|
|
 |
| (GMT+08:00)
2004-12-30 10:45:04
|
 |
|
ການເລືອກຕັ້ງທົ່ວໄປຂອງອີຣັກປະເຊີນກັບການທົດສອບອັນຂ້ຽວຂາດ
cri
ຕາມຂ່າວcri:ເນື່ອງໃນເວລາຫ່າງຈາກວັນຈັດການເລືອກຕັ້ງທົ່ວໄປບໍ່ຮອດ 5 ອາທິດ,ສະຖານະການອີຣັກຍັງຄົງເຮັດໃຫ້ຄົນວິຕົກກັງວົນ.
ຕາມສະຖິຕິທີ່ບໍ່ຄົບຖ້ວນ,ແຕ່ຕອນຄ່ຳວັນທີ 26 ຮອດວັນທີ 28 ທັນວາ,ການຫລອນໂຈມຕີທີ່ແນໃສ່ກອງທະຫານອາເມລິກາປະຈຳອີຣັກ ກອງປ້ອງກັນຊາດແລະຕຳຫລວດອີຣັກທີ່ເກີດຂຶ້ນຢູ່ແຫ່ງຕ່າງໆອີຣັກຢ່າງຫນ້ອຍໄດ້ເຮັດໃຫ້ 74 ຄົນເສຍຊີວິດ,ຫລາຍຮ້ອຍຄົນບາດເຈັບ.ໃນນັ້ນ,ພຽງແຕ່ວັນທີ 28 ມື້ດຽວກໍ່ມີ 42 ຄົນເສຍຊີວິດເປັນຢ່າງຫນ້ອຍ,ໃນນັ້ນສ່ວນຫລາຍແມ່ນຕຳຫລວດແລະສະມາຊິກກອງປ້ອງກັນຊາດອີຣັກ.
ຕອນເຊົ້າວັນທີ 27 ທັນວາ,ສຳນັກງານຢູ່ແບກແດດຂອງທ່ານຮາກິມ ຜູ້ນຳຄະນະກຳມະການສູງສຸດການປະຕິວັດອິສລາມອີຣັກ ພັກການເມືອງຕົ້ນຕໍນິກາຍຊີອິດອີຣັກຖືກຫລອນໂຈມຕີດ້ວຍລູກລະເບີດລົດຍົນແບບຂ້າໂຕຕາຍ,ທ່ານຮາກິມເອງບໍ່ໄດ້ຮັບບາດເຈັບ,ແຕ່ມີ 13 ຄົນເສຍຊີວິດລວມທັງຜູ້ປ້ອງກັນ,ປະມານ 50 ຄົນບາດເຈັບ.ທ່ານຮາກິມໄດ້ເປັນທີຫນຶ່ງໃນບັນຊີລາຍຊື່ຜູ້ສະຫມັກຮັບເລືອກຕັ້ງ 228 ຄົນທີ່ສະຫະພັນສາມັກຄີອີຣັກເຊິ່ງແມ່ນສະຫະພັນແຂ່ງຂັນເລືອກຕັ້ງຂອງນິກາຍຊີອິດສະເຫນີອອກມາ,ແມ່ນຜູ້ນຳສາສະຫນາທີ່ມີຫວັງຫລາຍກວ່າຫມູ່ທີ່ຜ່ານການເລືອກຕັ້ງເຂົ້າສູ່ອົງການອຳນາດໃນອະນາຄົດຂອງອີຣັກ.ນິກາຍຊີອິດຂອງອີຣັກທີ່ກວມປະຊາກອນອີຣັກ 60%ຂຶ້ນໄປຫວັງຜ່ານການເລືອກຕັ້ງ,ປ່ຽນທ່າແຮງດ້ານປະຊາກອນເປັນທ່າແຮງດ້ານອຳນາດ,ສະນັ້ນ,ນິກາຍຊີອິດຈິ່ງສະຫນັບສະຫນູນໃຫ້ຈັດການເລືອກຕັ້ງທົ່ວໄປຕາມເວລາກຳນົດຕະຫລອດມາ.ກໍແມ່ນຍ້ອນເຫດນີ້,ຜູ້ນຳນິກາຍຊີອິດໄດ້ກາຍເປັນເປົ້າຫມາຍລອບຄາດຕະກຳຂອງຜູ້ຄັດຄ້ານການເລືອກຕັ້ງ.
ກົງກັນຂ້າມກັບທ່າທີຕັ້ງຫນ້າເຂົ້າຮ່ວມການເລືອກຕັ້ງຂອງນິກາຍຊີອິດ,ພັກການເມືອງຈຳນວນຫນຶ່ງຂອງນິກາຍຊຸນນິດຂອງອີຣັກທີ່ກວມປະຊາກອນອີຣັກປະມານ 1 ສ່ວນ 5 ພັດຍຶດຫມັ້ນຮຽກຮ້ອງໃຫ້ເລື່ອນເວລາຈັດການເລືອກຕັ້ງທົ່ວໄປ,ຕະຫລອດຮອດສະຖານະການຄວາມປອດໄພຂອງອີຣັກດີຂຶ້ນແລະກອງທະຫານຕ່າງປະເທດຖອນອອກຈາກອີຣັກແລ້ວຈິ່ງຈັດຂຶ້ນ.ພັກການເມືອງເຫົ່ຼານີ້ເຫັນວ່າ,ການຈັດການເລືອກຕັ້ງທົ່ວໄປໃຕ້ກໍລະນີມີກອງທະຫານອາເມລິກາຈຳນວນຫລວງຫລາຍປະຈຳຢູ່ນັ້ນແມ່ນບໍ່ອາດຈະຍຸດຕິທຳໄດ້.ວັນທີ 27 ທັນວາ, ພັກອິສລາມ ພັກການເມືອງທີ່ໃຫຍ່ກວ່າຫມູ່ຂອງມຸສລິມນິກາຍຊຸນນີດປະກາດຖອນອອກຈາກການເລືອກຕັ້ງທົ່ວໄປ.ກ່ອນຫນ້ານີ້,ພັກດັ່ງກ່າວເຄີຍໄດ້ຍື່ນບັນຊີລາຍຊື່ຜູ້ສະຫມັກຮັບເລຶອກຕັ້ງ 275 ຄົນໃຫ້ຄະນະກຳມະການການເລືອກຕັ້ງສູນກາງອີຣັກ.ພັກດັ່ງກ່າວກ່າວວ່າ,ຄວາມປອດໄພບໍ່ມີການຮັບປະກັນ ຜູ້ມີສິດເລືອກຕັ້ງບໍ່ມີສິດຮູ້ອັນພຽງພໍຈົນກະທັ້ງບໍ່ສາມາດໄດ້ຮັບຕາລາງຈົດທະບຽນຜູ້ມີສິດເລືອກຕັ້ງເປັນຕົ້ນແມ່ນສາເຫດທີ່ພັກດັ່ງກ່າວຖອນອອກຈາກການເລືອກຕັ້ງທົ່ວໄປ.
ບົດບັນທຶກຊ່ອຍຈຳຂອງເຈົ້າຫນ້າທີ່ສະຫະປະຊາຊາດທີ່ຊ່ອຍການເລືອກຕັ້ງອີຣັກ ທີ່ສື່ມວນຊົນອາເມລິກາເຜີຍໃຫ້ຮູ້ໃນວັນທີ 27 ທັນວາໄດ້ລະບຸຄວາມຫຍຸ້ງຍາກທີ່ການເລືອກຕັ້ງທົ່ວໄປຂອງອີຣັກປະເຊີນໃນສະເພາະຫນ້ານີ້,ໃນນັ້ນລວມທັງຈຳນວນຜູ້ມີສິດເລືອກຕັ້ງທີ່ຈົດທະບຽນຕ່ຳກວ່າທີ່ຄາດໄວ້ ສູນປ່ອນບັດອາດຈະຖືກຫລອນໂຈມຕີ,ສາງໄວ້ບັດເລືອກຕັ້ງຂອງແຂວງຈຳນວນຫນຶ່ງຂາດອຸປະກອນປ້ອງກັນການຫລອນໂຈມຕີເປັນຕົ້ນ.
ບຸກຄົນວິເຄາະເຫັນວ່າ,ບັນຫາຄວາມປອດໄພຍັງຄົງແມ່ນອຸປະສັກຕົ້ນຕໍທີ່ກະທົບກະເທືອນເຖິງການຈັດການເລືອກຕັ້ງທົ່ວໄປຕາມເວລາກຳນົດ.ເຖິງວ່າກອງທະຫານອາເມລິກາທີ່ປະຈຳອີຣັກອ້າງວ່າມີ 1 ແສນ 5 ຫມື່ນຄົນກໍ່ຕາມ,ແຕ່ພາຍຫລັງຖານທັບອາເມລິກາປະຈຳໂມຊູນຖືກຫລອນໂຈມຕີ ພາໃຫ້ມີຄົນຕາຍແລະບາດເຈັບຢ່າງຫລວງຫລາຍແລ້ວ,ກອງທະຫານອາເມລິກາຂຸ້ນນຳການເພີ່ມທະວີການປ້ອງກັນຄວາມປອດໄພຂອງຕົນ,ບໍ່ມີກຳລັງພົນຍິ່ງຫລາຍມາຮັບປະກັນຄວາມປອດໄພຂອງການເລືອກຕັ້ງ.ນອກນນີ້,ບຸກຄົນວົງການການເມືອງຈຳນວນຫນຶ່ງຂອງອີຣັກກໍ່ຄັດຄ້ານໃຫ້ທະຫານອາເມລິກາປ້ອງກັນສູນປ່ອນບັດ,ເປັນຫ່ວງວ່າ,ການກະທຳດັ່ງກ່າວຈະທຳລາຍພາບພົດປະຊາທິປະໄຕຂອງການເລືອກຕັ້ງ. ຫລາຍໆຄົນເປັນຫ່ວງວ່າ,ຖ້າສະຖານະການຄວາມປອດໄພໃນເວລາເລືອກຕັ້ງບໍ່ໄດ້ຮັບການປົວແປງໃຫ້ດີຂຶ້ນ,ເຖິງວ່າຂືນຈັດການເລືອກຕັ້ງ,ຫລາຍໆຄົນກໍ່ບໍ່ກ້າສ່ຽງໄປປ່ອນບັດ,ບວກກັບພັກການເມືອງນິກາຍຊຸນນີດຂວ້ຳບາດ,ອັດຕາປ່ອນບັດອາດຈະຖືກກະທົບກະເທືອນ,ແລ້ວກະທົບກະເທືອນເຖິງຄວາມສັກສິດແລະຄວາມຫນ້າເຊື່ອຖືຂອງການເລືອກຕັ້ງ.ຈາກນີ້ເຫັນໄດ້ວ່າ,ການເລືອກຕັ້ງທົ່ວໄປຂອງອີຣັກຍັງຄົງປະເຊີນກັບການທົດສອບອັນຂ້ຽວຂາດນານາປະການ.
|
|
|
