|
ຕາມຂ່າວCRI: ວັນທີ 4 ມັງກອນ ຢູ່ທີ່ບາງກອກ, ທ່ານສຸລະກຽດ ສະຖຽນໄທ ລັດຖະມົນຕີການຕ່າງປະເທດໄທໄດ້ເຈລະຈາກັບທ່ານພໍແວວ ລັດຖະມົນຕີການຕ່າງປະເທດອາເມລິກາທີ່ໄປຢ້ຽມຢາມ, ສອງຝ່າຍໄດ້ແລກປ່ຽນຄວາມເຫັນກັນກ່ຽວກັບບັນຫາການສ້າງກົນໄກເຕືອນໄພພາກພື້ນ.
ໃນງານຖະແຫຼງຂ່າວທີ່ຈັດຂຶ້ນຫຼັງການເຈລະຈາ, ທ່ານພໍແວວກ່າວວ່າ, ລັດຖະບານອາເມລິກາໃຫ້ຄຳໝັ້ນສັນຍາວ່າຈະສະໜອງການຊ່ອຍເຫຼືອແກ່ປະເທດປະສົບໄພ. ທ່ານກ່າວວ່າ, ຈະແບ່ງປັນເງິນຊ່ອຍເຫຼືອທີ່ປະຊາຄົມໂລກສະໜອງໃຫ້ປະເທດປະສົບໄພແນວໃດແລະການວາງແຜນການສ້າງສາຄືນໃໝ່ໃນໄລຍະຍາວນານຫຼັງໄພພິບັດແມ່ນບັນຫາຕົ້ນຕໍທີ່ວຽກງານກູ້ໄພປະເຊີນໃນສະເພາະໜ້າ.
ທ່ານພໍແວວແມ່ນນຳພາຄະນະເດີນທາງໄປຮອດບາງກອກ ນະຄອນຫຼວງຂອງໄທໃນຕອນຄ່ຳວັນທີ 3 ມັງກອນ. ຫຼັງຈາກນັ້ນ ທ່ານຍັງຈະໄປຢ້ຽມຢາມອິນໂດເນເຊຍແລະສີລັງກາ, ແລະຈະເຂົ້າຮ່ວມກອງປະຊຸມສາກົນກ່ຽວກັບການສ້າງສາຄືນໃໝ່ຫຼັງໄພແຜ່ນດິນໄຫວແລະຄື້ນທະເລຊູນາມີທີ່ຈະຈັດຂຶ້ນຢູ່ຢາກາກຕາໃນວັນທີ 6 ມັງກອນ.
|
