|
|
 |
| (GMT+08:00)
2004-12-30 17:13:16
|
 |
|
ແຜ່ນດິນໄຫວແຮງມີຜົນກະທົບບໍ່ຫຼາຍຕໍ່ອະນາຄົດເສດຖະກິດອິນໂດເນເຊຍ
cri
Author: mengmeng
ແຜ່ນດິນໄຫວແລະຄື້ນທະເລຊູນາມີທີ່ເກີດຂຶ້ນຢູ່ເຂດທະເລມໍ່ອິນໂດເນເຊຍໃນຫວ່າງມໍ່ໆນີ້ໄດ້ເຮັດໃຫ້ຄົນຕາຍແລະບາດເຈັບເປັນຈຳນວນຫຼວງຫຼາຍແລະມີຄວາມເສຍຫາຍທາງຊັບສິນ. ແຕ່ວ່າ, ບຸກຄົນວິເຄາະເຫັນວ່າ, ໄພພິບັດທີ່ມີໜ້ອຍໃນປະຫວັດສາດກະໜ່ຳເສດຖະກິດກວມລວມຂອງອິນໂດເນເຊຍບໍ່ຫຼາຍປານໃດ, ພຽງແຕ່ຈະມີຜົນກະທົບທາງລົບຕໍ່ການທ່ອງທ່ຽວທ້ອງຖິ່ນແລະການເຄື່ອນໄຫວການຄ້າໃນໄລຍະສັ້ນ. ປີ2005, ເສດຖະກິດອິນໂດເນເຊຍຍັງຄົງຈະຮັກສາທ່ວງທ່າເຕີບໂຕຢ່າງດີງາມ.
ຕະຫຼາດຫຸ້ນຂອງອິນໂດເນເຊຍມີການປະຕິກິລິຍາອ່າວສະດຸ້ງໄວຕໍ່ໄພພິບັດບັ້ນນີ້. ເຖິງວ່າເປັນແນວນີ້ກໍຕາມ, ໃນເວລາເລີກຕະຫຼາດຂອງມື້ທຳອິດຫຼັງໄພພິບັດໃນວັນທີ27ທັນວາແລ້ວ, ຕົວເລກດັດສະນີສັງລວມຕະຫຼາດຫຸ້ນຢາກາກຕາເຊິ່ງເປັນຕະຫຼາດຫຸ້ນທີ່ໃຫຍ່ກວ່າໝູ່ຂອງອິນໂດເນເຊຍໄດ້ບັນລຸ997,518ຈຸດ, ຍັງສູງກວ່າມື້ກ່ອນເກີດແຜ່ນດິນໄຫວແຮງ, ຈຳນວນຊື້ຂາຍກໍ່ຫຼາຍຂຶ້ນ. ວັນທີ28ທັນວາ, ຕົວເລກດັດສະນີໃນເວລາເລີກຕະຫຼາດໄດ້ສືບຕໍ່ຖີບສູງຂຶ້ນ, ແລະໄດ້ບຸກທະລຸພັນຈຸດເປັນຄັ້ງທຳອິດໃນຫຼາຍປີມານີ້. ຜູ້ຊ່ຽວຊານວິເຄາະເຫັນວ່າ, ພາຍຫຼັງເກີດໄພພິບັດແລ້ວ, ຕະຫຼາດຫຸ້ນຂອງອິນໂດເນເຊຍບໍ່ໄດ້ຕົກຕ່ຳລົງພັດຖີບສູງຂຶ້ນ, ທັງນີ້ສະແດງໃຫ້ເຫັນວ່ານັກລົງທຶນຍັງມີຄວາມໝັ້ນໃຈວ່າເສດຖະກິດອິນໂດເນເຊຍຈະສືບຕໍ່ດີຂຶ້ນແລະວິສາຫະກິດມີຄວາມສາມາດສ້າງຜົນກຳໄລຫຼາຍກວ່າເກົ່າ.
ໃນຫຼາຍປີທີ່ຜ່ານມາ, ຕົວເລກດັດສະນີສັງລວມລາຄາຫຸ້ນໃນຕະຫຼາດຫຸ້ນຢາກາກຕາໄດ້ຢູ່ໃນລະຫວ່າງ600ນັດຫາ800ຈຸດໂດຍພື້ນຖານ, ມີແຕ່ຮອດສະຖານະການເລືອກຕັ້ງປະທານາທິບໍດີໃນເດືອນກັນຍາປີນີ້ກະຈ່າງແຈ້ງແລ້ວ, ຈິ່ງໄດ້ຖີບສູງຂຶ້ນ. ຕົ້ນເດືອນທັນວາປີນີ້, ຕະຫຼາດຫຸ້ນໄດ້ຫຍັບມໍ່ກັບພັນຈຸດ, ແລະໄດ້ບຸກທະລຸໃນວັນທີ28ທັນວາ, ທັງນີ້ສ່ອງແສງໃຫ້ເຫັນວ່ານັກລົງທຶນມີຄວາມກະຕືລືລົ້ນຕໍ່ຕະຫຼາດຫຸ້ນອິນໂດເນເຊຍ.
ທີ່ຈິງແລ້ວ, ແຕ່ປີນີ້ມາ, ການພັດທະນາເສດຖະກິດຂອງອິນໂດເນເຊຍໄດ້ເຂົ້າສູ່ສະພາບການທີ່ດີສົມຄວນເປັນກ້າວໆ. ປະຈຸບັນ, ການບໍລິໂພກສ່ວນບຸກຄົນຂອງປະເທດນີ້ໄດ້ກວມGDPປະມານ65%, ຈໍ່ຕົວຂຶ້ນເປັນກຳລັງຊຸກດັນຕົ້ນຕໍຂອງການເຕີບໂຕເສດຖະກິດ. ມວນຊົນທະຍອຍກັນຊື້ສິນຄ້າຕ່າງໆເຊັ່ນ: ລົດຍົນສ່ວນຕົວ, ເຄື່ອງໄຟຟ້າ, ລົດຈັກແລະໂທລະສັບມືຖືເປັນຕົ້ນ. ແຕ່ກ່ອນການລົງທຶນບໍ່ຫຼາຍປານໃດໄດ້ແຕ່ມາຮອດໄຕມາດທີສາມປີນີ້ໄດ້ເພີ່ມຫຼາຍຂຶ້ນ. ຕາມຕົວເລກທາງການ, ການລົງທຶນຂອງອິນໂດເນເຊຍໃນໄຕມາດທີສາມ ໄດ້ເພີ່ມຂຶ້ນ13%, ບາດກ້າວລົງທຶນໄດ້ໄວຂຶ້ນ. ໃນ8ເດືອນຕົ້ນປີນີ້, ການນຳເຂົ້າຕົ້ນທຶນທີ່ເປັນສິນຄ້າໄດ້ເພີ່ມຂຶ້ນ33%, ນີ້ແມ່ນວີແວວສະແດງໃຫ້ເຫັນການລົງທຶນໄດ້ເພີ່ມຂຶ້ນ. ນອກຈາກຂະແໜງການບໍ່ແຮ່ແລ້ວ, ໃນໄລຍະມໍ່ໆມານີ້, ການລົງທຶນຂອງຂະແໜງການຕົ້ນຕໍອື່ນໆຂອງປະເທດນີ້ກໍ່ໄດ້ເພີ່ມຂຶ້ນເຊັ່ນດຽວກັນ.
ເມື່ອສັງເກດຈາກຕົວເລກດັດສະນີຈຳນວນໜຶ່ງເຫັນໄດ້ວ່າ, ໄຕມາດທີສາມປີນີ້, ເສດຖະກິດອິນໂດເນເຊຍໄດ້ເພີ່ມຂຶ້ນ5%ຂຶ້ນໄປ, ໄດ້ລື່ນກາຍການຄາດຄະເນລ່ວງໜ້າຂອງນັກເສດຖະສາດຢ່າງຫຼວງຫຼາຍ. ນອກນີ້, ອັດຕາເງິນຕາຂອງປະເທດນີ້ໄດ້ແລກປ່ຽນກັບໂດລາ
ສະຫະລັດຢູ່ໃນສະພາບໝັ້ນທ່ຽງໂດຍຖື້ນຖານ; ໄພເງິນເຟີ້ໃນອາທິດທີໜຶ່ງຂອງເດືອນທັນວາໄດ້ຢູ່ໃນລະດັບຕ່ຳສຸດໃນປະຫວັດສາດຄື7%; ອັດຕາຫວ່າງງານຂອງປີນີ້ກໍ່ໄດ້ຕ່ຳກວ່າປີກາຍ. ເນື່ອງຈາກປັດໄຈດັ່ງກ່າວ, ທະນາຄານໂລກແລະທະນາຄານພັດທະນາອາຊີລ້ວນແຕ່ໄດ້ປັບການຄາດຄະເນຕໍ່ການເຕີບໂຕເສດຖະກິດອິນໂດເນເຊຍສູງກວ່າເກົ່າໜ້ອຍໜຶ່ງ. ທະນາຄານໂລກຄາດຄະເນວ່າຈັງຫວະເຕີບໂຕຂອງເສດຖະກິດອິນໂດເນເຊຍໃນປີນີ້ຈະບັນລຸ4,9%, ປີໜ້າຍັງຈະໄວກວ່ານີ້ອີກ.
ໃນເວລາຂຶ້ນດຳລົງຕຳແໜ່ງໃນເດືອນຕຸລາປີນີ້, ທ່ານຊູຊີໂລ ປະທານາທິບໍດີອິນໂດເນເຊຍກ່າວວ່າຈະປົວແປງສະພາບການລົງທຶນຂອງປະເທດຕົນໃຫ້ດີຂຶ້ນຕື່ມອີກ, ເລັ່ງລັດການພັດທະນາເສດຖະກິດ, ຫຼຸດອັດຕາຫວ່າງງານໃຫ້ໜ້ອຍລົງ, ພະຍາຍາມເຮັດໃຫ້ຈັງຫວະເຕີບໂຕເສດຖະກິດໃຫ້ບັນລຸ7%, ສ້າງສະພາບສະຫງ່າງາມທີ່ເສດຖະກິດອິນໂດເນເຊຍພັດທະນາຢ່າງວ່ອງໄວຄືສະຕະວັດທີ່ແລ້ວ. ຫວ່າງມໍ່ໆນີ້, ລັດຖະມົນຕີກະຊວງການເງິນອິນໂດເນເຊຍຍິ່ງເຫັນໄປໃນແງ່ດີວ່າ, ຈັງຫວະເຕີບໂຕທາງເສດຖະກິດຂອງປະເທດຕົນໃນປີໜ້າຈະມີຫວັງບັນລຸ5,4%.
|
|
|
