|
ທີ່ນີ້ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ່ຟັງທີ່ໂຄລົບ, ແຜ່ນດິນໄຫວແລະຄື້ນທະເລຊູນາມີມະຫາສະໝຸດອິນເດຍໄດ້ຜ່ານໄປໜຶ່ງອາທິດແລ້ວ, ຄຽງຄູ່ກັບເວລາຜ່ານພົ້ນໄປ, ວຽກງານຊອກຫາຜູ່ລອດຕາຍຂອງປະເທດປະສົບໄພອາຊີໃຕ້ແລະອາຊີອາຄະເນມໍ່ຈະສິ້ນສຸດລົງແລ້ວ. ການປ້ອງກັນພະຍາດລະບາດໄດ້ກາຍເປັນວຽກງານສຳຄັນກວ່າໝູ່ໃນເຂດປະສົບໄພ.
ຕາມສະຖິຕິຫຼ້າສຸດທີ່ປະກາດໃນວັນທີ 3 ມັງກອນ, ມີ 1 ແສນ 4 ໝື່ນກວ່າຄົນໄດ້ເສຍຊີວິດໃນແຜ່ນດິນໄຫວແລະຄື້ນທະເລຊູນາມີມະຫາສະໝຸດອິນເດຍເທື່ອນີ້. ປະຈຸບັນ ຍອດຈຳນວນເງິນທີ່ປະຊາຄົມໂລກໃຫ້ຄຳໝັ້ນສັນຍາຈະສະໜອງໃຫ້ເຂດປະສົບໄພຂອງບັນດາປະເທດນັ້ນໄດ້ລື່ນກາຍ 2 ຕື້ໂດລາສະຫະລັດແລ້ວ. ຢູ່ບາງຕົວເມືອງທີ່ປະສົບໄພຮ້າຍແຮງຢູ່ແຂວງອາເຊແຫ່ງອິນໂດເນເຊຍ, ຜູ່ກອບກູ້ເລີ່ມແຈກຢາຍອາຫານ ນ້ຳກິນເປັນຕົ້ນໄປໃຫ້ຜູ່ປະສົບໄພ. ເນື່ອງຈາກແຜ່ນດິນໄຫວແລະຄື້ນທະເລຊູນາມີໄດ້ເກີດຂຶ້ນເປັນເວລາໜຶ່ງອາທິດແລ້ວ, ຜູ່ຊ່ຽວຊານກອບກູ້ເຫັນໂດຍທົ່ວໄປວ່າ, ຜູ່ຫາຍສາບສູນໃນຄື້ນທະເລຊູນາມີອາດຈະເປັນໄປບໍ່ໄດ້ທີ່ຈະຍັງມີຊີວິດລອດ, ວຽງານຊອກຫາຜູ່ລອດຕາຍຈະສິ້ນສຸດລົງ.
ໃນຂະນະດຽວກັນຜູ່ປະສົບໄພນັບເປັນພັນເປັນໝື່ນຄົນຂອງອິນໂດເນເຊຍ ອິນເດຍແລະສີລັງກາເປັນຕົ້ນພວມປະເຊີນໜ້າກັບສະພາບບໍ່ມີທີ່ຢູ່ເພີ່ງພາອາໄສ. ໃນຫຼາຍມື້ມານີ້, ປາຍແຜ່ນດິນໄຫວຢູ່ເຂດທະເລມໍ່ກັບເກາະຊູມັດທຼາແຫ່ງອິນໂດເນເຊຍຍັງມີຢູ່ບໍ່ຂາດ, ແຂວງອາເຊມີຝົນຕົກແຮງລຽນຕິດ, ຢູ່ພາກຕາເວັນອອກຂອງສີລັງກາກໍ່ມີຝົນຕົກແຮງທັງພາໃຫ້ເກີດນ້ຳຖ້ວມ, ໄດ້ທຳລາຍທີ່ຢູ່ອາໄສທີ່ກໍ່ຂຶ້ນຊົ່ວຄາວໃຫ້ຜູ່ປະສົບໄພ. ເນື່ອງຈາກທາງຫຼວງແລະສິ່ງກໍ່ສ້າງຄົມມະນາຄົມຖືກທຳລາຍຢ່າງໜັກໜ່ວງໃນຄື້ນທະເລຊູນາມີ, ໄດ້ຂັດຂວາງການຂົນສົ່ງວັດຖຸກອບກູ້, ວັດຖຸຊ່ອຍເຫຼືອເປັນຈຳນວນຫຼວງຫຼາຍຖືກກອງຢູ່ເດີ່ນຍົນແລະທ່າກ່ຳປັ່ນຕົ້ນຕໍ, ບໍ່ສາມາດສົ່ງໄປໃຫ້ຜູ່ປະສົບໄພໄດ້ຢ່າງທັນການ, ສະພາບການດຳລົງຊີວິດຂອງຜູ່ປະສົບໄພຂີ້ຮ້າຍທີ່ສຸດ. ວຽກງານກອບກູ້ໄດ້ປະເຊີນໜ້າກັບການທ້າທາຍຢ່າງຂ້ຽວຂາດ.
ໂດຍປະເຊີນໜ້າກັບສະພາບຄົນຕາຍແລະບາດເຈັບຢ່າງໜັກໜ່ວງໃນແຜ່ນດິນໄຫວແລະຄື້ນທະເລຊູນາມີ, ຍ້ອນຂາດເຂີນຜູ່ກອບກູ້ ຈຶ່ງບໍ່ໄດ້ຝັງຜູ່ປະສົບເຄາະຮ້າຍຢ່າງທັນການ ຊາກສົບເຫຼົ່ານັ້ນເນົ່າເໝັນ, ນ້ຳກິນກໍຖືກເຊື່ອມພິດ. ເຄື່ອງປະກອບການປິ່ນປົວຢູ່ເຂດປະສົບໄພຄືຢູ່ແຂວງອາເຊແຫ່ງອິນໂດເນເຊຍເປັນຕົ້ນຖືກທຳລາຍຢ່າງໜັກໜ່ວງໃນຄື້ນທະເລຊູນາມີ, ລະບົບການປິ່ນປົວຢູ່ບາງທ້ອງຖິ່ນໝູນເດີນບໍ່ໄດ້, ຂາດເຂີນຢຸກຢາ. ບາດແຜຂອງຜູ່ປະສົບໄພຈຳນວນໜຶ່ງບໍ່ໄດ້ຮັບການຊຳລະຢ່າງທັນການ, ອາການເຈັບອາດຈະໜັກເຂົ້າ.
ອົງການອະນາໄມໂລກ່າວວ່າ, ຢູ່ເຂດປະສົບໄພມີຄວາມອັນຕະລາຍທີ່ຈະເກີດໂຣກລະບາດຢ່າງຂະໜາດໃຫຍ່, ຕາບໃດໂຣກລະບາດແຜ່ລາມອອກຢູ່ເຂດປະສົບໄພຢ່າງກວ້າງຂວາງແລ້ວ, ຈຳນວນຄົນເສຍຊີວິດຍ້ອນໂຣກລະບາດອາດຈະລື່ນກາຍຈຳນວນຄົນເສຍຊີວິດໃນຄື້ນທະເລຊູນາມີກໍອາດເປັນໄປໄດ້.
ວັນທີ 1 ມັງກອນ, ເຈົ້າໜ້າທີ່ອົງການອະນາໄມໂລກເຜີຍໃຫ້ຮູ້ວ່າ, ຢູ່ຄ້າຍຜູ່ປະສົບໄພຂອງອິນເດຍແລະສີລັງກາທີ່ຖືກຄື້ນທະເລຊູນາມີກະໜ່ຳນັ້ນໄດ້ພົບເຫັນມີຄົນເປັນໂຣກທ້ອງບິດແລ້ວ, ການລາຍງານມີຜູ່ເປັນໂຣກທ້ອງບິດກໍ່ພວມເພີ່ມຂຶ້ນຢ່າງບໍ່ຂາດສາຍ. ນອກນີ້ ຕາມຂ່າວຈາກອິນໂດເນເຊຍ, ຢູ່ເຂດປະສົບໄພແຂວງອາເຊໄດ້ເລີ່ມພົບເຫັນມີຜູ່ປະສົບໄພເສຍຊີວິດໂດຍຕົ້ນຕໍແມ່ນຍ້ອນເປັນປອດອັກເສບແລະຜິວໜັງຊຶມເຊື້ອ. ອົງການອະນາໄມໂລກພວມໃຊ້ມາດຕະການດ່ວນດຳເນີນການປິ່ນປົວແລະແຈກຢາຍຢຸກຢາ, ປ້ອງກັນບໍ່ໃຫ້ໂຣກລະບາດແຜ່ລາມອອກ.
ເຖິງວ່າປະຈຸບັນຍັງບໍ່ມີວີແວວເກີດໂຣກຮ່າກໍ່ຕາມ, ແຕ່ອົງການທີ່ກ່ຽວຂ້ອງເຕືອນໃຫ້ບັນດາປະເທດປະສົບໄພຕ້ອງປ້ອງກັນຄວາມອັນຕະລາຍທີ່ຈະເກີດໂຣກລະບາດ, ໃຊ້ມາດຕະການປ້ອງກັນລ່ວງໜ້າ.
ສະພາບການໄພຂອງເຂດອາຊີໃຕ້ແລະອາຊີອາຄະເນໄດ້ຮັບຄວາມເອົາໃຈໃສ່ໃນລະດັບສູງຈາກປະຊາຄົມໂລກ, ເພື່ອຫາລືຍຸດທະສາດກູ້ໄພຢູ່ເຂດປະສົບໄພແຜ່ນດິນໄຫວແລະຄື້ນທະເລຊູນາມີ, ອາຊຽນຈະໄຂກອງປະຊຸມວິສາມັນຜູ່ນຳອາຊຽນກ່ຽວກັບບັນຫາຫຼັງໄພແຜ່ນດິນໄຫວແລະຄື້ນທະເລຊູນາມີຢູ່ຢາກາກຕາໃນວັນທີ 6 ມັງກອນ. ຜູ່ນຳແລະຜູ່ແທນຂອງປະເທດປະສົບໄພຄືອິນໂດເນເຊຍ ໄທ ສີລັງກາແລະອິນເດຍເປັນຕົ້ນແລະປະເທດບໍລິຈາກຄືຈີນ ອົສຕຼາລີແລະຍີ່ປຸ່ນເປັນຕົ້ນ ພ້ອມດ້ວຍຂອງອົງການຈັດຕັ້ງສາກົນທີ່ກ່ຽວຂ້ອງຈະເຂົ້າຮ່ວມກອງປະຊຸມຕາມຄຳເຊີນ, ຜູ່ແທນທີ່ຮ່ວມປະຊຸມຈະແລກປ່ຽນຄວາມເຫັນກ່ຽວກັບບັນຫາທີ່ປະຊາຄົມໂລກຊ່ອຍເຫຼືອປະເທດປະສົບໄພກູ້ໄພ ສ້າງສາຄືນໃໝ່ແລະເພີ່ມທະວີການຮ່ວມມືປ້ອງກັນໄພໃນພາກພື້ນເປັນຕົ້ນ.
ທ່ານຜູ່ຟັງທີ່ໂຄລົບທີ່ຟັງມານັ້ນ ແມ່ນບົດແຈ້ງຂ່າວສາກົນທີ່ພາດຫົວເລື່ອງວ່າ: ການປ້ອງກັນພະຍາດລະບາດໄດ້ກາຍເປັນວຽກງານສຳຄັນກວ່າໝູ່ໃນເຂດປະສົບໄພອາຊີ.
|
