ຕາມຂ່າວCRI, ເວລາປະມານ8ໂມງເຊົ້າວັນທີ26ທັນວາເວລາທ້ອງຖິ່ນ, ເຂດທະເລເກາະຊູມັດຕຼາພາກເໜືອອິນໂດເນເຊຍໄດ້ເກີດແຜ່ນດິນໄຫວຮ້າຍແຮງຂັ້ນ8ລິກເທີຂຶ້ນໄປ, ແລະພາໃຫ້ເກີດທະເລເດືອດຟອງຢ່າງຮຸນແຮງ, ໄດ້ກະທົບກະເທືອນເຖິງຫຼາຍປະເທດອາຊີອາຄະເນແລະອາຊີໃຕ້. ນັບມາຮອດເວລາທີ່ນັກຂ່າວອອກຂ່າວ, ແຜ່ນດິນໄຫວແລະທະເລເດືອດຟອງໄດ້ເຮັດໃຫ້ພາກພື້ນນີ້ຕາຍໝື່ນກວ່າຄົນ.
ຕາມໄດ້ຊາບ, ໃຈກາງແຜ່ນດິນໄຫວເທື່ອນີ້ຢູ່ພື້ນທະເລທີ່ໄກຈາກແຂວງອາເຈເທິງເກາະຊູມັດຕຼາໄປທາງທິດຕາເວັນຕົກສຽງໃຕ້260ກິໂລແມັດ. ຜົນການຢັ່ງແທກຂອງຈີນ, ອາເມລິກາແລະຝຣັ່ງຕ່າງແມ່ນແຜ່ນດິນໄຫວຂັ້ນ8,7ລິກເທີ, ຂັ້ນ8,9ລິກເທີແລະຂັ້ນ8,5ລີກເທີ. ຕາໜ່າງສຳຫຼວດຢັ່ງແທກທໍລະນີອາເມລິກາກ່າວວ່າ, ແຜ່ນດິນໄຫວຂອງອິນໂດເນເຊຍຄັ້ງນີ້ແມ່ນແຜ່ນດິນໄຫວທີ່ຮ້າຍແຮງກວ່າໝູ່ທີ່ເກີດຂຶ້ນພາຍໃນຂອບເຂດທົ່ວໂລກແຕ່ປີ1964ເປັນຕົ້ນມາ.
ຢູ່ອິນໂດເນເຊຍ, ແຜ່ນດິນໄຫວແລະທະເລເດືອດຟອງໄດ້ເຣັດໃຫ້4400ກວ່າຄົນເສຍຊີວິດ. ພາຍຫຼັງທ່ານຊູຊີໂລ ປະທານາທິບໍດີອິນໂດເນເຊຍທີ່ພວມກວດການຢູ່ແຂວງບາບູອາແຫ່ງອິນໂດເນເຊຍຮູ້ຂ່າວກ່ຽວກັບແຜ່ນດິນໄຫວແລ້ວ, ໄດ້ຊີ້ແຈງໃຫ້ພະແນກທີ່ກ່ຽວຂ້ອງຂອງລັດຖະບານທຳປະຕິກິລິຍາສຸກເສີນໃນທັນທີ. ທ່ານຊູຊີໂລກ່າວວ່າ, ຈະໄປເຂດປະສົບໄພເພື່ອຢື້ຢາມຖາມຂ່າວປະຊາຊົນຜູ້ປະສົບໄພ.
ເມື່ອສັງເກດຈາກສະພາບແຜ່ນດິນໄຫວທີ່ເກີດຂຶ້ນຢູ່ເກາະຊູມັດຕຼາແລ້ວເຫັນວ່າ, ຜົນຮ້າຍໂດຍກົງຈາກແຜ່ນດິນໄຫວນັ້ນບໍ່ໜັກໜ່ວງປານໃດ, ແຕ່ທະເລເດືອດຟອງທີ່ເນື່ອງຈາກແຜ່ນດິນໄຫວນັ້ນໄດ້ກະໜ່ຳເຖິງປະເທດອື່ນໆທີ່ຢູ່ແຄມມະຫາສະມຸດອິນເດຍ, ໄດ້ສ້າງຜົນເສຍຫາຍຢ່າງໜັກໜ່ວງ.
ໃນລະເທເດືອດຟອງຄັ້ງນີ້, ອິນເດຍແລະສີລັງກາທີ່ອາຊີໃຕ້ນັ້ນມີສະພາບປະສົບໄພໜັກໜ່ວງກວ່າໝູ່. ປະຈຸບັນ, ທະເລເດືອດຟອງທີ່ເນື່ອງຈາກແຜ່ນດິນໄຫວນັ້ນໄດ້ເຣັດໃຫ້ອິນເດຍມີ2ພັນກວ່າຄົນເສຍຊີວິດ. ທ່ານຊິງ ນາຍົກລັດຖະມົນຕີອິນເດຍໄດ້ແຕ່ງລັດຖະມົນຕີກະຊວງນ້ຳມັນເຊື້ອໄຟແລະລັດຖະມົນຕີກະຊວງຄົມມະນາຄົມໄປເຂດປະສົບໄພ, ຮັບຜິດຊອບວຽກງານກອບກູ້ຊ່ອຍເຫຼືອ. ເຂດກວ້າງໃຫຍ່ທີ່ຢູ່ພາກຕາເວັນອອກແລະພາກໃຕ້ຂອງສີລັງກາຖືກນ້ຳຖ້ວມ, ທະເລເດືອດຟອງໄດ້ເຮັດໃຫ້ປະເທດດັ່ງກ່າວມີ4500ກວ່າຄົນເສຍຊີວິດ. ລັດຖະບານສີລັງກາໄດ້ປະກາດທົ່ວປະເທດເຂົ້າສູ່ສະພາວະສຸກເສີນ, ກອງທະຫານງວດໃຫຍ່ຂອງປະເທດດັ່ງກ່າວກໍ່ໄດ້ໄປຊ່ອຍກອບກູ້ຢູ່ເຂດປະສົບໄພ.
ນອກນີ້, ແຜ່ນດິນໄຫວຍັງໄດ້ເຮັດໃຫ້ເຂດທະເລທີ່ມໍ່ເກາະພູເກັດເຊິ່ງເປັນສະຖານທີ່ທ່ອງທ່ຽວຢູ່ພາກໃຕ້ຂອງໄທເກີດທະເລເດືອດຟອງ, ຟອງທະເລທີ່ຮ້າຍແຮງໄດ້ມ້ວນເອົາ ນັກທ່ອງທ່ຽວທີ່ພວມທ່ຽວຊົມຢູ່ເທິງເກາະເປັນຈຳນວນ ຫຼວງຫຼາຍ,
ໂຮງແຮມຫຼາຍຫຼັງເທິງເກາະກໍ່ເລີ່ມຍົກຍ້າຍຄົນ. ປະຈຸບັນ, ທະເລເດືອດຟອງໄດ້ເຮັດໃຫ້ຫຼາຍຈັງຫວັດທີ່ພາກໃຕ້ຂອງໄທມີ310ກວ່າຄົນເສຍຊີວິດ, ຫຼາຍຮ້ອຍກວ່າຄົນບາດເຈັບ. ທ່ານທັກສິນ ຊິນນະວັດ ນາຍົກລັດຖະມົນຕີໄທໄດ້ອອກຄຳສັ່ງໃຫ້ຜູ້ປະສົບໄພຖອນອອກຈາກເຂດທີ່ຖືກທະເລເດືອດຟອງຫຼອນໂຈມຕີທີ່ພາກໃຕ້ຂອງໄທ.
ຢູ່ມາເລເຊຍ, ທະເລເດືອດຟອງທີ່ເນື່ອງຈາກແຜ່ນດິນໄຫວໄດ້ພາໃຫ້42ຄົນເສຍຊີວິດ. ທະເລເດືອດຟອງຍັງເຮັດໃຫ້ເຂດສອງສ່ວນສາມຂອງມາເລນະຄອນຫຼວງມານດາຍຖືກນ້ຳຖ້ວມ, ເຮັດໃຫ້15ຄົນເສຍຊີວິດ.
ພາຍຫຼັງປະເທດດັ່ງກ່າວປະສົບໄພແຜ່ນດິນໄຫວແລະທະເລເດືອດຟອງແລ້ວ, ປະຊາຄົມໂລກໄດ້ທະຍອຍກັນສະແດງຄວາມຢື້ຢາມຖາມຂ່າວແລະຄວາມເຫັນໃຈຕໍ່ປະເທດປະສົບໄພ, ປະເທດແລະອົງການຈັດຕັ້ງສາກົນບໍ່ໜ້ອຍຍັງກ່າວວ່າຈະໃຫ້ການຊ່ອຍເຫຼືອແກ່ເຂດປະສົບໄພ. ວັນທີ26ທັນວາ, ທ່ານຫູຈິນທາວ ປະທານປະເທດຈີນໄດ້ຝາກໂທລະເລກໄປຍັງຜູ້ນຳຂອງປະເທດຕ່າງໆເຊັ່ນ: ອິນໂດເນເຊຍ, ອິນເດຍແລະສີລັງກາເປັນຕົ້ນ, ໄດ້ສະແດງຄວາມຢື້ຢາມຖາມຂ່າວຢ່າງຈິງໃຈຕໍ່ປະເທດດັ່ງກ່າວທີ່ທະເລເດືອດຟອງເຮັດໃຫ້ປະເທດເຫຼົ່ານີ້ມີຄົນຕາຍແລະບາດເຈັບຢ່າງຫຼວງຫຼາຍແລະປະສົບຜົນເສຍຫາຍດ້ານຊັບສິນຢ່າງຫຼວງຫຼາຍ. ຕອນຄ່ຳວັນທີ26ທັນວາ, ກະຊວງການຄ້າຈີນປະກາດວ່າ, ລັດຖະບານຈີນຕົກລົງໃຫ້ການຊ່ອຍເຫຼືອໂດຍດ່ວນດ້ານມະນຸດສະທຳແກ່5ປະເທດເຊັ່ນອິນເດຍເປັນຕົ້ນ. ວັນທີ26ທັນວາ, ທ່ານອານນານ ເລຂາທິການໃຫຍ່ສະຫະປະຊາຊາດກ່າວວ່າ, ສະຫະປະຊາຊາດໄດ້ກຽມພ້ອມຢູ່ທຸກເວລາໃຫ້ການຊ່ອຍເຫຼືອແກ່ປະເທດປະສົບໄພ. ຄະນະກຳມະການສະຫະພາບເອີລົບຕົກລົງໃຫ້ການຊ່ອຍເຫຼືອດ່ວນງວດທຳອິດທີ່ມີມູນຄ່າ3ລ້ານເອີໂລແກ່ປະເທດປະສົບໄພ. ນອກນີ້, ວັນທີ26ທັນວາ, ທ່ານບຸສ ປະທານາທິບໍດີອາເມລິກາ, ທ່ານຊີລັກ ປະທານາທິບໍດີຝຣັ່ງແລະທ່ານປູຕິນ ປະທານາ ທິບໍດີລັດເຊຍໄດ້ອອກຖະແຫຼງການຫຼືຝາກໂທລະເລກໄປຍັງຜູ້ນຳປະເທດປະສົບໄພ, ສະແດງຄວາມຢື້ຢາມຖາມຂ່າວແລະຄວາມເຫັນອົກເຫັນໃຈຕໍ່ສະພາບປະສົບໄພຂອງປະເທດເຫຼົ່ານີ້. ນອກນີ້, ປະເທດຕ່າງໆເຊັ່ນ: ເຢຍລະມັນ, ຍີ່ປຸ່ນ, ໂກແວັດແລະເກຼັກເປັນຕົ້ນກໍ່ກ່າວວ່າຈະໃຫ້ການຊ່ອຍເຫຼືອແກ່ປະເທດປະສົບໄພ.
|