|
ທີ່ນີ້ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການນັດພົບໃນວັນອາທິດ. ວັນທີ 20 ທັນວາປີນີ້ແມ່ນວັນລະລຶກມາກາວກັບຄືນສູ່ປະເທດຊາດຄົບຮອບ 5 ປີ. ໃນລາຍການພາກນີ້, ຂ້າພະເຈົ້າຂໍເຊີນທ່ານມ່ວນຊື່ນນຳກັນກັບປະຊາຊົນຈີນໃນໂອກາດສະຫຼອງມາກາວກັບຄືນສູ່ປະເທດຊາດຄົບຮອບ 5 ປີໃນທ່າມກາງສຽງເພງ. ກ່ອນອື່ນເຊີນຟັງເພງ "ຄວາມຖາມຂ່າວຂອງມາກາວ" ຂັບຮ້ອງໂດຍນາງຊຸນເຟິງໝິງ ນັກຮ້ອງມາກາວ.
ມາກາວຕັ້ງຢູ່ຝັ່ງຕາເວັນຕົກປາກແມ່ນ້ຳຈູຈຽງແຂວງກວາງຕຸ້ງທາງພາກໃຕ້ຈີນ, ແມ່ນດິນແດນສ່ວນໜຶ່ງຂອງຈີນມາແຕ່ບູຮານນະການ. ເມື່ອປີ 1553 ພວກລ່າເມືອງຂຶ້ນປອກຕຸຍການໄດ້ຍຶດຄອງມາກາວ. ຫຼັງຈາກນັ້ນ ດິນແດນ 7 ຕອນຂອງຈີນຄື ຮົງກົງແລະໄຕ້ຫວັນເປັນຕົ້ນໄດ້ຖືກພວກລ່າເມືອງຂຶ້ນຂອງປະເທດຕ່າງໆຕັດແຍກເອົາ. ເມື່ອປີ 1925, ທ່ານເວີນອິຕໍ ນັກກະວີທີ່ມີຊື່ສຽງຂອງຈີນຮູ້ສຶກຄັ່ງແຄ້ນຍ້ອນດິນແດນ 7 ຕອນນີ້ຂອງປະເທດຊາດສູນເສຍໄປ, ແລ້ວໄດ້ແຕ່ງກອນປະມວນໜຶ່ງ, ໃຫ້ຊື່ວ່າ "ຊີຈືຈື່ເກີ່" ແປວ່າ "ລູກທັງເຈັດ". "ມາກາວ" ແມ່ນກອນບົດທຳອິດໃນປະມວນກອນດັ່ງກ່າວ. ຫຼັງຈາກນັ້ນ 70 ກວ່າປີ ຄືປີ 1999, ກໍຄືປີມາກາວໃກ້ຈະກັບຄືນສູ່ຊວງເອິກ ມາຕຸພູມ, ທ່ານລີຫາຍອິງ ນັກແຕ່ງນົດທີ່ມີຊື່ສຽງຂອງຈີນໄດ້ແຕ່ງນົດເພງໃສ່ກອນຂອງທ່ານເວີນອິຕໍບົດນີ້, ໄດ້ສະແດງເຖິງຄວາມປາຖະໜາເລິກເຊິ່ງຂອງລູກຫຼານປະຊາຊາດຈີນຫຼາຍເສັ່ນຄົນທີ່ຫວັງຢ່າງແຮງກ້າໃຫ້ມາກາວກັບຄືນສູ່ປະເທດຊາດ. ຕໍ່ໄປເຊີນຟັງເພງ "ຊີຈືຈື່ເກີ່" ແປວ່າ "ລູກທັງເຈັດ-ມາກາວ".
ເນື້ອເພງມີຢູ່ວ່າ, ເຈົ້າຮູ້ບໍ່ ມາກາວບໍ່ແມ່ນນາມສະກຸນແທ້ຂອງຂ້ອຍ ແມ່ເອີຍ ລູກໜີຈາກອ້ອມກອດຂອງແມ່ດົນໂພດແລ້ວ, ແຕ່ສິ່ງທີ່ພວກມັນປຸ້ນເອົາໄປນັ້ນ ແມ່ນຮ່າງກາຍຂອງລູກ. ແມ່ໄດ້ຮັກສາດວງໃຈຂອງລູກໄວ້ຄືເກົ່າ. ແມ່ເອີຍ ລູກຝັນຫາແມ່ 300 ປີບໍ່ເຄີຍລືມແມ່ຈັກເທື່ອ. ຂໍໃຫ້ແມ່ເອີ້ນຊື່ນ້ອຍຂອງລູກເດີ--ອ້າວເໝີນ, ແມ່ເອີຍ ລູກຢາກກັບມາ, ແມ່ເອີຍ.
ວັນທີ 20 ທັນວາປີ 1999, ແມ່ນມື້ສຳຄັນໃນປະຫວັດຂອງປະຊາຊາດຈີນ, ມາກາວທີ່ໄດ້ຜ່ານການແປປ່ຽນຂອງໂລກມາຍາວນານໄດ້ກັບຄືນສູ່ຊວງເອິກຂອງມາຕຸພູມ, ແລະເລີ່ມແຕ່ນັ້ນມາ ມາກາວໄດ້ເຂົ້າສູ່ສັກກະຫຼາດໃໝ່ທີ່ມີສອງລະບອບໃນປະເທດດຽວ ພັດທະນາຢ່າງຈະເລີນຮຸ່ງເຮືອງ. ແຕ່ກັບຄືນສູ່ປະເທດຊາດ 5 ປີມານີ້, ເຂດບໍລິຫານພິເສດມາກາວໄດ້ປະຕິບັດທິດທາງ "ປະເທດດຽວສອງລະບອບ" "ຊາວມາກາວປົກຄອງມາກາວ" "ປົກຄອງຕົນເອງໃນລະດັບສູງ", ແລະມີສະຖານະພາບອັນດີງາມຄືການເມືອງມີສະຖຽນລະພາບ ເສດຖະກິດພັດທະນາ ສັງຄົມສະຫງົບ, ດ້ານຕ່າງໆລ້ວນແຕ່ໄດ້ຮັບໝາກຜົນທີ່ປະຈັກຕາຊາວໂລກ. ເພງ "ອ້າວເໝີນເຫີໜີຈ້າຍອິສີ" ແປວ່າ "ມາກາວຢູ່ຮ່ວມກັບເຈົ້າ" ໄດ້ສະແດງເຖິງອາລົມຈິດອັນປ່ຽມລົ້ນໄປດ້ວຍຄວາມສຸກແລະຄວາມພາກພູມໃຈຂອງພີ່ ນ້ອງຮ່ວມຊາດມາກາວທີ່ໄດ້ກັບຄືນສູ່ປະເທດຊາດ.
ທີ່ຟັງມານັ້ນແມ່ນເພງ "ມາກາວຢູ່ຮ່ວມກັບເຈົ້າ" ຂັບຮ້ອງໂດຍທ່ານຫວງເວີຍລິນ ນັກຮ້ອງມາກາວ.
ໃນຂະນະທີ່ເບີກບານມ່ວນຊື່ນນັ້ນ, ປະຊາຊົນຈີນຍິ່ງຈະບໍ່ລືມປີ 1999 ທີ່ມີຄວາມໝາຍອັນພິເສດ. ຕໍ່ໄປເຊີນຟັງເພງ "ລຽນສິ 1999" ແປວ່າ "ບໍ່ລືມປີ 1999", ສຳນຶກຮູ້ຄວາມເບີກບານໃຈຂອງປະຊາຊົນຈີນເມື່ອປີ 1999.
ທີ່ຟັງມານັ້ນແມ່ນເພງ "ບໍ່ລືມປີ 1999", ຂັບຮ້ອງໂດຍທ່ານຫວງເວີຍລິນ ນັກຮ້ອງມາກາວ. ແມ່ນແທ້, ປີ 1999 ແມ່ນປີທີ່ບໍ່ທຳມະດາ, ມາກາວກັບຄືນສູ່ປະເທດຊາດໄດ້ກາຍເປັນຈຸດສຸມທີ່ປະຈັກຕາຊາວໂລກ, ມາກາວທີ່ຜ່ານຟ້າຝົນລົມແດງໄດ້ກັບຄືນສູ່ຊວງເອິກມາຕຸພູມໃນທີ່ສຸດ, ຄວາມໄຝ່ຝັນແລະຄວາມປາຖະໜາໃນຫຼາຍປີຂອງລູກຫຼານປະຊາຊາດຈີນໄດ້ປະກົດຜົນເປັນຈິງ, ສະນັ້ນ ເມື່ອຫວນຄືນປີ 1999, ກໍຕ້ອງຄຶດເຖິງຄວາມລະອິດລະອ້ຽວ ຍາວນານຂອງມາກາວ, ຕໍ່ໄປເຊີນຟັງເພງ "ອ້າວເໝີນອິ" ແປວ່າ "ລົມຝົນມາກາວ". ເພງນີ້ໄດ້ບັນຍາຍປະຫວັດອັນລະອິດລະອ້ຽວຫຼາຍຮ້ອຍປີຂອງມາກາວ, ແລະຄວາມດີອົກດີໃຈເມື່ອໄດ້ກັບຄືນສູ່ມະຫາຄອບຄົວປະເທດຊາດແລ້ວ.
ແມ່ນແທ້, ບ້ານແມ່ນທ່າກ່ຳປັ່ນທີ່ສະຫງົບງຽບ, ທີ່ຈິງແລ້ວ ບໍ່ພຽງແຕ່ມາກາວ, ເວົ້າສຳລັບທຸກໆຄົນ ໂດຍສະເພາະແມ່ນຜູ່ທີ່ຈາກບ້ານເກີດໄປຍາວນານ, ບ້ານຈຶ່ງເປັນໜ້າຖະໜຸຖະໜອມທີ່ສຸດແລະສຳຄັນກວ່າໝູ່! ສູ່ມື້ນີ້ ຮົງກົງແລະມາກາວໄດ້ກັບຄືນສູ່ປະເທດຊາດແລ້ວ, ຄົນທັງຫຼາຍຍິ່ງຄຶດເຖິງພີ່ນ້ອງຮ່ວມຊາດໄຕ້ຫວັນຢາກໃຫ້ເຂົາເຈົ້າກໍກັບເມືອບ້ານໂດຍໄວ, ຫວັງຢ່າງແຮງກ້າຢ່າກໃຫ້ປະເທດຊາດໂຮມເຂົ້າເປັນເອກະພາບກັນ. ໃຫ້ປະເທດຊາດມັ່ງຄັ່ງເຂັ້ມແຂງ, ນີ້ແມ່ນຄວາມມຸ່ງມາດປາຖະໜາດຮ່ວມກັນຂອງຊາວຈີນທຸກຖ້ວນໜ້າ. ມ້ວນທ້າຍລາຍການພາກນີ້, ພວກເຮົາຂໍອວຍພອນໃຫ້ມະຫາຄອບຄົວປະຊາຊາດຈີນຈົ່ງໂຮມເຂົ້າເປັນເອກະພາບກັນໂດຍໄວ. ຕໍ່ໄປເຊີນຟັງເພງ "ຈຸຝູຈຸໂກ" ແປວ່າ "ອວຍພອນປະເທດຊາດ".
"ຂໍອວຍພອນປະເທດຊາດ, ປະເທດຊາດທີ່ສວຍງາມມັ່ງມູນ, ລູກຫຼານບັນດາເຜົ່າ, ຍົກຈອກຄຳ, ອວຍພອນເຈົ້າຈົ່ງຈະເລີນຮຸ່ງເລືອງ"
ທ່ານຜູ່ຟັງທີ່ໂຄລົບ, ລາຍການນັດພົບໃນວັນອາທິດພາກນີ້ຂໍສ້ຽງສຸດລົງພຽງທໍ່ນີ້, ຂອບໃຈທີ່ທ່ານຮັບຟັງ, ພົບກັນໃໝ່ໃນອາທິດໜ້າ, ສະບາຍດີ.
|
