຫ້ອງທົດລອງດັ່ງກ່າວເປັນເວລາ16ປີແລ້ວ.ທ່ານບອກນັກຂ່າວວ່າ:
"ໃນຫຼາຍປີມານີ້,ຝ່າຍລັດໄດ້ໃຫ້ການສະໜັບສະໜູນໂດຍຈຳເພາະແກ່ຫ້ອງທົດລອງຈຸດໜັກແຫ່ງຊາດ,ເຊິ່ງລວມທັງຄ່າໝູນເດີນຄ່າໃຊ້ຈ່າຍໃນການປ່ຽນແລະດັດສ້າງອຸປະກອນເປັນປະຈຳ,ໄດ້ສະໜອງການຮັບປະກັນອັນພື້ນຖານໃຫ້ແກ່ຫ້ອງທົດລອງທີ່ຮັກສາເງື່ອນໄຂຄົ້ນຄວ້າວິທະຍາສາດເຕັກນິກທີ່ຂ້ອນຂ້າງກ້າວໜ້າແລະສະພາບແວດລ້ອມວິຊາການອັນດີງາມ,ແລະໄດ້ຮັບປະກັນໃຫ້ຫ້ອງທົດລອງສາມາດດຳເນີນການຄົ້ນຄວ້າໄລຍະຍາວໃນທິດວິທະຍາສາດສຳຄັນຈຳນວນໜຶ່ງ."
ທ່ານລູເຄີສະເໜີໃຫ້ຮູ້ວ່າ,ໃນ10ກວ່າປີກ່ອນ,ຫ້ອງທົດລອງແຫ່ງຊາດທີ່ທ່ານເຮັດວຽກຢູ່ນັ້ນກໍໄດ້ເລີ່ມດຳເນີນວຽກງານຄົ້ນຄວ້າດ້ານວັດສະດຸໂລຫະນາໂນແມັດ.ຫ້ອງທົດລອງໄດ້ນຳໃຊ້ເງື່ອນໄຂແລະເງິນທຶນຄົ້ນຄວ້າວິທະຍາສາດເຕັກນິກຂອງຫ້ອງທົດລອງຈຸດໜັກແຫ່ງຊາດ,ເມື່ອໄດ້ທຳຄວາມພະຍາຍາມມາເປັນເວລາ8ປີແລ້ວ,ໃນທີ່ສຸດໄດ້ເຮັດໃຫ້ຈີນຢູ່ໃນແຖວໜ້າສຸດໃນຂົງເຂດຄົ້ນຄວ້າດັ່ງກ່າວ.
ໃນເວລາກ່າວຄຳປາໄສ,ທ່ານນາງເສີນຈີ້ລີ້ ທີ່ປຶກສາແຫ່ງລັດຈີນໄດ້ຢືນຢັນຢ່າງເຕັມສ່ວນຕໍ່ບົດບາດຂອງຫ້ອງທົດລອງຈຸດໜັກແຫ່ງຊາດໃນການຊຸກຍູ້ການຄົ້ນຄວ້າພື້ນຖານ,ແລະກ່າວວ່າ,ລັດຖະບານຈີນຈະສືບຕໍ່ເພີ່ມເງິນທຶນຫຼາຍກວ່າເກົ່າເຂົ້າໃນຫ້ອງທົດລອງຈຸດໜັກແຫ່ງຊາດ,ເພີ່ມທະວີການບຳລຸງສ້າງຜູ້ມີຄວາມຮູ້ຄວາມສາມາດໃນຊາວໜຸ່ມທຸກລະດັບ,ພ້ອມກັນນັ້ນ,ເລັ່ງລັດບາດກ້າວໄຂປະຕູສູ່ໂລກພາຍນອກຂອງຫ້ອງທົດລອງ,ເພື່ອດູດດຶງຜູ້ຊ່ຽວຊານຕ່າງປະເທດຫຼາຍກວ່າເກົ່າທີ່ມີລະດັບສູງມາເຮັດວຽກຢູ່ຫ້ອງທົດລ້ອງ.
|
|
|
