|
|
 |
| (GMT+08:00)
2004-12-29 16:25:21
|
 |
|
ຄື້ນທະເລຊູນາມີກະໜ່ຳຂະແໜງການທ່ອງທ່ຽວແລະຂະແໜງການປະກັນໄພ
cri
Author: mengmeng
ຕາມຂ່າວCRI, ແຜ່ນດິນໄຫວແຮງແລະຄື້ນທະເລຊູນາມີທີ່ເກີດຂຶ້ນຢູ່ເຂດທະເລມໍ່ເກາະຊູມັດຕຼາອິນໂດເນເຊຍໃນວັນທີ 26ທັນວາໄດ້ກະໜ່ຳຂະແໜງການທ່ອງທ່ຽວຂອງປະເທດຈຳນວນໜຶ່ງຂອງອາຊີອາຄະເນແລະອາຊີໃຕ້ຢ່າງໜັກໜ່ວງອີກເທື່ອໜຶ່ງ. ພ້ອມກັນນັ້ນ, ຂະແໜງການທ່ອງທ່ຽວແລະຂະແໜງການປະກັນໄພຂອງໂລກກໍ່ຖືກກະທົບກະເທືອນໃນລະດັບຕ່າງກັນ. ແຕ່ຄົນທັງຫຼາຍເຫັນວ່າ, ໄພພິບັດບັ້ນນີ້ມີຜົນກະທົບຈຳກັດຕໍ່ເສດຖະກິດໂລກ.
ແຜ່ນດິນໄຫວແລະຄື້ນທະເລຊູນາມີເທື່ອນີ້ພວມຢູ່ໃນໄລຍະມີແຂກທ່ອງທ່ຽວຫຼາຍຄືບຸນໂນແອນແລະບຸນປີໃໝ່ສາກົນ, ນັກທ່ອງທ່ຽວຂອງປະເທດຕ່າງໆພວມຜັກຜ່ອນຢ່ອນອາລົມຢູ່ປະເທດຈຳນວນໜຶ່ງຂອງອາຊີອາຄະເນແລະອາຊີໃຕ້, ໄດ້ຕາກອາກາດຢູ່ຫາດຊາຍຝັ່ງທະເລ. ພາຍຫຼັງເກີດໄພພິບັດແລ້ວ, ນັກທ່ອງທ່ຽວຕ່າງປະເທດທີ່ຕື່ນຕົກໃຈນັບເປັນໝື່ນຄົນທະຍອຍກັນຢຸດຕິການຜັກຜ່ອນຢູ່ແດນສະຫວັນການທ່ອງທ່ຽວທີ່ອາຊີອາຄະເນແລະອາຊີໃຕ້ແລ້ວ, ຂີ່ຍົນໜີອອກຈາກທ້ອງຖິ່ນນັ້ນໂດຍໄວ.
ຂະແໜງການທ່ອງທ່ຽວຂອງໄທເປັນຂະແໜງການເສົາຄ້ຳຂອງເສດຖະກິດແຫ່ງຊາດຕະຫຼອດມາ, ຄິດສະເລ່ຍແລ້ວແຕ່ລະປີຕ້ອນຮັບນັກທ່ອງທ່ຽວຕ່າງປະເທດ12ລ້ານກວ່າຄົນ. ພາຍຫຼັງເກີດວິກິດການການເງິນອາຊີເມື່ອປີ1997ແລ້ວ, ຂະແໜງການທ່ອງທ່ຽວໄດ້ປະກອບສ່ວນຢ່າງຫຼວງຫຼາຍເຂົ້າໃນການຟື້ນຟູແລະພັດທະນາເສດຖະກິດໄທ. ແຜ່ນດິນໄຫວແລະຄື້ນທະເລຊູນາມີທີ່ເກີດຂຶ້ນຢ່າງກະທັນຫັນໄດ້ເປັນເງົາມືດແກ່ໄທ, ໂດຍສະເພາະແມ່ນຂະແໜງການທ່ອງທ່ຽວຂອງພາກໃຕ້ຂອງໄທ. ຕາມຂ່າວແຈ້ງວ່າ, ຟອງທະເລມະຫຶມາໄດ້ທຳລາຍສິ່ງກໍ່ສ້າງທ່ອງທ່ຽວແລະໂຮງແຮມຂອງທ້ອງຖິ່ນຢ່າງຫຼວງຫຼາຍ, ໄດ້ເຮັດໃຫ້ນັກທ່ອງທ່ຽວຕ່າງປະເທດຢ່າງໜ້ອຍ700ກວ່າຄົນເສຍຊີວິດ. ຕາມຫົວໜ້າກົມທ່ອງທ່ຽວໄທຄາດຄະເນວ່າ, ໃນໄລຍະໜຶ່ງຕໍ່ໄປ, ອາດຈະມີນັກທ່ອງທ່ຽວຕ່າງປະເທດ1ລ້ານ2ແສນຄົນຍົກເລີກແຜນການທ່ອງທ່ຽວຢູ່ໄທຂອງພວກເຂົາເຈົ້າ, ລາຍຮັບການທ່ອງທ່ຽວອາດຈະຫຼຸດລົງ750ລ້ານໂດລາສະຫະລັດ. ການສ້າງສາຄືນໃໝ່ຂອງເຂດປະສົບໄພແລະເຮັດໃຫ້ຂະແໜງການທ່ອງທ່ຽວຟື້ນຕົວຢ່າງສົມບູນນັ້ນຢ່າງໜ້ອຍຕ້ອງໃຊ້ເວລາ2ປີ.
ພ້ອມກັນນັ້ນ, ຜູ້ຊ່ຽວຊານທັງຫຼາຍຊີ້ອອກວ່າ, ໃນໄລຍະໜຶ່ງຕໍ່ໄປພາຍໜ້າ, ການປະສົບໄພຂອງຂະແໜງການທ່ອງທ່ຽວຂອງປະເທດຈະປະເຊີນກັບບັນຫາອຸປະສັກທາງຈິດໃຈຂອງນັກທ່ອງທ່ຽວ. ເຖິງວ່າແຜ່ນດິນໄຫວແຮງແລະຄື້ນທະເລຊູນາມີແຮງປານນີ້ຮ້ອຍປີຈິ່ງຈະພົບເທື່ອໜຶ່ງ, ແຕ່ກຳລັງທຳລາຍທີ່ຮຸນແຮງຂອງມັນຜ່ານຈາກສື່ມວນຊົນຕ່າງໆໂຄສະນາໃນຂອບເຂດທົ່ວໂລກແລ້ວ, ໄດ້ສ້າງຄວາມຊົງຈຳທີ່ລືມຍາກໃຫ້ແກ່ຄົນທັງຫຼາຍ. ນອກນີ້, ເມື່ອທຽບກັບວຽກງານສ້າງສາຄືນໃໝ່ແລ້ວ, ການສ້າງຕັ້ງແລະປັບປຸງລະບົບເຕືອນໄພທຳມະຊາດໃຫ້ສົມບູນຂຶ້ນແມ່ນຍິ່ງສຳຄັນກວ່າ, ມີແຕ່ເຮັດແນວນີ້ຈິ່ງຈະເຮັດໃຫ້ນັກທ່ອງທ່ຽວບັນດາປະເທດມີຄວາມໝັ້ນໃຈຄືນໃໝ່. ນີ້ແມ່ນວຽກງານທີ່ຍາວນານກວ່າ.
ແຕ່ວ່າ, ບຸກຄົນວິເຄາະບໍ່ໜ້ອຍເຫັນວ່າ, ເວົ້າລວມແລ້ວ, ໄພພິບັດບັ້ນນີ້ບໍ່ຫ່ອນຈະກະໜ່ຳເສດຖະກິດຂອງພາກພື້ນນີ້ໜັກໜ່ວງປານໃດ. ຕົ້ນຕໍແມ່ນຍ້ອນວ່າສູນອຸດສາຫະກຳແລະສິ່ງກໍ່ສ້າງທ່າກ່ຳປັ່ນຂອງປະເທດທີ່ກ່ຽວຂ້ອງລ້ວນແຕ່ບໍ່ຖືກໄດ້ທຳລາຍ, ຄວາມເສຍຫາຍຍ້ອນໄພພິບັດສ່ວນຫຼາຍແມ່ນຢູ່ໃນຂະແໜງການທ່ອງທ່ຽວເທົ່ານັ້ນ. ໃຕ້ການຊ່ອຍເຫຼືອຂອງປະຊາຄົມໂລກ, ປະເທດເຫຼົ່ານີ້ມີຄວາມສາມາດຮັບມືກັບຄວາມເສຍຫາຍຈາກໄພພິບັດຢ່າງສົມບູນ, ເສດຖະກິດຂອງປະເທດກໍ່ຄວນໄດ້ຮັບການຟື້ນຕົວຢ່າງວ່ອງໄວ.
ນອກຈາກຂະແໜງການທ່ອງທ່ຽວໃນທ້ອງຖິ່ນແລ້ວ, ໄພພິບັດບັ້ນນີ້ມີຜົນກະທົບຕໍ່ເສດຖະກິດທົ່ວໂລກນັ້ນຕົ້ນຕໍກ່ຽວພັນກັບຂະແໜງການທີ່ກ່ຽວຂ້ອງກັບການທ່ອງທ່ຽວແລະຂະແໜງການປະກັນໄພທົ່ວໂລກ.
ສິ່ງທີ່ຄວນເອົາໃຈໃສ່ເປັນພິເສດແມ່ນຂະແໜງການປະກັນໄພໂລກ. ເວົ້າສຳລັບຂະແໜງການປະກັນໄພຂອງໂລກແລ້ວ, ຄື້ນທະເລຊູນາມີເທື່ອນີ້ໄດ້ນຳເອົາຄວາມເສຍຫາຍອັນໃຫຍ່ຫຼວງມາໃຫ້ຂະແໜງການປະກັນໄພເຮັດໃຫ້ຂະແໜງການດັ່ງກ່າວຍິ່ງລຳບາກກວ່າເກົ່າ, ເພາະວ່າແຕ່ຕົ້ນປີນີ້ມາຮອດປະຈຸບັນ, ຂະແໜງການປະກັນໄພທົ່ວໂລກໄດ້ເສຍຄ່າຊົດເຊີຍ42ຕື້ໂດລາສະຫະລັດແກ່ໄພທຳມະຊາດຫຼາຍເທື່ອ, ໃນນັ້ນ, ຄ່າຊົດເຊີຍຕໍ່ໄພພາຍຸທີ່ອາເມລິກາແລະຍີ່ປຸ່ນພົບພໍ້ນັ້ນໄດ້ບັນລຸ27ຕື້ໂດລາສະຫະລັດ. ແຕ່ວ່າ, ໜັງສືພິມຫຼາຍສະບັບຂອງເອີລົບເຫັນວ່າ, ແຜ່ນດິນໄຫວແລະຄື້ນທະເລຊູນາມີຂອງອາຊີເທື່ອນີ້ເຖິງວ່າໄດ້ກະໜ່ຳເນື້ອທີ່ຢ່າງກວ້າງຂວາງແລະເຮັດໃຫ້ຄົນຕາຍແລະບາດເຈັບເປັນຈຳນວນຫຼວງຫຼາຍກໍຕາມ, ແຕ່ຍ້ອນວ່າໄພພິບັດບໍ່ໄດ້ທຳລາຍຂົງເຂດເສດຖະກິດສຳຄັນຂອງໂລກ, ສະນັ້ນ, ບໍ່ຫ່ອນຈະມີຜົນກະທົບໜັກໜ່ວງປານໃດຕໍ່ເສດຖະກິດໂລກ.
|
|
|
