CRI ລາຍງານວ່າ,ຢູ່ເຂດທະເລມໍ່ເກາະຊູມັດຕຼາແຫ່ງອິນໂດນີເຊຍເກີດແຜ່ນດິນໄຫວແຮງແລະຄື້ນທະເລຊູນາມີ,ໄດ້ເປັນໄພພິບັດທີ່ບໍ່ເຄີຍມີມາກ່ອນໃຫ້ແກ່ປະເທດໃນອາຊີອາຄະເນ ອາຊີໃຕ້ຕະຫຼອດຮອດປະເທດອາຟຼລິກາຕາເວັນອອກຢູ່ ແຄມມະຫາສະຫມຸດອິນເດຍ ມີ 1 ແສນ 2 ຫມື່ນກວ່າຄົນປະສົບເຄາະຮ້າຍຢ່າງບໍ່ເປັນຈັ່ງບຸນ,ປະຊາກອນທີ່ປະສົບໄພໄດ້ບັນລຸເຖິງ 5 ລ້ານຄົນ,ຄວາມເສຍຫາຍດ້ານຊັບສິນໄດ້ລື່ນກາຍ 13 ຕື້ໂດລາສະຫະລັດ,ໂດຍປະເຊີນຫນ້າກັບໄພພິບັດບັ້ນນີ້,ການເຄື່ອນໄຫວກອບກູ້ສາກົນທີ່ມີຂະຫນາດໃຫຍ່ກວ່າຫມູ່ແລະສັບສົນກວ່າຫມູ່ໃນປະຫວັດສາດໄດ້ເລ່ີມຈັດຂຶ້ນ.ການປະສານງານການເຄື່ອນໄຫວກອບກູ້ສາກົນກໍປະສົບການທ້າທາຍແບບບໍ່ເຄີຍມີມາກ່ອນ.
ໂດຍປະເຊີນຫນ້າໄພພິບັດຢ່າງກະທັນຫັນ,ປະເທດທີ່ປະສົບໄພພາກັນໃຊ້ມາດຕະການດຳເນີນການກອບກູ້,ແຕ່ວ່າປະເທດພວມພັດທະນາທີ່ປະສົບໄພເຫຼົ່ານີ້ທັງບໍ່ມີກຳລັງການເງິນພຽງພໍ,ທັງຂາດບົດຮຽນແລະພາຫະນະອັນຈຳເປັນໃນການຕ້ານໄພ,ສະນັ້ນ,ຈິ່ງແບກຫາບຫນ້າທີ່ອັນຫນັກຫນາໃນດ້ານຊຳລະຊາກສົບ ກອບກູ້ຜູ່ບາດເຈັບ ຈັດວາງຜູ່ປະສົບໄພ ປ້ອງກັນບໍ່ໃຫ້ເກີດພະຍາດ,ແລະສ້າງບ້ານແປງເມືອງຄືນໃຫມ່ເປັນຕົ້ນ,ດອກເຕີ ເດວີດ ນາບາໂລ ຜູ່ຊ່ຽວຊານຊັ້ນສູງຂອງອົງການອະນາໄມໂລກຕັກເຕືອນວ່າ,ນອກຈາກເຄື່ອງປະກອບປິ່ນປົວກອບກູ້ທີ່ໃຊ້ໃນການ ກູ້ໄພແລະນ້ຳດື່ມຂົນສົ່ງໄປຮອດຢ່າງວ່ອງໄວເທົ່ານັ້ນ,ຖ້າບໍ່ດັ່ງນັ້ນ,ເມື່ອໃດພະຍາດລະບາດ,ຜົນຮ້າຍຢ້ອນຫລັງອາດຈະຍິ່ງເປັນຕາຢ້ານຈຳນວນຜູ່ຕາຍຍັງຈະຫຼາຍກວ່າໃນປະຈຸບັນຊ້ຳ
ແຕ່ວ່າ,ການດຳເນີນການເຄື່ອນໄຫວກອບກູ້ຢ່າງຂະຫນາດໃຫຍ່ພ້ອມກັນແມ່ນບັນຫາຍາກຂວາງຫນ້າຢູ່ປະຊາຄົມໂລກ,ພາຍຫລັງເກີດໄພພິບັດແລ້ວ,ໄດ້ມີ 30 ກວ່າປະເທດແລະອົງການສາກົນຈຳນວນຫນຶ່ງຈົນຮອດສ່ວນບຸກຄົນຫຼືວ່າຍໍລິຈາກເງິນ ຫຼືວ່າສະຫນອງວັດສະດຸ ຫຼືວ່າແຕ່ງຫນ່ວຍກອບກູ້ເຂົ້າຮ່ວມຖັນແຖວກູ້ໄພ,ຈະເຮັດແນວໃດປະເມີນລະດັບປະສົບໄພແລະການຊ່ອຍເຫຼືອທີ່ເຂດປະສົບໄພຕ້ອງການ,ຈະຊັບຊ້ອນຍົນທີ່ຂົນສົ່ງວັດສະດຸກອບກູ້ໄພຫຼາຍຮ້ອຍລຳທີ່ບັນດາປະເທດແຕ່ງອອກແລະຮັບປະກັນວັດສະດຸກູ້ໄພເຫຼົ່ານີ້ແຈກຢາຍເຖິງໃນມືຂອງຜູ່ປະສົບ ໄພຢ່າງວ່ອງໄວແລະມີປະສິດທິຜົນ,ປະເທດທີ່ຮັບການຊ່ອຍເຫຼືອອາດຈະຄຳນິງບໍ່ເຖິງ,ສະນັ້ນ,ຈິ່ງຕ້ອງການປະຊາຄົມໂລກປະສານງານການເຄື່ອນໄຫວກອບກູ້.
ຄົນທັງຫຼາຍສົນໃຈວ່າສະຫະປະຊາຊາດເຊິ່ງເປັນອົງການສາກົນໃຫຍ່ກວ່າຫມູ່ໃນໂລກຕ້ອງແບກຫາບຫນ້າທີ່ອັນຫນັກຫນາໂດຍປັດເຂ່ຍບໍ່ໄດ້,ທ່ານອານນານ ເລຂາທິການໃຫຍ່ສະຫະປະຊາຊາດໄດ້ໂທລະສັບລົມກັບຜູ່ນຳຂອງປະເທດທີ່ປະສົບໄພທັງຫມົດໄດ້ຊອກຮູ້ຄວາມຕ້ອງການຊ່ອຍເຫຼືອຂອງບັນດາປະເທດ,ທ່ານຍັງໄດ້ໂທລະສັບລົມກັບຜູ່ນຳປະເທດບໍລິຈາກຕົ້ນຕໍໄດ້ຊອກຮູ້ການຄືບຫນ້າຂອງວຽກງານກູ້ໄພ, ວັນທີ 30 ທັນວາທ່ານອານນານເວົ້າວ່າ,ສະຫະປະຊາຊາດແມ່ນກຳລັງຫນູນຫລັງຢ່າງເຂັ້ມແຂງຂອງປະເທດປະສົບໄພ,ທ່ານຍັງຊີ້ອອກວ່າ,ສິ່ງທີ່ຕ້ອງການທີ່ສຸດໃນປະຈຸບັນນີ້ແມ່ນປະຊາຄົມໂລກປະສານງານເປັນເອກະສັນກັນດຳເນີນວຽກງານຕ້ານໄພ,ນີ້ແມ່ນປະຖົມປັດໃຈທີ່ພາວຽກງານຕ້ານໄພໄດ້ຮັບຜົນສຳເລັດ,ວັນທີ 28 ທັນວາ,ທ່ານເອກແລນຮອງເລຂາທິການໃຫຍ່ສະຫະປະຊາຊາດທີ່ຮັບຜິດຊອບວຽກງານຊ່ອຍກອບກູ້ມະນຸດສະທຳໄດ້ຮຽກຮ້ອງບັນດາປະເທດໂດຍສະເພາະແມ່ນປະເທດພັດທະນາຈົ່ງສະຫນອງການຊ່ອຍເຫຼືອມະນຸດສະທຳໃຫ້ປະເທດປະສົບໄພ,ຊ່ອຍເຫຼືອພວກເຂົາເຈົ້າ ກູ້ໄພແລະສ້າງສາຄືນໃຫມ່ສະຫະປະຊາຊາດໄດ້ແຕ່ງ 4 ຫນ່ວຍງານປະສານງານປະເມີນແລະກູ້ໄພເພື່ອຊ່ອຍເຫຼືອປະເທດອາຊີທີ່ປະສົບໄພຫນັກຫນ່ວງດຳເນີນວຽກງານກູ້ໄພ.
ຄືດັ່ງທ່ານກົດຟຼີ ຜູ່ຊ່ຽວຊານຊ່ອຍເຫຼືອມະນຸດສະທຳເວົ້າວ່າ,ໃນການເຄື່ອນໄຫວຊ່ອຍເຫຼືອສາກົນເທື່ອນີ້,ສະຫະປະຊາຊາດໄດ້ເປັນຕົວສະແດງສຳຄັນ,ຄົນທັງຫຼາຍສົນໃຈວ່າປະເທດຈຳນວນຫນຶ່ງໄດ້ສະເຫນີໃຫ້ສ້າງສະຫະພັນຊ່ອຍເຫຼືອເຊິ່ງແມ່ນອາເມລິກາ ຍີ່ປຸ່ນອົສຕຼາລີແລະອິນເດຍເປັນແກນກາງ,ພວກເຮົາເຫັນວ່າ,ການເຄື່ອນໄຫວຊ່ອຍກອບກູ້ສາກົນຄວນໃຫ້ສະຫະປະຊາຊາດເສີມຂະຫຍາຍບົດບາດ ນຳພາ,ປະເທດພັດທະນາຄວນຕອບສະຫນອງຄຳຮຽກຮ້ອງຂອງສະຫະປະຊາຊາດ,ເປັນເຈົ້າການຈັດການເຄື່ອນໄຫວກອບກູ້ຂອງຕົນເຂົ້າໃນໂຄງຮ່າງຂອງສະຫະປະຊາຊາດ,ຫາກບໍ່ແມ່ນຢາກຫຼີກຫຼົບສະຫະປະຊາຊາດ,ມີແຕ່ເຮັດແນວນີ້,ຄວາມພະຍາຍາມກູ້ໄພຂອງປະຊາຄົມໂລກຈິ່ງຈະຂະຫຍາຍໄປຕາມທິດທາງທີ່ວ່ອງໄວ ມີປະສິດທິຜົນສູງແລະເປັນລະບຽບໄດ້.
|