ຕາມຂ່າວCRI: ວັນທີ 1 ມັງກອນ ປະຊາຄົມໂລກສືບຕໍ່ສະໜອງການຊ່ອຍເຫຼືອໃຫ້ແກ່ປະເທດປະສົບໄພແຜ່ນດິນໄຫວແລະຄື້ນທະເລຊູນາມີ ແລະດຳເນີນການກອບກູ້ຢ່າງຕັ້ງໜ້າ, ປະຈຸບັນ ຍອດຈຳນວນເງິນບໍລິຈາກທີ່ປະຊາຄົມໂລກຍິນດີເອົາໃຫ້ນັ້ນໄດ້ລື່ນກາຍ 2 ຕື້ໂດລາສະຫະລັດແລ້ວ.
ແຕ່ວັນທີ 1 ມັງກອນເປັນຕົ້ນມາ, ກອງກອບກູ້ສາກົນຂອງຈີນເລີ່ມເຮັດວຽກປິ່ນປົວກອບກູ້ຢູ່ເມືອງບານດາ ອາເຊ ເຂດປະສົບໄພຮ້ານແຮງຂອງອິນໂດເນເຊຍ. ໜ່ວຍຜູ່ຊ່ຽວຊານກວດ DNA ຂອງຈີນກໍເລີ່ມບັນທຶກຂໍ້ມູນຂອງຜູ່ເສຍຊີວິດໃນຄື້ນທະເລຊູນາມີຢູ່ເກາະພູເກັດ ທາງພາກໃຕ້ປະເທດໄທ, ເພື່ອເປັນຫຼັກອ້າງອິງໃນການຈຳແນກຊາກສົບ. ອົງການຊ່ອຍເຫຼືອສາກົນຄື ມູນນິທິເດັກສະຫະປະຊາຊາດເປັນຕົ້ນກໍພວມຂົນສົ່ງແລະແຈກຢາຍອາຫານ ນ້ຳດື່ມແລະຢຸກຢາເປັນຕົ້ນຢູ່ອິນໂດເນເຊຍ.
ວັນທີ 1 ມັງກອນ ລັດຖະບານຍີ່ປຸ່ນແລະອີຕາລີປະກາດວ່າ, ຈະເພີ່ມເງິນຊ່ອຍເຫຼືອທີ່ສະໜອງໃຫ້ປະເທດປະສົບໄພຈະຕ່າງຂຶ້ນຮອດ 500 ລ້ານໂດລາສະຫະລັດແລະ 70 ລ້ານເອີໂລ. ກ່ອນແລະຫຼັງວັນທີ 1 ມັງກອນ, ລັດຖະບານປະເທດອາຝຼິກກາຄື ກີເນເສັ້ນສູນສູດ ເຊເນການແລະໂມລີເຊີດເປັນຕົ້ນ ຕ່າງປະກາດວ່າຈະສະໜອງການຊ່ອຍເຫຼືອແກ່ປະເທດປະສົບໄພ.
ກອງປະຊຸມສາກົນກ່ຽວກັບສ້າງສາຄືນໃໝ່ຫຼັງໄພພິບັດທີ່ມີປະເທດປະສົບໄພ ປະເທດບໍລິຈາກແລະອົງການຈັດຕັ້ງສາກົນຈຳນວນໜຶ່ງເຂົ້າຮ່ວມນັ້ນ ຈະຈັດຂຶ້ນຢູ່ອິນໂດເນເຊຍໃນວັນທີ 6 ມັງກອນນີ້. ທ່ານອານນານ ເລເຂທິການໃຫຍ່ສະຫະປະຊາຊາດປະກາດວ່າຈະເຂົ້າຮ່ວມກອງປະຊຸມເທື່ອນີ້.
|