|
ປີໜ້າ, ຈີນຈະດັດແປງວຽກງານຖະແຫລງຂ່າວໃຫ້ດີຂຶ້ນຕື່ມອີກ
cri
ວັນທີ 28 ທັນວາ, ໃນງານຖະແຫລງຂ່າວທີ່ຈັດຂຶ້ນຢູ່ປັກກິ່ງ, ທ່ານຈ້າວສີເຈີ້ງ ຫົວໜ້າຫ້ອງການຖະແຫລງຂ່າວຂອງຄະນະລັດຖະບານຈີນເຜີຍໃຫ້ຮູ້ວ່າ, ປີໜ້າ, ຈີນຈະດັດແປງວຽກງານຖະແຫລງຂ່າວໃຫ້ດີຂຶ້ນຕື່ມອີກ, ເພື່ອສະໜອງຂ່າວຄາວກ່ຽວກັບວຽກງານຂອງລັດຖະບານຈີນຕໍ່ວົງການຂ່າວຂອງຈີນແລະຕ່າງປະເທດຊາບຢ່າງທັນການ ຖືກຕ້ອງ ແລະຮອບດ້ານ.
ແຕ່ປີ 1993 ເປັນຕົ້ນມາ, ຫ້ອງການຖະແຫລງຂ່າວຂອງຄະນະລັດຖະບານຈີນໄດ້ເລີ່ມຮັບຜິດຊອບການຖະແຫລງຂ່າວຂອງຄະນະລັດຖະບານຈີນແລະປະສານງານການປະກາດຂ່າວຂອງພາກສ່ວນຕ່າງໆຂອງລັດຖະບານ. ເມື່ອໄດ້ທຳຄວາມພະຍາຍາມມາ 10 ກວ່າປີແລ້ວ, ງານຖະແຫລງຂ່າວທີ່ຫ້ອງການຖະແຫລງຂ່າວດັ່ງກ່າວຈັດຂຶ້ນນັ້ນໄດ້ຈາກປີລະຫລາຍເທື່ອ ສິບກວ່າເທື່ອໃນເບື້ອງຕົ້ນເພີ່ມຂຶ້ນຮອດ 60 ເທື່ອໃນປີນີ້, ວຽກງານຖະແຫລງຂ່າວແລະຄຸນນະພາບລ້ວນແຕ່ໄດ້ຍົກສູງຂຶ້ນຂ້ອນຂ້າງຫລາຍ.
ນອກນີ້, ໃນຫລາຍປີມານີ້, ບັນດາອົງການປົກຄອງຂັ້ນແຂວງແລະຂັ້ນນະຄອນຂອງຈີນກໍລ້ວນແຕ່ໄດ້ສ້າງລະບອບໂຄສົກຖະແຫລງຂ່າວ. ການສ້າງແລະບູລະນະລະບອບຖະແຫລງຂ່າວ, ໄດ້ສະໜອງຊ່ອງທາງໃຫ້ແກ່ວົງການຖະແຫລງຂ່າວຂອງຈີນແລະຕ່າງປະເທດຊອກຮູ້ຂ່າວຄາວຂອງວຽກງານທີ່ກ່ຽວກັບຂອງລັດຖະບານຈີນຢ່າງທັນການ ຖືກຕ້ອງແລະຮອບດ້ານ. ໃນງານຖະແຫລງຂ່າວທີ່ຈັດຂື້ນຢູ່ທີ່ປັກກິ່ງໃນວັນທີ 28 ທັນວາ, ທ່ານຈ້າວສີເຈິ້ງ ຫົວໜ້າຫ້ອງການຖະແຫລງຂ່າວຂອງຄະນະລັດຖະບານຈີນກ່າວວ່າ, ປີ 2005, ຈີນຈະດັດແປງວຽກງານຖະແຫລງຂ່າວໃນ 4 ດ້ານ. ທ່ານເວົ້າວ່າ:
ໜຶ່ງແມ່ນເລືອກເອົາຫົວຂໍ້ທີ່ກ່ຽວພັນເຖິງວຽກງານສຳຄັນຂອງລັດຖະບານ, ຫົວຂໍ້ທີ່ສື່ມວນຊົນສົນໃຈແລະສາທາລະນະຊົນຢາກຮູ້ມາຖະແຫລງ. ສອງ, ແມ່ນຊີ້ນຳໃຫ້ລັດວິສາຫະກິດຂະໜາດໃຫຍ່ ຫົວໜ່ວຍພາລະກິດຄື ໂຮງໝໍ ໂຮງຮຽນແລະອົງການການທະນາຄານເປັນຕົ້ນກໍເຮັດຕາມພາກສ່ວນລັດຖະບານສ້າງລະບອບໂຄສົກຖະແຫລງຂ່າວ; ສາມ, ແມ່ນອິງຕາມການຕົກລົງຂອງພັກກອມມູນິດຈີນກ່ຽວກບການຊຸກຍູ້ໃຫ້ເປີດເຜີຍວຽກງານຂອງພັກເທື່ອລະກ້າວ, ເພີ່ມຄວາມໃສຊ່ອງທາງດ້ານວຽກງານຂອງອົງການພັກນັ້ນ, ຈະເຊີນພະນັກງານວຽກງານຂອງພັກເຂົ້າຮ່ວມງານຖະແຫລງຂ່າວໃຫ້ຫລາຍກວ່າເກົ່າ; ສີ່, ສືບຕໍ່ບູລະນະກົນໄກຖະແຫລງຂ່າວກ່ຽວກັບເຫດການທີ່ເກີດຂຶ້ນກະທັນຫັນ, ຈັດງານຖະແຫລງຂ່າວເພື່ອໃຫ້ສື່ມວນຊົນແລະສາທາລະນະຊົນຮູ້ຈັກສະພາບທີ່ເກີດຂຶ້ນຢ່າງທັນການ.
ທ່ານຈ້າວສີເຈິ້ງກ່າວວ່າ, ແຕ່ປີນີ້ເປັນຕົ້ນມາ, ລັດຖະບານຈີນໄດ້ເພີ່ມຄວາມແຮງໃນການຊຸກຍູ້ການເປີດເຜີຍວຽກງານການເມືອງ ແລະຄວາມໃສຊ່ອງຂອງວຽກງານຂ່າວຄາວ, ໃນນັ້ນ, ວຽກງານຖະແຫລງຂ່າວໄດ້ມີບົດບາດຂ້ອນຂ້າງສຳຄັນ. ທ່ານເຫັນວ່າ, ນີ້ບໍ່ພຽງແຕ່ແມ່ນຍ້ອນໄດ້ຈັດງານຖະແຫລງຂ່າວເລື້ອຍໆແລະຄຸນນະພາບຂອງງານຖະແຫລງຂ່າວກໍດີຂຶ້ນທໍ່ນັ້ນ, ພ້ອມກັນນັ້ນ, ກໍມີສ່ວນກ່ຽວພັນກັບຄຸນທາດຂອງໂຄສົກຖະແຫລງຂ່າວສູງຂຶ້ນ.
ຕາມຊາບວ່າ, ໃນປີ 2004, ຫ້ອງການຖະແຫລງຂ່າວຂອງລັດຖະບານຈີນໄດ້ຈັດຊຸດອົບຮົມໂຄສົກຖະແຫລງຂ່າວທົ່ວປະເທດສອງຊຸດ, ແລະແຍກອອກຮ່ວມກັນກັບ 14 ແຂວງ ແລະເຂດປົກຄອງຕົນເອງໃນທົ່ວປະເທດຈັດຊຸດອົບຮົມໂຄສົກຖະແຫລງຂ່າວ, ມີ 2 ພັນກວ່າຄົນມາເຂົ້າຮ່ວມຊຸດອົບຮົມ. ກະຊວງສຶກສາທິການ ກະຊວງຮັກສາຄວາມສະຫງົບ ກະຊວງສາທາລະນະສຸກ ແລະກະຊວງທາງລົດໄຟຈີນແລະພາກສ່ວນທີ່ກ່ຽວຂ້ອງກໍໄດ້ຈັດຊຸດອົບຮົມຂອງພະແນກຕົນແລະລະບົບຕົນໃຕ້ການຊ່ອຍເຫຼືອຂອງຫ້ອງການຖະແຫລງຂ່າວຂອງລັດຖະບານຈີນ, ໂຄສົກທີ່ເຂົ້າຮ່ວມການອົບຮົມໄດ້ຕີລາຄາສູງສົມຄວນຕໍ່ການຈັດຊຸດອົບຮົມ, ເຫັນວ່າ, ເມື່ອໄດ້ຮັບການອົບຮົມແລ້ວ, ໄດ້ມີຄວາມຮັບຮູ້ຕໍ່ຄວາມສຳຄັນຂອງວຽກງານຖະແຫລງຂ່າວຫລາຍຂຶ້ນ, ໄດ້ເພີ່ມຄວາມໝັ້ນໃຈໃນການເຮັດວຽກຖະແຫລງຂ່າວໃຫ້ດີ. ທ່ານຈ້າວສີເຈິ້ງ ຫົວໜ້າຫ້ອງການຖະແຫລງຂ່າວຂອງລັດຖະບານຈີນກ່າວວ່າ, ປີໜ້າ, ຫ້ອງການຖະແຫລງຂ່າວຂອງລັດຖະບານຈະສືບຕໍ່ດຳເນີນວຽກງານອົບຮົມໂຄສົກຖະແຫລງຂ່າວ, ເພື່ອໃຫ້ໂຄສົກຖະແຫລງຂ່າວຮູ້ຈັກຄວາມສຳຄັນຂອງການຖະແຫລງຂ່າວ, ການເປີດເຜີຍວຽກງານການເມືອງ, ເພື່ອຍົກລະດັບຂອງໂຄສົກຖະແຫລງຂ່າວທຸກຂັ້ນຂອງຈີນໃຫ້ສູງຂຶ້ນ.
|
|
