|
ປີ 2004,ຕົວເມືອງຈຳນວນຫນຶ່ງຂອງຈີນໄດ້ຕັ້ງຄຼິນິກທົດລອງປົວຜູ້ເສບຢາເສບຕິດດ້ວຍເມທາດອນໂດຍຈຳເພາະ.ການປົວດ້ວຍເມທາດອນດັ່ງກ່າວໄດ້ມີ ບົດບາດອັນແນ່ນອນໃນດ້ານຊ່ອຍຜູ້ເສບຢາເສບຕິດເຊົາແງ້ນຢາແລະປ້ອງກັນການແຜ່ລະບາດຂອງເມທາດອນແມ່ນຢານ້ຳສັງເຄາະດ້ວຍເຄມີ.ມັນມີບົດບາດອັນແນ່ນອນທີ່ເຮັດໃຫ້ຜູ້ເສບຢາເສບຕິດເຊົາແງ້ນຢາ.ປະຈຸບັນ,ຫລາຍໆປະເທດໃນໂລກໄດ້ໃຊ້ເມທາດອນໂດຍທົ່ວໄປໃນການປົວໃຫ້ອອກຢາເສບຕິດ.ໃຫ້ຜູ້ເສບຢາເສບຕິດກິນຢາເມທາດອນຢ່າງຊອບກົດຫມາຍແລະປອດໄພໃຕ້ການຊີ້ນຳຂອງຫມໍ,ສາມາດແກ້ອາການຕິດຢາເສບຕິດເຊັ່ນເຮໂຣອິນເປັນຕົ້ນ,ຫລຸດຜ່ອນການຕິດໂຣກເອດແລະພະຍາດອື່ນໆຍ້ອນໃຊ້ເຂັມສັກຢາຮ່ວມກັນ.
ຕາມສະເຫນີວ່າ,ຍ້ອນໄດ້ໃຊ້ມາດຕະການດັ່ງກ່າວ,ໃນປະເທດແລະເຂດແຄວ້ນຈຳນວນຫນຶ່ງໃນໂລກອັດຕາຜູ້ເສບຢາເສບຕິດໂຣກເອດໄດ້ຫຼຸດຫນ້ອຍລົງຢ່າງບັງເກີດຜົນ.ອີງຕາມຕົວເລກທີ່ຝ່າຍທາງການຈີນປະກາດ,ປະຈຸບັນ,ຢູ່ຈີນມີຜູ້ຕິດເຊື້ອໂຣກເອດປະມານ 8 ແສນ 4 ຫມື່ນຄົນ,ການແຜ່ລາມຂອງໂຣກເອດພວມຢູ່ໃນຈຸດອັນຕະລາຍທີ່ຈາກຝູງຄົນອັນຕະລາຍແຜ່ລະບາດໄປສູ່ຝູງຄົນທຳມະດາ,ໃນນັ້ນ, ການໃຊ້ເຂັມສັກຢາ ເສບຕິດຮ່ວມກັນແມ່ນຊ່ອງທາງຕົ້ນຕໍທີ່ເຮັດໃຫ້ໂຣກເອດແຜ່ລະບາດຢູ່ຈີນ.ທ່ານລີຈື້ເວີຍ ສາສະດາຈານສະຖາບັນແພດສາດມະຫາວິທະຍາໄລປັກກິ່ງຂອງຈີນເຫັນວ່າ,ຈຸດປະສົງກົກຮາກອັນຫນຶ່ງທີ່ຈີນທົດລອງໃຊ້ວິທີປົວດ້ວຍຢາເມທາດອນນັ້ນກໍ່ແມ່ນເພື່ອຫຼີກເວັ້ນການໃຊ້ເຂັມສັກຢາເສບຕິດຮ່ວມກັນ,ເພື່ອປ້ອງກັນແລະຫລຸດການແຜ່ລະບາດຂອງໂຣກເອດໃຫ້ຫນ້ອຍລົງ.ທ່ານເວົ້າວ່າ: "ເວົ້າໃນດ້ານແພດສາດ ໂດຍສະເພາະແມ່ນໃນດ້ານປ້ອງກັນໂຣກເອດ,ພວກເຮົາໄດ້ຮຽກຮ້ອງຕະຫຼອດມາໃຫ້ທົ່ວສັງຄົມຕ້ອງຮັບຮູ້ ສະພາບຕົວຈິງ,ສະຫນອງຢາໃຊ້ແທນຊະນິດຫນຶ່ງໃຫ້ຜູ້ເສບຢາເສບຕິດຢ່າງເປີດເຜີຍ,ເພື່ອສະກັດກັ້ນກາງກະທຳຂອງພວກເຂົາເຈົ້າທີ່ໃຊ້ເຂັມສັກຢາເສບຕິດຮ່ວມກັນ,ບໍ່ໃຫ້ພວກເຂົາເຈົ້າຖືກເຊື້ອໂຣກເອດຕິດແປດ.ການຕັ້ງຄຼິນິກໃຊ້ຢາເມທາດອນກໍ່ແມ່ນເພື່ອຫລຸດຜ່ອນຜົນຮ້າຍບາງຢ່າງທີ່ມີຕໍ່ສ່ວນບຸກຄົນ ຄອບຄົວແລະສັງຄົມຍ້ອນສັກຢາເສບຕິດ."
ຄຼິນິກປົວດ້ວຍຢາເມທາດອນຂອງເມືອງເກີຈີ້ວແຂວງຢຸນນານ ພາກຕາເວັນຕົກສຽງໃຕ້ຂອງຈີນແມ່ນຄຼິນິກທົດລອງປົວຜູ້ຕິດເຮໂລອິນດ້ວຍຢາເມທາດອນແຫ່ງທຳອິດຂອງຈີນ.ທ່ານມິນຊຽງຕົງເປັນນາຍຫມໍທີ່ເຮັດວຽກຢູ່ຄຼິນິກດັ່ງກ່າວ.ທ່ານບອກນັກຂ່າວວ່າ,ແຕ່ຮັບປົວຄົນເຈັບໃນເດືອນເມສາປີ 2004 ມານີ້,ວຽກງານທຸກລາຍຂອງຄຼິນິກໄດ້ດຳເນີນໄປຢ່າງເປັນປົກກະຕິ.ປະຈຸບັນ,ຜູ່ມາກິນຢາຢູ່ຄຼິນິກໄດ້ມີເກືອບ 100 ຄົນແລ້ວ. ທ່ານເວົ້າວ່າ: "ວິທີປົວດ້ວຍຢາເມທາດອນພວມຖືກຝູງຄົນເສບຢາເສບຕິດຮັບເຫັນດີນຳເທື່ອລະກ້າວ,ໃນເກືອບຫນຶ່ງເດືອນມານີ້,ຄຼິນິກພວກເຮົາກໍ່ໄດ້ຮັບເອົາຜູ່ມາປົວ 80 ກວ່າຄົນແລ້ວ,ປະຈຸບັນ,ບໍ່ວ່າຄົນເຈັບຫລືຄອບຄົວຄົນເຈັບລ້ວນແຕ່ຮູ້ສືກວ່າວິທີປົວດ້ວຍຢາເມທາດອນດີ."
ທ່ານມິນຊຽງຕົງສະເຫນີວ່າ,ອີງຕາມຂໍ້ກຳນົດທີ່ກ່ຽວຂ້ອງຂອງລັດຖະບານຈີນ,ຜູ້ເສບຢາເສບຕິດອາຍຸ 20 ປີຂຶ້ນໄປ, ອອກຢາຫລາຍເທື່ອກໍ່ຍັງບໍ່ເຊົາແງ້ນຫລືບັງຄັບໃຫ້ອອກຢາສອງເທື່ອຂຶ້ນໄປຍັງບໍ່ເຊົາແງ້ນຈິ່ງຮ້ອງຂໍໃຊ້ວິທີປົວດ້ວຍຢາເມທາດອນໄດ້,ຄ່າປົວແມ່ນລັດຈ່າຍໃຫ້.
ຕໍ່ຜູ້ທີ່ສອດຄ່ອງກັບເງື່ອນໄຂປິ່ນປົວນັ້ນ,ທາງຄຼິນິກກໍ່ມີລະບຽບອັນເຄັ່ງຄັດ. ທາງຄຼິນິກຈະຕ້ອງອີງຕາມລະດັບແງ້ນຢາຂອງຜູ້ກ່ຽວ,ແລ້ວໃຊ້ຢາເມທາດອນປະລິມານຫນ້ອຍຫຼາຍໃຫ້ເຫມາະສົມ.ນອກນີ້,ຕໍ່ຜູ້ປົວດ້ວຍວິທີໃຊ້ຢາເມທາດອນ,ທາງຄຼິນິກຈະກວດປັດສາວະເຂົາເຈົ້າເປັນແຕ່ລະໄລຍະ,ຖ້າຕົວຢ່າງປັດສາວະເປັນຫມາຍບວກ,ທາງຄຼິນິກມີສິດສົ່ງຜູ້ກ່ຽວໄປບັງຄັບໃຫ້ອອກຢາຄືນໃຫມ່ຢູ່ອົງການອອກຢາຂອງທ້ອງຖິ່ນ. ພ້ອມກັນນັ້ນ,ຄຼິນິກເມທາດອນດັ່ງກ່າວຍັງໄດ້ປະຕິບັດການຄຸ້ມຄອງຢາເມທາດອນຢ່າງເຄັ່ງຄັດ.
ນາງວັງອີແມ່ນຜູ້ເສບຢາເສບຕິດ, ປີນີ້ອາຍຸ 34 ປີ, ເສບຢາເສບຕິດມາ 10 ກວ່າປີແລ້ວ.ແຕ່ມີຄຼິນິກປົວດ້ວຍຢາເມທາດອນເມືອງເກີຈີ້ວເປັນຕຕົ້ນມາ,ນາງແມ່ນຜູ້ຫນຶ່ງທີ່ໄດ້ຮັບການປິ່ນປົວດ້ວຍວິທີນີ້ກ່ອນຫມູ່.ຕັ້ງແຕ່ເລີ່ມຮັບການປິ່ນປົວ,ປະມານ 4 ໂມງແລງແຕ່ລະມື້,ນາງວັງອີກໍ່ໄປກິນຢາເມທາດອນຢູ່ຄຼິນິກ75 ມີລີລິດ.ດຽວນນີ້,ນາງບໍ່ສັກເຮໂຣອິນອີກແລ້ວ,ແລະໄດ້ດຳລົງຊີວິດຄືຄົນປົກກະຕິ.ນາງບອກນັກຂ່າວວ່າ, ການປົວດ້ວຍຢາເມທາດອນແມ່ນວິທີມະນຸດສະທຳທີ່ສຸດ,ທັງໄດ້ຜົນດີຫລາຍ.ນາງເວົ້າວ່າ:ເມື່ອຂ້ອຍກິນຢາເມທາດອນແລ້ວ,ຮູ້ສຶກມີແຮງກວ່າແຕ່ກ່ອນຫລາຍ,ບໍ່ຂີ້ຄ້ານຄືແຕ່ນີ້ອີກແລ້ວ,ອີຫຍັງກໍ່ບໍ່ສົນໃຈ.ດຽວນີ້,ຜູ້ທີ່ຮູ້ຈັກຂ້ອຍໃຜກໍວ່າຂ້ອຍແຂງແຮງແດ່ແລ້ວ.ຂ້ອຍເອງກໍ່ຮູ້ສຶກດີຂຶ້ນ."
ເລີ່ມແຕ່ເດືອນເມສາປີນີ້ເປັນຕົ້ນມາ,ລັດຖະບານຈີນໄດ້ອະນຸມັດ 5 ແຂວງແລະເຂດປົກຄອງຕົນເອງເຊັ່ນແຂວງຢຸນນານແລະແຂວງກວາງຕຸ້ງເປັນຕົ້ນຕັ້ງຄຼີນິກປົວດ້ວຍຢາເມທາດອນ.ປະຈຸບັນໄດ້ມີຄຼິນນິກ 8 ແຫ່ງເລີ່ມຮັບປົວໃຫ້ຜູ້ເສບຢາເສບຕິດແລ້ວ.ຕາມຮູ້ວ່າ,ພາຍໃນ 5 ປີຂ້າງຫນ້າ,ຈີນຈະຕັ້ງຄຼິນິກປົວດ້ວຍຢາເມທາດອນ 1 ພັນແຫ່ງ,ມີແຜນການປົວໃຫ້ຜູ້ເສບຢາເສບຕິດປະມານ 2 ແສນຄົນ.
|
