|
|
 |
| (GMT+08:00)
2004-12-30 10:57:05
|
 |
|
ປະຊາຄົມໂລກເພີ່ມຄວາມແຮງໃນການຊ່ອຍເຫືຼອເຂດປະສົບໄພແຜ່ນດິນໄຫວແລະຄຶ້ນທະເລຊູນາມີ
cri
ຕາມຂ່າວcri: ແຜ່ນດິນໄຫວແຮງແລະຄຶ້ນທະເລຊູນາມີຍ້ອນແຜ່ນດິນໄຫວທີ່ເກີດຂຶ້ນຢູ່ມະຫາສະຫມຸດອິນເດຍໃນວັນທີ 26 ທັນວາໄດ້ເຮັດໃຫ້ປະເທດສ່ວນຫນຶ່ງຂອງອາຊີໃຕ້ແລະອາຊີອາຄະເນມີຄົນຕາຍແລະບາດເຈັບຢ່າງຫລວງຫລາຍແລະຊັບສິນເສຍຫາຍອັນມະຫາສານ,ພາໃຫ້ທົ່ວໂລກເອົາໃຈໃສ່ໂດຍທົ່ວໄປ, ປະຊາຄົມໂລກພາກັນສະຫນອງການຊ່ອຍເຫືຼອກູ້ໄພດ່ວນໃຫ້ແກ່ເຂດປະສົບໄພ.ເນື່ອງຈາກລະດັບຮາຍແຮງຂອງໄພພິບັດເທື່ອນີ້ແລະຈຳນວນຜູ້ປະສົບເຄາະຮ້າຍໄດ້ເພີ່ມຂຶ້ນເລື້ອຍໆ,ປະຊາຄົມໂລກພວມເພີ່ມຄວາມແຮງໃນການຊ່ອຍເຫືຼອເຂດປະສົບໄພ.
ວັນທີ 28 ທັນວາ,ຢູ່ເຊີແນວ,ອົງການທີ່ກ່ຽວຂ້ອງຂອງສະຫະປະຊາຊາດໄດ້ຮຽກໄຂກອງປະຊຸມປະສານງານການຊ່ອຍເຫືຼອປະເທດປະສົບໄພແຜ່ນດິນໄຫວແລະໄພຄຶ້ນທະເລຊູນາມີ.
ໃນງານຊຸມນຸມນັກຂ່າວ,ທ່ານນາງສະຕີເວນສ ຮອງຜູ້ປະສານງານການຊ່ອຍເຫືຼອດ່ວນຂອງສະຫະປະຊາຊາດເວົ້າວ່າ,ພາຍໃນສອງສາມມື້ຂ້າງຫນ້າ,ສະຫະປະຊາຊາດຈະປະກາດຄຳຮຽກຮ້ອງດ່ວນຕໍ່ປະຊາຄົມໂລກໃຫ້ບໍລິຈາກທຶນຊ່ອຍເຫືຼອທີ່ອາດຈະສູງຮອດ 1 ຕື້ 600 ລ້ານໂດລາສະຫະລັດ,ເພື່ອຊ່ອຍປະເທດທີ່ປະສົບໄພດຳເນີນວຽກງານກອບກູ້ຊ່ອຍເຫືຼອໂດຍໄວ.ປະຈຸບັນ,ອີງຕາມສະຖິຕິຂອງພາກສ່ວນທີ່ກ່ຽວຂ້ອງຂອງສະຫະປະຊາຊາດ,ຍອດມູນຄ່າບໍລິຈາກຊ່ອຍເຫືຼອ ປະເທດທີ່ປະສົບໄພໄດ້ລື່ນກາຍ 81 ລ້ານໂດລາສະຫະລັດແລ້ວ.ຕາມທະນາຄານໂລກຄາດຄະເນໃນເບື້ອງຕົ້ນໃນຫວ່າງແລ້ວນີ້,ປະເທດທີ່ປະສົບໄພຕ້ອງການການຊ່ອຍເຫືຼອປະມານ 5 ຕື້ໂດລາສະຫະລັດ.
ໃນຫລາຍມື້ມານີ້,ຫລາຍປະເທດພັດທະນາຕົ້ນຕໍໄດ້ເພີ່ມຈຳນວນເງິນຊ່ອຍເຫືຼອ.ຖັດຈາກລັດຖະບານອາເມລິກາປະກາດໃຫ້ການຊ່ອຍເຫືຼອຕ່າງໆເປັນມູນຄ່າ 15 ລ້ານໂດລາສະຫະລັດກ່ອນຫນ້ານີ້ແລ້ວ,ວັນທີ 28 ທັນວາ,ຖະຊວງການຕ່າງປະເທດອາເມລິກາໄດ້ກ່າວອີກວ່າ,ອາເມລິກາຈະເພີ່ມການຊ່ອຍເຫືຼອ 20 ລ້ານໂດລາສະຫະລັດແກ່ປະເທດເຫົ່ຼານີ້.
ວັນທີ 29 ທັນວາ,ລັດຖະບານອົດສຕຼາລີປະກາດວ່າ,ຈະໃຫ້ການຊ່ອຍເຫືຼອກູ້ໄພ 25 ລ້ານໂດລາອົດສຕຼາລີເທົ່າກັບປະມານ 19 ລ້ານ 2 ແສນ 5 ຫມື່ນໂດລາສະຫະລັດແກ່ປະເທດທີ່ປະສົບໄພ.
ວັນທີ 29 ທັນວາ,ທ່ານສະໂລເດີ ນາຍົກລັດຖະມົນຕີເຢຍລະມັນປະກາດວ່າ, ລັດຖະບານເຢຍລະມັນຈະເພີ່ມການຊ່ອຍເຫືຼອດ່ວນແກ່ປະເທດທີ່ປະສົບໄພຄຶ້ນທະເລຊູນາມີຂອງອາຊີຈາກ 2 ລ້ານເອີໂລທີ່ປະກາດກ່ອນຫນ້ານີ້ຂຶ້ນເປັນ 20 ລ້ານເອີໂລເທົ່າກັບປະມານ 27 ລ້ານໂດລາສະຫະລັດ.
ສ່ວນລັດຖະບານຍີ່ປຸ່ນກໍ່ໄດ້ໃຫ້ຄຳຫມັ້ນສັນຍາວ່າຈະໃຫ້ການຊ່ອຍເຫືຼອກູ້ໄພດ່ວນເປັນມູນຄ່າ 30 ລ້ານໂດລາສະຫະລັດໃນນັ້ນມີເຄື່ອງກິນ ຢຸກຢາແລະຕູບຜ້າເຕັນເປັນຕົ້ນແກ່ເຂດປະສົບໄພ.
ວັນທີ 29 ທັນວາ,ລັດຖະບານຝຣັ່ງແລະອັງກິດຕ່າງປະກາດວ່າ,ຈະໃຫ້ການຊ່ອຍເຫືຼອ 15 ລ້ານເອີໂລເທົ່າກັບປະມານ 20 ລ້ານໂດລາສະຫະລັດແລະ 21 ລ້ານ 3 ແສນເອີໂລເທົ່າກັບປະມານ 29 ລ້ານໂດລາສະຫະລັດແກ່ປະເທດທີ່ປະສົບໄພຄຶ້ນທະເລຊູນາມີຂອງອາຊີ.
ນອກນີ້,ຖັດຈາກໄດ້ໃຫ້ການຊ່ອຍເຫືຼອດ່ວນ 3 ລ້ານເອີໂລ,ວັນທີ 28 ທັນວາ,ສະຫະພາບເອີລົບໄດ້ປະກາດອີກວ່າ,ໃນຕໍ່ໄປຂ້າງຫນ້າ,ມູນຄ່າຊ່ອຍເຫືຼອ ຈະເພີ່ມຂຶ້ນຮອດ 50 ລ້ານເອີລົບ.
ໃນຖານເປັນປະເທດພວມພັດທະນາ,ລັດຖະບານຈີນກໍ່ຕົກລົງໃຫ້ການຊ່ອຍເຫືຼອແກ່ປະເທດທີ່ປະສົບໄພຢ່າງສຸດຄວາມສາມາດຂອງຕົນ,ວັດຖຸເປັນມູນຄ່າ 21 ລ້ານ 6 ແສນຢວນຈະຂົນສົ່ງທາງອາກາດໄປຮອດປະເທດທີ່ກ່ຽວຂ້ອງໂດຍດ່ວນ. ວັນທີ່ 29 ທັນວາ,ວັດຖຸຊ່ອຍເຫືຼອ 100 ໂຕນທີ່ຈີນຊ່ອຍເຫືຼອສີລັງການັ້ນໄດ້ຂົນສົ່ງໄປຮອດໂກລົມໂບແລ້ວ,ຈຳນວນເງິນ 3 ແສນໂດລາສະຫະລັດທີ່ຈີນຊ່ອຍເຫືຼອໄທກໍ່ໄດ້ມອບໃຫ້ຝ່າຍໄທແລ້ວ.ຕອນຄ່ຳວັນທີ 29 ທັນວາ,ລັດຖະບານຈີນຍັງຕົກລົງເພີ່ມການຊ່ອຍເຫືຼອດ່ວນແກ່ປະເທດທີ່ປະສົບໄພຢ່າງຫລວງຫລາຍ.
ແຕ່ວັນທີ 27 ມານີ້,ວັດຖຸຊ່ອຍເຫືຼອສ່ວນຫນຶ່ງຂອງສາກົນໄດ້ທະຍອຍກັນຂົນສົ່ງໄປຮອດເຂດປະສົບໄພ.ຜູ້ປະສານງານວຽກງານກອບກູ້ຊ່ອຍເຫືຼອດ່ວນຂອງສະຫະປະຊາຊາດກ່າວວ່າ,ພາຍໃນ 48 ຊົ່ວໂມງຂ້າງຫນ້າ,ຈະມີຍົນຂົນສົ່ງວັດຖຸກອບກູ້ຊ່ອຍເຫືຼອຫລາຍຮ້ອຍລຳຂອງ 24 ປະເທດບິນໄປສູ່ເຂດປະສົບໄພແຫ່ງຕ່າງໆ.ມູນນິທິຢູນີເຊັບສະຫະປະຊາຊາດ ອົງການແພດໄຮ້ພົມແດນ ສຳນັກງານຂ້າຫລວງຊັ້ນສູງ ສະຫະປະຊາຊາດກ່ຽວກັບວຽກງານຊາວອົບພະຍົບ ສຳນັກການແຜນການພັດທະນາຂອງສະຫະປະຊາຊາດ ສະພາກາແດງສາກົນແລະສະຫະພັນສາກົນຊີກວົງເດືອນແດງແລະອົງການອື່ນໆລ້ວນແຕ່ໄດ້ແຕ່ງຜູ້ກອບກູ້ຊ່ອຍເຫືຼອແລະຂົນສົ່ງວັດຖຸກອບກູ້ຊ່ອຍເຫືຼອທີ່ກ່ຽວຂ້ອງໄປໃຫ້ເຂດປະສົບໄພ.ປະຊາຄົມໂລກ ບັນດາອົງການຈັດຕັ້ງສາກົນແລະອົງການກອບກູ້ຊ່ອຍເຫືຼອສາກົນພວມພ້ອມກັນກັບປະເທດທີ່ປະສົບໄພ,ຮ່ວມກັນດຳເນີນການເຄື່ອນໄຫວກອບກູ້ຊ່ອຍເຫືຼອໃນຂອບເຂດທົ່ວໂລກຢ່າງຂະຫຍາດໃຫຍ່.
|
|
|
