|
|
 |
| (GMT+08:00)
2005-01-04 15:07:51
|
 |
|
ກອງກອບກູ້ສາກົນຈີນດຳເນີນການເຄື່ອນໄຫວກອບກູ້ຢູ່ປະເທດປະສົບໄພແຜ່ນດິນໄຫວແລະຄື້ນທະເລຊູນາມີ
cri
ຫຼັງຈາກເກີດແຜ່ນດິນໄຫວແລະຄື້ນທະເລຊູນາມີມະຫາສະໝຸດອິນເດຍມານີ້,ລັດຖະບານຈີນໄດ້ແຕ່ງກອງກອບກູ້ສາກົນ 3 ກອງໄປເຂດປະສົບໄພເປັນລຳດັບ.
ວັນທີ 31 ທັນວາປີ 2004,ສະມາຊິກກອງກອບກູ້ສາກົນຈີນງວດທຳອິດລວມ 35 ຄົນໄດ້ເດີນທາງໄປຮອດອິນໂດເນເຊຍ,ແລະໄປຮອດບັນດາອາເຊ ເຂດປະສົບໄພຮ້າຍແຮງທີ່ສຸດຂອງອິນໂດເນເຊຍໃນຕອນຂ້ອນແຈ້ງວັນທີ 1 ມັງກອນປີ2005,ດຳເນີນການເຄື່ອນໄຫວກອບກູ້ຢ່າງໄວວາ.ໃນເວລາໃຫ້ສຳພາດທາງໂທລະສັບ,ທ່ານເຈີງຊຽງເສີນ ຫົວໜ້າກອງກອບກູ້ເຜີຍໃຫ້ຮູ້ວ່າ,ປະຈຸບັນ,ພວກເຂົາເຈົ້າໄດ້ສ້າງໂຮງໝໍຊົ່ວຄາວຢູ່ກາງທົ່ງ,ເລີ່ມກອບກູ້ຜູ້ບາດເຈັບແຫ່ງນັ້ນ.ທ່ານເວົ້າວ່າ:
"ຢູ່ເຂດປະສົບໄພຮ້າຍແຮງທີ່ຢູ່ແຄມທະເລໃນແຫ່ງນັ້ນ,ມີໂຮງໝໍຫຼັງໜຶ່ງໄດ້ຖືກທຳລາຍຢ່າງເຖິງຖອງແລ້ວ,ແຕ່ຍັງມີມວນຊົນຫຼາຍໝື່ນຄົນຢູ່ອ້ອມຂ້າງ,ຂາດ ໝໍອິດຢາທີ່ສຸດ.ພວກຂ້າພະເຈົ້າຖືກແບ່ງເປັນ 3 ຈຸ,ຈຸໜຶ່ງແມ່ນເຈາະຈົງຊ່ອຍພວກເຂົາເຈົ້າຟື້ນຟູໂຮງໝໍຫຼັງນີ້; ອີກຈຸໜຶ່ງໄປສະໜາມບິນ,ເຊິ່ງເປັນບ່ອນຂົນສົ່ງຜູ້ບາດເຈັບຈຳນວນຫຼວງຫຼາຍ; ຈຸທີ 3 ແມ່ນເຝົ້າຢູ່ໂຮງໝໍຊົ່ວຄາວທີ່ພວກຂ້າພະເຈົ້າສ້າງຂຶ້ນເອົາເອງ."
ຕາມແນະນຳໃຫ້ຮູ້ວ່າ,ໂຮງໝໍຊົ່ວຄາວທີ່ກອງກູ້ໄພສາກົນຈີນສ້າງຂຶ້ນ,ສາມາດດຳເນີນວຽກງານປີ່ນປົວພະແນກພາຍນອກທົ່ວໄປແລະຜ່າຕັດພາຍນອກເປັນປະຈຳສ່ວນໜຶ່ງ.ກອງກອບກູ້ໄດ້ນຳເອົາເຄື່ອງຜ່າຕັດພາຍນອກ,ເຄື່ອງກວດກາຫົວໃຈເອເລັກໂຕຼນິກ,ເຄື່ອງສົ່ງເຊໂຣມແລະອຸປະກອນອື່ນໆ,ຢາຕ້ານເຊື້ອ,ຢາປົວບາດແຜແລະຢາແກ້ຮ້ອນລວມ 70 ກວ່າຊະນິດ.ຍ້ອນວ່າໂຮງໝໍຫຼັງນີ້ມໍ່ກັບບ່ອນຈັດວາງຜູ້ປະສົບໄພທີ່ໃຫຍ່ກວ່າໝູ່ໃນແຫ່ງນັ້ນ,ມື້ໃດກໍມີຜູ້ປະສົບໄພຫຼາຍຮ້ອຍຄົນພາກັນມາປີ່ນປົວຢູ່ແຫ່ງນີ້.ນອກຈາກການຊ່ອຍເຫຼືອກອບກູ້ທາງແພດແລ້ວ,ກອງກູ້ໄພສາກົນຈີນຍັງຮ່ວມມືກັບກອງກອບກູ້ສາກົນອື່ນໆຢ່າງຕັ້ງໜ້າ,ເປີດກວ້າງຂອບເຂດກອບກູ້ຊ່ອຍເຫຼືອ.
ວັນທີ 31 ທັນວາປີ 20043,ຜູ້ຊ່ຽວຊານ 5 ຄົນຂອງກອງກອບກູ້ປີ່ນປົວກອງທີສອງຂອງຈີນເດີນທາງໄປຮອດເຂດປະສົບໄພຮ້າຍແຮງຍ້ອນໄພແຜ່ນດິນໄຫວແລະຄື້ນທະເລຊູນາມີຢູ່ພາກໃຕ້ຂອງໄທ.ປະຈຸບັນ,ຜູ້ຊ່ຽວຊານເຫຼົ່ານີ້ໃຕ້ອຸນຫະພູມ 35 ອົງສາຢູ່ເຂດປະສົບໄພ,ເຮັດວຽກກວດກາDNAຂອງຜູ້ເສຍຊີວິດທີ່ບໍ່ຮູ້ຖານະ,ເພື່ອຊອກຮູ້ຖານະຂອງຜູ້ເສຍຊີວິດເຫຼົ່ານີ້ໂດຍໄວ.
ໃນຄ່ຳຄືນວັນທີ 2 ມັງກອນປີນີ້,ກອງກອບກູ້ປີ່ນປົວຈີນກອງທີ 3 ໄດ້ເດີນທາງໄປຮອດໂກລົມບີ ນະຄອນຫຼວງສີລັງກາ,ເມື່ອພັກຜ່ອນຈັດໜ້ອຍແລ້ວ,ກໍຂ້ຽວຄືນເດີນທາງໄປເຮັດວຽກຊ່ອຍເຫຼືອກູ້ໄພຢູ່ເຂດປະສົບໄພຮ້າຍແຮງຍ້ອນຄື້ນທະເລຊູນາມີທີ່ພາກໃຕ້ສີລັງກາ.ໃນເວລາແນະນຳໜ້າທີ່ຂອງພວກເຂົາເຈົ້າ,ທ່ານວັງປີງຊຽງ ຫົວໜ້າກອງກອບກູ້ແນະນຳວ່າ:
"ໜ້າທີ່ສຳຄັນຂອງພວກຂ້າພະເຈົ້າເທື່ອນີ້ແມ່ນ,ເຂົ້າຮ່ວມວຽກງານຊ່ອຍກອບກູ້ຜູ້ບາດເຈັບຢູ່ເຂດປະສົບໄພ,ນອກນີ້ຍັງຊ່ອຍເຫຼືອທ້ອງຖິ່ນນັ້ນດຳເນີນວຽກງານປ້ອງກັນພະຍາດລະບາດ."
ທ່ານວັງເວົ້າວ່າ,ກອງກອບກູ້ພວກເຂົາເຈົ້າກອງນີ້ມີສະມາຊິກ 14 ຄົນ,ປະກອບດ້ວຍຜູ້ຊ່ຽວຊານທາງດ້ານພະຍາດລະບາດ,ພະແນກກະດູກ,ພະແນກເອິກ,ພະແນກພາຍນອກຫົວ,ພະແນກພາຍໃນແລະພະຍາດຕັບເປັນຕົ້ນ,ຕ່າງໄດ້ມາຈາກອົງການປີ່ນປົວທີ່ມີຊື່ສຽງສອງຫຼັງຂອງນະຄອນປັກກິ່ງ,ໃນນັ້ນມີຫຼາຍຄົນຍັງເຄີຍເຂົ້າຮ່ວມວຽກງານກູ້ໄພນ້ຳນອງພາຍໃນປະເທດຈີນ,ມີບົດຮຽນອຸດົມສົມບູນໃນດ້ານກອບກູ້ແລະປີ່ນປົວຢູ່ເຂດປະສົບໄພ.
ທ່ານເກົາຊຽງ ຮອງລັດຖະມົນຕີປະຈຳການຂອງກະຊວງສາທາລະນະສຸກ ຈີນເວົ້າວ່າ,ຈີນຍັງຈະເພີ່ມຄວາມແຮງຕື່ມອີກເຂົ້າໃນການກອບກູ້ປີ່ນປົວຍ້ອນໄພແຜ່ນດິນໄຫວແລະຄື້ນທະເລຊູນາມີມະຫາສະໝຸດອິນເດຍ.ປະຈຸບັນ,ກະຊວງສາທາລະນະສຸກຈີນໄດ້ຈັດຕັ້ງກອງກອບກູ້ 10 ກອງລວມ 150 ຄົນຢູ່ແຫ່ງຕ່າງໆ,ພວກເຂົາເຈົ້າຈະໄປເຂດປະສົບໄພຕາມຄວາມຮຽກຮ້ອງຕ້ອງການຂອງປະເທດປະສົບໄພຢູ່ທຸກເວລາ.ທ່ານເວົ້າວ່າ:
"ພວກຂ້າພະເຈົ້າໄດ້ທຳການກະກຽມເປັນຢ່າງດີໃນແຫ່ງຕ່າງໆຂອງຈີນແລ້ວ,ພວກຂ້າພະເຈົ້າຈະແຕ່ງກອງປີ່ນປົວໄປເຂດປະສົບໄພຢ່າງທັນການຕາມຄວາມຮຽກຮ້ອງຕ້ອງການ,ດຳເນີນວຽກງານບໍລິການກອບກູ້ປີ່ນປົວ.
|
|
|
