|
ຕາມຂ່າວCRI: ໃນຫຼາຍມື້ມານີ້, ລັດຖະບານແລະວົງການຕ່າງໆຂອງຈີນໄດ້ພາກັນແດ່ມືຊ່ອຍເຫຼືອແກ່ປະເທດແລະປະຊາຊົນທີ່ປະສົບໄພແຜ່ນດິນໄຫວແລະຄື້ນທະເລຊູນາມີມະຫາສະໝຸດອິນເດຍຕາມຄວາມສາມາດຂອງຕົນ.
ພາຍຫຼັງເກີດໄພພິບັດແລ້ວ, ລັດຖະບານຈີນໄດ້ສະໜອງການຊ່ອຍເຫຼືອແກ່ປະເທດປະສົບໄພ, ສົ່ງກອງກອບກູ້ ກອງແພດໄປເຂດປະສົບໄພ, ໃຊ້ມາດຕະການໃຫ້ຄວາມສະດວກແກ່ພົນລະເມືອງບໍລິຈາກເງິນໃຫ້ເຂດປະສົບໄພ. ຕອນຄ່ຳວັນທີ 1 ມັງກອນ, ທ່ານລີຈາວຊິງ ລັດຖະມົນຕີການຕ່າງປະເທດຈີນໄດ້ໂທລະສັບໂອ້ລົມກັບທ່ານອານນານ ເລຂາທິການໃຫຍ່ສະຫະປະຊາຊາດ ແລະທ່ານລີຈົງວຸກ ຜູ່ອຳນວຍການໃຫຍ່ອົງການອະນາໄມໂລກ, ແຈ້ງສະພາບການຊ່ອຍເຫຼືອປະເທດປະສົບໄພຂອງລັດຖະບານຈີນ, ທ່ານກ່າວວ່າ ຈີນຍິນດີເພີ່ມທະວີການຮ່ວມມືກັບສະຫະປະຊາຊາດແລະອົງການອະນາໄມໂລກ, ຊ່ອຍເຫຼືອປະເທດປະສົບໄພດຳເນີນວຽກງານກອບກູ້ແລະການປ້ອງກັນໂຣກພະຍາດເປັນຕົ້ນ, ແລະຊ່ອຍເຫຼືອປະເທດປະສົບໄພສ້າງສາຄືນໃໝ່ຫຼັງໄພພິບັດ.
ຕາມຂ່າວແຈ້ງວ່າ, ພາຍຫຼັງວັດຖຸແລະເງິນສົດທີ່ລັດຖະບານຈີນບໍລິຈາກໃຫ້ປະເທດປະສົບໄພງວດທຳອິດຕົກເປັນເງິນຈຳນວນ 21 ລ້ານ 6 ແສນ 3 ໝື່ນຢວນສົ່ງໄປຮອດປະເທດທີ່ກ່ຽວຂ້ອງ ສະໜອງໃຫ້ປະຊາຊົນຜູ່ປະສົບໄພແລ້ວ, ແຕ່ວັນທີ 2 ເປັນຕົ້ນໄປ, ຈີນກໍເລີ່ມຈັດຕັ້ງປະຕິບັດການຊ່ອຍເຫຼືອງວດໃໝ່ຕົກເປັນເງິນ 500 ລ້ານຢວນໃຫ້ແກ່ປະເທດປະສົບໄພ. ໃນມື້ດຽວກັນ, ຈີນຍັງສົ່ງກອງກອບກູ້ປິ່ນປົວໄປເຂດປະສົບໄພສີລັງກາ ນີ້ເປັນກອງກອບກູ້ກອງທີສາມທີ່ຈີນສົ່ງໄປຊ່ອຍເຫຼືອປະເທດປະສົບໄພ.
ວິສາຫະກິດຈຳນວນໜຶ່ງແລະບຸກຄົນສ່ວນຕົວຢູ່ແຫ່ງຕ່າງໆຂອງຈີນກໍພາກັນບໍລິຈາກເງິນແລະວັດຖຸໃຫ້ເຂດປະສົບໄພ. ນັບມາຮອດວັນທີ 1 ມັງກອນ, ສະພາກາແດງຈີນໄດ້ຮັບເງິນສົດຫຼືຄຳໝັ້ນສັນຍາວ່າຈະບໍລິຈາກເງິນນັ້ນມີເກືອບ 20 ລ້ານຢວນ, ໃນນັ້ນມີ 5 ລ້ານ 2 ແສນຢວນໄດ້ມອບໃຫ້ສະພາກາແດງສາກົນແລະສະພາກາແດງຂອງປະເທດປະສົບໄພແລ້ວ. ຫຼາຍອົງການຈັດຕັ້ງຂອງຮົງກົງກໍຫ້າງຫາເງິນເກືອບ 300 ລ້ານໂດລາຮົງກົງໃຫ້ປະເທດປະສົບໄພ.
|
