|
|
 |
| (GMT+08:00)
2004-12-27 10:29:00
|
 |
|
ງານຄອນເສີດຕ້ານການລັກລອກແບບປີ 2004(ສຽງ)
cri
Author: mo
|
ຫວ່າງກ່ອນນີ້ບໍ່ດົນ, ງານຄອນເສີດຕ້ານການລັກລອກແບບປີ2004ໃນງານດົນຕີອາຊີຊຽງໄຮ້ທີ່ຈັດຂຶ້ນຢູ່ຊຽງໄຮ້ໄດ້ເພີ່ມເນື້ອໃນອັນມີກຳລັງໃຫ້ແກ່ການເຄື່ອນໄຫວຕ້ານເຄື່ອງສຽງແລະພາບທີ່ລັກລອກແບບແລະປົກປ້ອງສິດຊັບສິນທາງປັນຍາ. ດາລາເພງທີ່ມາຈາກເຂດໃນ, ຮົງກົງແລະໄຕ້ຫວັນຈີນ20ກວ່າຄົນໄດ້ໃຊ້ສຽງເພງອັນໄພເລາະຂອງເຂົາເຈົ້າ, ຮຽກຮ້ອງໃຫ້ແຟນເພງທັງຫຼາຍພ້ອມດ້ວຍບຸກຄົນທີ່ເອົາໃຈໃສ່ນຳຄວາມຈະເລີນຮຸ່ງເຮືອງຂອງຕະຫຼາດແຜ່ນສຽງຂອງຈີນທັງໝົດ, ໃຊ້ການເຄື່ອນໄຫວຕົວຈິງພ້ອມກັນສ້າງໂລກດົນຕີທີ່ສົມບູນປອດໃສ. ໃນລາຍການມື້ນີ້, ຂ້າພະເຈົ້າຈະຄັດເລືອກເອົາເພງດີເດັ່ນໃນງານຄອນເສີດເທື່ອນີ້ສູ່ທ່ານຟັງ, ເພື່ອໃຫ້ທ່ານຮູ້ຄວາມຈູບຈ້າວແລະຄວາມຕັດສິນໃຈຂອງປະຊາຊົນຈີນໃນການສະໜັບສະໜູນຂອງແທ້ແລະຕ້ານການລັກລອກແບບເຄື່ອງສຽງແລະພາບ.ເພງທີ່ທ່ານພວມຟັງຢູ່ນີ້ແມ່ນເພງQingzanggaoyuan ແປວ່າພູພຽງຊີງຫາຍຕິເບດ ຂັບຮ້ອງໂດຍຄະນະຮ້ອງສາມເອື້ອຍນ້ອງດອກບົວຫິມະ ເຊິ່ງເປັນຄະນະຮ້ອງເຜົ່າຕິເບດຂອງເຂດໃນຈີນ.
ທີ່ຟັງມານັ້ນແມ່ນເພງQingzanggaoyuan ພູພຽງຊີງຫາຍຕິເບດ ຂັບຮ້ອງໂດຍຄະນະຮ້ອງສາມເອື້ອຍນ້ອງດອກບົວຫິມະ.
ງານຄອນເສີດຕ້ານການລັກລອກແບບເຄື່ອງສຽງແລະພາບແມ່ນເນື້ອໃນສຳຄັນໜຶ່ງຂອງງານດົນຕີອາຊີຊຽງໄຮ້ທີ່ຈັດຂຶ້ນປີລະເທື່ອ, ແຕ່ປີ1998ເປັນຕົ້ນມາ, ງານຄອນເສີດດັ່ງກ່າວຍ້ອນມີດາລາທີ່ມີຊື່ສຽງຮ່ວມສະແດງທຸກເທື່ອແລະມີຫົວຂໍ້ຈະແຈ້ງຄື ສະໜັບສະໜູນຂອງແທ້, ອະນຸລັກສິດຊັບສິນທາງປັນຍາ, ຊຳລະສະສາງຕະຫຼາດດົນຕີແລະວັດທະນະທຳໃຫ້ສະອາດ, ຈຶ່ງໄດ້ຮັບຄວາມເຫັນດີເຫັນພ້ອມຈາກວົງການຕ່າງໆໃນສັງຄົມ, ແລະໄດ້ຮັບການຕອບສະໜອງຢ່າງກວ້າງຂວາງຈາກບໍລິສັດແຜ່ນສຽງ, ນັກຮ້ອງ ແລະແຟນເພງຂອງບັນດາປະເທດ. ທ່ານນາງກູຢວນ ຜູ້ອຳນວຍການໃຫຍ່ປະຈຳເຂດໃນຈີນຜູ້ໃໝ່ຂອງແຊນໂນວີ ຄື ຊ່ອງໂທລະພາບດົນຕີທີ່ໃຫຍ່ກວ່າໝູ່ຂອງອາຊີຝ່າຍໜຶ່ງທີ່ເປັນເຈົ້າພາບຈັດງານເວົ້າວ່າ, ການຮັກສາສິດຊັບສິນທາງປັນຍາ, ໂຈມຕີການລັກລອກແບບຕ້ອງການໃຫ້ຄົນທັງຫຼາຍຮ່ວມແຮງຮ່ວມໃຈກັນ, ພ້ອມກັນທຳຄວາມພະຍາຍາມ. ນັກຮ້ອງທັງຫຼາຍທີ່ເຂົ້າຮ່ວມການສະແດງກໍ່ທະຍອຍກັນສະແດງຄວາມເຫັນດເຫັນພ້ອມ, ຮຽກຮ້ອງໃຫ້ແຟນເພງທັງຫຼາຍພ້ອມກັນສະໜັບສະໜູນການຕ້ານການລັກລອກແບບ. ທ່ານຊູຢົງຄັ່ງ ນັກຮ້ອງຮົງກົງເວົ້າວ່າ, ນັກຮ້ອງພ້ອມຜູ້ແຕ່ງເພງແລະຜູ້ຈັດທຳໄດ້ໃຊ້ສະໝອງແລະກຳລັງເຫື່ອແຮງຢ່າງຫຼວງຫຼາຍເພື່ອຜະລິດແຜ່ນCD, ແຕ່ພັດບໍ່ໄດ້ຮັບຄ່າຕອບແທນເທົ່າທີ່ຄວນ. ສະນັ້ນຈຶ່ງບໍ່ມີທຶນພຽງພໍທີ່ຈະຈັດທຳຜະລິດແຜ່ນCDໃໝ່ ແລະຍ່ອມຈະມີຜົນກະທົບຕໍ່ຄຸນນະພາບຂອງແຜ່ນCD. ຕໍ່ໄປເຊີນຟັງເພງAiyigerenhaonan ຮັກຄົນຜູ້ໜຶ່ງຍາກຫຼາຍ ຂັບຮ້ອງໂດຍທ່ານຊູຢົງຄັ່ງ.
ເພງທີ່ທ່ານຟັງມານັ້ນແມ່ນເພງAiyigerenhaonan ຮັກຄົນຜູ້ໜຶ່ງຍາກຫຼາຍ ຂັບຮ້ອງໂດຍທ່ານຊູຢົງຄັ່ງ.
ທີ່ຈິງແລ້ວ, ນັກຮ້ອງເກືອບໝົດທຸກຄົນລ້ວນແຕ່ເຄີຍເສຍຫາຍຫລາຍຍ້ອນແຜ່ນCDຖືກລັກລອກແບບ. ສະນັ້ນ, ເຂົາເຈົ້າຈຶ່ງຄຽດຊັງການລັກລອກແບບທີ່ສຸດ. ສົມມົດວ່າ ທ່ານຊູຢົງຄັ່ງ, ໃນງານຖະແຫຼງຂ່າວຂອງງານຄອນເສີດຕ້ານການລັກລອກແບບນັ້ນ, ທ່ານຊູຢົງຄັ່ງກໍ່ໄດ້ຈັບຄ້ອນເຫຼັກຟາດໃສ່ຮູບຄວັດນ້ຳກ້າມທີ່ຄວັດເປັນສິ່ງລອກແບບນັ້ນຢ່າງໜຳໃຈ, ເພື່ອສະແດງໃຫ້ເຫັນຄວາມຕັດສິນໃຈຂອງຕົນທີ່ຕ້ານການລັກລອກແບບ. ໃນງານຄອນເສີດ, ນາງວາງຢົງ ຂອງເຂດໃນຈີນກໍເຄີຍເວົ້າດ້ວຍຄວາມກະຕຸ້ນໃຈທີ່ສຸດ, ຮຽກຮ້ອງໃຫ້ເພື່ອນທັງຫຼາຍທີ່ຮັກຫອມດົນຕີຈົ່ງສະໜັບສະໜູນຂອງແທ້, ເພື່ອໃຫ້ດົນຕມີສິ່ງແວດລ້ອມພັດທະນາຢ່າງປອດໃສ.
ທີ່ຟັງມານັ້ນແມ່ນເພງWobushihuangrong ຂ້ອຍບໍ່ແມ່ນຮວງຢົງ ເຊິ່ງຂັບຮ້ອງໂດຍນາງວາງຢົງ.
ງານຄອນເສີດປີນີ້ຕ່າງກັນກັບປີກາຍ, ເພື່ອສະແດງຄວາມໝັ້ນໃຈແລະກຳລັງໃນການຄັດຄ້ານການລັກລອກແບບ, ງານຄ່ອນເສີດປີນີ້ໄດ້ມີດາລາເພງຫລາຍໆຄົນຮ້ອງເພງນຳກັນ, ຕົວຢ່າງຄື, ນາງວາງຢົງກັບທ່ານຊຽວເຈີ້ງນານຮ່ວມກັນຮ້ອງເພງWobugouaini ຂ້ອຍຮັກເຈົ້າບໍ່ຫລາຍປານໃດ, ນາງຢາງຊຽນຮວາກັບທ່ານເຫີຈົງຮ່ວມກັນຮ້ອງເພງHuahaoyueyuan ເດືອນເພງມາລາສວຍ ເປັນຕົ້ນ, ໄດ້ເພີ່ມສີສັນພິເສດໃຫ້ແກ່ເວທີງານຄອນເສີດ. ພ້ອມກັນນັ້ນ, ແຟນເພງກັບດາລາເພງຍັງຮ້ອງເພງນຳກັນເລື້ອຍໆ, ຄົນທັງຫລາຍຮ້ອງເພງດຽວກັນໃນຍາມລາຕີທີ່ທ້ອງຟ້າເຕັມໄປດ້ວຍໝູ່ດາວ. ຫົວຂໍ້ຕ້ານການລັກລອກແບບແມ່ນ"ເຄົາລົບເພງທີ່ແຕ່ງດັ້ງເດີມ, ສະໜັບສະໜູນຂອງແທ້"ໄດ້ຮັບການຕອບສະໜອງຢ່າງຝົດຟື້ນຈາກແຟນເພງທັງຫລາຍໃນທົ່ວງານ ຕາມສຽງເພງອັນໄພເລາະຂອງນັກຮ້ອງທັງຫລາຍ, ໄດ້ກະຕຸກຊຸກຍູ້ໃຫ້ຄົນຍິ່ງຫລາຍກວ່າເກົ່າເຂົ້າຮ່ວມຖັນແຖວຕ້ານການລັກລອກແບບ, ພ້ອມກັນສ້າງໂລກດົນຕີທີ່ບໍລິສຸດຜຸດຜ່ອງ. ຕໍ່ໄປເຊີນຟັງເພງ" Huahaoyueyuan ເດືອນເພງມາລາສວຍ" ທີ່ຂັບຮ້ອງໂດຍນາງຢາງຊຽນຮວາ ນັກຮ້ອງຮົງກົງກັບທ່ານເຫີຈົງ ນັກຮ້ອງເຂດໃນຈີນ.
ໃນງານຄອນເສີດເທື່ອນີ້, ນອກຈາກມີການສະແດງອັນດີເດັ່ນຂອງນັກຮ້ອງທັງຫລາຍແລ້ວ, ຢູ່ເທິງເວທີ, ຍັງມີຄີບອດຈຳລອງຂອງເຄື່ອງເສບຂະໜາດໃຫຍ່ຕັ້ງຢູ່, ເມື່ອນັກຮ້ອງແຕ່ລະຄົນຮ້ອງແລ້ວແລ້ວ, ກໍເອົາແຜ່ນCDແທ້ຂອງຕົນແຜ່ນໜຶ່ງສອດໃສ່ຄີບອດດັ່ງກ່າວ. ເມື່ອແຜ່ນCDສອດໃສ່ເຕັມໝົດແລ້ວ, ທົ່ວສະຖານທີ່ງານຄອນເສີດກໍມີແສງສີຮຸ່ງເຮືອງຈັບຕາ ໂດຍມີຄວາມໝາຍວ່າ, ຄຽງຄູ່ກັບການຕ້ານການລອກແບບດຳເນີນລົງສູ່ລວງເລິກ, ພາລະກິດດົນຕີຂອງຈີນກໍຍ່ອມຈະມີອະນາຄົດຈະເລີນຮຸ່ງເຮືອງ. ທ່ານຢຽນເສີງຊູ ນັກຮ້ອງໄຕ້ຫວັນຂອງຈີນແມ່ນດາລາເພງທີ່ຂຶ້ນມາຮ້ອງເພງຜູ້ສຸດທ້າຍ, ຄືນມື້ນັ້ນທ່ານໄດ້ຕັ້ງເດີນທາງຈາກຟິລິບປິນມາຊຽງໄຮ້ເພື່ອເຂົ້າຮ່ວມການສະແດງ.
ເມື່ອທ່ານຮ້ອງເພງສິ້ນສຸດລົງ ແລະສອດCDແຜ່ນສຸດທ້າຍໃສ່ຄີບອດແລ້ວ, ຜູ້ຊົມໃນງານພາກັນຮ້ອງໂຮຢ່າງຟົດຟື້ນ, ແຟນເພງ 8 ໝື່ນກວ່າຄົນໄດ້ກວັດແກວ່ງໄມ້ເຮືອງແສງໃນມື, ຮ້ອງໃສ່ການລັກລອກແບບຢ່າງແຮງໆວ່າ" ບໍ່ ". ມ້ວນທ້າຍລາຍການມື້ນີ້, ເຊີນຟັງເພງYigongchi ແປວ່າ ໜຶ່ງແມັດ ຂັບຮ້ອງໂດຍທ່ານຢຽນເສີງຊູ.
ພາຍຫລັງງານຄອນເສີດສິ້ນສຸດລົງແລ້ວ, ແຟນເພງທັງຫລາຍຍັງບໍ່ຢາກຈາກໄປ. ເວົ້າສຳລັບຝ່າຍເຈົ້າພາບຈັດງານແລ້ວ, ການໃຊ້ຜົນສະທ້ອນຂອງດາລາເພງມາຊັກນຳການເຄື່ອນໄຫວຕ້ານການລອກແບບໃນທົ່ວປວງຊົນ, ອາດເວົ້າໄດ້ວ່າແມ່ນໄດ້ຮັບໝາກຜົນເບື້ອງຕົ້ນໃນຄ່ຳຄືນມື້ນັ້ນ. ທີ່ຈິງແລ້ວ, ການລັກລອກແບບແມ່ນບັນຫາສາກົນ, ຫວັງໃຫ້ຜູ້ຟັງໝົດທຸກຄົນເຂົ້າຮ່ວມຖັນແຖວສະໜັບສະໜູນຂອງແທ້, ສະກັດກັ້ນການລັກລອກແບບ, ພ້ອມກັນປະກອບສ່ວນເຂົ້າໃນການຮັກສາຕະຫລາດດົນຕໃນໂລກໃຫ້ສະອາດປອດໂປ່ງ.
|
|
|
