|
ທີ່ນີ້ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ່ຟັງທີ່ໂຄລົບ, ປີ 2004 ທີ່ຫາກໍ່ຜ່ານພົ້ນໄປ ແມ່ນປີໜຶ່ງທີ່ຈີນກັບອາຊຽນເລັ່ງບາດກ້າວຮ່ວມມືທາງເສດຖະກິດການຄ້າ.
ການຂະຫຍາຍຕົວຂອງການຮ່ວມມືທາງເສດຖະກິດການຄ້າລະຫວ່າງຈີນອາຊຽນໃນໜຶ່ງປີຜ່ານມາມີຈຸດພິເສດ 3 ຂໍ້ຄືດັ່ງລຸ່ມນີ້:
ກ່ອນອື່ນ, ການຄ້າລະຫວ່າງສອງຝ່າຍໄດ້ເຕີບໂຕຢ່າງວ່ອງໄວ. ຕາມສະຖິຕິຂອງກະຊວງການຄ້າຈີນ, ມູນຄ່າການຄ້າລະຫວ່າງຈີນກັບປະເທດອາຊຽນໄດ້ລື່ນກາຍ 100 ຕື້ໂດລາສະຫະລັດຢ່າງມີລັກສະນະປະຫວັດສາດ.
ຖັດມາ, ໄດ້ສັບຊ້ອນອົງປະກອບສິນຄ້າຂາເຂົ້າຂາອອກເລື້ອຍໆ. ທ່ານລູຈຽນເຢີນ ຮອງຫົວໜ້າສະຖາບັນຄົ້ນຄວ້າອາຊີປາຊີຟິກສະພາບັນດິດວິທະຍາສາດສັງຄົມຈີນເວົ້າວ່າ:
ຈີນນອກຈາກນຳເຂົ້າຜະລິດຕະພັນກະສິກຳ ວັດຖຸດິບແລະຜະລິດຕະພັນແຮ່ຈາກອາຊຽນແລ້ວ, ຍັງນຳເຂົ້າຊີກສ່ວນແລະເຄື່ອງອາໄຫຼ່ເອເລັກໂຕຼນິກເປັນຈຳນວນຫຼວງຫຼາຍ; ເມື່ອສັງເກດຈາກການສົ່ງອອກຂອງຈີນຕໍ່ອາຊຽນແລ້ວເຫັນວ່າ, ແຕ່ກ່ອນຕົ້ນຕໍແມ່ນຜະລິດຕະພັນແຮງງານສຸມຄື ສິ່ງປັ່ນທໍແລະເກີບເປັນຕົ້ນ, ດຽວນີ້ ຜະລິດຕະພັນກົນຈັກແລະເຄື່ອງຜະລິດໄຟຟ້າ ແລະຜະລິດຕະພັນເອເລັກໂຕຼນິກໄດ້ກາຍເປັນຜະລິດຕະພັນຕົ້ນຕໍທີ່ຈີນສົ່ງອອກໄປສູ່ອາຊຽນແລ້ວ. ເລື່ອງຕ້ອງເວົ້າເຖິງນັ້ນແມ່ນ ໃນ 10 ປີຜ່ານມາ, ການຄ້າຜະລິດຕະພັນອຸດສາຫະກຳໄດ້ເພີ່ມຂຶ້ນໄວກວ່າໝູ່, ທັງນີ້ສະແດງໃຫ້ເຫັນວ່າອົງປະກອບການຄ້າລະຫວ່າງຈີນກັບອາຊຽນໄດ້ຍົກສູງຂຶ້ນຢ່າງຫຼວງຫຼາຍເມື່ອທຽບກັບຫຼາຍປີກ່ອນ.
ສາມ, ສິນຄ້າທີ່ຈີນນຳເຂົ້າຫຼາຍກວ່າສົ່ງອອກໄດ້ເພີ່ມຂຶ້ນອີກ. ແຕ່ເດືອນມັງກອນຫາເດືອນຕຸລາປີ 2004, ມູນຄ່າສິນຄ້ານຳເຂົ້າຫຼາຍກວ່າສົ່ງອອກໄດ້ບັນລຸ 17 ຕື້ 100 ລ້ານໂດລາສະຫະລັດ. ຈີນຂາດດຸນມີມູນເຫດໃນສອງດ້ານ ໜຶ່ງ ພາຍຫຼັງປະຕິບັດແຜນການເກັບກ່ຽວໄລຍະຕົ້ນໃນຕົ້ນປີ 2004, ບາງປະເທດອາຊຽນໄດ້ເພີ່ມການສົ່ງຜະລິດຕະພັນກະສິກຳຄື ຜັກແລະໝາກໄມ້ເປັນຕົ້ນເຂົ້າຈີນ, ພາໃຫ້ການຂາດດຸນເພີ່ມຂຶ້ນ; ສອງ ຈີນນຳເຂົ້າວັດຖຸດິບເພີ່ມຂຶ້ນ, ພາໃຫ້ການຂາດດຸນເພີ່ມຂຶ້ນເຊັ່ນດຽວກັນ.
ໃນໜຶ່ງປີມານີ້, ໃນດ້ານຊຸກຍູ້ການຮ່ວມມືເສດຖະກິດການຄ້າລະຫວ່າງຈີນອາຊຽນ, ຍັງມີເຫດການຈຳນວນໜຶ່ງຕ້ອງສົນໃຈນຳ.
ວັນທີ 19 ພະຈິກປີ 2004, ຈີນກັບອາຊຽນໄດ້ເຊັນ "ສັນຍາການຄ້າສິນຄ້າຂອງສັນຍາຂອບການຮ່ວມມືເສດຖະກິດຮອບດ້ານ"ແລະ"ສັນຍາກົນໄກແກ້ໄຂການວິວາດກັນ", ໄດ້ແຜ້ວທາງໃຫ້ແກ່ການເລີ່ມສ້າງເຂດການຄ້າເສລີຈີນອາຊຽນຢ່າງຮອບດ້ານໃນປີ 2005. ໃນເວລາກ່າວເຖິງການສ້າງເຂດການຄ້າເສລີຮອບດ້ານໄດ້ນຳເອົາຜົນປະໂຫຍດຕົວຈິງມາໃຫ້ແກ່ສອງຝ່າຍນັ້ນ, ທ່ານຈາງຊາວກາງ ຮອງຫົວໜ້າກົມສາກົນກະຊວງການຄ້າຈີນເວົ້າວ່າ:
ໂດຍອາໄສການສ້າງເຂດການຄ້າເສລີ, ຈີນກັບອາຊຽນຈະຫຼຸດເງື່ອນໄຂການຄ້າສິນຄ້າໃຫ້ຕ່ຳລົງຕື່ມອີກໄດ້, ນີ້ໝາຍເຖິງການຄ້າລະຫວ່າງສອງຝ່າຍຈະຂະຫຍາຍຕົວອອກຕື່ມອີກ, ໂອກາດຮ່ວມມືຈະຫຼາຍຂຶ້ນຕື່ມອີກ, ຄວາມຕ້ອງການຂອງກຳລັງຜະລິດພາຍໃນປະເທດກໍຈະເປີດກວ້າງອອກຕື່ມອີກ, ທັງນີ້ມີຜົນດີຕໍ່ວິສາຫະກິດແລະປະຊາຊົນຂອງສອງຝ່າຍ. ນອກນີ້ ເມື່ອສັງເກດຈາກຂົງເຂດບໍລິການແລະການລົງທຶນແລ້ວເຫັນວ່າ, ສອງຝ່າຍຫຼຸດເງື່ອນໄຂບໍລິການແລະການລົງທຶນໃຫ້ຕ່ຳລົງຕື່ມອີກບົນພື້ນຖານຄຳໝັ້ນສັນຍາຂອງໃຜລາວໃນເວລາເຂົ້າຮ່ວມອົງການການຄ້າໂລກ, ກໍໝາຍເຖິງການຈະລາຈອນຂອງທຶນຈະລຸລ່ວງກວ່າເກົ່າ, ການຂະຫຍາຍການລົງທຶນແລະການບໍລິການກໍມີຜົນດີຫຼາຍຕໍ່ການຂະຫຍາຍການຜະລິດແລະສະຫວັດດີການຂອງຜູ່ບໍລິໂພກຂອງສອງຝ່າຍ.
ເວົ້າໃນດ້ານພາວະວິໄສແລ້ວ, ການສ້າງເຂດການຄ້າເສລີໄດ້ມີຜົນສະທ້ອນຕໍ່ຈີນແລະອາຊຽນທັງສອງຝ່າຍ. ດ້ານໜຶ່ງ, ບໍ່ວ່າຈະແມ່ນຜູ່ຜະລິດຫຼືແມ່ນຜູ່ບໍລິໂພກ, ລ້ວນແຕ່ຈະໄດ້ຜົນປະໂຫຍດຈາກການຄ້າເສລີ ແລະຈາກການຫຼຸດພາສີ. ອີກດ້ານໜຶ່ງ, ພາຍຫຼັງອັດຕາພາສີຫຼຸດລົງແລ້ວ, ຜະລິດຕະພັນຂອງຕ່າງປະເທດຈຳນວນຫຼວງຫຼາຍຈະຫຼັ່ງໄຫຼເຂົ້າ, ກໍຈະເປັນການກະໜ່ຳບໍ່ນ້ອຍຕໍ່ຜະລິດຕະພັນພາຍໃນປະເທດ. ຄັນຊັ້ນບັນດາປະເທດອາຊຽນຈະໄດ້ຮັບຜົນປະໂຫຍດຫຼາຍກວ່າເກົ່າຫຼືບໍ່ຈາກການສ້າງເຂດການຄ້າເສລີ? ກ່ຽວກັບບັນຫານີ້ ທ່ານລູຈຽນເຢີນຊີ້ອອກວ່າ, ປະຈຸບັນ ຈີນໄດ້ກາຍເປັນປະເທດນຳເຂົ້າຫຼາຍໃນພາກພື້ນອາຊີແລ້ວ, ຈີນສືບຕໍ່ຂະຫຍາຍຕະຫຼາດໃຫ້ກວ້າງອອກ ສາມາດດຶງດູດຜະລິດຕະພັນຂອງປະເທດອາຊຽນຫຼາຍກວ່າເກົ່າ, ເວົ້າສຳລັບປະເທດອາຊຽນແລ້ວແມ່ນເລື່ອງດີ. ການເຕີບໂຕຂອງເສດຖະກິດຈີນກໍບໍ່ຂົ່ມຂູ່ອາຊຽນ. ທ່ານລູຈຽນເຢີນເວົ້າວ່າ:
ພວກຂ້າພະເຈົ້າບໍ່ຢາກຜ່ານການສ້າງເຂດການຄ້າເສລີແລ້ວໄດ້ຮັບຜົນປະໂຫຍດແຕ່ຝ່າຍດຽວ, ພວກຂ້າພະເຈົ້າຢາກຜ່ານຈາກການຄ້າການລົງທຶນໃນທົ່ວພາກພື້ນຢ່າງເສລີ, ຫຼຸດພາສີ, ຍົກເລີກກຳແພງພາສີ, ເຮັດໃຫ້ການຄ້າລະຫວ່າງຈີນອາຊຽນເພີ່ມຂຶ້ນຢ່າງໃຫຍ່ຫຼວງ, ແລະສະແຫວງຫາການໄດ້ຮັບຜົນປະໂຫຍດທັງສອງຝ່າຍ.
ງານເອັກສ໌ໂປຈີນອາຊຽນຄັ້ງປະຖົມມະເລີກທີ່ຈັດຂຶ້ນຢູ່ເມືອງໜານໜິງ ເຂດກວາງຊີຂອງຈີນເມື່ອເດືອນພະຈິກປີ 2004 ແມ່ນມາດຕະການທີ່ມີລັກສະນະທາດແທ້ຂອງລັດຖະບານຈີນເພື່ອຊຸກຍູ້ການເຈລະຈາການສ້າງເຂດການຄ້າເສລີ. ຕາມສະຖິຕິ, ນັບລວມແລ້ວ ມູນຄ້າສິນຄ້າທີ່ຊື້ຂາຍກັນໃນງານເອັກສ໌ໂປຈີນອາຊຽນຄັ້ງປະຖົມມະເລີກໄດ້ບັນລຸ 1 ຕື້ 84 ລ້ານໂດລາສະຫະລັດ, ໂຄງການລົງທຶນທີ່ເຊັນກັນລະຫວ່າງວິສາຫະກິດຂອງຈີນແລະຂອງອາຊຽນມີ 58 ໂຄງການ. ໃນເວລາຕີລາຄາງານເອັກສ໌ໂປຈີນອາຊຽນຄັ້ງນີ້ ທ່ານສົງສວນ ໂຄສົກກະຊວງການຄ້າຈີນເວົ້າວ່າ:
ງານເອັກສ໌ໂປຈີນອາຊຽນຍ່ອມຈະກາຍເປັນແທ່ນສຳຄັນອັນໜຶ່ງໃນການເພີ່ມທະວີການຮ່ວມມືລະຫວ່າງສອງຝ່າຍ, ແທ່ນນີ້ຈະສະໜອງເງື່ອນໄຂທີ່ລະອຽດກວ່າເກົ່າ ໂດຍກົງກວ່າເກົ່າແລະສະດວກກວ່າເກົ່າໃຫ້ຈີນເພີ່ມທະວີການໄປມາຫາສູ່ກັນທາງເສດຖະກິດການຄ້າກັບປະເທດອາຊຽນ, ສະໜອງໂອກາດໃຫ້ວິສາຫະກິດຂອງຈີນແລະຂອງອາຊຽນໃນການຂະຫຍາຍການຮ່ວມມືທາງເສດຖະກິດ, ເຮັດໃຫ້ທັງສອງຝ່າຍໄດ້ຮັບຜົນດີໃນການຄ້າເສລີແລະເສດຖະກິດພາກພື້ນເຊື່ອມໂຍງເຂົ້າກັນ.
ໃນປີ 2005, ການສ້າງເຂດການຄ້າເສລີຈີນອາຊຽນຈະເລີ່ມດຳເນີນໄປຕາມເວລາກຳນົດ, ການລົງທຶນແລະການຮ່ວມມືລະຫວ່າງສອງຝ່າຍໃນຂົງເຂດຕ່າງໆກໍຈະຂະຫຍາຍຕົວອອກ. ຈີນຈະເຮັດຄືແຕ່ເກົ່າເມືອຫຼັງດ້ວຍທ່າທີອັນຈິງໃຈແລະຕິດແທດຕົວຈິງ, ພ້ອມກັນກັບປະເທດອາຊຽນກຳໂອກາດໃຫ້ດີ, ລົງເລິກການຮ່ວມມືທາງເສດຖະກິດການຄ້າ, ພ້ອມກັນສ້າງຄວາມຈະເລີນຮຸ່ງເຮືອງທົ່ວໄປຂອງພາກພື້ນແຫ່ງນີ້.
|
