|
|
 |
| (GMT+08:00)
2004-12-28 14:11:49
|
 |
|
ຈີນປະກາດໜັງສືປົກຂາວເລື່ອງການປ້ອງກັນປະເທດຂອງຈີນໃນປີ 2004
cri
ຕາມຂ່າວ CRI: ວັນທີ 27 ທັນວາ ຫ້ອງການຖະແຫຼງຂ່າວຂອງຄະນະລັດຖະບານຈີນໄດ້ປະກາດໜັງສືປົກຂາວເລື່ອງ"ການປ້ອງກັນປະເທດຂອງຈີນໃນປີ 2004",ເຊິ່ງໄດ້ແນະນຳຢ່າງຮອບດ້ານກ່ຽວກັບນະໂຍບາຍປ້ອງກັນປະເທດຂອງຈີນແລະສະພາບພັດທະນາຂອງການກໍ່ສ້າງການປ້ອງກັນປະເທດແລະກອງທັບຂອງຈີນໃນສອງປີມານີ້.
ຄຽງຄູ່ກັບການພັດທະນາຂອງເສດຖະກິດຈີນ,ຜົນປະໂຫຍດແຫ່ງຊາດຂອງຈີນໄດ້ເປີດກວ້າງອອກຢ່າງບໍ່ຢຸດຢັ້ງ,ທັດສະນະຄະຕິແລະສະຕິປ້ອງກັນປະເທດຂອງປະຊາຊົນກໍຄ່ອຍໆເພີ່ມທະວີຂຶ້ນ,ໂດຍເລັງສາຍຕາໄປໃສ່ການພັດທະນາຂອງສະຖານະການໂລກແລະພາຍໃນປະເທດຈີນ,ລັດຖະບານຈີນໄດ້ປະກາດໜັງສືປົກຂາວ 4 ສະບັບໃນປີ 1995 ປີ 1998,ປີ 2000 ແລະປີ 2002 ໃນເວລາອັນເໝາະສົມ,ພາໃຫ້ພາຍໃນປະເທດແລະຕ່າງປະເທດເອົາໃຈໃສ່ໂດຍທົ່ວໄປ. ທ່ານເຕີງຮົງໂຈວ ນັກຄົ້ນຄວ້າຂອງພະແນກຄົ້ນຄວ້າການທະຫານໂລກສັງກັດສະພາບັນດິດວິທະຍາສາດການທະຫານຈີນເວົ້າວ່າ,ໜັງສືປົກຂາວປ້ອງກັນປະເທດແຕ່ລະສະບັບລ້ວນແຕ່ມີທຳນອງພື້ນຖານ,ສ່ອງແສງການວິນິດໄສພື້ນຖານຂອງຈີນທີ່ມີຕໍ່ສະຖານະການຂອງໂລກກໍຄືຂອງຈີນ. ທ່ານເວົ້າວ່າ,
ໜັງສືປົກຂາວປີ 2004 ໄດ້ກ່າວເນັ້ນວ່າ,ສັນຕິພາບແລະການພັດະນາຍັງແມ່ນຫົວຂໍ້ຫຼັກຂອງຍຸກປັດຈຸບັນ,ສະຖານະການຄວາມປອດໄພສາກົນແມ່ນໜັກແໜ້ນໃນດ້ານກວມລວມ,ແຕ່ກໍມີປັດໄຈບໍ່ໝັ້ນທ່ຽງ,ບໍ່ແນ່ນອນແລະບໍ່ປອດໄພເພີ່ມຂຶ້ນ.
ໜັງສືປົກຂາວປ້ອງກັນປະເທດທີ່ປະກາດເທື່ອນີ້ໄດ້ເນັ້ນໜັກການປ່ຽນແປງໃໝ່ຂອງສະຖານະການຄວາມປອດໄພ,ການສັງຮອມໃໝ່ຕໍ່ນະໂຍບາຍປ້ອງກັນປະເທດແລະສະພາບໃໝ່ໃນຂົງເຂດຄວາມປອດໄພສາກົນ. ໜັງສືປົກຂາວຊີ້ເນັ້ນວ່າ,ເປົ້າໝາຍພັດທະນາຂອງຈີນໃນ 20 ປີຕົ້ນສະຕະວັດນີ້ແມ່ນສຸມກຳລັງສ້າງສາສັງຄົມເຫຼືອຢູ່ເຫຼືອກິນຢ່າງຮອບດ້ານ. ຈຸດພື້ນຖານຂອງການພັດທະນາຂອງຈີນຕົ້ນຕໍແມ່ນອາໃສກຳລັງຂອງຕົນເອງ,ບໍ່ຂັດຂວາງແລະຂົ່ມຂູ່ໃຜໝົດ. ຈີນຈະຍຶດໝັ້ນນະໂຍບາຍປ້ອງກັນປະເທດແບບປ້ອງກັນຕົວ,ບໍ່ແຜ່ຂະຫຍາຍອິດທິພົນຈົນເທົ່າໃດໆ,ບໍ່ເປັນເຈົ້າອຳນາດຈົນເທົ່າໃດໆ.
ທ່ານເຕີງຮົງໂຈວແນະນຳວ່າ,ໜັງສືປົກຂາວໄດ້ສະເໜີຢ່າງຈະແຈ້ງເປັນຄັ້ງທຳອິດກ່ຽວກັບປັດໄຈສຳຄັນທີ່ມີຢູ່ໃນພາກຕົວຈິງແລະແຝງຊ້ອນຢູ່ທີ່ມີຜົນສະທ້ອນຕໍ່ຄວາມປອດໄພຂອງຈີນໃນອະນາຄົດ. ທ່ານເວົ້າວ່າ:
ໃນພາກສ່ວນສະຖານະການຄວາມປອດໄພ,ໜັງສືປົກຂາວໄດ້ຊີ້ອອກວ່າ 4 ປັດໄຈທີ່ກະທົບກະເທືອນຄວາມປອດໄພຂອງຈີນກໍຄື:ໜຶ່ງ,ອິດທິກຳລັງໄຕ້ຫວັນເປັນເອກະລາດທີ່ຂະຫຍາຍຕົວໄປທາງຮ້າຍ; ສອງ,ແມ່ນຄວາມຜິດໂຕນກັນທາງເຕັກນິກການທະຫານທີ່ເນື່ອງຈາກການປ່ຽນແປງໃໝ່ທາງການທະຫານຂອງໂລກ; ສາມແມ່ນຄວາມສ່ຽງແລະການທ້າທາຍທີ່ເນື່ອງຈາກເສດຖະກິດໂລກາວິວັດ; ສີ່ແມ່ນຄວາມຂັດແຍ່ງແລະການຕໍ່ສູ້ກັນລະວ່າງຂົ້ວດຽວກັບຫຼາຍຂົ້ວທີ່ຊົງຕົວມາຍາວນານ.
ໃນພາກສ່ວນກ່ຽວກັບນະໂຍບາຍປ້ອງກັນປະເທດ,ໜັງສືປົກຂາວໄດ້ສະເໜີເປົ້າໝາຍແລະໜ້າທີ່ພື້ນຖານຂອງຈີນໃນດ້ານປົກປັກຮັກສາຄວາມປອດໄພແຫ່ງຊາດ,ຕົ້ນຕໍລວມທັງການປົກປ້ອງອະທິປະໄຕ,ຜືນແຜ່ນດິນອັນຄົບຖ້ວນແລະສິດປະໂຫຍດທາງທະເລຂອງຊາດ,ຮັກສາຜົນປະໂຫຍດແຫ່ງການພັດທະນາຂອງຊາດ,ສ້າງການປ້ອງກັນປະເທດທັນສະໄໝທີ່ສອດຄ່ອງກັບສະພາບແຫ່ງຊາດຂອງຈີນແລະທ່ວງທ່າພັດທະນາການທະຫານຂອງໂລກ,ຮັກສາລະບຽບສັງຄົມອັນປົກກະຕິແລະຄວາມສະຫງົບຂອງສັງຄົມ,ຍາດແຍ່ງສະພາບແວດລ້ອມສາກົນແລະສະພາບແວດລ້ອມອ້ອມຂ້າງອັນດີງາມເປັນເວລາຍາວນານສົມຄວນ. ທ່ານຢວນເຈີງຫຼິງ ນັກຄົ້ນຄວ້າຂອງພະແນກຊີ້ນຳການຄົ້ນຄວ້າວິທະຍາສາດຂອງສະພາບັນດິດວິທະຍາສາດການທະຫານຈີນແນະນຳວ່າ:
ໜັງສືປົກຂາວສະບັບໃໝ່ໄດ້ສະເໜີຢ່າງຄັກແນ່ວ່າ,ນະໂຍບາຍປ້ອງກັນປະເທດຂອງຈີນຮັບໃຊ້ຍຸດທະສາດຄວາມປອດໄພແຫ່ງຊາດ,ໄດ້ບັນຍາຍຫຼັກການຕົ້ນຕໍຂອງຍຸດທະສາດຄວາມປອດໄພແຫ່ງຊາດພ້ອມດ້ວຍເປົ້າໝາຍແລະໜ້າທີ່ພື້ນຖານໃນການຮັກສາຄວາມປອດໄພແຫ່ງຊາດ;ໄດ້ບັນຍາຍເນື້ອໃນນະໂຍບາຍການປະຕິຮູບການທະຫານທີ່ມີສີສັນພິເສດຂອງຈີນ,ລວມທັງ 5 ດ້ານເຊັ່ນການສ້າງສາກອງທັບໃຫ້ເຂັ້ມແຂງດ້ວຍວິທະຍາສາດເຕັກນິກເປັນຕົ້ນ,ໄດ້ເນັ້ນໜັກການໂຄສະນານະໂຍບາຍຕໍ່ໄຕ້ຫວັນ,ສະແດງຄວາມຈິງໃຈແລະຄວາມອົດທົນຂອງພວກເຮົາໃນການແກ້ໄຂບັນຫາໄຕ້ຫວັນໂດຍສັນຕິ,ແລະກໍໄດ້ສະແດງໃຫ້ເຫັນຄວາມຕັດສິນໃຈແລະເຈດຈຳນົງຂອງພວກເຮົາໃນການທັບມ້າງກົນອຸບາຍແບ່ງແຍກໃດໆ.
ທ່ານເຕີງຮົງໂຈວ ນັກຄົ້ນຄວ້າຂອງພະແນກຄົ້ນຄວ້າການທະຫານໂລກສັງກັດສະພາບັນດິດວິທະຍາສາດການທະຫານຈີນເວົ້າວ່າ:
ຍາມໃດ ນະໂຍບາຍຕໍ່ໄຕ້ຫວັນຂອງລັດຖະບານຈີນກໍແມ່ນແຈ່ມແຈ້ງໂດຍຕະຫຼອດ,ແລະກໍສອດຄ່ອງກັບຜົນປະໂຫຍດກົກຮາກຂອງປະຊາຊົນສອງຝັ່ງ. ໜັງສືປົກຂາວປ້ອງກັນປະເທດສະບັບໃໝ່ໄດ້ປະກາດຢ່າງຈະແຈ້ງວ່າ,ພວກເຮົາເດັດດ່ຽວຄັດຄ້ານໄຕ້ຫວັນເປັນເອກະລາດ,ຄັດຄ້ານການແຊກແຊງຂອງພາຍນອກ,ຄັດຄ້ານການຂາຍອາວຸດກ້າວໜ້າໃຫ້ໄຕ້ຫວັນຫຼືຜູກເປັນກຸ່ມການທະຫານກັບໄຕ້ຫວັນດ້ວຍຮູບການໃດໆ,ຖ້າເຈົ້າໜ້າທີ່ໄຕ້ຫວັນກ້າກໍ່ເຫດການໄຕ້ຫວັນເປັນເອກະລາດແລ້ວ,ປະຊາຊົນຈີນແລະກຳລັງປະກອບອາວຸດຂອງຈີນກໍຈະບໍ່ເສຍດາຍຄ່າຕອບແທນໃດໆ,ທັບມ້າງກົນອຸບາຍແບ່ງແຍກທີ່ໃຫ້ໄຕ້ຫວັນເປັນເອກະລາດນັ້ນຢ່າງເດັດດ່ຽວແລະເຖິງຖອງ.
|
|
|
