|
ແຕ່ບູຮານນະການມານີ້,ອາລະຍະທຳຂອງຈີນກໍ່ຖືກເອິ້ນເປັນອາລະຍະທຳຂະຫນົບທຳນຽມແລະດົນຕີ,ຂະຫນົບທຳນຽມແມ່ນປັດໄຈອັນສະເຫມີຕົ້ນສະເຫມີປາຍໃນປະຫວັດອາລະຍະທຳຫລາຍພັນປີຂອງຈີນ,ແລະກໍ່ແມ່ນເອກະລັກຕົ້ນຕໍທີ່ອາ ລະຍະທຳຈີນຕ່າງກັບອາລະຍະທຳບູຮານອື່ນໆ. ຂະຫນົບທຳນຽມຈີນມີຄວາມເປັນມາແນວໃດ?ປະຫວັດຄວາມເປັນມາຂອງຂະຫນົບ ທຳນຽມດົນນານປານໃດ?
ຢູ່ຈີນສະໄຫມບູຮານ,ນັກການເມືອງແລະນັກແນວຄິດທຸກສະໄຫມລ້ວນແຕ່ເຄົາລົບນັບຖືຂະຫນົບທຳນຽມແລະພາລະບົດບາດຂອງມັນທີ່ສຸດ,ໃນສະໄຫມລາຊະວົງໂຈ່ວເມື່ອສະຕະວັດທີ 11 ກ່ອນຄິດຕະສັງເກດ,ນັກການເມືອງກໍ່ເຫັນວ່າ, ຂະຫນົບທຳນຽມແມ່ນພາກສ່ວນປະກອບຕົ້ນຕໍຂອງໂຄງປະກອບແຫ່ງລັດ.ທ່ານຂົງຈຶ້ແມ່ນນັກແນວຄິດທີ່ມີຊື່ສຽງກວ່າຫມູ່ໃນປະຫວັດສາດຈີນແມ່ນໄດ້ໄດ້ສຸມກຳລັງເຂົ້າໃນການລິເລີ່ມ"ການປົກຄອງດ້ວຍຂະຫນົບທຳນຽມ"ຕະຫຼອດຊີວິດຂອງທ່ານ,ມີເຈດຈຳນົງວ່າ"ສ້າງຕັ້ງປະເທດດ້ວຍຂະຫນົບທຳນຽມ".ໃນຍຸກສະໄຫມລາຊະວົງສັກດິນາຂອງຈີນ 2 ພັນກວ່າປີຫລັງທ່ານຂົງຈຶ້ ນັກການເມືອງທັງຫລາຍໄດ້ສືບທອດແລະເສີມຂະຫຍາຍມູນເຊື້ອຂອງທ່ານຂົງຈຶ້ແລະສຳນັກຂົງຈຶ້,ອອກແຮງຊຸກຍູ້ບົດບາດພິເສດຂອງ"ຂະຫນົບ ທຳນຽມ"ໃນການປົກຄອລັດ,ແລະຖືເປັນໄມ້ຫລາວັດແທກວັດທະນະທຳພື້ນຖານທີ່ຈຳແນກວັດທະນະທຳຈີນກັບວັດທະນະທຳອື່ນໆ.
ໃນຖານເປັນປະກົດການທີ່ຈີນມີໂດຍຈຳເພາະ, ຂະຫນົບທຳນຽມຂອງຈີນບູຮານແມ່ນລະບົບແຫ່ງລະບອບແລະວັດທະນະທຳທີ່ມີອົງປະກອບອັນຄົບຖ້ວນ,ລະບົບດັ່ງກ່າວລວມທັງມີຫຼາຍເນື້ອໃນເຊັ່ນການເມືອງ ກົດຫມາຍ ສາສະຫນາ ຈະລິຍະທຳແລະລະບອບສັງຄົມເປັນຕົ້ນ.ຂະຫນົບທຳນຽມຫລືລະບົບຂະຫນົບທຳນຽມສ່ອງແສງໃຫ້ເຫັນຢູ່ນຳພິທີການດ້ານນະມັດສະການ ສະມາຄົມ ພິທີເຊັ່ນໄຫວ້ ພິທີຝັງສົບ ການເຄື່ອນທັບ ພິທີແຕ່ງດອງພິທີປົງສົບເປັນຕົ້ນທີ່ຜູ້ປົກຄອງລາຊະວົງສ້າງຂຶ້ນຕາມຄວາມຕ້ອງການຕົວຈິງດ້ານການເມືອງ ພິທີເຊັ່ນໄຫວ້ ພິທີປູກຝັງແລະເສິກສົງຄາມເປັນຕົ້ນໃນຄາວນັ້ນ.
ຂະຫນົບທຳນຽມມີພາລະບົດບາດທາງສັງຄົມກຳນົດຖານະ ກຽດຕິຍົດແລະຊົນຊົ້ນວັນນະ,ສະນັ້ນ,ຂຸນນາງທີ່ຢູ່ໃນຊົນຊັ້ນວັນນະຕ່າງກັນປະຕິບັດຂະຫນົບທຳນຽມກໍ ຕ່າງກັນ,ໃນເວລາຈັດພິທີການຊະນິດຕ່າງໆ,ຜູ້ເຂົ້າຮ່ວມທຸກຄົນລ້ວນແຕ່ຕ້ອງອີງຕາມຊົນຊັ້ນວັນນະຂອງຕົນ,ແລະນຳໃຊ້ເຄື່ອງຈັດພິທີການຫລືຂະຫນົບທຳນຽມທີ່ຊົນຊັ້ນວັນນະຂອງຕົນໃຊ້ໄດ້.
ຍ້ອນເວລາດົນໂພດ,ບວກກັບເອກະສານມີຫນ້ອຍ,ສະນັ້ນ,ສະພາບອັນຄຶກຄຶ້ນ ທີ່ຊົນຊັ້ນຂຸນນາງສະໄຫມປະຖົມບູຮານຈັດພິທີການນັ້ນມີແຕ່ອາໄສຂໍ້ມູນບູຮານນະ ຄະດີພາກສະຫນາມແຫ່ງຮ່ອງຮອຍວັດທະນະທຳບູຮານຢູ່ແຫ່ງຕ່າງໆແຕ່ສະຕະວັດທີ 20 ມານີ້ມາສະແດງໃຫ້ເຫັນເຄົ້າໂຄງແລະໂສມຫນ້າໂດຍສັງເຂບຂອງມັນ.
ເມື່ອສັງເກດຈາກຂໍ້ມູນບູຮານນະຄະດີພາກສະຫນາມຢູ່ແຫ່ງຕ່າງໆແລ້ວເຫັນວ່າ,ໃນວັດທະນະທຳຍຸກຫີນໃຫມ່ພຸ້ນ,ຂະຫນົບທຳນຽມຫລືລະບອບຂະຫນົບທຳນຽມຂອງຈີນກໍ່ໄດ້ອອກຫນໍ່ຈໍ່ແຫນງແລ້ວ.ໃນວັດທະນະທຳລຽງຈູຢູ່ເຂດສາມຫລ່ຽມແມ່ນ້ຳຢາງເຊຍ່າມໃຕ້ທີ່ຫ່າງຈາກປະຈຸບັນ 5 ພັນປີນັ້ນ,ລະບອບຂະຫນົບທຳນຽມກໍ່ໄດ້ເປັນລະບົບເປັນແບບສະບັບແລະເປັນລະບອບ.ກ່ອນອື່ນ,ສະພາບຫມູ່ບ້ານແລະຂະຫນາດຂອງວັດທະນະທຳລຽງຈູໄດ້ສ່ອງແສງໃຫ້ເຫັນວ່າ,ສັງຄົມໃນຄາວນັ້ນໄດ້ສ້າງເປັນລະບົບຊົນຊັ້ນສັງຄົມແບບທາດປິລາມິດທີ່ແບ່ງຊົນຊັ້ນວັນນະຢ່າງຈະແຈ້ງແລ້ວ; ຖັດມາ, ອີງຕາມບົດລາຍງານກ່ຽວກັບການຂຸດຄົ້ນບູຮານນະຄະດີພາກສະຫນາມ,ຂຸມຝັງສັບຂອງວັດທະນະທຳລຽງຈູມີຂຸມໃຫຍ່ ຂຸມຂະຫນາດກາງ ຂຸມຂະຫນາງກາງສຳຮອງແລະຂຸມຂະຫນາດນ້ອຍ,ລະຫວ່າງຂຸມຝັງສົບປະເພດຕ່າງໆ,ບໍ່ວ່າຈະແມ່ນຂະຫນາດແລະລະບອບຂຸມຝັງສົບຫລືວ່າປະເພດແລະຄຸນນະພາບຂອງສິ່ງທີ່ຝັງນຳກັນລ້ວນແຕ່ມີຄວາມແຕກຕ່າງກັນຢ່າງຈະແຈ້ງແລະແຕກຕ່າງກັນຫລາຍທີ່ສຸດ,ໃນຂຸມຝັງສົບປະເພດຕ່າງໆ,ເຄື່ອງໃຊ້ໃນທຳພິທີການທີ່ສະແດງໃຫ້ເຫັນເຖິງຖານະທາງ ສັງຄົມຂອງເຈົ້າຂອງຂຸມຝັງສົບກ່ອນຍັງມີຊີວິດຢູ່ຈະຫລາຍຫລືຫນ້ອຍນັ້ນໄດ້ສ່ອງແສງໃຫ້ເຫັນຢ່າງຈະແຈ້ງວ່າ ສັງຄົມໃນຄາວນັ້ນແມ່ນສັງຄົມທີ່ແບ່ງຊົນຊັ້ນວັນນະຢ່າງເຂັ້ມງວດ,ລະຫວ່າງສະມາຊິກຂອງຊົນຊັ້ນຕ່າງໆໃນສັງຄົມໄດ້ແບ່ງກຽດຕິຍົດແລະຄວາມເຫຼື່ືອມລ້ຳຕ່ຳສູງຕ່າງກັນ,ນີ້ແມ່ນປະກົດການສຳຄັນແຫ່ງການຊົງຕົວຢູ່ຂອງຂະຫນົບທຳນຽມແລະລະບົບຂະຫນົບທຳນຽມ.
ເມື່ອສັງເກດເບິ່ງຈາກປະຫວັດສາດແລ້ວເຫັນວ່າ,ລະບົບຂະຫນົບທຳນຽມບູຮານຂອງສະໄຫມວັດທະນະທຳລຽງຈູບໍ່ພຽງແຕ່ບໍ່ໄດ້ເສື່ອມໂຊມແລະສູນຫາຍພ້ອມກັນກັບວັດທະນະທຳລຽງຈູເທົ່ານັ້ນ,ຫາກຍັງຖືກລາຊະວົງລຸນຫລັງສືບທອດຮອບດ້ານ,ກາຍເປັນເນື້ອໃນທີ່ມີສີສັນພິເສດກວ່າຫມູ່ຂອງອາລະຍະທຳຈີນບູຮານ.ຂະຫນົບທຳ ນຽມບູຮານເຫົ່ຼານີ້ຂະຫຍາຍຕົວຕື່ມອີກ,ກາຍເປັນລະບົບວັດທະນະທຳການເມືອງທີ່ສັບສົນແລະຄົບຖ້ວນບໍລິບູນ,ມີຈິດໃຈວັດທະນະທຳຂອງຂະຫນົບທຳນຽມ,ແລະທັງມີພາລະບົດບາດທາງສັງຄົມຂອງລະບອບຂະຫນົບທຳນຽມ,ເຊິ່ງກໍ່ຄືຜ່ານຈາກການກຳນົດຢ່າງລະອຽດຕໍ່ຫໍວັງ ພາຊະນະ ອາພອນເຄື່ອງເອ້ຂອງຊົນຊັ້ນຂຸນນາງທີ່ມີຊັ້ນວັນນະຕ່າງກັນມາສະແດງໃຫ້ເຫັນຫລັກການຄວາມແຕກຕ່າງກັນດ້ານຊົນຊັ້ນວັນນະແຫ່ງຄວາມສະຫນິມສະຫນົມ ຄວາມຫ່າງເຫີນ ມີກຽດສັກສີຫລືເຫຼື່ອມລ້ຳຕ່ຳສູງ. ນອກນີ້,ໃນລະບອບຂະຫນົບທຳນຽມຍັງລວມທັງເຄື່ອງໃຊ້ອັນລະອຽດຈຳນວນຫນຶ່ງ,ຕົວຢ່າງຄືຕາປະທັບຍົກທີ່ເປັນສັນຍະລັກແຫ່ງອຳນາດຂອງເຈົ້າຊີວິດເປັນຕົ້ນ, ຈໍ່ຕົວເປັນວັດທະນະທຳຍົກທີ່ມີເອກະລັກຂອງຈີນ.ໃນຫົວທີ,ຂະຫນົບທຳນຽມແລະລະບອບຂະຫນົບທຳນຽມແມ່ນຜູ້ປົກຄອງໃນສະໄຫມບູຮານຂອງຈີນເປັນຜູ້ກຳນົດແລະປະກາດໃຊ້,ຜ່ານຈາກການສັບຊ້ອນແລະເຜີຍແຜ່ຂອງສຳນັກຢູ, ພາຍຫລັງມາໄດ້ຖືກຝ່າຍທາງການທຸກສະໄຫມໃຊ້ເປັນຫຼັກມາດຖານດ້ານການເມືອງແລະດ້ານຈະລິຍະທຳ,ໄດ້ມີຜົນສະທ້ອນອັນເລິກເຊິ່ງທີ່ສຸດຕໍ່ການຈໍ່ຕົວເປັນວັດທະນະທຳອັນເປັນມູນເຊື້ອຂອງຈີນ.
|
