|
|
 |
| (GMT+08:00)
2004-12-31 15:46:48
|
 |
|
ຄື້ນທະເລຊູນາມີທີ່ມະຫາສະມຸດອິນເດຍໄດ້ສະແດງຢ່າງພົ້ນເດັ່ນໃຫ້ເຫັນຂໍ້ຂາດຕົກບົກຜ່ອງ5ຂໍ້ໃນການປ້ອງກັນໄພແລະກູ້ໄພຂອງມວນມະນຸດ
cri
Author: mengmeng
ຕາມຂ່າວCRI, ນັບມາຮອດຕອນຄ່ຳວັນທີ30ທັນວາ, ແຜ່ນດິນໄຫວແຮງແລະຄື້ນທະເລຊູນາມີທີ່ເກີດຂຶ້ນໃນເຂດທະເລມະຫາສະມຸດອິນເດຍໄດ້ເຮັດໃຫ້1ແສນ1ໝື່ນກວ່າຄົນເສຍຊີວິດແລ້ວ, ຈຳນວນຜູ້ເສຍຊີວິດແລະບາດເຈັບຍັງອາດຈະເພີ່ມຂຶ້ນຕື່ມອີກ. ຄຽງຄູ່ກັບວຽກງານກູ້ໄພໄດ້ລົງສູ່ລ່ວງເລິກ, ຄົນທັງຫຼາຍກໍ່ໄດ້ຕໍ່ຜົນເສຍຫາຍອັນໃຫຍ່ຫຼວງເນື່ອງຈາກໄພພິບັດບັ້ນນີ້. ອາດເວົ້າໄດ້ວ່າ, ຄື້ນທະເລຊູນາມີບັ້ນນີ້ໄດ້ສະແດງຢ່າງພົ້ນເດັ່ນໃຫ້ເຫັນຂໍ້ຂາດຕົກບົກຜ່ອງ5ຂໍ້ໃນການປ້ອງກັນໄພແລະກູ້ໄພຂອງມວນມະນຸດ.
ກ່ອນອື່ນ, ຂາດກົນໄກເຕືອນໄພຄື້ນທະເລຊູນາມີທີ່ບັງເກີດຜົນ. ປະຈຸບັນ, ເຖິງວ່າມວນມະນຸດຍັງບໍ່ສາມາດຄວບຄຸມບໍ່ໃຫ້ເກີດໄພທຳມະຊາດຕ່າງໆເຊັ່ນ: ແຜ່ນດິນໄຫວແລະຄື້ນທະເລຊູນາມີເປັນຕົ້ນ, ແຕ່ສາມາດຜ່ານຈາກມາດຕະການເຕືອນໄພເປັນຕົ້ນຫຼຸດຄວາມເສຍຫາຍໃຫ້ໜ້ອຍລົງໄດ້. ພາຍຫຼັງອາລັສກາແຫ່ງອາເມລິກາເກີດແຜ່ນດິນໄຫວແຮງເຖິງຂັ້ນ9,2ລິກເທີແລະພາໃຫ້ເກີດຄື້ນທະເລຊູນາມີເມື່ອປີ1964ແລ້ວ, ລະບົບຕິດຕາມຄື້ນທະເລແລະເຕືອນໄພຄື້ນທະເລຊູນາມີແຄມມະຫາສະມຸດປາຊີຟິກກໍ່ໄດ້ສ້າງຂຶ້ນແລ້ວ. ແຕ່ວ່າ, ລະບົບເຕືອນໄພຄື້ນທະເລຊູນາມີມະຫາສະມຸດອິນເດຍພັດບໍ່ໄດ້ສ້າງຂຶ້ນເທື່ອ, ພາໃຫ້ໂສກນາດຕະກຳເນື່ອງຈາກຄື້ນທະເລຊູນາມີບັ້ນນີ້ເກີດຂຶ້ນອີກຫຼັງຈາກນັ້ນ40ປີ.
ສອງ, ຂາດກົນໄກຮັບມືກັບສະພາບສຸກເສີນຢ່າງເປັນເອກະພາບກັນແລະປະສານງານກັນຫຼັງປະສົບໄພ. ພາຍຫຼັງເກີດຄື້ນທະເລຊູນາມີບັ້ນນີ້ແລ້ວ, ເຖິງວ່າລະດັບພັດທະນາເສດຖະກິດຂອງປະເທດປະສົບໄພອ່າວຕ່ຳແດ່ໂດຍທົ່ວໄປ, ພື້ນຖານໂຄງລ່າງອ່ອນແອ, ບໍ່ສາມາດໃຊ້ມາດຕະການກູ້ໄພທີ່ແຂງແຮງ. ແຕ່ຖ້າມີກົນໄກຮັບມືສະພາບສຸກເສີນທີ່ສະດວກແລະເປັນລະບຽບແລ້ວ, ພາຍຫຼັງເກີດໄພແລ້ວ, ບັນດາຝ່າຍທີ່ກ່ຽວຂ້ອງສາມາດຈັດວາງການຍົກຍ້າຍ, ກອບກູ້ແລະແຈກຢາຍວັດສະດຸຢ່າງວ່ອງໄວ, ແລະແລກປ່ຽນແລະແຈ້ງຂ່າວໃຫ້ກັນຊາບແລ້ວ, ກໍສາມາດຫຼຸດຄວາມເສຍຫາຍໃຫ້ໜ້ອຍລົງໃນລະດັບໃດໜຶ່ງ.
ສາມ, ມີສະຕິຄວາມປອດໄພອ່ອນແອ, ຂາດການຄາດຄະເນຕໍ່ຜົນຮ້າຍອັນໜັກໜ່ວງຂອງໄພພິບັດ. ຕາມສື່ມວນຊົນໄທລາຍງານວ່າ, ຜູ້ຊ່ຽວຊານອຸຕຸນິຍົມໄທໄດ້ຮັບຮູ້ສະພາບທີ່ກ່ຽວຂ້ອງໃນເວລາເກີດແຜ່ນດິນໄຫວ, ແຕ່ພັດບໍ່ໄດ້ຄິດເຖິງຜົນຮ້າຍເປັນໄພພິບັດແຜ່ນອິນໄຫວອາດຈະນຳມາໃຫ້. ຈົນມີຂ່າວລາຍງານວ່າ, ຜູ້ຊ່ຽນຊານອຸຕຸນິຍົມເປັນຫ່ວງວ່າຄັນປະກາດການເຕືອນໄພຄື້ນທະເລຊູນາມີແລ້ວອາດຈະກະທົບກະເທືອນເຖິງລາຍຮັບຂອງຂະແໜງການທ່ອງທ່ຽວແລ້ວຈິ່ງປິດອຳໄວ້ບໍ່ໄດ້ລາຍງານ, ມີແຕ່ຄອງຄອຍວ່າຈົ່ງໂຊກດີແລ້ວຫຼີກເວັ້ນການເກີດຄື້ນທະເລຊູນາມີ.
ສີ່, ແມ່ນເອົາໃຈໃສ່ນຳແຕ່ປະສິດທິຜົນທາງເສດຖະກິດໄລຍະສັ້ນ, ບໍ່ເອົາຫົວຊານຳການທຳລາຍສິ່ງແວດລ້ອມຊີວະພາບ. ຄວາມໄວການກະໜ່ຳແຜ່ນດິນ
ໃຫຍ່ຂອງຄື້ນທະເລຊູນາມີບັ້ນນີ້ໄວຫຼາຍ, ຈົນເຮັດໃຫ້ຄົນຕື່ນຕົກໃຈແລ້ວບໍ່ຮູ໊ຈະທຳປະຕິກິລິຍາແນວໃດ. ສ່ວນຜູ້ຊ່ຽວຊານອະນຸລັກສິ່ງແວດລ້ອມຈຳນວນໜຶ່ງຊີ້ອອກວ່າ, ທີ່ຈິງແລ້ວ, ຢູ່ແຄມທະເລຂອງຫຼາຍປະເທດປະສົບໄພ, ແຕ່ກ່ອນມີປ່າໄມ້ແດງເຊິ່ງເປັນສິ່ງກຳບັງທຳມະຊາດທີ່ສາມາດຫຼຸດຄວາມໄວແລະຄວາມແຮງຂອງຄື້ນທະເລຊູນາມີ, ແຕ່ຍ້ອນວ່າມວນມະນຸດມີແຕ່ສະແຫວງຫາຜົນປະໂຫຍດທາງເສດຖະກິດໃນໄລຍະນັ້ນ, ປ່າໄມ້ແດງຖືກທຳລາຍຢ່າງມີລັກສະນະລ້າງຜານ. ພ້ອມກັນນັ້ນ, ການສ້າງສິ່ງກໍ່ສ້າງລື້ນເລີງທ່ອງທ່ຽວຢູ່ແຄມທະເລຢ່າງຫຼວງຫຼາຍນັ້ນ, ກໍເປັນຄວາມອັນຕະລາຍທີ່ແຝງຢູ່ໃນເມື່ອເກີດຄື້ນທະເລຊູນາມີຈິ່ງພາໃຫ້ມີຄົນຕາຍແລະບາດເຈັບຢ່າງຫຼວງຫຼາຍແລະກໍ່ຄວາມເສຍຫາຍດ້ານຊັບສິນຢ່າງໜັກໜ່ວງ.
ຫ້າແມ່ນຫຼີກລຽງໜ້າທີ່ຮັບຜິດຊອບແລະພັນທະ, ຖືເອົາບັນຫາທີ່ມວນມະນຸດພ້ອມກັນປະເຊີນ. ໄພທຳມະຊາດອາດຈເກີດຂຶ້ນຢູ່ທຸກເວລາ, ປະເທດໃດກໍ່ອາດຈະປະເຊີນ, ສະນັ້ນ, ການປ້ອງກັນໄພແລະຕ້ານໄພແມ່ນການທ້າທາຍທີ່ມວນມະນຸດພ້ອມກັນປະເຊີນ. ບັນດາປະເທດໃນໂລກມີແຕ່ເກາະແຂນກັນພ້ອມກັນທຳຄວາມພະຍາຍາມ, ຈິ່ງຈະສາມາດເຮັດໃຫ້ການຂົ່ມຂູ່ຂອງໄພພິບັດທີ່ມີຕໍ່ມວນມະນຸດຫຼຸດເຖິງລະດັບຕ່ຳສຸດໄດ້. ແຕ່ວ່າ, ໃນໄລຍະຕົ້ນທີ່ເກີດໄພພິບັດບັ້ນນີ້, ປະເທດຈຳນວນໜຶ່ງທີ່ບໍ່ໄດ້ປະສົບໄພໂດຍກົງພັດບໍ່ໄດ້ຮັບຮູ້ຄວາມຮ້າຍແຮງຂອງໄພບັ້ນນີ້. ພາຍຫຼັງໄດ້ຮັບຮູ້ສະພາບປະສົບໄພແລ້ວ, ທ່ານບຸສ ປະທານາທິບໍດີອາເມລິກາຍັງສືບຕໍ່ຜັກຜ່ອນຢູ່, ແລ້ວຖືກມວນຊົນປະເທດຕົນຕິຕຽນຢ່າງຮຸນແຮງ. ການຊ່ອຍເຫຼືອກູ້ໄພງວດທຳອິດຂອງປະເທດພັດທະນາຈຳນວນໜຶ່ງບໍ່ຫຼາຍປານໃດກໍ່ພາໃຫ້ເຈົ້າໜ້າທີ່ສະຫະປະຊາຊາດຕິຕຽນ.
ສິ່ງທີ່ເປັນໜ້າດີໃຈນັ້ນແມ່ນ, ປະຈຸບັນ, ປະຊາຄົມໂລກໄດ້ຮັບຮູ້ຄວາມໂຫດຮ້າຍຂອງໄພພິບັດບັ້ນນີ້ແລ້ວ, ແລະໄດ້ຕັ້ງໜ້າເຂົ້າຮ່ວມການເຄື່ອນໄຫວຕ້ານໄພແລະກູ້ໄພບັ້ນນີ້ແບບບໍ່ເຄີຍມີມາກ່ອນ. ແຕ່ວ່າ, ມີແຕ່ເຂົ້າຮ່ວມການຕ້ານໄພແລະກູ້ໄພໃນສະເພາະໜ້ານີ້ແມ່ນບໍ່ພໍເທື່ອ, ການທີ່ຈະເຮັດແນວໃດສະຫຼຸບບົດຮຽນແລະຫຼີກເວັ້ນບໍ່ໃຫ້ໂສກນາດຕະກຳແບບນີ້ເກີດຂຶ້ນອີກຈິ່ງແມ່ນບັນຫາທີ່ມວນມະນຸດຄວນພິຈາລະນາແລະໃຊ້ມາດຕະການຮັບມື.
|
|
|
